MURU 08

Yehova Unokoza Kala Fwinyu

Yodindiwa

Yehova unafuna ira mumuiziwe pama. Chifukwa n’ni? Unoona ira mwaiziwa pama makalelwae, ndila dae na yolingae munerenge funechecha ira mukale fwae. Koma kodi pivyowandeya kala fwae wa Mulungu? (Welengani Salimo 25:14.) Kodi nyo munapange avi ira mukale fwae wa Mulungu? Baibulo linosomeda vyofuka vyevi teto linotonyi-eda ira kala fwae wa Yehova kofuneya vinjinji kwaranya gwilizana na muthu uliwetene.

1. Kodi Yehova unafuna ira nyo muire n’ni?

Baibulo linaonga ira “Andamelani Mulungu, teto liye unoza auwandameleni.” (Yakobo 4:8) Kodi mawu anala kanatapulela n’ni? Yehova unauvepani ira mukale fwae. Athu amo-iwa kanaona ira kai vyowandeya gwilizana na muthu woi katinawande muona. Eeno kanaganiza ira Mulungu kanakale fwiwa. M’Baibulo, Yehova unosambaula vyetene vyonikami-a ira niiziwe makalelwae. Liye unopanga vyevi na yolinga yoi nikale afwae. Nawelenganga uthenga unoyo Yehova univa-ile liye m’Baibulo usamwali-u na liye unolimba vinjinji ngakale ira kaninamuonevo.

2. Chifukwa n’ni ninaonge ira Yehova unokoza kala Fwinyu wapama kwaranya muthu uliwetene?

Ninaonga eeno chifukwa yoi Yehova unouwomeliwanani vinjinji kwaranya muthu uliwetene. Liye unofuna ira musangalalenga koma teto mupempelenga wa liye thawi detene mwagumana na mavuto. Baibulo linaonga ira mumurulelenga “khawa ndinyu detene, voi unoukumbanyelani.” (1 Petulo 5:7) Yehova uli wokozeya kami-a, miyali-a koma teto vuruwana afwae kaonganga. — Welengani Salimo 94:18, 19.

3. Kodi Yehova unafuna ira afwae kapangenga n’ni?

Pivyoona ira Yehova unowomeliwana athu etene, koma unoomeliwana vinjinji “athu oongowa murima.” (Miyambo 3:32) Yehova unafuna ira afwae kaesaesenga panga vyongo vyevyo liye unavionaliye ira pivyapama, nopewanga vyongo vyevyo liye unaviona liye ira pivyotakala. Athu amo-iwa kanaona ira katinakwakwani-e panga vyongo vyetene vyevyo Yehova unafuna liye koma teto pewelaatu vyotakala vyetene. Koma Yehova ngu Mulungu wachifundo. Liye unowachela uliwetene unoyo unamuomeliwana liye na murima wetene koma teto anayo kanaesaesa panga vyongo vyomusangalasa. — Salimo 147:11; Vyoira 10:34, 35.

FUNJEDANI VYOWENJEDELEYA

Onani vimo-i viwa vyevyo munapange nyo ira Yehova akale fwinyu koma teto chifukwa iwa unakale fwinyu wapama vinjinji kwaranya muthu uliwetene.

4. Abulahamu ali fwae wa Yehova

Khani ya m’Baibulo yokuza Abulahamu (unoyo teto aromoliwa ira Abulamu) inonikami-a iziwa mwemo vinakalelaathu muthu akala fwae wa Mulungu. Welengani khani ya Abulahamu va Genesesi 12:1-4. Era eeno tapanyani vyofuka vyo-arelavi:

Kodi Yehova amuvepile Abulahamu ira apange n’ni?
Kodi Yehova amulonjezile n’ni?
Kodi Abulahamu apangile n’ni angavwile malangizo a Yehova?

5. Vyevyo Yehova unafuna liye ira afwae kapangenga

Thawi dinjinji ninofuna ira afwi-u kapangenga vyongo vimo-i viwa vyene.

Kodi nyo munafuna ira afwinyu kauirelengani vyongo vyiivi?

Welengani 1 Yohani 5:3, era eeno tapanyani yofuka yo-arelela:

Kodi Yehova unafuna ira afwae kapangenga n’ni?

Ira nivwele Yehova, thawi ndimo-i ninafuneela chenja makalelwi-u. Welengani Yesaya 48:17, 18, era eeno tapanyani yofuka yo-arelela:

Chifukwa n’ni Yehova unafuna ira afwae kachenje vyongo vimo-i?

Malimba inda chito ya vyomangamanga unamuva-a fwae wavachito chapewa yovitetezela. — Fwi-u wapama unoniumbucha vyongo vyevyo vinaniteteze koma teto nikami-a. Yehova unopanga chimozimozi wa afwae

6. Vyevyo Yehova unapangela liye afwae

Yehova unokami-a afwae vilela mavuto. Onelani VIDIYO, era eeno tapanyani yofuka yo-arelela.

VIDIYO: Yehova Undiirela Vyongo Vinjinji (3:20)

Muvidiywela, kodi Yehova amukami-ile avi mu-iyana m’mo-iwa limbana na maganizo otakala?

Welengani Yesaya 41:10, 13, era eeno tapanyani vyofuka vyo-arelavi:

Kodi Yehova ulonjezile ira unaza aapangele n’ni afwae etene?
Kodi munaganiza ira Yehova unokoza kala Fwinyu wapama? Chifukwa n’ni munaonga eeno?

Vithuzithuzi: Athu anayo kali vausamwali kanokami-edana m’mo-i na fwae. 1. Muthu mo-iwa unamukami-eda fwae tami-a tebulo. 2. Mu-iyana unamuwandela fwae vya m’murimani. 3. Mulombwana unamukami-a fwae ira aende. — Afwinyu avamurima kanoukami-ani mwafuneela likami-edo. Naliyene teto Yehova unoza aukami-eni

7. Ira Yehova akale fwi-u, ninafuneela ongi-ananga na liye

Ongi-ana unolimbi-a usamwali-u na Yehova. Welengani Salimo 86:6, 11, era eeno tapanyani vyofuka vyo-arelavi:

Kodi ninawande avi ongi-ana na Yehova?
Kodi Yehova unaonga avi na iyo?

Vithuzithuzi: 1. Mu-iyana unaapempela. Seta ili vamuru vae itonyanga udimu. 2. Mu-iyana unawelenga Baibulo. Seta ili vamuru vae itonyanga vati. — Iyo ninoonga na Yehova zela mupempelo; liye unoonga na iyo zela m’Baibulo

ATHU AMO-IWA KANAONGA IRA: “Kai vyowandeya kala fwae wa Mulungu.”

Kodi muna-indi-ede chito lemba liivi votonyi-eda ira pivyowandeya kala fwae wa Yehova?

VYEVYO NIFUNJEDILE IYO

Yehova unafuna ira mukale Fwae, teto liye unokoza ukami-ani panga vyevi.

Vyofuka Vyoweli-eda

Kodi Yehova unakami-a avi afwae?
Chifukwa n’ni Yehova unawandela afwae ira kachenjenga vyongo vimo-i?
Kodi nyo munaganiza ira Yehova unafuna ira afwae kapangenga vyongo vyevyo vili vyorucha vikwakwani-a? Chifukwa n’ni munaonga eeno?

Dambo lelo nimari-ile iyo funjeda murula:

Yolinga

Wandelani fwinyu yongo imo-iwa ineyo mufunjedile nyo yokuza Yehova.

Vimo-i:

Your other goal

ONANI VIMO-I

Kodi kala fwae wa Mulungu unaukami-eni avi?

“Yehova Ndiye Mulungu Wofunika Kum’dziwa” (Nsanja ya Olonda, February 15, 2003)

Onani vyevyo munapange nyo ira Mulungu akale fwinyu.

“Kodi Ndingatani Kuti Ndikhale Paubwenzi ndi Mulungu?” (Mayankho a Zimene Achinyamata Amafunsa, Buku Lanambili, muru 35)

Onani vyevyo vyapangi-ile muzimai m’mo-iwa onga ira kala vausamwali na Yehova oovulumucha moywae.

“Sindinkafuna Kufa!” (Nsanja ya Olonda Na. 1 2017)

Vuruwanani vevo azombwe kanasambaulaathu mwemo munamuonelaathu Yehova.

Kodi Kukhala Bwenzi la Mulungu Kumatanthauza Chiyani? (1:46)