Athu 8 Koovulumuwa

Nowa na banja lae, koovolowa mu ingalawa limo-i na vinyama. Yehova oo-eya isewo teto zongwe oowambeela rumbwa. Ali zongwe oinjiva moi ingalawele yoowambeela enda vadimu va ma-inje. Vanduli viwa, ma-inje koozaala va ilambo yetene. Athu otakala anayo katavolowile mu ingalaweyo, kookhwa. Koma Nowa na banja lae koovulumuwa. Vyevi vinotonyi-eda ira aluwa koosangalala vinjinji chifukwa yoiziwa ira koomuvwela Yehova.

Zongweyo oorumbwa wa malambo 40, tana na ma-iyu. Vanduli viwa oo-iya moi ma-inje koowambeela weleela. Moi ingalaweyo, yooimela vamwango. Koma va ilambwela vali vangalive ma-inje anjinji eno Nowa na banja laelo kookalave mu ingalaweyo.

Ma-injayo koowambeela weleela vang’ono na vang’ono. Nowa na banja laelo kookala mu ingalaweyo kwaranya wa chaka imo-i. Vanduli viwa Yehova oowawandela ira kakume moi vyali ngati kanavolowa muilambo isha. Aluwa koomuyamikela vinjinji Yehova chifukwa yowavulumucha, moi koopeleka sembe.

Yehova oosangalala vinjinji na sembeyo. Liye oolonjeza ira kanaza a-indi-eda teto chito nawili igumula voononga vyongo va ilambwela. Vofuna simikizela vyevi, oopangi-a ira udimu uoneele zirilimbo. Kodi nyo muwambeela onavo zirilimbo?

Vanduli viwa Yehova oomuwandela Nowa na banja lae ira kakaena a-ima nozaala va ilambo yavati.