Ihema Yolambelelamo

Mose angali m’Mwango wa Sinai, Yehova oomuwandela ira apange tenti yavadela yolambelelamo teto kairomola ira ihema.

Yehova oomuwandela Mose ira: ‘Awandele athu ira kauva-e vyongo vyevyo kanakwakwani-eathu ira upangele ihema.’ Aisaraeli koopeleka golide, siliva, mkuwa, mabwe atengo wavadimu koma teto vyovirii-edela. Koopeleka teto maoya a khosa, nguwo, vikopa vya nyama koma teto vyongo vimo-i. Athwayo koopeleka vyongo vinjinji mpakana Mose oowawandela ira: ‘Ba-i vikwakwana. Kamuzena teto vyongo vimo-i.’

Mose oo-indi-eda chito vyongo vyevi vopanga ihema. Aisaraeli koo-indi-eda chito ihema inela volambelelamo Mulungu moi kaipangile mundila yoi kakwakwani-enga itukula voenda.

Alombwana na a-iyana anjinji aluso koo-indana chito yopanga ihemela. Yehova oowava-a zelu dowakami-a vo-inda chito inela. Amo-i koopanga nguwo koma teto virii-eda. Vookala teto amo-iwa anayo kapanga vyongo vo-indi-eda chito mabwe, golide kapena mitengo.

Athwayo koopanga ihema vo-arela malangizo anayo Yehova aava-ile liye. Koopanga nguwo yoriya ineyo ya-iyani-a Malo Owela na Malo Owela Vinjinji. M’Malo Owela Vinjinji mookala bokosi lelo laromoliwa ira likasa la pangano. Bokosili loopangiwa na golide koma teto matabwa a tengo wapama vinjinji. Malo Owela mookala yo-elavo nyale yagolide, tebulo na malo alukulu opelekelavo sembe. Teto vatando la ihema vookala beseni na malo amo-i teto opelekelavo sembe dotumeya.

Aisaraeli koomari-a panga ihemela vangakede vira chaka imo-i kumela vevo kakumileathu wu Iguputo. Va sopano kookaana malo olambelela Yehova. Likasa la pangano loowaumbucha Aisaraeli ira koolonjeza ira kanerenga muvwela Yehova. Kodi munoiziwa ira pangano chin’ni? Tilonjezo lavadela lelo athu kanawandelanaathu.

Yehova oomusakula Aroni na a-imae aalombwana ira ka-indenga chito uihema nopelekanga sembe. Aroni eka unoyo ali ndimuwa wasembe, ngunoyo aloliwa ira avolowenga m’Malo Owela Vinjinji. Liye oopanga vyevi ndila imo-i chaka iliyetene vopeleka sembe ya machimwae, a banja lae koma teto a Aisaraeli etene. Ulemelelo wa Yehova oozala mu ihemeyo teto murambo ookala vadimu viwa. Murambo wakala vadimu va ihema Aisaraeli kookalave vamalwayo. Koma muramboyo wavenyavo, kooiziwa ira kanafuneya maruwa. Eno koopwasula ihemele nowambeela arela muramboyo moi koodowa manga vamalo amo-iwa.