Aisaraeli Katapangile Vyevyo Kalonjezileathu

Yehova oomuwandela Mose ira: ‘Uze umwango uno. Ndinoza ndilembe malamulwanga nouva-a.’ Mose oodowa umwangowo moi ookala wewo malambo 40. Angali wewo, Yehova oolemba malamulo 10 va mabwe men’li nomuva-a.

Vangavirile thawi, Aisaraeli koowambeela ganiza ira Mose uwatawa. Eno koomuwandela Aroni ira: ‘Ninafuna sogoleli m’mo-iwa. Nipangele mulungu.’ Aroni oowawandela ira: ‘Ndiva-eni golidinyu.’ Eno oo-indi-eda chito golideyo nopanga fano la mwana wa ng’ombe. Vingaireile eno, Aisaraelayo koonga ira: ‘Ula ngu Mulungu unoyo anivulumuchile wu Iguputo.’ Koowambeela lambela fano la mwana wa ng’ombeyo moi koopanga mwambo otonyi-eda sangalala. Va koolakwa vinjinji. Aluwa koolonjeza ira kanerenga lambela Yehova eka koma kai vyevyo kapangaathu.

Yehova oona vyevyo vyaireyavi moi oomuwandela Mose ira: ‘Dowa waone vyevyo athwale kanapangaathu. Koo-iya ndivwela teto kanalambela mulungu onama.’ Mose oomaruwa, wu angatukulile mabwe men’lale.

Angaandamele fiya, oovwa athu kaimbanga. Vanduli viwa oowaona kainanga koma teto kokorela mwana wa ng’ombe. Mose oolunduwa vinjinji. Oovoka vati mabwe men’lale moi kootweeya. Thawi ineyo ootumeya fanolo nolichilachila. Vanduli viwa oomufuka Aroni ira: ‘Koma weyo vyoona oowavwela athwala nopanga vyongo vyotakala eni?’ Aroni oosomeda ira: ‘Pepani kamundilunduwele. Munoiziwa pama mwemo athwala kaliliathu. Aluwa kafuna mulungu eno ndakede landa golide no-ela vamulo, nopanga ng’ombela.’ Koma Aroni kaafuneya panga vyevi. Mose oowelelawo nawili umwango ule dowa muvepa Yehova ira aakululukele athwayo.

Yehova ookululukela athu etene anayo kalapile nowambela nawili mulambela. Moi Aisaraeli kafuneya vwela vyongo vyetene vyevyo Mose aawandela liye.