MURU 10

Kodi Misonkano da Mboni da Yehova Dinaukami-eni Avi?

Yodindiwa

Kodi muwambeela itaniwavo umisonkano da Mboni da Yehova? Akala ira kamunaambeele dowawo, mwina munokoza ovanga mwaganizela vyodowao. Mwina nyo munovifuka ira: ‘Kodi vamisonkano dedi vanaireya vyoi avi? Chifukwa n’ni dili dofuneya? Nanga chifukwa n’ni ndinafuneela dowa fwanyeavo?’ M’murula, munoona mwemo misonkano dinaukami-edeleniathu vamoywinyu koma teto mwemo dinaukami-edeleniathu ira mukale fwae wa Mulungu.

1. Chifukwa n’ni ninafuneela sonkana?

Wolemba Baibulo m’mo-iwa ootonyi-eda ira sonkana kofuneya vinjinji. Liye eere: “Vamisonkano, ndinoza ndimutamande Yehova.” (Salimo 26:12) Naaliwene teto a Mboni da Yehova kanosangalala na misonkano. Vailambo yetene yavati, aliwa kanosonkana mulungu uliwetene ira katamande Mulungu, imba nyimbo koma teto pempela. Thawi dimo-i vachaka, aliwa kanolambela Mulungu vamisonkano dilukulu.

2. Kodi munaza mufunjeda n’ni vamisonkano di-u?

Vamisonkano, ninokambilana vinjinji Mawu a Mulungu, asambaula “novwei-a tapulela uwa.” (Welengani Nehemiya 8:8.) Mwaza mufwanyeya vamisonkano, munoza mufunjede vya Yehova koma teto makalelwae apama. Mwafunjeda vyongo vinjinji vyotonyi-eda ira Yehova unouomeliwanani, nanyen’ne teto munoza muwambeele muomeliwana. Munoza mufunjede teto mwemo Mulungu munaukami-edeleni liye ira mukale osangalala. — Yesaya 48:17, 18.

3. Kodi athu anayo munagumanena nyo vamisonkano di-u kanaukami-eni avi?

Yehova unaniwandela ira “niganizelane ira nilimbikisane va chikondi na chito dapama. Kani-iye sonkana vamo-i.” (Aheberi 10:24, 25) Vamisonkano di-u, munoza mugumane na athu anayo kanatonyi-edana chikondi vinjinji mofwanafwana na nyo, kanofuna funjeda vinjinji vyokuza Mulungu. Munoza muvwe athu kakambilananga makundo olimbikisa okumela m’Baibulo. (Welengani Aroma 1:11, 12.) Enjedela vevo munoza teto muwalede na athu amo-iwa anayo kakwakwani-ile limbana na mavuto anayo athu avabanja koma teto anayo ka-ali vabanja kanagumananaathu. Va nikede ona vyongo vyoyeva ba-i vyevyo Yehova unaniwandela liye ira nisonkanenga thawi detene.

FUNJEDANI VYOWENJEDELEYA

Onani mwemo misonkano da Mboni da Yehova munairelaathu koma teto chifukwa iwa ninafuneela esaesa fwanyeyavo.

4. Misonkano da Mboni da Yehova

Muthawi ya anamarumiwa, Akiristu koosonkana thawi detene ira kalambele Yehova. (Aroma 16:3-5) Welengani Akolose 3:16, era eeno tapanyani yofuka yo-arelela:

Kodi Akiristu owambeela kalambela avi Yehova?

Malambwano, a Mboni da Yehova teto kanosonkana thawi detene. Ira muiziwe mwemo kanairelaathu misonkano diwa, onelani VIDIYO. Yamala, onani ithuzithuzi yotonyi-eda mwemo misonkano dinaireelaathu, era eeno tapanyani vyofuka vyo-arelavi.

VIDIYO: Inaireya Chin’ni Unyumba ya Umwene? (2:12)

Kod vyevyo vinaireya va Nyumba ya Umwene vinafwanafwana avi na vyevyo muwelengile nyo va Akolose 3:16?
Muvidiywela kapena vaithuzithuzi, pivyongo vyiivi vyokuza misonkano vyevyo viusangalasileni?

Welengani 2 Akorinto 9:7, era eeno tapanyani yofuka yo-arelela:

Chifukwa n’ni a Mboni da Yehova katinapeleki-a ndalama umisonkano diwa?

Limo-i na malimba ufunji-ani, onani dimo-i mwa khani dedo dinakambiwe vamisonkano da mulungu ula.

Chikhani iivi vasonkanola ineyo iusangalasileni kapena ineyo munaona nyo ira inokoza ukami-ani vinjinji?

Nanga munoiziwa?

Vasaiti ya jw.org, munokoza fwanya malo anayo misonkano dinaireelaathu koma teto thawi ineyo dinairelangaathu vailambo yetene.

Vithuzithuzi: Vyoireya vya va Nyumba ya Umwene, Misonkano diireyanga Misonkano daanaambeele, koma teto dangamalile. Vyoireyavi vinoweli-ediwa muvithuzithuzi A mpakana D.

A. Upulatifomu wa Nyumba ya Umwene, m’bali unakamba khani yokumela m’Baibulo vathawi yamisonkano.

Vamisonkano di-u vanokala khani, visazo na mavidiyo. Misonkano dinowambeela koma teto gomi-eda na nyimbo na pempelo
Vambali dimo-i damisonkano athu kanokala na mwai opeleka ndemanga
Uliwetene ngowacheliwa— mabanja, athu anayo ka-ali vabanja, andimuwa koma teto a-ima
Misonkano di-u kaninaliveli-a. A Mboni da Yehova katinaliveli-a vovolowa koma teto katinaendi-a mbale ya vyopeleka

5. Munafuneela vilimbi-eda ira mufwanyeyenga vamisonkano

Kaganizelani isazo ya banja la Yesu. Ira kafwanyeye vamisonkano vachaka aliwa kafuneela enda ulendo wa makiromita 100, mundila ineyo yavira m’mimwango kumela wu Nazareti dowa fiya wu Yelusalemu. Welengani Luka 2:39-42, era eeno tapanyani vyofuka vyo-arelavi:

Kodi munaganiza ira vafuneela vilimbi-eda ira kaende uledo wodowa wu Yelusalemula?
Chifukwa n’ni munafuneela vilimbi-eda ira mufwanyeye vamisonkano?
Kodi munaganiza ira vilimbi-eda moi eeni kokami-a? Chifukwa n’ni munaonga eeno?

Vithuzithuzi: Yosefe na Mariya kanokozeela ira kayende ulendo. 1. Yosefe una-ela matumba va bulu, teto Mariya unakoza vyodja. 2. Mapu otonyi-eda ndila yokumela wu Nazareti dowa wu Yelusalemu.

Baibulo linaonga ira sonkana kofuneya vinjinji. Welengani Aheberi 10:24, 25, era eeno tapanyani yofuka yo-arelela:

Chifukwa n’ni ninafuneela sonkana thawi detene?

ATHU AMO-IWA KANAONGA IRA: “Sonkana na athu amo-i kai ofuneya vinjinji. Funjeda Baibulo vaweka kokwakwanela.”

Romolani lemba kapena isazo ya m’Baibulo ineyo inanikami-a iziwa vyevyo Yehova unafuna liye?

VYEVYO NIFUNJEDILE IYO

Fwanyeya vamisonkano unoukami-ani ira mufunjede vinjinji vyokuza Yehova, mumuomeliwengana vinjinji monga fwinyu wa vamurimani koma teto ira mumulambelenga limo-i na athu amo-iwa.