Yosiya Oomeliwana Ilamulo ya Mulungu

Yosiya oowambeela lamulela wu Yuda angan’na chaka 8. Vathawi ineyo, athu anjinji koomeliwana vyamasenga koma teto koolambela mafano. Yosiya angakwakwani-ile chaka 16 ooesaesa funjeda vya Yehova ira amulambelenga mofwanelela. Angakwakwani-ile chaka 20 oowambeela phwanya mafano nogumula malo etene anayo athu kapelekelavoathu sembe da mafano. Moi angakwakwani-ile chaka 26 oopanga vyoi kachisi asakaediwe.

Vosakaeda kachisiyo, ndimuwa wa asembe zina lae Hilikiya oofwanya mpukutu wa Ilamulo ya Yehova. Ninokoza onga ira unola wali mpukutu unoyo Mose alembile liye. Eno wo-arela wa mwene, zina lae Safani oolanda mpukutuyo dowana wa Yosiya nowambeela muwelengela mogweli-a mawu. Yosiya angavwile vyevyo vyali mu mpukutuyo, oozindikila ira athu koo-iya muvwela Yehova wa chaka dinjinji. Vanduli viwa oomuwandela Hilikiya ira: ‘Yehova unilunduwela vinjinji. Dowani mwaonge na liye ira aniwandele vyofwanelela panga.’ Yehova oosomeda vomu-indi-eda chito namaongela wa-iyana zina lae Hulida voonga ira: ‘Ayuda koo-iya arela malamulwanga. Ndinowalanga. Koma kandinapanga vyevi vevo Yosiya unalamulela liye chifukwa uviyevi-a.’

Yosiya angavwile vyevi oodowa wu kachisi nowaitani-a Ayuda etene moi oowawelengela Ilamulo ya Yehova. Etene koolonjeza ira ninowambeela muvwela Yehova na murima wetene.

Ayudayo kali kanga-iile panga Pasika wa chaka dinjinji. Koma Yosiya oovwa mu Ilamulweyo ira aluwa kanafuneela panganga Pasika chaka iliyetene. Eno oowawandela Ayudayo ira: ‘Tiyemoni nimupangele Yehova Pasika.’ Yosiya oopanga vyoi vapelekiwe sembe dinjinji koma teto ira vakale athu oimba vakachisi. Ayudayo koopanga Pasika moi vanduli viwa koopanga Ikondwelelo ya Mikate Dookana Yofufumi-a wa malambo 7. Kumela vevo Samueli akhwile liye aluwa kali kaanapangevo Pasika ngati unola. Vi vinakeda tonyi-eda ira Yosiya oomeliwa vinjinji Ilamulo ya Yehova. Kodi nyo munosangalala funjeda Ilamulo ya Yehova?