Kalata Yokumela wu Bungwe Lolamulela

Oomeliwa Abali na Arongoli-u:

Voi ninolambela Yehova, ninoliomeliwana vinjinji Baibulo chifukwa mba Mawae. Ninoiziwa ira khani diwa tidolondola koma teto makundwiwa mbokami-a. Ninoiziwa teto ira Yehova univa-a Baibulo chifukwa yoi unoniomeliwana. (Salimo 119:105; Luka 1:3; 1 Yohani 4:19) Ninofunechecha teto kami-a amo-iwa ira kaiziwe makundo a choonadi anayo kali m’Mawu a Mulungu. Eno nili osangalala kumi-a bukuli la muru oyi, “Vyevyo Ninafunjede Iyo Mukhani da M’Baibulo.” Eno ninafuna nikede fotokozawo vang’ono vyokuza bukuli.

Bukuli nililemba na yolinga yoi likami-e a-ima. Koma ngakale vili eno, tilokami-a teto wa athu anayo kanafuna liiziwa pama Baibulo. Voi Baibulo tibuku la uliwetene, funjeda khani da m’bukuli unonikami-a ira nikalenga osangalala.

Bukuli linofotokoza khani da m’Baibulo ambeela vevo athu kalengiweathu. Niesaesa fotokoza khanidi mundila yo-orucha vwechecha koma teto mo-arela thawi ineyo vyongovyo vyaireileathu.

Koma bukuli, kalinakeda fotokoza khani da m’Baibulo. Nilemba khanidi koma teto sakaeda vithuzi viwa mundila yoi muthu awelenganga akalenga ngati unaaona vyevyo vyaireya koma teto vwa ngati mwemo athwayo kavwelaathu.

Bukuli linonikami-a ona ira Baibulo linofotokoza vya athu anayo kamuvwele Yehova na anayo katamuvwele. Teto linonikami-a ona vyevyo ninafunjede iyo wa athwayo. (Aroma 15:4; 1 Akorinto 10:6) Bukuli likaana vigawo 14. Umaabeelelo wa igawo iliyetene ukala mawu ofotokoza vyevyo ninafunjede iyo mu igaweyo.

Akala muli likholo, muwelengenga na a-iminyu muru uliwetene nokambilana vithuzi viwa. Vanduli viwa muwelengenga teto limo-i mavesi a m’Baibulo anayo vakumele khaniyo. Era eno mukami-enga a-imayo ona gwilizana wewo ulivo vaari va vyevyo muwelengile nyo m’Baibulo na vyevyo mufunjedile nyo mukhaniyo. Ndila inela inokoza kami-a teto akala munakambilana na muthu wausinkhu unoyo unafuna liiziwa pama Baibulo.

Kaninakaikela ira bukuli linokami-a a-ima na adimuwene ira kafunjede makundo a m’Mawu a Mulungu nowa-indi-edanga chito va moywiwa. Vi vinokami-a ira naaliwene kakale m’banja la Mulungu, nomulambelanga.