Yehova Oomulezela Murima Yona

Athu amunzinda wa Nineve, koopanga vyongo vyotakala. Eno Yehova oomuwandela namaongela Yona ira adowe aachenjeze ira ka-iye vyotakalavyo. Koma Yona ootawa moi oogwela sitima yavanyanja yodowa wu Tarisi.

Angali vaulendola, vanyanja voowambeela lipevo lakopolo moi oendi-a sitima koova vinjinji. Aluwa koopempela wa milungu diwa nofukanga ira: ‘Kodi vyevi vinaireya chifukwa n’ni?’ Vanduli viwa Yona oowawandela ira: ‘Athu nyo, ulakwi-ile ngu miyo. Yehova oondiwandela ira ndipange vimo-i viwa vyene eni ndinaataawa. Mundivokede munyanjamu moi lipevoli lino-iya.’ Oendi-a sitimeyo katafuna muvokeda m’ma-inje koma Yona oowakanyi-eda ira kamuvokedemo. Vanduli viwa koomuvokedamo moi lipevolo looimela.

Yona akeda ganiza ira unokhwa ba-i. Vevo abwina liye, oowambeela pempela wa Yehova. Vyangaireile eno, Yehova ootumiza somba ilukulu ineyo yamumidile Yona. Komave liye kaakhwile. Angali m’mbani mwa sombeyo, oopempela teto ira: ‘Yehova, ndinoulonjezani ira ndinerenga vwela iliyetene ineyo munandiwandele nyo.’ Yona ookala m’mbani mwa sombeyo wa malambo maralu moi vanduli viwa yoodowa muraveya vakumani.

Yona angavulumuwile, Yehova oomuwandela teto nawili ira adowe wu Nineve. Ulendo unola Yona kakoondile. Angafiile wewo oowawandela athu otakalayo ira: ‘Ukede ala malambo 40 moi mzinda wa Nineve unoonongiwa.’ Athu awu Nineve kangavwile uthengoyo koochenja. Mwene ya wewo yoolamula ira: ‘Tiyemoni nipempele wa Mulungu teto ni-iye panga vyotakala. Mwina kananiononga.’ Yehova angaonile ira athwayo koolapa, kaonongile mzindoyo.

Vi kai vyevyo Yona adedi-eda liye eno oolunduwa vinjinji. Kakedani ganizela, Yehova oomulezela murima Yona koma teto mupangela chifundo, koma liye kaafuna apangela chifundo athu awu Nineve. Yona ookuma muzindoyo dowa garati vati vatengo. Vanduli viwa tengoyo oouma moi Yona oolunduwa teto nawili. Eno Yehova oomufuka ira: ‘Kodi unavwela chisoni tengola koma kunafuna vwela chisoni athu awu Nineve? Miyo-i ndiapangela chifundo moi kandiaonongile.’ Kodi Yehova atapulela n’ni veva? Atapulela ira athu awu Nineve kali ofuneya kwaranya tengo uliwetene.