Vyevyo Ninaire Iyo Ira Mapepelwi-u Kakalenga Apama Vinjinji

1. Kodi Yehova unaawandela atumikae ira kairenga n’ni? (Onani teto ithuzithuzi.)

KODI ninadowe wambaani nafunanga malangizo koma teto limbikisiwa? Ninoiziwa yosomeda ya yofuka inela. Ninokoza pepela wa Yehova. Teto liye unoniwandela ira nipangenga vyevi. Unofuna ira nipepelenga wa liye “thawi detene.” (1 Ates. 5:17) Ninokoza pepela wa liye momasuwa koma teto muvepa ira anisogolelenga vambali iliyetene ya moywi-u. (Miya. 3:5, 6) Voi Yehova ngu Mulungu ova-a, liye kanani-elela malile a thawi ineyo ninapepele iyo wa liye.

2. Kodi ninatapanya n’ni mukhanila?

² Ninoona ira pepelo chimphaso yantengo wavadimu. Komave chifukwa yotanganisiwa mwina vinonirucha fwanya thawi yopepela. Kapena ninoona ira ninafuneela koza mapepelwi-u ira kakalenga ovweya pama. Pivyosangalasa ira Malemba kanonilimbikisa koma teto nisogolela vakhanila. Mukhanila, ninoona mwemo isazo ya Yesu inanikami-edeleathu ira nifwanyenga thawi yopepela. Ninoona teto vyongo 5 vyevyo ninaromole iyo m’mapepelwi-u ira kakalenga apama.

YESU OOFWANYA THAWI YOPEPELA

3. Kodi Yesu aiziwa n’ni vyokuza pepela?

³ Yesu ooiziwa ira Yehova unoona ira pepela kofuneya vinjinji. Aanaze vailambo yavatila, liye oowona Babae asomedanga mapepelo a a-iyana na alombwana ororomeleya. Mofwanafwani-a, Yesu ali vambali va Babae vevo aluwa kasomedaathu mapepelo okumela vati vamurima a Hana, Davide, Eliya koma teto athu amo-iwa. (1 Sam. 1:10, 11, 20; 1 Mam. 19:4-6; Sal. 32:5) Eno kai vyodabwi-a ira Yesu oowawandela ofunjedae ira kapepelenga vakwikwivakwikwi koma teto na iroromelo. — Mat. 7:7-11.

4. Kodi ninafunjeda n’ni wa Yesu vakhani yopepela?

⁴ Zela m’mapepelwae wa Yehova, Yesu oopeleka isazo yoi o-arelae ka-arelenga. Vathawi yetene ya utumikae, Yesu oopepela vakwikwivakwikwi. Liye afuneela fwanya thawi yoi apepele chifukwa thawi dinjinji akala otanganisiwa koma teto oorungunuwiwa na athu anjinji. (Malik. 6:31, 45, 46) Liye oovenya mamawa vinjinji ira akale vaeka nopepela. (Malik. 1:35) Vathawi imo-i oopepela ma-iyu wetene aanasakule vyoira vakhani yofuneya vinjinji. (Luk. 6:12, 13) Teto ma-iyu ogomi-eda amoywae, liye oopepela moweli-edaweli-eda voganizela mbali yomari-a ya utumikae vailambwela ineyo yali yorucha vinjinji. — Mat. 26:39, 42, 44.

5. Kodi ninamusazi-ede avi Yesu napepelanga?

⁵ Isazo ya Yesu inonifunji-a ira kaya ninatanganisiwa moi avi, ninafuneela fwanya thawi yopepela. Mofwanafwana na Yesu, mwina na-iyene ninokoza funeela venya mamawa vinjinji kapena gona mochedwa ira nifwanye thawi yopepela. Nairanga vyevi ninotonyi-eda ira ninoyamikela Yehova voniva-a mphaso ya vadelela. Murongola m’mo-i zina lae Lynne, unoumbuwelave mwemo akuziwile liye angaiziwile wathawi yowambeela vyokuza mwayi wa pepelo. Liye eere: “Ndangafunjedile ira ndinokoza onga na Yehova thawi liyetene, vyoondikami-a ira ndimuonenga monga Fwanga wavamurima teto ndoofuna ira mapepelwanga kakalenga apama.” Mookaikela pumwemo anjinji a iyo ninavwelanga iyo. Ndiye tiyemoni nitapanye makundo 5 ofuneya anayo ninaromole iyo m’mapepelwi-u.

MAKUNDO 5 OFUNEYA AROMOLA VOPEPELA

6. Mogwilizana na Chivumbuluso 4:10, 11, kodi Yehova ngofwanelela wachela n’ni?

⁶ Tamanda Yehova. M’masomphenya oiri-a chidwi, namarumiwa Yohani oowona andimuwa 24 udimu kalambelanga Yehova. Aluwa kootamanda Mulungu voiziwa ira ngofwanelela wachela ‘kopolo, ulemelelo na ulemu.’ (Welengani Chivumbuluso 4:10, 11.) Angelo ororomeleya kookaana vifukwa vyowairi-a tamanda nolemekeza Yehova. Aluwa kanakala limo-i naliye udimu moi koofiya vomuiziwa pama vinjinji. Kanoona teto makalelwae zela muvyoira vyae. Kaonanga mwemo Yehova munairela liye vyongo, vinowairi-a ira kamutamandenga. — Yob. 38:4-7.

7. Kodi ninamutamande Yehova va vifukwa vyiivi?

⁷ Na-iyene ninofuna mutamanda Yehova m’mapepelwi-u nofotokoza vyevyo ninawomeliwana iyo koma teto yamikela vyokuza liye. Mwawelenganga koma teto funjeda Baibulo, mushishenga fwanya makalelo anayo kanauriyelani vinjinji. (Yob. 37:23; Arom. 11:33) Era eno mumuwandelenga Yehova mwemo munavwela nyo chifukwa ya makalelwae. Ninokoza mutamanda teto chifukwa yonikami-a iyo koma teto abali na arongoli-u. Thawi detene liye unonisamalela koma teto niteteza. — 1 Sam. 1:27; 2:1, 2.

8. Kodi vimo-i mwavifukwa vyoniiri-a yamikela Yehova piivi? (1 Atesalonika 5:18)

⁸ Yamikela Yehova. Nikaana vifukwa vinjinji vyoniiri-a yamikela Yehova m’mapepelwi-u. (Welengani 1 Atesalonika 5:18.) Ninokoza muyamikela chifukwa ya vyapama vyevyo nin’na iyo. Moi mphaso iliyetene yapama inakumela wa liye. (Yak. 1:17) Mofwanafwani-a, ninokoza mutokoza chifukwa yailambo yoriyela koma teto vyongo vyoiri-a chidwi vyamuchilengedwe. Ninokoza muyamikela teto chifukwa yoniva-a moyo, banja, afwi-u koma teto idedi-edo. Ninofuna muyamikela Yehova chifukwa yonilola sangalala na usamwali wantengo wavadimu unoyo nin’na iyo na liye.

9. Chifukwa n’ni ninafuneela esaesa ira nimuyamikelenga Yehova?

⁹ Ninafuneela esaesa vinjinji ira niganizelenga vifukwa vyevyo vinaniiri-a ira nimuyamikelenga Yehova. Athu anjinji muilambwela mbo-oyamikela. Thawi dinjinji aluwa kanakeda ganizela vyevyo kanafunaathu, ookala vyevyo kanaireathu ira katonyi-ede yamikela vyevyo kan’naathu. Akala ninalandele maganizo anala, mapepelwi-u kanokoza kala okedanga vepa. Ira vyevi kaviniireele, ninafuneela esaesa kaana murima oyamikela vyetene vyevyo Yehova unaniirela liye. — Luk. 6:45.

10. Kodi yamikela wamukami-ile avi murongola m’mo-i ira avilele? (Onani teto ithuzithuzi.)

¹⁰ Murima oyamikela unokoza nikami-a ira nivilelenga mavuto. Kaganizelani vyevyo vyamuireele murongola m’mo-i zina lae Kyung-sook, vyevyo vyafotokoziwe mu Nsanja ya Olonda ya January 15, 2015. Liye oofwanyeya na khansa ya m’mapapu. Liye eere: “Vyevi vyoondikumudwi-a vinjinji. Ndoowona ira nditatila iliyetene moi ndoowova vinjinji.” Kodi chin’ni yamukami-ile vilela? Liye aongile ira mazulo uliwetene aanagone oodowa vamalo owaledela vadenga la nyumbae teto oopepela mokumi-a mawu noromola vyongo 5 vyevyo unayamikela liye vadambo lelo. Vyevi vyoomukami-a ira kakumbanyenga vinjinji teto vyoomulimbikisa ira amuwomeliwengana Yehova. Oowona mwemo Yehova munakami-edela liye atumikae ororomeleya kagumananga na mavuto teto oozindikila ira ninofwanya madaliso anjinji kwaranya mavuto anayo ninagumanana iyo. Mofwanafwana na Kyung-sook, nikaana vifukwa vinjinji vyomuyamikela Yehova ngakhale vevo ninagumana iyo na mavuto. Muyamikela vopepela unokoza nikami-a ira nivilele koma teto nipitilizeve kala osangalala.

11. Yesu angawelele udimu, chifukwa n’ni ofunjedae kafuneela kala olimba murima?

¹¹ Vepa Yehova ira anikami-e ira nilaleelenga molimba murima. Aanawelele udimu, Yesu ooumbucha ofunjedae ira kanafuneela irela umboni vya liye, “mu Yerusalemu, wu Yudeya wetene na wu Samariya, dowa fiya umagomi-edo ailambo yavati.” (Vyo. 1:8; Luk. 24:46-48) Vaanavire thawi indendai asogoleli Achiyuda koomu-inda namarumiwa Petulo na Yohani nowadowana Ukhoti Lilukulu la Ayuda moi koowalamula ira ka-iye laleela koma teto koowaophophi-a. (Vyo. 4:18, 21) Ndiye kodi Petulo na Yohani kairile n’ni?

12. Mogwilizana na Vyoira 4:29, 31, kodi ofunjeda kairile n’ni?

¹² Vowasomeda asogoleli Achiyuda anayo kaaophophi-a, Petulo na Yohani kaongile ira: “Weluzani ekinyu, akala uli ofwanelela vamaso va Mulungu vwela nyo kwaranya Mulungu. Koma iyo kanina-iye onga vyongo vyevyo navionile iyo novivwa.” (Vyo. 4:19, 20) Petulo na Yohani kangamasuliwe, ofunjedayo koopepela wa Yehova mogweli-a mawu ira aakami-e kwakwaneli-eda yofuna yae. Aluwa koopepela ira: “Lolani ira akapolwinyu kapitilize onga mawinyu molimba murima.” Yehova oosomeda pepelo lokumela vati vamurimali. — Welengani Vyoira 4:29, 31.

13. Kodi ninafunjeda n’ni vaisazo ya Jin-hyuk?

¹³ Ninokoza asazi-eda ofunjeda a Yesu vopitilizave laleela ngakhale vevo andimuwa a boma karuni-ileathu chitwi-u yolaleela. Kaganizelani isazo ya M’bali Jin-hyuk, unoyo amangiwe chifukwa yokoonda volowa usilikali. Angali mundende, liye oova-iwa chito yoi apelekenga yodja wa akaidi amo-i anayo kali mundende ya ekiwa. Koma kaaloliwa ira atapanyenganawo khani dimo-i tangani-avo dokuza Baibulo. Liye oopepela wa Yehova ira amukami-e kala olimba murima koma teto ira amukami-e fwanya ndila dowandelela amo-i imbarimbari va mpata uliwetene unoyo unafwanyeye. (Vyo. 5:29) Liye aongile ira: “Yehova oosomeda mapepelwanga vondikami-a kala olimba murima koma teto ndiva-a zelu ira ndiambeeli-e maphuzilo a Baibulo anjinji, anayo ndairi-a miyo wa 5 minisi mundende iliyetene. Vanduli vuwa ma-iyu ndoolemba makalata anayo ndava-a miyo akaidi afwanga dambo lo-arela.” Iyo teto ninokoza roromela ira Yehova unonikami-a ira nikwakwaneli-ede utumiki-u. Mofwanafwana na Jin-hyuk, na-iyene ninafuneela muvepa Yehova ira anikami-e kala olimba murima koma teto aniva-e zelu.

14. Chin’ni inanikami-e nagumananga na mavuto? (Salimu 37:3, 5)

¹⁴ Vepa Yehova ira anikami-e vilela mavuto. Anjinji a iyo ninogumana na mavuto okuza thanzi kapena maganizo, khwa wa athu anayo ninaawomeliwana iyo, mavuto a m’banja, zuzumi-iwa kapena teto mavuto amo-i. Teto vyongo monga mulili koma teto khondo vipangi-a ira vikale vyorucha vinjinji limbana na mavuto anala. Eno mupepelenga wa Yehova mokumela vati va murima. Mumuwandelenga vyevyo vinaireya va moywinyu ngati mwemo munairele nyo na fwinyu wavamurima. Muroromelenga ira Yehova “unoza airevo yongo.” — Welengani Salimu 37:3, 5.

15. Kodi pepelo linanikami-e avi vilela chisauso? Pelekani isazo.

¹⁵ Limbi-eda pepela unokoza nikami-a ‘vilela chisauso.’ (Arom. 12:12) Yehova unoiziwa vyevyo vinaireela atumikae moi unovwa “kuwa uwa wovepa likami-edo.” (Sal. 145:18, 19) Mpainiya m’mo-i wachaka 29, zina lae Kristie, oowona ira vyevi pivyoona. Mo-oyembekezeleya, liye oowambeela bulela marenda alukulu. Vyevi vyoomukumudwi-a vinjinji. Vanduli vuwa oovwa teto ira am’mae koofwanyeya na marenda oophi-a. Kristie aongile ira: “Ndoopepela wa Yehova mokumela vati va murima ira andiva-e kopolo ira ndiwande vilela dambo lililetene. Thawi detene ndooesaesa panga vyongo vyokuza lambela monga fwanyeya va misonkano koma teto funjeda vameka.” Liye oowenjedela ira: “Pepelo loondikami-a vathawi yorucha vinjinji. Ndooiziwa ira thawi detene Yehova uli na miyo, moi vyevi vyoondimiyali-a vinjinji. Ngakhale ira mavuto okuza thanzi langa katimalile thawi ineyo, Yehova oosomeda mapepelwanga vondiva-a murendele wa m’murima.” Kanidiwalenga ira “Yehova unoiziwa vulumucha athu ovipeleka wa liye kakala va mavuto.” — 2 Pe. 2:9.

16. Chifukwa n’ni ninafuneela kami-iwa na Yehova ira nilimbane na vyoshisha?

¹⁶ Vepa Yehova ira anikami-e pewa vyoshisha. Voi kanili angwilo, thawi dinjinji ninolimbana na murima ofuna panga vyotakala. Satana unoesaesa panga vyetene vyevyo unawande liye vonipangi-a ira nivuteyenga panga vyofwanelela. Ndila imo-i ineyo unairela liye vyevi kusokoneza maganizwi-u vo-indi-eda chito vyosangalasa vyotakala. Vyera eno ninowambeela ganizela vyongo vyotakala vyevyo vinapangi-e ira kanikale owela vamaso va Yehova koma teto niire chimo lilukulu. — Malik. 7:21-23; Yak. 1:14, 15.

17. Namuvepa Yehova ira anikami-e, kodi ninaire n’ni ira niirenga vyongo mogwilizana na vyevyo nimuvepile iyo? (Onani teto ithuzithuzi.)

¹⁷ Ninafuneela kami-iwa na Yehova ira niwande limbana na maganizo ofuna panga vyotakala. M’pepelo lae laisazo, Yesu ooromolamo likundo loi: “Kamunivolochi-e m’mavuto, koma muniwaki-e wa otakaloyo.” (Mat. 6:13) Yehova unofuna nikami-a koma ninafuneela muvepa ira anikami-e. Ninafuneela teto panganga vyongo mogwilizana na mapepelwi-u. Ninokoza teto panga vyongo vimo-i vyevyo vinanikami-e pewa maganizo na makundo otakala anayo kali ofala muilambo ya Satanela. (Sal. 97:10) Welenga koma teto funjeda Baibulo unokoza nikami-a ira niganizelenga vyongo vyapama. Fwanyeya vamisonkano koma teto indana chito yolaleela unokoza titi-eda maganizwi-u. Nera eno, Yehova unonilonjeza ira kanaza alola ira nishishiwe fiya voi kaninawande vilela. — 1 Akor. 10:12,13.

18. Vakhani ya pepelo, kodi etene iyene ninafuneela panga n’ni?

¹⁸ Etene iyene ninafuneela pepelanga vinjinji kwaranya wale ira nikaleve ororomeleya m’malambo omari-a oruchala. Dambo lililetene mufwanyenga thawi yoi mupepele kumela vati vamurima. Yehova unafuna ira ‘nimuwandelenga vyam’murimani mwi-u’ m’pepelo. (Sal. 62:8) Mumutamandenga Yehova teto mumuyamikelenga chifukwa ya vyetene vyevyo unaira liye. Mumuvepenga ira aukami-eni kala olimba murima volaleela. Mumuchondelelenga ira aukami-eni limbana na mavuto a tundu uliwetene koma teto vyoshisha vilivyetene vyevyo munagumanana nyo. Kamulolenga ira iliyetene kapena uliwetene aulepeli-eni pepela wa Yehova thawi detene. Koma kodi Yehova unasomeda avi mapepelwi-u? Ninoza nitapanye yofuka yofuneya inela mukhani yo-arela.