Makundo Okami-a Ira Mugumano Wokozeela Chito Yolaleela Ukalenga Wapama

Mofwanafwana na mwemo munakalelaathu na migumano detene da pingo, migumano dokozeela chito yolaleela chi yova-iwa yokumela wa Yehova teto dinoniva-a ngari yoi nilimbi-ane va zivelo na chito dapama (Aheb 10:24, 25) Migumanodi dinafuneya ira diireyenge wa maminisi 5 dowa maminisi 7, moi tawi yenela yamalanga, athu kakale kangawandeliwe muthu onoyo unafunaathu wendana, wu gawo wewo unafunaathu dowa laleela koma teto livepelo likale langapangiwe. (Akala mugumanola unaireya vanduli va migumano da pingo, unafuneela kala wokwiiva kwaranyeda veva.) Wopangi-a mugumanola unafuneya akozeele pama vyongo vyevyo vinakami-ede athu anayo kanadowe molaleela va dambo lelo. Mofwanafwani-a, akala ira ti looluka vevo athu anjinji kazile va mugumanola mboyi katidowile molaleela wa mulungu wetene, vinokala pama keda tapanya vyevyo munaonge nyo volaleela. Kodi ti myasa dimo-i diivi dedo dinatapanye iyo va mugumanola?

• Isazo ya vyevyo vinaonge iyo yofwanyeya mu Isibukhu ya Migumano — ya Chitwi-u Yolaleela na Ingumi-u ya Ikiristu

• Mwemo muna-indi-ede iyo chito vyoireya vya chineneeva vowambeela tapanya na athu

• Tonyi-edani mwemo munasomedele nyo muthu onoyo uwongile vyongo vyevyo athu amutatamwinyu vinawongechaathu akala ira katinafuna ira mutapanye

• Mwemo munasomedele iyo muthu onoyo unaroromela ira kuli Mulungu, koma teto onoyo unaroromela ira vyongo vyaingumi vyairile chinja kumela wu vyongo vimo-i, woonga iwongelo imo-i vamo-i uli muipembezo yo-ofala mutatamwinyu

• Mwemo muna-indi-edele iyo chito saiti ya jw.org vamo-i JW Library^® na Baibulo

• Mwemo muna-indi-edele iyo chito imo-i mwa vyongo vyofwanyeya va vyongo vyofunji-ana

• Mwemo munairele iyo mutundu m’mo-iwene wolaleela, n’nga leleela va telefoni, lemba makalata, laleela m’malo ofwanyeya athu anjinji, ira maulendo oweli-eda, vamo-i pangi-a funji-a wa Baibulo

• Umbuchana vyongo vyofuneela va mwasa wokala otiti-edeya, chinja vyongo mogwilizana na vyevyo vinaireya, kaana makalelo apama, ona vyongo mofwaneleela, vamo-i makundo amo-iwa

• Tapanya yofunjeda vamo-i vidiyo ya m’buku loi Kuwerenga Komanso Kuphunzitsa Mwaluso

• Mwemo munamulimbi-ele nyo vamo-i mukami-eda fwinyu onoyo muendilenanyo molaleela

• Lemba logwilizana na milanyo munalaleela nyo dambo lelo, vamo-i isazo yolimbi-a ya vyevyo vyaireele athu amo-i molaleela