Kanili Eki-u

1-2. (a) Chifukwa n’ni kaninaonge ira ninakala eki-u nagumana na mayeselo? (b) Kodi ninakambirana n’ni mukhanila?

NAGUMANA na mayeselo alukulu, ninokoza Kalanga ngati nili mungalawa ing’onong’ono va nyanja vevo vali mafunde. Koma kaninakala eki-u. Babi-u waudimu unoiziwa mavuto anayo ninagumanana iyo moi unonilonjeza ira unerenga nikami-a. Yehova unomusimikizela mtumikae uliwetene ira: “Ndinoukami-a.” — Yes. 41:10.

² Mukhanila ninokambilana mwemo Yehova munanikami-ela liye mundila 4 di: (1) vonisogolela, (2) voniva-a vyongo vyofuneya, (3) voniteteza, koma teto (4) vonilimbikisa. Yehova unonilonjeza ira kaya ninaza nigumana na mavuto oyi avi, liye kanaza anidiwala. Liye kanani-iye, eno kanili eki-u.

YEHOVA UNONISOGOLELA

3-4. Kodi Yehova unanisongolela avi? (Salimo 48:14)

³ Welengani Salimo 48:14. Yehova kanaembekezela ira ninerenga visogolela eki-u. Ndiye kodi unasogolela avi athwae malambwano? Ndila imo-i ineyo munapangela liye vyevi kuzela m’Baibulo. (Sal. 119:105) Mawae kanonikami-a ira nisakulenga pama vyoira koma teto ira nikalenga na makalelo anayo kananipangi-e ira nikalenga osangalala vathawiila koma teto ira nize nifwanye moyo oomala usogolo.a Mwaisazo, unonifunji-a ira kanisungenga ya m’murimani, nikalenga oona murima va vyongo vyetene koma teto niomeliwengana kumela m’murima. (Sal. 37:8; Aheb. 13:18; 1 Pe. 1:22) Natonyi-edanga makalelo anala ninokala mulombwana kapena iyana wapama, makolo apama koma teto ninerenga gwilizana na afwi-u.

⁴ Yehova oo-ela m’Mawae khani da athu anayo kagumanile na mayeselo ofwanafwana na anayo ninagumanana iyo, moi koovwa ngati mwemo ninavwela iyo. (1 Akor. 10:13; Yak. 5:17) Nawelenganga khani dedi koma teto indi-eda chito vyevyo ninafunjeda iyo, ninopindula mundila mbin’lidi. Ndila yowambeela, ninozindikila ira kanili eki-u chifukwa athu amo-iwa kanogumana teto na mavuto ngati anayo ninagumanana iyo moi kanowavilela pamapama. (1 Pe. 5:9) Ndila yanambili, ninofunjeda vyevyo ninapange iyo ira nivilelenga mavutwayo. — Arom. 15:4.

5. Kodi Yehova unamu-indi-eda chito mbaani vonisogolela vandila yodowa wu moyo?

⁵ Yehova unonisogolela teto zela mwa Akristu afwi-u.b Mwaisazo, oing’anela madela kanoendela mipingo ira kanilimbikisenga. Khani diwa dinolimbi-a iroromelo yi-u koma teto dinonikami-a ira nikalenga ogwilizana. (Vyo. 15:40–16:5) Andimuwa mupingo kanopanga chidwi na ofalisa uliwetene. (1 Pe. 5:2, 3) Makolo kanofunji-a a-imiwa ira kakale va usamwali wapama na Yehova kakale oganiza pama koma teto kakale na makalelo apama. (Miya. 22:6) Koma teto arongola olimba mwauzimu kanokami-a arongola aisikana vowava-a isazo yapama, malangizo okami-a koma teto alimbikisa. — Tito 2:3-5.

6. Kodi ninafuneela panga n’ni ira nipindulenga na malangizo a Yehova?

⁶ Yehova upanga mbalae voniva-a malangizo ofuneya. Kodi ninatonyi-ede avi yamikela vyevyo unipangele liye? Lemba la Miyambo 3:5, 6 linaonga ira: “Umuroromelenga Yehova na murimao wetene, moi kuroromelenga luso lawo lovwechecha vyongo.” Nera eno, “liye unoza aongole ndila di-u,” tapulela ira unoza anikami-e pewa mavuto anjinji nokalanga osangalala. Ninoyamikela vinjinji ira Yehova unoniomeliwana koma teto niva-a malangizo okami-a. — Sal. 32:8.

YEHOVA UNONIVA-A VYEVYO NINAFUNEELA IYO

7. Kodi Yehova unaniva-a vyofuneya mundila diivi? (Afilipi 4:19)

⁷ Welengani Afilipi 4:19. Enjedela vonisogolela mwauzimu, Yehova unodalisa tindi li-u ira nifwanyenga yodja, vyowara na vogona. (Mat. 6:33; 2 Ates. 3:12) Mwaibadwa iyo athu ninokumbanyela mwemo ninafwanyelenga iyo vyongo vyofuneya va moyo, koma Yehova unonilimbikisa ira kanikumbanyelenga vinjinji vyongo vyevi. (Mat. 6:25) Ninaonga eno chifukwa Babi-u kana-iyevo atumikae anayo kanavuteya. (Mat. 6:8; Aheb. 13:5) Ninafuneya roromelanga vyevyo unilonjezile liye ira unoza anikami-e fwanya vyofuneya va moyo.

8. Kodi Yehova amukami-ile avi Davide?

⁸ Kaganizelani mwemo Yehova mwamukami-ele liye Davide. Vachaka detene dedo Davide na athwae kakalileathu moyo otawatawa, Yehova oowava-a vyevyo kafuneelaathu. Davide angaganizele mwemo Yehova mwamusamalele liye va chaka dedo, oolemba ira: “Ndali mwana koma vano ndiulukula, koma kandinaonevo muthu uliwetene ororomeleya anga-iiwe, kapena a-imae kavepi-anga yodja.” (Sal. 37:25) Mwina nanyene muonavo va moywinyu Yehova apelekanga vyofuneya wa atumikae ororomeleya.

9. Kodi Yehova unakami-a avi athwae malambwano va thawi ya ngozi? (Onani teto ithuzithuzi.)

⁹ Yehova unopeleka teto wa atumikae vyofuneya va moyo va thawi ineyo uireileathu ngozi imo-iwene. Mwaisazo, wu Yelusalemu wangafiile ndala muthawi ya anamarumiwa, Akristu a m’madela o-iyana-iyana kootumiza vyongo vyofuneya wa abali na arongoliwa anayo kakuziwe na ndaleyo. (Vyo. 11:27-30; Arom. 15:25, 26) Vi pivyevyo athu a Yehova kanapangaathu teto malambwano. Waireya ngozi imo-iwene, Yehova unolimbikisa athwae ira kakami-e afwiwa vowava-a vyongo monga yodja, ma-inje, vyowara koma teto mirombwe. Magulu a vyomangamanga kanosakaeda manyumba a abali koma teto Nyumba da Umwene dedo dionongeile. Athu a Yehova kano-indi-eda chito makundo a m’Malemba vokami-a koma teto limbikisa afwiwa anayo katunduwa uonongeile kapena anayo kakhweliwe.c

10-11. Kodi ninafunjeda n’ni vakhani ya Borys?

¹⁰ Yehova unokami-a teto athu anayo katinamutumikela ira kafwanyenga vyongo vyofuneya. Na-iyene teto ninoesaesa omela murima athu anayo katinatumikela Yehova. (Agal. 6:10) Vyevi vinokami-a ira nialaleele. Isazo ngu mphuzisi mulukulu wa va sukulu imo-iwa yau Ukraine zina lae Borys. Liye kai wa Mboni da Yehova koma thawi detene oomela murima koma teto lemekeza a-ima a Mboni wu sukulu. Vathawi imo-iwa afuneela tawela wu dela limo-iliwa chifukwa ya kondo moi abali-u koomukami-a. Vanduli viwa, Borys oofwanyeya va Mwambo Oumbuwela Khwa wa Yesu Kristu. Voumbuwela vyevyo vyamuireele vathawi ineyo, Borys oonga ira: “A Mbonayo koopanga vyongo na miyo mooma murima koma teto koondisamalela. Ndinowayamikela vinjinji a Mboni da Yehova.”

¹¹ Na-iyene teto ninokoza sazi-eda chifundo ya Babi-u waudimu votonyi-eda chikondi wa athu anayo kanavuteya, ngakale anayo katinatumikela Yehova. (Luka 6:31, 36) Ninororomela ira naomeliwanga athu amo-i vinowakami-a ira kaze kakale ofunjeda a Kristu. (1 Pe. 2:12) Kaya athwayo kanoza kakale atumiki a Yehova kapena naari, iyo ninofwanya isangalalo ineyo inaza chifukwa yova-a.— Vyo. 20:35.

YEHOVA UNONITETEZA

12. Kodi Yehova alonjezile ira unatetezenga avi athwae monga gulu? (Salimo 91:1, 2, 14)

¹² Welengani Salimo 91:1, 2, 14. Yehova unilonjeza ira unerenga niteteza mwauzimu. Liye kanalole ira Satana asokoneze lambela oona. (Yoh. 17:15) Kaninakaikela ira “isauso ilukulu” yaza iambeeleya, Yehova unoza akwakwaneli-ede vyevyo ulonjezile liye ira unoza anikami-e kala na iroromelo yolimba koma teto unoza anivulumuche. — Chiv. 7:9, 14.

13. Kodi Yehova unateteza avi uliwetene vaeka?

¹³ Kodi Yehova unateteza avi muthu uliwetene vaeka? Yehova uno-indi-eda chito malemba vonikami-a iziwa vyofwanelela na vyoofwanelela. (Aheb. 5:14) Na-arelenga makundo ofwanyeya m’Mawae, liye unerenga niteteza uvyongo vyevyo vinaniporeche koma teto vyevyo vinaononge iroromelo yi-u. (Sal. 91:4) Yehova unoniteteza teto zela mupingo. (Yes. 32:1, 2) Nagwilizananga na athu anayo kanaomeliwa Yehova koma teto a-rela makundwae ninolimbikisiwa koma teto ninopewa vyotakala. — Miya. 13:20.

14. (a) Chifukwa n’ni Yehova kananiteteza wu mayeselo amo-i? (b) Kodi lemba la Salimo 9:10 linanisimikizela vya n’ni? (Onani teto mawu a m’pedi.)

¹⁴ Thawi dimo-i Yehova ooteteza atumikae awale ira katiporechiwe kapena phiwa. Koma kaapanga vyevi thawi detene. Na-iyene teto ninokoza gumana na “vyongo ngati vyevi mooembekezela.” (Nam. 9:11) Thawi dimo-i Yehova ukala alolanga ira atumikae kazuzumi-iwenga kapena teto phiwa vofuna tonyi-eda ira Satana ngonama. (Yob. 2:4-6;Mat. 23:34) Vyevi vinokoza teto ireya malambwano. Ngakale ira Yehova kananichosele mayeselo, ninororomela ira liye kana-iye athu anayo kanamuomeliwana.d — Sal. 9:10.

YEHOVA UNONILIMBIKISA

15. Kodi ninalimbikisiwa avi na pempelo, Mawu a Mulungu, koma teto Akristu afwi-u? (2 Akorinto 1:3, 4)

¹⁵ Welengani 2 Akorinto 1:3, 4. Iyo Akristu thawi dimo-i ninovwa chisoni koma teto kaana nkhawa. Mwina vano munana gumana na vuto limo-iliwa lene lelo linapangi-a ira muvivwenga ngati muli ekinyu. Iziwani ira Yehova unoiziwa mwemo munavwela nyo. Liye unovwechecha mwemo ninavwela iyo moi “unonimiyali-a va mayeselwi-u etene.” Kodi unanimiyali-a moi avi? Napempela wa Yehova mochondelela liye unoniva-a “murendelae unoyo athu katinawande uvwechecha.” (Afil. 4:6, 7) Ninolimbikisiwa teto nawelenganga Baibulo novwa mawu a Yehova. Zela m’Mawae owandeliwa, liye unonisimikizela ira unoniomeliwana, unoniwandela vyevyo ninapange iyo ira nikale azelu koma teto unoniva-a idedi-edo. Nakala va misonkano ninolimbikisiwa, naaledanga na Akristu afwi-u koma teto ninomiyali-iwa na makundo a m’Malemba.

16. Kodi ninafunjeda n’ni va vyevyo vyamuireele Nathan na Priscilla?

¹⁶ Isazo ya Nathan na Priscilla anayo kanakala wu United States inonisimikizela ira Yehova unonilimbikisa koma teto nimiyali-a vo-indi-eda chito mawae. Chaka divireledo mundulimu, aluwa kooganiza vyotamela udela limo-iliwa wewo wafuneeya olaleela anjinji. Nathan aongile ira: “Noororomela ira Yehova unoza anidalise va utumiki-ula.” Koma aluwa kangakede fiya udelalo koogumana na mavuto avyachuma koma teto marenda. Vanduli viwa koowelela waniwa komave koopitiliza gumana na mavuto avyachuma. Nathan aongile ira: “Ndoodabwa ira chifukwa n’ni Yehova kaanidalisile ngati mwemo nadedi-edela iyo. Ndoowambeela ganiza ira mwina ndiilakwi-a vimo-iviwa vyene.” Koma vanduli viwa Nathan na Priscilla koozindikila ira Mulungu kaa-iile vathawi ya mavutwela. Nathan aongile ira: “Vathawi yoruchela, Baibulo lali ngati fwi-u unoyo anilimbikisa koma teto niva-a malangizo. Nooganizela mwemo Yehova mwanikami-ele liye ira nivilele, m’malo mokedanga ganizela mayeselo anayo nagumanana iyo. Moi panga vyevi oonikami-a ira nikale okozeya gumana na mayeselo amo-iwa usogolo ningan’na iroromelo yolimba.

17. Kodi murongola m’mo-iwa zina lae Helga alimbikisiwe avi? (Onani teto ithuzithuzi.)

¹⁷ Kodi abali na arongola kananilimbikisa avi? Kaganizelani vyevyo vyamuireele Helga unoyo unakala wu Hungary. Wa chaka dinjinji, liye oogumana na mavuto anjinji anayo kamupangi-a ira asauwelenga vyoira novionanga ira ngo-ofuneya. Koma aganizela vyevyo vyaireile unoona ira Yehova oomukami-a zela mwa abali na arongola. Liye alembile ira: “Yehova ukala andikami-anga aona ira ndiifooka chifukwa ya chito, samalela mwananga wobulela koma teto mayeselo amo-iwa. Va chaka 30 detene dedi liye ukala akwakwaneli-edanga lonjezo lae loi unerenga ndilimbikisa. Thawi dinjinji unondilimbikisa zela mwa abali na arongola anayo kanandiongi-a mooma murima koma teto mondiganizela. Ndikala ndiwachelanga vathawi yofwanelela mameseji koma teto makalata okala na mawu olimbikisa.”

18. Kodi ninalimbikise avi athu amo-i?

¹⁸ Iyo teto ninokoza musazi-eda Mulungu volimbikisa athu amo-iwa. Kodi ninapange avi vyevi? Ninafuneela avuruwananga moleza murima, onga na aluwa mawu olimbikisa koma teto ava-a vyevyo kanafuneelaathu. (Miya. 3:27) Niesaesenga limbikisa athu anayo kanavuteya ngakale ira katinatumikela Mulungu vathawiila. Akala anebi-u kanabulela, kookaana chisoni kapena nkhawa, niyaendelenga, avuruwana koma teto kambilana na aluwa malemba olimbikisa. Nasazi-edanga Yehova, unoyo ngu “Mulungu unoyo unanimiyali-a va vuto lililetene,” ninokami-a Akristu vilela mayeselo koma teto fewi-a mirima da athu amo-iwa ira naaliwene teto kaambeele lambela oona. — Mat. 5:16.

YEHOVA UNERENGA NIKAMI-A THAWI DETENE

19. Kodi Yehova unanipangela n’ni, nanga ninamusazi-ede avi?

¹⁹ Yehova unoganizela athu anayo kanamuomeliwana. Liye kanani-iya nagumana na mavuto. Unosamalela atumikae ororomeleya ngati mwemo likholo lachikondi linasamalelelaathu mwaniwa. Unonisogolela, niteteza, nilimbikisa koma teto niva-a vyongo vyevyo ninafuneela iyo. Ninosazi-eda Babi-u waudimu nakami-anga koma teto limbikisa athu anayo kanagumana na mavuto. Ngakale nigumane na mavuto oyi avi, kanikaikelenga ira Yehova uli na iyo. Vale liye oonilonjeza ira: “Kuove chifukwa miyo ndili na weyo.” (Yes. 41:10) Mawu anala kanonilimbi-a murima moi ninoiziwa ira kanili eki-u.