Musazi-edenga Angelo Ororomeleya

1-2. (a) Kodi iyo athu nina-iyana avi na angelo? (b) Kodi ninafwanafwana avi na angelo?

VEVO Yehova aukami-ileni liye funjeda choonadi, ooukokelani m’banja la atumikae o-iyana-iyana koma teto achikondi anayo kanatangani-avo angelo mamiliyoni anjinji. (Dan. 7:9, 10) Naganizelanga vya angelo, thawi dinjinji ninoganizela vyo-iyana wewo ulivo vaari va iyo athu na aluwa. Mwaisazo, aluwa kookala kangalivo wathawi indendai kwaranya iyo. (Yobu 38:4, 7) Aluwa mbakopolo vinjinji kwaranya iyo. Moi mo-iyana na iyo athu anayo kanili angwilo, aluwa mbowela koma teto olungama. — Luka 9:26.

² Ngakale ira vikala iyana wewu, ninofwanafwana na aluwa va vyongo vinjinji. Mwaisazo, mofwanafwana na angelo, ninowanda sazi-eda makalelo a Yehova koma teto nikaana ufulu osakula. Nikaana teto mazina, nikaana makalelo koma teto vyoira vyo-iyana-iyana votumikela Yehova koma teto nikaana murima ofuna mulambela Mulengi-u. — 1 Pe. 1:12.

3. Kodi ninafunjede n’ni wa angelo ororomeleya?

³ Voi ninofwanafwana na angelo va vyongo vinjinji, isazo iwa inokoza nilimbikisa koma teto nikami-a. Moi ninokoza funjeda vinjinji kumela wa aluwa. Mukhanila ninoona vyevyo ninapange iyo ira nisazi-edenga viyevi-a wa angelo ororomeleyala, mwemo kanatonyi-edelaathu ira kanowaomeliwana athu koma teto vyevyo kanaesaesaathu panga ira pingo ukaleve owela.

ANGELO MBOVIYEVI-A

4. (a) Kodi angelo kanatonyi-eda avi viyevi-a? (b) Chifukwa n’ni angelo kanaviyevi-a? (Salimo 89:7)

⁴ Angelo ororomeleya mboviyevi-a. Ngakale ira aluwa kanoiziwa vyongo vinjinji, mbakopolo koma teto azelu, kanovwela malangizo a Yehova. (Sal. 103:20) Ka-indanga chito dedo kava-iweathu, aluwa katinavitama chifukwa ya vyevyo kapangileathu kapena vioni-eda na kopolo dedo kan’naathu. Kanosangalala panga vyevyo Mulungu unafuna liye ngakale ira katinaiziweya na mazina ira mbaaluwa anayo kapangile vyongovyo.a (Gen. 32:24, 29; 2 Mam. 19:35) Aluwa katinalola wachela ulemelelo unoyo unafuneya dowa wa Yehova. Chifukwa n’ni angelo kali oviyevi-a vinjinji? Aluwa kanomuomeliwana Yehova koma teto mulemekeza vinjinji. — Welengani Salimo 89:7.

5. Kodi ngelo m’mo-iwa atonyi-edile avi viyevi-a vopeleka malangizo wa Yohani? (Onani teto ithuzithuzi.)

⁵ Tiyemoni nione khani imo-iwa yotonyi-eda ira angelo mboviyevi-a. M’ma 96 C.E., ngelo m’mo-iwa unoyo zina lae kalinaiziweya oomuoni-a namarumiwa Yohani masomphenya odabwi-a. (Chiv. 1:1) Kodi Yohani apangile n’ni angaonile masomphenyayo? Liye oofuna mulambela ngeloyo. Koma mombaraanya ngelo ororomeleyola oomuruni-a, moi aongile ira: “Samala! Kupange vyevyo! Miyo ndikede kala kapolo fwawo na wa abalawo . . . Lambela Mulungu.” (Chiv. 19:10) Veva ngelola ooviyevi-a vinjinji. Liye kaafuna va-iwa ulemu kapena tamandiwa. Thawi ineyo oomuwandela Yohani ira unafuneya lambela Mulungu. Vathawi imo-ive ineyo liye kaamuona Yohani ngati muthu oofuneya kwenikweni. Ngakale ira ngeloyo ootumikela Yehova wa chaka dinjinji koma teto ali wakopolo kwaranya Yohani, liye ooviyevi-a noonga ira namarumiola ali kapolo fwae. Moi ngakale ira ngeloyo oofuna musumulula Yohani, kaamunyanyuwele namarumiwa wokalamba unola. M’malomwiwa oowonga na liye mooma murima moi oozindikila ira vyevyo Yohani aonile liye vyoomudabwi-a vinjinji.

6. Kodi ninasazi-ede avi viyevi-a wa angelo?

⁶ Kodi ninaasazi-ede avi angelo vakhani yoviyevi-a? Na-iyene nava-iwa vyoira kaninafuneya vitamandela kapena funa va-iwa ulemu chifukwa ya vyevyo ninakwakwani-a iyo panga. (1 Akor. 4:7) Enjedela vevo, kaninafuneya vionanga kala okwaranya amo-iwa chifukwa yoi nitumikela Yehova wa thawi indendai kapena teto chifukwa yoi nikaana maudindo amo-iwa. Moi napanganga vinjinji votumikela Yehova pavevo teto ninafuneya iyo vionanga ngati ang’onong’ono. (Luka 9:48) Mofwanafwana na angelo ninofuna tumikela amo-iwa. Kaninafuna pangi-a ira athu amo-iwa kaonenga ira nili ofuneya vinjinji.

7. Kodi ninatonyi-ede avi viyevi-a napelekanga malangizo kapena sumulula muthu?

⁷ Thawi dimo-i ninofuneya peleka malangizo akopolo. Koma mofwanafwana na ngelo unoyo amusumululile Yohani mooma murima, na-iyene ninokoza peleka malangizo akopolo koma kanimukumudwi-e muthu. Akala kaninaviona kala okwaranya athu amo-iwa, ninokoza peleka malangizo okumela m’Baibulo mwaulemu koma teto mwachikondi.— Akol. 4:6.

ANGELO KANOWAOMELIWANA ATHU

8. (a) Mogwilizana na Luka 15:10, kodi angelo kanatonyi-eda avi ira kanowaomeliwana athu? (b) Kodi angelo kanakami-a avi vachito yolaleela? (Onani teto lowambeela.)

⁸ Angelo katinanyalanyaza vyevyo vinaireela athu kapena teto ganizanga ira kanili ofuneya. Aluwa kanowaomeliwana athu moi kanosangalala ochimwa kalapa nowelela wa Yehova kapena muthu achenja ndila dae nowambeela funjeda choonadi. (Welengani Luka 15:10.) Aluwa kanonikami-a teto na-indanga chito yolaleela vya Umwene. (Chiv. 14: 6) Ngakale ira aluwa katinalaleela mwachindunji wa athu, kanokoza sogolela ofalisa wa muthu unoyo unafuna funjeda vya Yehova. Komave kai thawi detene vevo ninaonge iyo mosimikiza ira angelo kanonisogolela wa muthu m’mo-iwene. Moi Yehova unokoza indi-eda chito ndila dimo-i, monga peleka zimwae ira ukami-e athu anayo kanafuna muiziwa kapena sogolela atumikae. (Vyo. 16:6, 7) Komave liye uno-indi-eda chito vinjinji angelwae vonikami-a va chito yolaleela. Eno nalaleelanga uthenga wapama ninokoza kala osimikiza ira angelwae kanoza kanikami-e. — Onani bokosi loi “Mapempelwiwa Koosomediwa.”b

9. Kodi ninaasazi-ede avi angelo vakhani yowaomeliwana athu?

⁹ Kodi ninaasazi-ede avi angelo vakhani yowaomeliwana athu? Navwa ilengezo yoi muthu m’mo-iwa uweli-ediwa mupingo, nisangalalenga ngati mwemo angelo kanapangelaathu. Nipangenga vyetene vyevyo ninawande iyo vomuwachela na manda meeli koma teto musimikizela ira ninomuomeliwana (Luka 15:4-7; 2 Akor. 2:6-8) Ninokoza teto sazi-eda angelo vopanga vyevyo ninawande iyo vachito yolaleela. (Nam. 11:6) Angelo kanonikami-a nalaleelanga uthenga wapama, eno na-iyene nikami-enga abali na arongoli-u ka-indanga chito inela. Mwaisazo, ninokoza panga vyoi nilaleele na ofalisa unoyo kanaiziwa vinjinji. Ninokoza kami-a teto abali na arongola okalamba kapena teto anayo kanabulela ira naaluwene teto kalaleelenga.

10. Kodi ninafunjeda n’ni va vyevyo vyamuireele Sara?

¹⁰ Koma bwanji akala kaninawande panga vinjinji chifukwa ya mwemo vyongo vililiathu vamoywi-u? Ninokozave fwanya ndila yoi ni-indelenga chito limo-i na angelo volaleela. Isazo ngu murongola m’mo-iwa wau India zina lae Sarac. Angapangile upainiya wa chaka 20, Sara oobulela moi akeda gonati. Vyevi vyoomukumudwi-a vinjinji, moi pivyovweya. Koma chifukwa yoi oowelenga Baibulo thawi detene koma teto abali na arongolae koomukami-a mwachikondi, vang’ono na vang’ono Sara oowambeela sangalala. Komave liye afuneya fwanya ndila disha dolaleelela mogwilizana na mwemo vyongo vyaliliathu vathawi ineyo. Voi kaawanda garati vati ira alembe makalata, akeda laleela vafoni. Ndiye akala uwaimbele foni athu vaulendo oweli-eda, aluwa koomuwandela teto vya athu amo-iwa anayo kafuna funjeda. Wa medi doyeva doka, Sara ookaana maphuzilo a Baibulo okwaranya 20, oyi kaakwakwani-a afunji-a etene. Eno liye oopeleka amo-iwa mwa athwayo wa abali na arongola mupingo. Vano anjinji mwa ofunjedayo kanofwanyeya vamisonkano. Vinaoneya ira angelo kanosangalala vinjinji inda chito limo-i na abali na arongola ngati Sara, anayo kanapanga vyetene vyevyo kanawandeathu vachito yolaleela.

ANGELO KANOVILELA

11. Kodi angelo ororomeleya katonyi-edile avi vilela?

¹¹ Angelo ororomeleya pivisazo vyapama vinjinji vakhani yovilela. Aluwa kookala kavilelanga vyongo vyookaana chilungamo koma teto vyotakala wa chaka masauzande anjinji. Aluwa koomuona Satana na angelo amo-iwa anjinji anayo katumikela limo-i na aluwa kamuukelanga Yehova. (Gen. 3: 1; 6:1, 2; Yuda 6) Baibulo linoniwandela vya ngelo m’mo-iwa ororomeleya unoyo alimbanile na iwanda yakopolo. (Dan. 10:13) Enjedela vevo, wa chaka dinjinji angelo kookala kaonanga athu oyeva oka kasakulanga lambela Yehova. Ngakale vili eno, angelo ororomeleyala kanopitilizave tumikela Yehova mosangalala koma teto mwatindi. Aluwa kanoiziwa ira vathawi yofwanelela Yehova unoza achose vyongo vyetene vyookaana chilungamo.

12. Chin’ni inanikami-e ira nivilelenga?

¹² Kodi ninaasazi-ede avi angelo vakhani yovilela? Mofwanafwana na angelo, na-iyene ninokoza gumana na vyongo vyookaana chilungamo kapena runi-iwa. Koma ninororomela ira vathawi yofwanelela, Yehova unoza achose vyotakala vyetene. Eno mofwanafwana na angelo ororomeleya, ‘kanina-iya panga vyapama.’ (Agal. 6:9) Koma teto Mulungu unolonjeza ira unoza anikami-e vilela. (1 Akor. 10:13) Nivepenga Yehova ira aniva-e zimwae owela unoyo unanikami-e kala oleza murima koma teto osangalala. (Agal. 5:22; Akol. 1:11) Koma bwanji akala munaruni-iwa? Muroromelenga Yehova koma teto kamutekenyeyenga. Thawi detene unoza aukami-eni koma teto uva-ani kopolo. — Aheb. 13:6.

ANGELO KANOKAMI-A IRA PINGO UKALE OWELA

13. Kodi angelo kava-iwe chito yavadela iivi m’malambo ogomi-edala? (Mateyu 13:47-49)

¹³ M’malambo ogomi-edala, Yehova upeleka wa angelo chito yolaleela. (Welengani Mateyu 13:47-49.) Chito inela inopangi-a ira athu anjinji kapange chidwi na uthenga wapama. Amo-iwa mwa athu anala kanochenja mpakana fiya vokala Akristu oona, koma amo-i katinachenja. Angelo koova-iwa chito yoi ‘kachose athu otakala vaari va olungama.’ Vi vinatapulela ira chitwiwa inokami-a ira pingo ukale owela. Koma kavinatapulela ira uliwetene unoyo u-iile sonkana na iyo va vifukwa vyo-iyana-iyana kanawelele mugulu. Kavinatapulela teto ira mupingo kamunakala mavuto. Koma ninokoza kala osimikiza ira angelo kano-inda chito mwatindi vokami-a ira pingo ukale owela.

14-15. Kodi ninaasazi-ede avi angelo vakhani yokami-a ira pingo ukale owela? (Onani teto ithuzithuzi.)

¹⁴ Kodi ninaasazi-ede avi angelo vokami-a ira pingo ukale owela? Ninokoza panga vyevi voesaesa kaana makalelo apama koma teto kala vausamwali olimba na Yehova. Ninoesaesa teteza murimi-u vosakula pama athu owaledana koma teto pewa iliyetene ineyo inanisokoneze. (Sal. 101:3) Ninokoza teto panga pama kami-a Akristu afwi-u ira kakaleve ororomeleya wa Yehova. Mwaisazo, kodi ninapange n’ni akala nivwile ira Mkristu fwi-u upanga chimo lilukulu? Chifukwa yomuomeliwana muthuyo ninokoza mulimbikisa ira aawandele andimuwa. Akala kanaawandela, iyo ninokoza awandela andimuwayo. Ninafuna ira Mkristu uliwetene unoyo usamwalae na Yehova uwambeele sokonezeya akami-iwe mombaraanya. — Yak. 5:14, 15.

¹⁵ Pivyovwi-a chisoni ira athu amo-iwa anayo kanapanga machimo alukulu kanochosiwa mupingo. Vyera eno nino-iya ‘gwilizana na aluwa.’d (1 Akor. 5:9-13) Vyevi vinokami-a ira pingo ukale owela. Arela malangizo vakhani inela unokoza akami-a athu anayo kachosiwe mupingo ira kaganize vyowelela wa Yehova. Moi kawelela wa Yehova, ninosangalala limo-i na Yehova koma teto angelo. — Luka 15:7.

16. Kodi nyo munaza muesaesa asazi-eda angelo mundila iivi?

¹⁶ Ngumwai ulukulu ira Yehova unilola ira nifunjede vyokuza angelo koma teto makalelwiwa apama monga viyevi-a, omeliwana athu, vilela koma teto kami-a ira pingo ukale owela. Naasazi-edanga angelo ororomeleyala, na-iyene ninoza nikale m’banja la atumikae mpakana walewale.