“Itanani Andimuwa”

1. Kodi Yehova unatonyi-eda avi ira unoona ira khosa dae ti damtengo wavadimu vinjinji?

YEHOVA unoona ira khosa dae tidatengo wavadimu vinjinji. Moi liye oodigula na magazi a Yesu teto oopeleka udindo wa andimuwa amupingo ira kadisamalelenga. (Vyo. 20:28) Mulungu unafuna ira khosa dae disamaleliwenga pama koma teto mwachikondi. Mosogoleliwa na Kristu Yesu, andimuwa kanolimbikisa abali na arongoliwa anayo ti khosa, koma teto akami-a ira kakalengave ororomeleya wa Yehova. — Yes. 32:1, 2.

2. Kodi Yehova unapanga chidwi vinjinji na mbaani? (Ezekiyeli 34:15, 16)

² Yehova unoomeliwana vinjinji khosa dae detene, koma unosamalela mwavadela vinjinji khosa dedo dinafuneela likami-edo. Vo-indi-eda chito andimuwa, liye unosamalela atumikae anayo kanabulela mwauzimu. (Welengani Ezekiyeli 34:15, 16.) Komave liye unafuna ira etene iyene nivepenga likami-edo vevo ninafuneela iyo. Enjedela vomuvepa Mulungu ira anikami-e, vathawi ngati dedi nivepenga teto likami-edo wa “abusa na aphuzisi” mupingo. — Aife. 4:11, 12.

3. Kodi ganizela udindo unoyo andimuwa kanaathu kokami-a moi avi?

³ Mukhanila, ninoona vyevyo Mulungu upangile liye vyoi andimuwa kakami-enga atumikae anayo kafookile. Ninofwanya teto vyosomeda vya vyofuka vyo-arelavi: Kodi pivathawi iivi vevo ninavepe iyo andimuwa ira kanikami-e? Chifukwa n’ni ninafuneya panga eno? Nanga andimuwayo kananikami-e avi? Ngakale usamwali-u na Yehova wangali olimba, vyosomeda vya vyofuka vyevi vinokoza nikami-a ira niyamikelenga vyevyo Yehova upangile liye vyoi anikami-enga. Moi dambo limo-i ninoza nivulumuche moywi-u.

KODI PIVATHAWI IIVI VEVO “NINAAITANE IYO ANDIMUWA”?

4. Chifukwa n’ni ninaonge ira marenda oromoliwa va Yakobo 5:14-16, 19, 20 mba marenda auzimu? (Onani teto vithuzithuzi.)

⁴ Vofotokoza vyevyo Mulungu upangile liye vyoi andimuwa kanikami-enga nafooka, ofunjeda Yakobo oofuka ira: “Kodi vikala uliwetene unoyo unabulela vaari vinyu? Aitane andimuwa amupingo.” (Welengani Yakobo 5:14-16, 19, 20.) Khanila inatonyi-eda ira Yakobo aonga vya marenda auzimu. Mwaisazo, obuleloyo oowandeliwa ira aitane andimuwa amupingo, ookala dokotala. Moi marendayo kanaoneya ira mbauzimu chifukwa ira obuleloyo achile, unafuneela kululukiwa machimwae. Vyongo vimo-i vyevyo vinafuneya ira muthu unoyo unabulela mwauzimu achile, vinofwanafwana na vyevyo muthu unoyo unabulela marenda enieni unafuneela liye panga. Mwaisazo, nabulela ninofuneya dowa gumana na dokotala, nomufotokozela mwemo ninavwela iyo koma teto arela malangizwae. Mofwanafwana na vyevi, nabulela mwauzimu ninafuneya dowa wa andimuwa, nowafotokozela mwemo vyongo vililiathu koma teto arela malangizo a m’Malemba anayo kananiva-eathu.

5. Kodi ninaiziwe avi ira niambeela bulela mwauzimu?

⁵ Va Yakobo chaputala 5, ninolimbikisiwa ira nidowenga wa andimuwa nazindikila ira mwandila imo-iwene usamwali-u na Yehova uwambeela sokonezeya. Vinokoza kala pama achela likami-edo naanapange vyongo vyevyo vinasokoneze usamwali-u na Yehova. Moi ninafuneya visaelanga moona murima. Malemba kanonichenjeza ira kai vyorucha vipusi-anga noonanga ira usamwali-u na Yehova uli pama. (Yak. 1:22) Vyevi pivyevyo teto vyaaireele Akristu a wu Sade, moi Yesu oowachenjeza ira Yehova kaasangalala naaluwa. (Chiv. 3:1, 2) Ndila imo-i ineyo ninaiziwele iyo mwemo moywi-u wauzimu uliliathu ku erekezela tindi lelo nina iyo volambela Yehova vathawiila na mwemo napangela iyo mundulimu. (Chiv. 2:4, 5) Ninokoza vifuka ira: ‘Kodi ndinoomeluwa welenga Baibulo koma teto ganizela vyevyo ndiwelengile miyo ngati vowambeela? Kodi ndinopitiliza kozeela misonkano koma teto fwanyeyavo thawi detene? Kodi ndino-indana chito yolaleela mwatindi? Kodi vathawiila ndinoganizela vinjinji vya vyongo vyosangalasa koma teto ndalama kwaranya wale? Akala vyosomeda va vyofuka vyevi pivyoi ee, vinokoza tonyi-eda ira niambeela fooka mwauzimu moi akala kaninapangevo yongo mombaraanya, vyongo vinokoza takala vinjinji. Eno akala kaninawande limbana na vuto li-ulo va eki-u kapena akala nipangile wale vyongo vyosempana na makundo a Mulungu, ninokoza panga pama vepa andimuwa ira kanikami-e.

6. Kodi muthu unoyo upangile chimo lilukulu unafuneya panga n’ni?

⁶ Muthu unoyo upangile chimo lilukulu lelo linamupangi-e ira achosiwe mupingo, unafuneya fotokozela andimuwa. (1 Akor. 5:11-13) Muthu uliwetene unoyo upangile chimo lilukulu unafuneya kami-iwa ira asakaede usamwalae na Yehova. Ira Yehova anikululukele vo-indi-eda chito dipo, ninafuneya ‘panga vyongo vyotonyi-eda lapa.’ (Vyo. 26:20) Vyongo vyevyo vinatangani-avo dowa afotokozela andimuwa akala nipangile chimo lilukulu.

7. Kodi ngu mbaani teto unoyo unafuneya kami-iwa na andimuwa?

⁷ Andimuwa katinakeda kami-a athu anayo kapangile machimo alukulu oka, koma kanokami-a teto athu anayo kafookile mwauzimu. (Vyo. 20:35) Mwaisazo, mwina nyo munokoza ona ira munolepela limbana na vilakolako vyotakala. Mwina vinokoza kala vyorucha vinjinji akala vowambeela mwaanafunjede choonadi mwa-indi-eda chito mirombwe dosokoneza ugogo, onela vyolava koma teto panga iwerewere. Kamunafuneya limbana na mavuto anala vaekinyu. Munokoza sakula dowa mufotokozela ndimuwa unoyo unavuruwane nkhawa dinyu, uva-ani malangizo okami-a koma teto usimikizelani ira munokoza musangalasanga Yehova vogonji-a vilakolako vyotakala. (Nam. 4:12) Akala mukumudwile chifukwa yoi munopitiliza kaanave vilakolako vyotakala, andimuwa kanoza kauumbucheni ira unoyo ngu umboni otonyi-eda ira nyo munoona ira usamwalinyu na Yehova ngofuneya vinjinji moi munopewa murima oviroromela. — 1 Akor. 10:12.

8. Kodi mba machimo avi anayo kaninafuneya afotokozela andimuwa?

⁸ Kai yongo iliyetene ineyo nilakwi-ile iyo ineyo ninafuneya iyo dowa afotokozela andimuwa. Nierekeze ira moowonga mawu ovoreya vinjinji wa m’bali kapena murongola, kapena moolunduwa vinjinji. M’malo modowa mufotokozela ndimuwa, vinokala pama arela malangizo a Yesu anayo kanaukami-eni ira mukale teto vamurendele na m’bali kapena murongoloyo. (Mat. 5:23, 24) Munokoza teto saela m’mabukwi-u vyokuza makalelo monga faasa, leza murima noviruni-a nayolinga yoi muze muwatonyi-ede usogolo. Komave akala mulepelile mali-a vuto linyulo munokoza muvepa ndimuwa nayolinga yoi aukami-eni. Mukalata ineyo alembele liye Akristu a wu Filipi, namarumiwa Paulo oomuvepa m’bali m’mo-iwa unoyo kaamuromolile zina, ira akami-e Eodiya na Suntuke ira kamali-e oovwanana uwa. Na nyen’ne teto andimuwa a mupingwinyu kanokoza ukami-ani vinjinji. — Afil. 4:2, 3.

CHIFUKWA N’NI NINAFUNEYA ITANA ANDIMUWA?

9. Chifukwa n’ni kaninafuneya lola ira nyaswa unilepeli-e vepa likami-edo wa andimuwa? (Miyambo 28:13)

⁹ Vanofuneya iroromelo koma teto limba murima ira nivepe likami-edo napanga chimo lilukulu koma teto naonanga ira ninolepela wina va kondo yolimbana na vyofooka vi-u. Kaninafuneela lola ira nyaswa unilepeli-e ira andimuwa kanikami-e. Chifukwa n’ni ninaonga eno? Ninaonga eno chifukwa Yehova ooniva-a andimuwa ira kanikami-enga kala vausamwali olimba na liye. Eno nafotokozelanga andimuwa mavutwi-u ninotonyi-eda ira ninomuroromela koma teto ninomuvwela. Koma teto ninozindikila ira ninofuneela likami-edo lae ira nipitilize panga vyapama. (Sal. 94:18) Moi napanga chimo, Mulungu unoza anipangele chifundo akala nilapile no-iya vyotakalavyo. — Welengani Miyambo 28:13.

10. Kodi inaireye chin’ni akala ninabise machimwi-u?

¹⁰ Nafotokozelanga andimuwa vya chimo li-u, Yehova unonikululukela moi ninokoza kala vausamwali olimba na liye. Koma nabisa chimolo mavutwi-u kanoulukula. Davide angabisile machimwae usamwalae na Yehova oosokonezeya, moi liye ookaana nkhawa koma teto oobulela. (Sal. 32:3-5) Mofwanafwana na marenda enieni koma teto poreya, marenda auzimu kanoulukula akala muthu kawachelile likami-edo lofwanelela. Yehova unovwechecha vyevi, eno unonivepa ira ‘nikambilane na liye’ vo-indi-eda chito ndila ineyo agarati-ile liye yonikami-a ira nikale teto vausamwali na liye. — Yes. 1:5, 6, 18.

11. Kodi bisa machimo unakuze avi athu amo-iwa?

¹¹ Bisa machimo unokoza pangi-a ira zimu wa Mulungu ulepelenga inda chito pama mupingo, moi vyevi vinokoza sokoneza murendele. (Aife. 4:30) Naiziwa ira muthu m’mo-iwa upanga chimo lilukulu, ninafuneya mulimbikisa ira aonge wa andimuwa.a Akala ninabise chimo la muthu m’mo-iwa ninokoza kaana mulandu wa Yehova. (Lev. 5:1) Muomeluwana Yehova unafuneya nilimbikisa ira niawandelenga andimuwa akala muthu m’mo-iwa upangile chimo. Nera eno ninokami-a ira pingo ukale owela koma teto muthu unoyo uchimwileyo unosakaeda usamwalae na Yehova.

MWEMO ANDIMUWA KANANIKAMI-ELAATHU

12. Kodi andimuwa kananikami-a avi?

¹² Andimuwa kanolangiziwa ira kakami-enga athu anayo kafookile mwauzimu. (1 Ates. 5:14) Akala mwalakwi-ile vyongo vimo-iviwa vyene, aluwa kanoza kaufukeni vyofuka vyevyo vinaakami-e iziwa maganizwinyu koma teto mwemo munavwela nyo. (Miya. 20:5) Pivyoona ira kai vyokweya afotokozela momasuwa andimuwa vyevyo vyaireile. Mwina munokoza lepela fotokoza chifukwa yonyaswa, ikalelo inyu, kapena wewo mwabaluwele nyo. Koma munokoza akami-a vinjinji akala munaafotokozele movweya pama. Kamukaena nkhawa ira vyevyo munaonge nyo vinokoza oneya ngati ‘kamunaganiza pama.’ (Yobu 6:3) M’malo mouweluzani mombaraanya, andimuwayo kanoza kaesaese uvuruwanani ira kaiziwe khani yetene kaanapeleke malangizo. (Miya. 18:13) Aluwa koozindikila ira weta nkhosa unofuna thawi yokwakwanela moi katinaembekezela ira vuto linyulo linokoza mala vokeda kambilana ulendo umo-i.

13. Kodi mapempelo aandimuwa koma teto malangizwiwa okumela m’Malemba kananikami-e avi? (Onai teto vithuzithuzi.)

¹³ Vokambilana na andimuwayo, aluwa katinaza kaupangi-ani ira muviimbenga mulandu vinjinji. M’malomwiwa, kanoza kaupempeleleni. Munokoza dabwa na mwemo pempelo liwa linaukami-eleniathu chifukwa “lino-inda chito mwakopolo vinjinji.” Likami-edo liwa linotangani-avo uzoli-ani “makura” muzina la Yehova. (Yak. 5:14-16) “Makura” anala kanaimelela choonadi yofwanyeya m’Mawu a Mulungu. Andimuwa kano-indi-eda chito Baibulo mwaluso ira kaulimbikiseni koma teto ukami-ani ira musakaede usamwalinyu na Yehova. (Yes. 57:18) Malangizo a m’Malemba anayo kanauva-eniathu kanokoza ukami-ani ira mukaena murima ofuna panga vyofwanelela. Zela mwa andimuwa anala, munokoza vwa Yehova auwandelangani ira: “Ndila chila. Endani mundila inela.” — Yes. 30:21.

14. Mogwilizana na Agalatiya 6:1, kodi andimuwa kanakami-a avi muthu unoyo ‘uwambeele volowela vandila yolakweya’? (Onani teto ithuzithuzi.)

¹⁴ Welengani Agalatiya 6:1. Akristu anayo ‘kaambeele volowela vandila yolakweya,’ kanakala ira katina-arela makundo olungama a Mulungu. Ndila yolakweya inela inokoza kala sakula vyongo molakweya kapena panga chimo lilukulu. Chifukwa ya chikondi, andimuwa ‘kanomukami-a muthuyo na zimu ofaasa.’ Mawu a Igiriki anayo kaamasuleleathu ira ‘kami-a’ kanofotokoza teto vyoweli-eda likuva lelo ligugumuwile na yolinga yoi muthuyo karangale. Dokotala waluso unoweli-eda likuvalo mundila yoi muthuyo kavwe voreya vinjinji. Mofwanafwana na vyevi, andimuwa kamukami-anga muthu unoyo ‘uwambeele volowela vandila yolakweya’ kanopanga vyevyo mundila yoi kavwe voreya vinjinji. Aluwa kanolangiziwa teto ira vopanga vyevi kanafuneya ‘samala, ovela ira naaluwene teto katiesiwe.’ Andimuwa kamukami-anga muthu kanozindikila ira naaluwene kai angwilo moi kanokoza lakwi-a vyongo. M’malo mokaana murima oweluza kapena vionanga ira mbavadimu vinjinji kapena olungama, aluwa kanoesaesa kala athu achifundo. — 1 Pe. 3:8.

15. Kodi ninafuneya panga n’ni akala nina vuto limo-i liwa lene?

¹⁵ Ninafuneya roromelanga andimuwa mupingo. Aluwa koofunji-iwa ira kasungenga visisi, kapelekenga malangizo voindi-eda chito makundo a Baibulo ookala maganizwiwa koma teto kanikami-enga ira nivilelenga mavuto. (Miya. 11:13; Agal. 6:2) Andimuwala kanokaana makalelo koma teto maluso o-iyana-iyana, koma ninafuneya kala omasuwa dowa gumana na ndimuwa uliwetene nokambilana na liye vyokuza vuto li-ulo. Koma kai pama ira naonga na ndimuwa m’moi nidowenga dowa vepa malangizo wa ndimuwa m’mo-iwa na yolinga yoi nifwanye ndimuwa unoyo unaniwandele vyoniomela. Napanga eno ninoza nikale ngati anayo kanakeda funa vwa “vyowaomela m’mabaru,” ookala ofuna ‘funji-iwa makundo olondola’ a Mawu a Mulungu. (2 Tim. 4:3) Nadowa wa ndimuwa dowa mufotokozela vya vuto li-u, liye unokoza nifuka akala niongile na ndimuwa m’mo-iwa koma teto malangizo anayo univa-ile liye. Ndimuwoyo teto unokoza tonyi-eda ira ngoviyevi-a vofukedela malangizo wa ndimuwa fwae. — Miya. 13:10.

UDINDO UNOYO ULIWETENE WA IYO UNA LIYE

16. Kodi uliwetene una udindo oyi avi?

¹⁶ Ngakale ira andimuwa kanoniing’anela monga khosa da Mulungu, aluwa katinaniwandela vyofwanelela panga. Ngu udindo wa muthu uliwetene vaeka kaana moyo ovipeleka wa Mulungu. Uliwetene unoza asomede mulandu wa Mulungu va vyevyo unaonga liye koma teto va vyevyo unapanga liye. Moi Mulunguyo unokoza nikami-a ira nikaleve ororomeleya wa liye. (Arom. 14:12) Eno m’malo moniwandela vyofwanelela panga, andimuwa kano-indi-eda chito mawu a Mulungu vofuna nikami-a iziwa maganizwae. Vo-arela malangizo a m’Baibulo, ninokoza funji-a ‘luso li-u loganiza’ ira nisakulenga vyoira mwazelu.— Aheb. 5:14.

17. Kodi ninafuneya simikiza murima panga n’ni?

¹⁷ Ngu mwai wamtengo wavadimu vinjinji kala khosa da Yehova. Yehova oomutumiza Yesu, unoyo ngu “m’busa wapama,” ira aze apeleke dipo nayolinga yoi nize nifwanye moyo oomala. (Yoh. 10:11) Yehova uno-indi-eda chito andimuwa mupingo vokwakwaneli-eda lonjezo lae loi: “Ndinoza ndiuva-eni abusa anayo kanapanga vyongo vyogwiliza na vyofuna vyanga moi kanoza kaukami-eni ira muiziwe vyongo vinjinji koma teto mukale ovwechecha vyongo.” (Yer. 3:15) Eno nafooka kapena bulela mwauzimu, kanizengelezenga aitana andimuwa ira kanikami-e. Eno tiyemoni nisimikize thawi detene ira niwachelenga likami-edo lokumela wa Yehova zela mwa andimuwa amupingo.