Kodi Makundo Owambeela a m’Baibulo Anayo Mwafunjedile Nyo, Kanokoza Ukami-ani Malambwano?

1. Kodi makundo owambeela a m’Baibulo kaukami-ileni avi mwangakede funjeda choonadi?

MAKUNDO owambeela a m’Baibulo anayo nafunjedile iyo, koonikami-a vinjinji vamoywi-u. Mwaisazo, nangaiziwile ira zina la Mulungu ngu Yehova nooesaesa ira liye akale fwi-u. (Yes. 42:8) Nangaiziwile vyevyo vinaireya muthu akhwa, noo-iya kumbanyela vyoi athu anayo ninaomeluwana iyo anayo kakhwile kanozuzuma. (Nam. 9:10) Moi nangafunjedile vyevyo Mulungu ulonjezile liye vyokuza Paradaizo, noo-iya kumbanyela vyokuza sogolo li-u. Nooiziwa ira ninoza nikaena moyo, ookala wa thawi yoyeva ngati chaka 70 kapena 80, koma mpakana walewale. — Sal. 37:29; 90:10.

2. Kodi lemba la 2 Petulo 1:12, 13 linatonyi-eda avi ira makundo owambeela a m’Baibulo kanokami-a teto Akristu anayo katumikele Yehova wa thawi indendai?

² Kaninafuneya diwala funeya wa makundo owambeela a m’Baibulo. Namarumiwa Petulo, oowalembela kalata yanambili Akristu anayo kali wale “olimba mu choonadi.” (Welengani 2 Petulo 1:12, 13.) Koma vathawi ineyo, aluwa koogumana na mavuto amo-iwa mupingomo, tangani-avo aphuzisi onama koma teto athu otakala. (2 Pe. 2:1-3) Petulo oofuna limbikisa abali na arongolae ira kawandenga limbana na mavuto anala. Eno liye oowaumbucha vya vyongo vyevyo kafunjedileathu vowambeela. Makundo anala koowakami-a ira kakale ororomeleya wa Yehova mpakana mapeto.

3. Chifukwa n’ni Akristu etene kanafuneya ganizelanga makundo owambeela a m’Baibulo? Fotokozani

³ Makundo owambeela a m’Baibulo, kanokoza nikami-a ngakale ira nikala nitumikelanga Yehova wa thawi indendai. Niyerekezele eni: Kaswiri oiziwa phiya yodja koma teto muthu unoyo unafunjeda wene phiya, kanokoza indi-eda chito vyongo vyofwanafwana vophiya yodja. Koma kaswiri unoyo ukalile aphiyanga wa thawi indendai, unakala angafunjedile pama indi-enda chito vipangizovyo vophiya yodja yooma mundila do-iyana-iyana. Mofwanafwana na vyevi, atumiki a Yehova anayo kakalile katumikelanga wa thawi indendai na ofunjeda Baibulo asha, kanokoza onanga makundo owambeela a m’Baibulo mo-iyana. Vyongo va moywi-u kapena vyevyo nikalile iyo nipanganga votumikela Yehova, vinochenja nakeda batiziwa wene. Naganizelanga makundo a m’Baibulo anayo nafunjedile iyo mundulimu, ninokoza fwanya makundo asha anayo kananikami-e mogwilizana na mwemo vyongo vililiathu vathawiila. Tiyemoni nione vyevyo Akristu anayo kakalile kamutumikelanga Yehova wa thawi indendai, kanafunjedeathu va makundo maralu owambeela a m’Baibulo.

YEHOVA NGU MULENGI

4. Kodi iziwa ira Yehova ngu Mulengi unanikami-a avi?

⁴ Baibulo linaonga ira “unoyo apangile vyongo vyetene ngu Mulungu.” (Aheb. 3:4) Ninoiziwa ira ilambo ya vatila na vya moyo vyetene, vyalengiwe na Mulengi-u wa zelu koma teto wakopolo detene. Liye ngunoyo anipangile moi unoniiziwa pama vinjinji. Moi yofuneya vinjinji chi yoi unonisamalela. Liye unoiziwa teto vyevyo vili vyapama vinjinji wa iyo. Iziwa likundo lo-orucha la choonadi loi Yehova ngu Mulengi, unonikami-a mu ndila dinjinji moi unonipangi-a ira nikaena moyo wapama.

5. Kodi mba makundo achoonadi aavi anayo kananikami-e kala oviyevi-a? (Yesaya 45:9-12)

⁵ Likundo loi Yehova ngu Mulengi, linokoza nifunji-a ira nikale oviyevi-a. Mwaisazo, vevo Yobu akeda liye ganizela vya liye yeka koma teto vya athu amo-iwa, Yehova oomuumbucha ira liye ngu Mulengi wa kopolo detene. (Yobu 38:1-4) Vyevi vyoomuumbucha Yobu ira ndila da Yehova ti davadimu vinjinji kwaranya da athu koma teto ira ilietene ineyo unapanga liye chiyapama thawi detene. Mogwilizana na likundo leli, vanduli viwa namaongela Yesaya oolemba ira: “Kodi ulongo unokoza mufuka oomba yombwe ira: ‘kodi unapanga n’ni?’” — Welengani Yesaya 45:9-12.

6. Kodi pi vathawi iivi vevo pivyofuneya ganizela vya Mulengi-u wa zelu koma teto wakopolo detene? (Onani teto ithuzithuzi.)

⁶ Thawi dimo-i muthu unoyo ukalile atumikelanga Yehova wa chaka dinjinji, unokoza ambeela roromelanga vinjinji zelu dae, m’malo mororomelanga zelu da Yehova na mawae ira kamusogolelenga. (Yobu 37:23, 24) Koma bwanji akala muthu unaganizele zelu dookaana malile koma teto kopolo dedo Mulengi un’na liye? (Yes. 40:22; 55:8, 9) Likundo la mu choonadi leli linokoza mukami-a ira akale oviyevi-a noonanga ira maganizo a Yehova mbolondola koma teto ofuneya vinjinji.

7. Kodi chin’ni ineyo yamukami-ile Rahela ira asomedele chenja wewo waireile?

⁷ Ganizela likundo loi Yehova ngu Mulengi, woomukami-a Rahela unoyo unakala wu Slovenia ira asomedele chenja wewo waireile mugululi. Rahela oosomedela ira: “Thawi dimo-i vyoondirucha somedela vyevyo abali osogolela kasakulileathu. Mwaisazo, ngakale vanduli voonela Lipoti la Bungwe Lolamulela la Nambala 8 la 2023, vyoondioneela vyailendo wa thawi yowambeela, ndangamuonile m’bali akambanga khani angan’na ilevu. Eno ndoomuvepa Yehova ira andikami-e somedela chenja wewu.” Rahela oozindikila ira Yehova unoyo ngu Mulengi wa udimu na ilambo yavati, thawi detene unoiziwa pama mwemo munaendi-ele liye gulu lae. Akala nanyen’ne teto vinauruchani somedela malangizo asha kapena chenja wewo uireile, munokoza panga pama viyevi-a noganizelanga kopolo koma teto zelu davadimu da Mulengi-u Yehova. — Arom. 11:33-36.

CHIFUKWA IWA MULUNGU UNALOLA IRA ATHU KAZUZUMENGA?

8. Kodi iziwa chifukwa ineyo Mulungu unalolela liye ira athu kazuzumenga unanikami-a avi?

⁸ Chifukwa n’ni Mulungu unalola ira athu kazuzumenga? Chifukwa yolepela fwanya yosomeda ya yofuka inela, athu amo-i kanomulunduwela Mulungu kapena teto ambeela onanga ira liye kaliwo. (Miya. 19:3) Mo-iyana na athu anala, nyo mufunjeda ira athu kanovuteya nokhwa chifukwa ya uchimo koma teto chifukwa yookaana ungwilo, ookala chifukwa ya Yehova. Mufunjeda teto ira leza murima wa Yehova ukami-a athu anjinji ira kamuiziwe koma teto vionela ekiwa mwemo Yehova munaze liye amali-ele mavuto etene mpakana walewale. (2 Pe. 3:9, 15) Makundo achoonadi anala kanoulimbikisani koma teto ukami-ani ira mukale vausamwali wolimba na liye.

9. Kodi pi vathawi iivi vevo ninafuneya iyo umbuwela chifukwa iwa Yehova ulolele liye ira athu kazuzumenga?

⁹ Vevo ninaembekezela iyo ira Yehova amali-e mavuto etene, ninafuneya kala oleza murima. Koma muthu unoyo ninamuomeluwana iyo akhwa kapena iyo na banja li-u nagumana na mavuto kapena pangeliwa vyongo vyookaana chilungamo, ninokoza kumudwa chifukwa ninowambeela ona ira Yehova unaadimbeluwa mali-a mavuto. (Hab. 1:2, 3) Vathawi ngati inela ninokoza panga pama ganizela vifukwa vyevyo Yehova ulolele liye ira athu apama kazuzumenga.a (Sal. 34:19) Niganizelenga teto yolingae yoza mali-a mavuto etene mpakana walewale.

10. Kodi chin’ni ineyo yamukami-ile Anne ira avilele am’mae kangakhwile?

¹⁰ Iziwa chifukwa ineyo Yehova ulolele liye ira athu kazuzumenga, unonikami-a ira nivilelenga mavuto. Anne unoyo unakala va ilumba ya Mayotte va nyanja ya Indian Ocean, aongile ira: “Am’manga kangakhwile chaka dingasi dene mundulimu, ndookumudwa vinjinji. Komave thawi detene ndooviumbucha ira, kai Yehova unoyo unapangi-a ira athu kazuzumenga. Liye unofunechecha za mali-a mavuto etene koma teto za venyi-a athu etene anayo ninaaomeluwana iyo. Ganizela likundo la m’Baibulo la choonadi leli, unondiva-a murendele wa m’murimani unoyo teto unandidabwi-a.”

11. Kodi ganizela vifukwa vyevyo vyapangi-ile ira Yehova alole ira athu kazuzumenga unanikami-a avi ira nivilelenga nalaleelanga uthenga wapama?

¹¹ Iziwa chifukwa ineyo Yehova ulolele liye ira athu kazuzumenga, unonilimbikisa ira nipitilize laleela uthenga wapama. Angafotokozile ira leza murima wa Yehova unokami-a ira athu kalape noza vulumuchiwa, Petulo oolemba ira: “Ganizelani vya tundu wa muthu unoyo munafuneela nyo kala. Munafuneela kala athu aikalelo yowela, teto mupangenga chito dotonyi-eda ira muli ovipeleka wa Mulungu.” (2 Pe. 3:11) Laleela chiimo-i mwa chito yotonyi-eda ira nili “ovipeleka wa Mulungu.” Mofwanafwana na Babi-u, na-iyene teto ninowaomeluwana athu. Ninofuna ira naaluwene kaze kavolowe mu ilambo isha ya Mulungu mwemo munaze mukale chilungamo. Moleza murima, Yehova unapeleka mwai wa athu amudela linyu oyi kaambeele mulambela. Ngumwai ulukulu vinjiinji kala afwae a Mulungu, nokami-anga athu anjinji mwemo ninawandele iyo ira kaiziwe vyokuza liye mapeto kaanafiye.— 1 Akor. 3:9.

NINAKALA “M’MALAMBO OMARI-A”

12. Kodi iziwa ira ninakala “m’malambo omari-a” unanikami-a avi?

¹² Baibulo linofotokoza molondola vyokuza ikalelo ya athu a “m’malambo omari-a.” (2 Tim. 3:1-5) Ninakeda funeya ona mwemo vyongo vililiathu wewo ninakala iyo, ira nione mwemo ulosila unakwakwaneli-ediwaathu. Naonanga makalelo aathu kapitilizanga takala, vinonikami-a ira niambeele roromela vinjinji ira mawu a Mulungu mbororomeleya. — 2 Tim. 3:13-15.

13. Mogwilizana na fanizo la Yesu lava Luka 12:15-21, kodi ninafuneya vifuka vyofuka viivi?

¹³ Iziwa ira ninakala m’malambo omari-a, unonikami-a teto ira ni-elenga vyongo vyofuneya vinjinji vamalo owambeela. Tiyemoni nione vyevyo ninafunjeda iyo va likundo leli kumela mu fanizo la Yesu lava Luka 12:15-21. (Welengani.) Chifukwa n’ni muthu wa chuma wa mufanizo la Yesu aromoliwa ira “ookaana zelu”? Liye kaaromoliwa eno chifukwa yoi ali wolemela, koma chifukwa yoi liye kaa-ela vyongo vyofuneya va malo owambeela. “Liye ooviunjikela chuma koma kaali olemela wa Mulungu.” Chifukwa n’ni muthuyo afuneya pangavo yongo mombaraanya? Chifukwa Mulungu oomuwaandela ira: “Ma-iyu anala moywao kanoufuna.” Malambwano, vevo mapeto kanaandamelaathu ninokoza panga pama vifuka ira: ‘Kodi ndinozindikila ira yofuneya vinjinji chin’ni nda-indi-edanga chito thawanga? Kodi ndinakami-a a-imanga kaan’na vyolinga vyoi avi? Kodi ndino-indi-eda chito kopolo, thawi, koma teto vyongo vyanga voviunjikela chuma, kapena ndinosunga chumanga udimu?’

14. Kodi isazo ya Miki inatonyi-eda avi ira chizelu ganizelanga umboni wa m’malemba wotonyi-eda ira ninakala m’malambo omari-a?

¹⁴ Naganizelanga modii-a vya likundo loi ninakala m’malambo omari-a, vinokoza nikami-a iziwa vyevyo ninafuneela iyo sakula vamoywi-u. Vyevi pivyevyo vyamuireele murongola m’mo-iwa zina lae Miki. Liye aongile ira: “Ndangamari-ile sukulu, ndoofunechecha ndangapangile maphuzilo owenjedela okuza vinyama. Ndookaana teto yolinga yoza panga upainiya koma teto dowa tumikela wewo unafuneela olaleela vya Umwene anjinji. Afwanga olimba mwauzimu koondikami-a ira ndiganizele mosamala akala vyali vyofuneya ira ndapange maphuzilo avadimwala koma kaanave vyolinga vyauzimu. Aluwa koondiumbucha ira vachineneeva mapeto ailambwela kanofiya. Aluwa koondiumbucha teto ira muilambo isha ndinoza ndikaena mwai ofunjeda vyokuza vinyama mpakana walewale. Eno ndoosakula panga maphuzilo a thawi yoyeva. Vyevi vyoondikami-a ira ndifwanye chito yoi ndikaengana ndalama dokwakwanela koma teto ineyo yandiva-a thawi yoi ndipangenga upainiya. moi vangavirile thawi ndootamela wu Ecuador wewo wafuneya olaleela Umwene anjinji.” Vathawi ila Miki na mamunae kanatumikela monga oing’anela dela muilambo ya Ecuador.

15. Kodi athu amo-i kanapanga n’ni kavwa uthenga wapama? Pelekani isazo. (Onani teto ithuzithuzi.)

¹⁵ Kaninafuneya gwa ulesi akala athu kanakoonda vuruwana uthenga wapama. Ninaonga eno chifukwa athu kanokoza chenja. Isazo va khanila ngu Yakobo unoyo ali chimwenae wa Yesu. Liye oomuona Yesu aulukulanga nokala Mesiya koma teto oomuona afunji-anga kwaranya muthu uliwetene. Koma wa chaka dinjinji, Yakobo kaakalile wo-arela wa Yesu. Liye ookala wo-arela wa Yesu wa tindi vanduli voi Yesuyo uvenyi-iwa.b (Yoh 7:5; Agal. 2:9) Eno kani-iye alaleela abali-u anayo vowambeela katinatonyi-eda chidwi, teto niwelelenga wa athu anayo kanakoonda vuruwana uthenga wapama. Niumbuwelenga ira ninakala m’malambo omari-a moi chitwi-u yolaleela inafuneya indiwa mombaraanya. Vinokoza wandeya ira vyevyo ninaawandele iyo vathawiila kanoza kaviumbuwele usogolo nopangavo yongo, mwina teto isauso ilukulu yangaambeele.c

NIYAMIKELENGA VIKUMBUSO VYA YEHOVA

16. Kodi vikumbuso vya Yehova vinaukami-ani avi? (Onani bokosi loi “Muvi-indi-edenga Chito Vokami-a Athu Amo-i.”)

¹⁶ Makundo amo-i a m’Baibulo anayo gulu li-u linapelekaathu, kanakoziwa ira kakami-e athu anayo katinaiziwa vinjinji vyokuza Baibulo. Mwaisazo, khani da etene dedo dinakambiwa mulungu uliwetene, khani na mavidiyo amo-i ofwanyeya va jw.org koma teto magazini ogawela, kanakoziwa na yolinga yoi kakami-e athu anayo kai a Mboni. Ngakale vili eno, na-iyene teto ninopindula na vyongo vyevi. Vyongovi vinonikami-a ira nimuomeluwengana vinjinji Yehova, niroromelenga mawae, koma teto nifunji-enga amo-iwa mo-inda murima makundo owambeela a choona di. — Sal. 19:7.

17. Kodi pi vathawi iivi vevo ninafuneye iyo ganizela makundo owambeela a m’Baibulo?

¹⁷ Wa iyo anayo nikalile nitumikelanga Yehova wa thawi indendai, ninosangalala navwa makundo amo-i achoonadi anayo kachenjile. Koma ninoyamikela teto vinjinji makundo owambeela amuchoonadi ofuneya anayo nafunjedile iyo, koma teto anayo kanikami-ile kala va usamwali na Yehova. Akala thawi dimo-i ninakameela maganizwi-u m’malo mo-arelanga malangizo a gulu la Yehova, ninafuneya kala oviyevi-a noumbuwelanga ira Mulengi-u unoyo ngwa kopolo koma teto wazelu ngunoyo unasogolela gululi. Iyovano kapena athu anayo ninaomeluwana iyo kavilelanga maeselo amo-iwene, nilezenga murima noganizelanga chifukwa iwa Yehova ulolile ira athu kazuzumenga. Nasakulanga mwemo nina-indi-edele iyo chito thawi koma teto chumi-u, niumbuwelenga ira ninakala m’malambo omari-a. Eno tiyemoni nilolenga ira vikumbuso vya Yehova vinikami-enga kala azelu koma teto nipitilizeve mutumikela Yehova mororomeleya.