Kamukaikelenga Ira Yehova Unouomeluwanani Vinjinji

1. Chifukwa n’ni mwavipelekile wa Yehova? (Onani teto ithuzithuzi.)

KODI munoumbuwela dambo lelo mwapempelile nyo wa Yehova nomuwandela ira munofuna vipeleka wa liye nayolinga yoi mumutumikelenga mpakana walewale? Kaninakaikela ira moosakula panga vyevi chifukwa yoi moofiya vomuiziwa pama koma teto chifukwa yomuomeluwana. Moomulonjeza ira munoza mu-elenga vyevyo unafuna liye vamalo owambeela, koma teto munoza mupitilize muomeluwana na muriminyu wetene, moywinyu wetene, na maganizwinyu etene, koma teto kopolo dinyu detene. (Maliko 12:30) Keda kumela vathawi ineyo mwavipelekile nyo wa Yehova, chikondinyu wa liye ikala iulukulanga vinjinji. Ndiye kodi munamusomede avi muthu m’mo-iwa angaufukileni ira, “Kodi munomuomeluwana vinjinji Yehova?” Mookaikela munokoza musomeda ira, “Ee, ndinomuomeluwana vinjinji kwaranya muthu uliwetene, kapena yongo iliyetene.”

2-3. Kodi Yehova unafuna ira kanikaikelenga vya n’ni, nanga ninakambilana n’ni mukhanila? (Yeremiya 31:3)

² Nanga kodi munamusomede avi muthu m’mo-iwa angaufukileni ira, “Kodi munaganiza ira Yehova unouomeluwanani?” Kodi munokoza kaikela someda chifukwa yoviona ira nyo kamuli ofwanelela ira Yeheova auomeluwenganani? Ngakale ira ninomuomeluwana vinjinji Yehova, thawi dimo-i ninokoza ambeela kaikela akala Yehova unaniomeluwana, chifukwa yoviona ira kanili ofwanelela tonyi-ediwa chikondi na liye. Mu pumwemo teto murongola m’mo-iwa mwavivwela liye chifukwa yoi katonyi-ediwe chikondi angali mwana. Liye aongile ira: “Ndinoiziwa ira ndinomuomeluwana Yehova, moi kandinakaikela vyevi. Koma thawi dinjinji ndinokaikela akala Yehova unandiomeluwana.” Ndiye kodi nyo chin’ni ineyo inaukami-eni ira kamukaikelenga ira Yehova unouomeluwanani?

³ Yehova ngunoyo aukokeleni wa liye. (Welengani Yeremiya 31:3.) Moi unafuna ira nyo kamukaikelenga ira liye unouomeluwanani. Vevo mwavipelekile nyo wa liye nobatiziwa, oouva-ani yongo yamtengo wavadimu vinjinji ineyo chi chikondae yororomeleya. Chikondi inela chiilukulu vinjinji moi liye kanau-iyeni ngakale vang’ono. Chifukwa yoi Yehova unowaomeluwana vinjinji atumikae ororomeleya, liye unowaona etene ngati “chuma yavadela.” (Mala. 3:17.) Eno kamukaikelenga ira muli avadela vinjinji wa liye. Yehova unafuna ira muvivwenga ngati mwemo namarumiwa Paulo mwavivwela liye, unoyo kaakaikela ira Yehova unomuomeluwana. Paulo alembile ira: “ndisimikiza murima ira khwa, moyo, angelo, maboma, vyongo vyevyo vilivo, vyongo vyevyo vinaza, kopolo, usinkhu, dii-a kapena yolengiwa iliyetene, kinaza inimwalani-a na chikondi ya Mulungu.” (Arom. 8:38, 39) Mukhanila ninokambilana chifukwa iwa kaninafuneya kaikelanga ira Yehova unoniomeluwana, koma teto ninokambilana vyevyo ninapange iyo ira niroromelenga vinjinji vyevi.

CHIFUKWA N’NI KANINAFUNEYA KAIKELANGA IRA YEHOVA UNONIOMELUWANA?

4. Kodi Satana unafuna ira niroromelenga n’ni, nanga ninamuruni-e avi?

⁴ Roromela ira Yehova unoniomeluwana, unonikami-a ira nilimbanenga na “vyoira vyachinyengo vya Satana” (Aife. 6:11) Satana unafuna ira ni-iye mutumikela Yehova. Moi unoesaesa mwemo unawandele liye ira akwakwaneli-ede yolinga inela. Moi imo-i mwa vyongo vyachinyengo vyveyo una-indi-eda liye chito, kunipangi-a ira niroromelenga ira Yehova kananiomeluwana. Satana uli ngati Podogoma unoyo unaesaesa ira a-inde inyama ineyo ifookile. (1 Pe. 5:8, 9) Podogoma unoomeluwa ukela vinyama vyevyo vinaoneya ira kavili vyotetezeya. Moi mofwanafwana na Podogoma, Satana unoniukela aniona ira nifooka chifukwa ya vyongo vyevyo nalakwi-ile iyo munduli, mavuto anayo ninagumanana iyo vathawiila kapena teto naovanga vyevyo vinaireye usogolo. (Miya. 24:10) Koma naroromelanga vinjinji ira Yehova unoniomeluwana, ninokoza kala okozeya limbana na vyoira vyachinyengo vya Satana.— Yak. 4:7.

5. Kodi roromela ira Yehova unoniomeluwana kofuneya moi avi?

⁵ Roromela ira Yehova unoniomeluwana, unonikami-a ira nikale vausamwali wapama na liye. Ninaonga eno chifukwa yoi liye anilengile mundila yoi niaomeluwengana athu amo-iwa koma teto nifunenga ira athu amo-iwa kaniomeluwengana. Muthu m’mo-iwa anitonyi-eda chikondi, usamwali-u unolimba. Moi ninowambeela omeluwana vinjinji. Eno naonanga ira Yehova unoniomeluwana, pavevo teto usamwali-u na liye unakalaathu olimba vinjinji. (1 Yoh. 4:19) Baibulo linaonga ira: “Andamelani wa Mulungu moi liye unoza auwandameleni.” (Yak. 4:8) Ndiye kodi chin’ni inanikami-e ira niroromelenga vinjinji ira Yehova unoniomeluwana?

KODI CHIN’NI INANIKAMI-E IRA NIROROMELENGA VINJINJI VYOI YEHOVA UNONIOMELUWANA?

6. Kodi ninafuneya pempelelanga n’ni ira kanikaikelenga vyoi Yehova unoniomeluwana?

⁶ Mupempelenga wa Yehova thawi detene moi mumuwandelenga vyevyo munafuna nyo, nayolinga yoi aukami-engani vwechecha ira unouomeluwanani (Luka 18:1; Arom. 12:12) Mupempelenga wa Yehova moweli-eda weli-eda dambo lililetene, ira aukami-engani ira muvionenga ngati mwemo munauonelani liye. Muthu akaana murima oviimba mulandu, unokoza vionanga ira Yehova kanamuomeluwana. Koma iyo kanidiwalenga ira Yehova ngumulukulu kwaranya mirima di-u. (1 Yoh. 3:19, 20) Yehova unouiziwani pama kwaranya mwemo munaviiziwela nyo, moi unoona makalelo apama anayo mun’na nyo, anayo kamunakwakwi-e aona. (1 Sam. 16:7; 2 Lim. 6:30) Eno ‘mumukutulelenga vyetene vya m’murimani mwinyu,’ vomufotokozela mwemo munavwela nyo, koma teto muvepa ira aukami-eni ira muroromelenga ira liye unouomeluwanani. (Sal. 62:8) Vanduli vopempela, mupangenga vyongo mogwilizana na mapempelwinyu vo-indi-eda chito makundo o-arelala.

7-8. Kodi buku la Masalimo linanisimikizela avi ira Yehova unoniomeluwana?

⁷ Muroromelenga vyevyo Yehova unaonga liye zela m’Baibulo. Vo-indi-eda chito zimwae owela, Yehova oowakami-a olemba Baibulo ira kafotokoze vyoona vyokuza liye. Kaganizelani mwemo Davide mwafotokozele liye pama likundo lotonyi-eda ira Yehova unoniomeluwana. Liye aongile ira: “Yehova uli vakwikwi na athu otweya murima. Liye unovulumucha athu anayo kakumudwile.” (Sal. 34:18, na mawu a m’pedi.) Eno mwakumudwa kamuvionenga ira muli ekinyu. Chifukwa Yehova unolonjeza ira vathawi ngati inela , pavevo unakala liye vakwikwi vinjinji na nyo, chifukwa unoiziwa ira chithawi ineyo munafuneelanyo vinjinji likami-edo lae. Musalimo limo-i, Davide alembile ira: “Sungani misodi danga mutumba linyu laikopa.” (Sal. 56:8) Yehova unoniona nakumudwa moi vinomukuza aona ira ninaavuteya. Ninokoza onga ira Yehova unosunga misodi di-u, moi unodiona ira tidamtengo wavadimu vinjinji. Wale muthu aendanga ulendo olapa, oo-indi-eda chito tumba laikopa vo-elamo ma-inje na yolinga yoi aa-indi-edenga chito vaulendwae, moi tumbalo lookala lofuneya vinjinji wa liye. Mofwanafwana na muthu unola, Yehova unoona misodi di-u ira tidamtengo wavadimu vinjinji moi unodisunga mutumba lae laikopa. Va Salimo 139:3, Ninowelenga ira: “[Nyo Yehova] munoiziwa iliyetene ineyo ndinapanga miyo.” Yehova unoona iliyetene ineyo munapanga nyo koma unoganizela vinjinji vyapama vyevyo munapanga nyo. (Aheb. 6:10) Chifukwa liye unoyamikela vinjinji vyetene vyevyo munaesaesa nyo panga na yolinga yoi mumusangalase.a

⁸ Yehova a-indi-edanga chito mavesi a m’Baibulo ngati anala unakala ngati unaniwandela ira: “Ndinafuna ira uiziwe ira ndinouomeluwana vinjinji.” Koma monga mwemo nionele iyo umambeelelo wakhanila, Satana unafuna ira niroromelenga ira Yehova kananiomeluwana ngakale vang’ono. Eno akala nyo thawi dimo-i munakaikela vyoi Yehova unoumeluwanani, muvifukenga ira, ‘Kodi miyo ndinafuneya muroromelanga mbaani? Kodi ndimuroromelenga Satana unoyo “ngonama” kapena ndimuroromelenga “Yehova unoyo ngwa choonadi”?’ — Yoh. 8:44; Sal. 31:5.

9. Kodi Yehova unawasimikizela n’ni athu anayo unaaomeluwana liye? (Ekisodo 20:5, 6)

⁹ Muganizelenga mwemo Yehova munavwela liye amo-iwa kamutonyi-eda chikondi. Mwaisazo, kaganizelani vyevyo Yehova amuwandelile liye Mose na Aisaraeli. (Welengani Ekisodo 20:5, 6.) Yehova oolonjeza ira unoza apitilize tonyi-eda chikondi yororomeleya wa athu anayo kanamuomeluwana. Mawu anala kanatonyi-eda ira Mulungwi-u unoyo ngororomeleya, unowaomeluwana athu anayo kanamuomeluwana. (Nehe. 1:5) Ndiye mwakaikelanga akala Yehova unauomeluwanani, muvifukenga ira, ‘Kodi Miyovano ndinomuomeluwana Yehova?’ Ndiye vanduli viwa muganizelenga likundo ili: Akala munamuomeluwana Yehova moi munoesaesa panga vyongo vyomusangalasa, kamukaikelenga ira naliyene teto unouomeluwanani vinjinji. (Dan. 9:4; 1 Akor. 8:3) Vyevi vinatapulela ira akala munamuomeluwana Yehova, kavili chifukwa yokaikela ira liye unouomeluwanani. Muroromelenga na murima wetene ira liye unouomeluwanani, moi kanaza au-iyani ngakale vang’ono.

10-11. Kodi Yehova unafuna ira nionenga avi mphaso ya dipo? (Agalatiya 2:20)

¹⁰ Muganizelenga vya mphaso yamtengo wavadimu ya dipo. Yehova oopeleka mphaso ilukulu vinjinji wa athu, vevo atumizile liye mwanae Yesu Kristu vailambo yavati za nikhwela. (Yoh. 3:16) Koma kodi mphaso inela kauva-ileni nyoovo vaekinyu? Ee. Kaganizelani vyevyo vyamuireele namarumiwa Paulo. Liye aanakale Mkristu oopanga machimo alukulualukulu moi angakalile Mkristu, oolakwi-ave vyongo vimo-i. (Arom. 7:24, 25; 1 Tim. 1:12-14) Koma liye oona ira Yehova oopeleka mphaso ya dipo wa liye eka. (Welengani Agalatiya 2:20.) Eno muumbuwelenga ira Yehova ngunoyo amuwandelile Paulo ira alembe vyevi. Moi vyetene vyevyo vyalembiwe m’Baibulo, vyalembiwe ira vinilangize. (Arom. 15:4) Mawu a Paulwala kanatonyi-eda ira Yehova unafuna ira muonenga dipo ngati mphaso ineyo auva-ileni liye vaekinyu. Mwaonanga dipo mundila inela, munerenga ona ira Yehova unouomeluwanani.

¹¹ Ninomuyamikela vinjinji Yehova chifukwa yoi oomutumiza mwanae Yesu vailambwela ira aze anikhwele. Chifukwa imo-iwa ineyo Yesu azele liye, yali za awandela athu choonadi yokuza Mulungu. (Yoh. 18:37) Mwaisazo, Yesu oofunji-a ira Yehova unowaomeluwana vinjinji a-imae.

YESU UNONIKAMI-A IRA KANIKAIKELENGA IRA YEHOVA UNONIOMELUWANA

12. Chifukwa n’ni kaninafuneya kaikelanga vyevyo Yesu afotokozile liye vyokuza Yehova?

¹² Yesu angali vano vailambo yavati, oowafunji-a athu makalelo apama a Yehova. (Luka 10:22) Iyovano kaninakaikela vyongo vyetene vyokuza Yehova vyevyo Yesu afunji-ile liye, chifukwa liye ookala udimu wa thawi indendai kwaranya muthu uliwetene. (Akol. 1:15) Liye oona mwemo Yehova mwatonyi-edela liye ira oowaomeluwana a-imae ororomeleya. Ndiye kodi Yesu angali vailambo yavatila aakami-ile avi athu amo-iwa ira karoromelenga vyoi Yehova unowaomeluwana?

13. Kodi Yesu unafuna ira nimuonenga avi Yehova?

¹³ Yesu unafuna ira nimuonenga Yehova ngati mwemo liye munamuonela liye. M’mabuku a Uthenga Wapama, Yesu oomuromola Yehova ira “Baba” maulendo okwaranya 160. Moi aonganga na o-arelae, liye oomeluwa indi-eda chito mawu oyi “Babinyu” kapena “Babinyu” waudimu.” (Mat. 5:16; 6:26) Yesu aanaze vailambo yavatila, atumiki ororomeleya a Yehova koo-indi-eda chito mawu oyi, ‘Wakopolo detene,’ ‘Wamudimudimu’ koma teto oyi ‘Mulengi Mulukulu’ voonga vya Yehova. Koma thawi dinjinji Yesu oo-ndi-eda chito mawu oyi ‘Baba,’ vofuna tonyi-eda ira Yehova unowaomeluwana vinjinji atumikae ngati mwemo baba wachikondi munaomeluwana liye a-imae. Tiyemoni nione maulendo men’li anayo Yesu ai-ndi-edile liye chito mawu oyi “Baba.”

14. Kodi Yesu atonyi-edile avi ira uliwetene wa iyo ngwamtengo wavadimu wa Babi-u waudimu? (Mateyu 10:29-31) (Onani teto ithuzithuzi.)

¹⁴ Tiyemoni niambeele kambilana mawu a Yesu ofwanyeya va Mateyu 10:29-31. (Welengani.) Mbalame ding’onong’ono kadinawande mulambela Yehova. Koma Babi-u waudimu unoona ira mbalame dedi tidamtengo wavadimu vinjinji moi unoiziwa yamorela vati. Ndiye akala Yehova unaona ira mbalame dedi tidamtengo wavadimu vinjinji, uli avi atumikae ororomeleya anayo kanamulambela chifukwa yomuomeluwana? Yesu oonga teto ira Yehova unoiziwa injiva wa sisi lelo lili m’muruni mwi-u. Ndiye akala Yehova unaiziwa vyongo ving’onong’ono vyokuza iyovano, kanikaikelenga ira unoniomeluwana. Yesu unafuna ira nikale osimikiza koma teto niroromelenga ira uliwetene wa iyo ngofuneya vinjinji wa Babi-u waudimu Yehova.

15. Kodi mawu a Yesu ava Yohani 6:44 kananiwandela vyoi avi vyokuza Babi-u waudimu?

¹⁵ Tiyemoni nione thawi imo-iwa vevo Yesu a-indi-edile liye chito mawu oyi “Baba.” (Welengani Yohani 6:44.) Babinyu waudimu ngunoyo aukokileni koma teto ukami-ani ira muiziwe choonadi. Koma chifukwa n’ni aukokileni? Chifukwa oona makalelo apama anayo kali m’murimani mwinyu. (Vyo. 13:48) Vevo Yesu aonga liye mawu anayo kali va Yohani 6:44, vinaoneya ira afotokoza vyevyo Yeremiya alembile liye vyevyo vili mu lemba losogolela khanila. Valemba leli, Yehova ooawandela athwae ira: “Ndiukokela wa miyo na chikondi yororomeleya, [kapena ira ndinopitiliza utonyi-eda chikondi yororomeleya].” (Yer. 31:3; Yerekezelani na Hoseya 11:4) Kodi mawu anala kanatapulela n’ni? Babinyu waudimu, thawi detene unoona makalelo apama mwa nyo anayo kamunaaona.

16. (a) Kodi ninaonge ira Yesu unaniwandela vyoi avi, nanga chifukwa n’ni kaninafuneya kaikelanga? (b) Chifukwa n’ni ninafuneya roromelanga vinjinji ira Yehova ngu Babi-u wachikondi? (Onani bokosi loi “Baba Unoyo Etene Iyene Ninafuneela Iyo.”)

¹⁶ Vevo Yesu afotokoza liye ira Yehova ngu Babi-u, vyali ngati unaonga ira: “Yehova kai Baba wa miyo meka, koma nanyen’ne teto ngu Babinyu. Moi ndinousimikizelani ira unouomeluwanani vaekinyu.” Eno akala thawi dimo-i munakaikela vyoi Yehova unouomeluwani, muvifukenga ira ‘Kodi chi zelu kaikelanga mwana wa Mulungu unoyo unamuiziwa pama Babae koma teto unoyo unaonga vyoona thawi detene?’ — 1 Pe. 2:22.

MULIMBI-ENGA IROROMELO INYU

17. Chifukwa n’ni ninafuneya esaesa ira kanikaikelenga vyoi Yehova unoniomeluwana?

¹⁷ Ninafuneya panga vyetene vyevyo vinawande iyo nayolinga yoi nilimbi-enga iroromelo yi-u, ira kanikaikelenga ira Yehova unoniomeluwana. Monga mwemo nionele iyo mukhanila, Satana unoyo ngu mdani owenjela unopitiliza esaesa ira anipangi-e ira ni-iye mutumikela Yehova. Vofuna fooki-a iroromelo yi-u, Satana unopitiliza esaesa nipangi-a ira niganizenga ira Mulungu kananiomeluwana. Koma kanilole ira Satana anifooki-e nonilepeli-a mutumikela Yehova. — Yobu 27:5.

18. Kodi ninapange avi ira niroromelenga vinjinji vyoi Yehova unoniomeluwana?

¹⁸ Ira kamukaikelenga vyoi Yehova unouomeluwanani, pitilizani pempela wa Yehova nayolinga yoi aukami-eni ira muvionenga ngati mwemo munauonelani liye. Teto muganizelenga vyokuza olemba Baibulo anayo kafotokozile vyokuza chikondae yororomeleya. Muganizelenga mwemo unavwela liye athu amo-iwa kamutonyi-eda chikondi, vale naliyene unowatonyi-eda chikondi. Muganizelenga teto vifukwa vyevyo vinaupangi-ani ira muonenga ira dipo chi mphaso ineyo auva-ileni liye vaekinyu. Muroromelenga teto mawu a Yesu oyi Yehova ngu Babinyu. Ndiye muthu m’mo-iwa aza aufukani ira, “Kodi Yehova unouomeluwanani?” Munoza musomede molimba murima ira, “Ee unondiomeluwana vinjinji, moi dambo lililetene ndinoesaesa ira ndimutonyi-edenga ira ndinomuomeluwana.”