Mawu Aumapeto
1. Kodi Babulo Mulukulu Ninamuiziwe Avi?
Kodi ninaiziwa avi ira “Babulo Mulukulu” unaimelela vipembezo vyetene vyonama? (Chivumbuluso 17:5) Kaonani makundo ala:
Unofwanyeya vailambo yetene yavati. Baibulo linaonga ira Babulo Mulukulu ugaratile vadimu va ‘makamu na vilambo’ teto ‘unolamulela mamwene a ilambo yavati.’ — Chivumbuluso 17:15, 18.
Liye kanakale gulu landale kapena loira vya malonda. Vili eno chifukwa “mamwene a ilambo yavati” na “amalonda oendaenda,” katinaza kaonongiwa vathawi ineyo Babulo Mulukulu unaze liye awonongiwanga. — Chivumbuluso 18:9, 15.
Unopangi-a athu roromela vyonama vyokuza Mulungu. Liye unairiwa hule chifukwa yoi unopanga mgwilizano na maboma na yolinga yoi afwanye ndalama na vyongo vimo-i vyomuomela. (Chivumbuluso 17:1, 2) Uno-olocha athu a mitundu detene teto uphi-a athu anjinji. — Chivumbuluso 18:23, 24.
2. Kodi Mesiya Aoneele Alini?
Baibulo loolonjeza ira Mesiya unoza aoneele vaza vavira milungu 69. — Welengani Daniyeli 9:25.
Kodi milungu 69 daambeele alini? Daambeele mu chaka ya 455 B.C.E. Vathawi inela Bwanamkubwa Nehemiya oofiya wu Yerusalemu ira ‘akoze nomanga nawili’ mzindoyo. — Daniyeli 9:25; Nehemiya 2:1, 5-8.
Kodi milungu 69 dalandile thawi indendai moi avi? M’maulosi amo-i a m’Baibulo, dambo limo-i linaimelela chaka imo-i. (Numeri 14:34; Ezekiyeli 4:6) Eeno, mulungu umo-i unaimelela chaka 7. Mu ulosila milungu 69 dinaimelela chaka 483 (69 x 7).
Kodi milungu 69 damalile alini? Nawelengela chaka 483 ambeela mu chaka ya 455 B.C.E., vinonifii-a mu chaka ya 29 C.E.a Chaka inela chineyo Yesu abadiziwe liye nokala Mesiya. — Luka 3:1, 2, 21, 22.
3. Ndila Dokami-edela Obulela Dokuza Magazi
Viikala ndila dimo-i dokami-edela obulela doi madokotala kanafuneyelanga indi-eda chito magazi a muthu unoyo unabulela. Koma dimo-i mwa ndiladi kai dololeya wa Akiristu. Ndiladi, kupeleka magazi kapena indi-eda chito magazi a muthu unabuleloyo anayo kasungiwe vodedi-eda ira kamupange opaleshoni. — Dotoronomo 15:23.
Komave viikala ndila dimo-i dedo dinakale dololeya wa Mkiristu. Ndiladi, kulinga, sefa magazi, nyungusula magazi, indi-eda chito machini ovulumuchela magazi kapena machini anayo kana-inda chito ngati murima na mapapu vathawi yopanga opaleshoni. Mkiristu uliwetene unafuneela sakula eka mwemo madokotala kana-indi-edeleathu chito magazaye vevo kanamupangaathu opaleshoni, mulinga magazi kapena vathawi ineyo kanamuva-aathu likami-edo limo-i liwa lene. Dokotala uliwetene unokoza indi-eda chito ndila dedi mo-iyana na dokotala m’mo-iwa. Eno Mkiristu unafuneela ambeela saela ira aiziwe mwemo dokotalaye una-indi-edele liye chito magazaye aanamupange opaleshoni, mulinga kapena muva-a likami-edo lililetene. Ganizelani vyofuka vi:
Kodi magazanga amo-iwa kanoza kafuneele ambeela aperucha muthuthu langa moi mwina kanoza ka-iye enda wathawi yoyeva? Vyera eno, kodi iguguda murimanga inoza indilole ona ira magazi anala chimbali ya thuthu langa moi katinafuneela ira ‘katatiliwe vati’? — Dotoronomo 12:23, 24.
Nanga bwanji akala vevo kanandiva-aathu likami-edo lachipatala vanafuneya ira magazanga amo-iwa kaalande, nowatangani-a na vyongo vimo-i era eno aweli-eda muthuthu langa? Kodi iguguda murimanga inokoza ndilola kapena kinandilole wachela likami-edo loi eni mogwilizana na vyevyo ndinafunjeda miyo m’Baibulo?
4. Kodi Otelana Kanamwalane va Vifukwa Vyiivi?
Baibulo kalinalimbikisa ira athu kamwalane teto linawonga ira akala kanamwalane, katin’na ufulu wotela kapena woteliwa. (1 Akorinto 7:10, 11) Komave viikala vifukwa vimo-i vyevyo vinairi-a Akiristu amo-i sakula mwalana.
Lepela samalela banja mwadala: Mulombwana kanasamalela banja laye mpakana fiya voi banjalo linosauwela vyongo vyofuneya vamoyo. — 1 Timoteyu 5:8.
Panga nkhaza doopi-a: Nkhaza dinoiri-a ira thanzi kapena moyo wa muthu ukale vangozi. — Agalatiya 5:19-21.
Pangi-a ira fwaye a-iye lambela Yehova: Akala mulombwana kapena mu-iyana unapangi-a ira fwaye a-iye tumikela Yehova. — Vyoira 5:29.
5. Maholide Koma Teto Vikondwelelo
Akiristu katinairana maholide woi katinaomeli-a Yehova. Komave, Mkiristu uliwetene unafuneela indi-eda chito iguguda murima vosakula vyofwaneela panga vakhani inela mogwilizana na vyevyo afunjedile liye m’Baibulo. Kaonani visazo vi:
Muthu m’mo-iwa aufunelani vyapama va holide imo-iwene. Munokoza musomeda ira, “Zikomo.” Akala unafuna iziwa vinjinji, munokoza musambaulela chifukwa n’ni kamunakondwelelana holide ineyo.
Mulombwana kapena mu-iyaninyu, unoyo kai wa Mboni da Yehova, uitanani ira mwadye limo-i yodya na abalaye va holide imo-iwene. Akala iguguda muriminyu inoulolani dowa, munokoza panga pama musambaulela ira akala upwamdowo unaireye miyambo dimo-i do-ogwilizana na makundo a m’Baibulo, kamunairana.
Uchito winyu kapena abwaninyu kanouva-ani bonasi vathawi ineyo athu kanakondwelelathu holide imo-iwene. Kodi munafuneela koonda bonasiyo? Kai lamulo koonda. Kodi unauva-ani bonasiyo na yolinga yoi mukondwelelena holideyo kapena chindila youyamikelani chifukwa yoi muno-inda chito pama?
Muthu m’mo-iwa unauva-ani mphaso vathawi ya holide imo-iwa. Mwina unokoza onga ira: “Ndinoiziwa ira kamunakondwelela holide inela, koma ndikede funa uva-ani mphasola.” Mwina unauva-ani mphasoyo chifukwa yokeda funa uirelani vyapama ba-i. Komave, kodi kavinakale pama ganizela akala unauva-ani mphasoyo vofuna ushishani kapena ira mukondwelelena holideyo? Eno vanduli voganizela makundo anala, munokoza sakula wachela kapena koonda mphasoyo. Thawi detene nasakulanga vyoira, ninafuneela kan’na iguguda murima yapama koma teto kala ororomeleya wa Yehova. — Vyoira 23:1.
6. Marenda Ova-edana
Ninoesaesa panga vyongo mosamala vinjinji vopewa falisa marenda ova-edana chifukwa yoi ninoomeliwana afwi-u. Eno akala ninabulela marenda ova-edana kepena ninoona vizindikilo vyoi ninobulela moi ninokoza avali-a amo-iwa ninafuneela kala osamala vinjinji. Ninopanga vyevi chifukwa Baibulo linaniwandela ira: “Uomeliwengana fwawo monga mwemo munaviomeliwanawe weka.” — Aroma 13:8-10.
Kodi muthu unoyo un’na marenda ova-edana unafuneela panga n’ni vovwela likundo leli? Kanafwaneela panga vyongo vyevyo vinapangi-e ira athu amo-iwa kavale marendayo monga ava-a moni wa m’manda, akumbarela koma teto akisa. Muthu woi eno kanafuneela kumudwa akala athu amo-iwa kasakulile ira katimuitanele waniwa vofuna teteza banja liwa. Akala ira muthuyo unafuna badiziwa, unafuneela iziwi-a wogwilizani-a chito da bungwe la andimuwa vya marendaye na yolinga yoi kavali-e marendayo wa athu amo-i anayo kanafuna badiziwa. Muthu unoyo abulelevo marenda ova-edana moi unovikaikelave ira unokoza kaana marendala, unopanga pama dowa viezi-a magazi aanambeele imweendi na muthu m’mo-i. Napanganga vyevi ninotonyi-eda ira ‘kaninaganizela vyofuna vi-u ba-i, koma ninoganizela teto vya amo-iwa.’ — Afilipi 2:4.
7. Khani Dokuza Bizinezi na Malamulo
Ira nipewe mavuto anjinji vakhani ya bizinezi koma teto ndalama, ninafuneela lembelana kapena sainelana mgwilizano uliwetene ngakale vevo ninapanga iyo mgwilizano na Mkiristu fwi-u. (Yeremiya 32:9-12) Komave, thawi dimo-i Akiristu kanokoza iyana maganizo vakhani ding’onong’ono dokuza ndalama kapena vyongo vimo-i. Vyera eno, iyo ninafuneela mali-a ovwananawo mombaranya, mwamurendele koma teto vaeki-u.
Koma kodi ninafuneela panga n’ni na-iyana maganizo vakhani dilukulu monga ba ndalama mwachinyengo kapena takali-a limbili la muthu m’mo-iwa? (Welengani Mateyu 18:15-17.) Yesu aongile ira ni-arelenga makundo mararu ala:
Muesaesenga kambirana khaniyo vaekinyu. — Onani vesi 15.
Vyalepeleya, munokoza dowawo na muthu m’mo-i kapena athu ambinli ororomeleya mupingo mwinyu ira mwatapanye vya khaniyo. — Onani vesi 16.
Vyaruchangave, pavevo munavepe nyo andimuwa a mupingo ira kaukami-eni. — Onani vesi 17.
Ninafuneela esaesa pewa landela abali-u uboma chifukwa panga vyevi unokoza takali-a zina la Yehova koma teto pingo. (1 Akorinto 6:1-8) Komave viikala khani dimo-i doi dinafuneela weluziwa uboma. Mofwanafwani-a, mali-a banja, sakula likolo lelo linafuneela lela mwana makolo kamwalana, ndalama dedo lombwana kapena mu-iyana unafuneela liye pelekanga wa fwaeyo banja lamala, wofwaneela wachela inshulansi, ndalama dedo munafuneelanyo wachelanga bizinezi yavuta kapena sainela mawilo. Mkiristu unoyo unadowa ukoti na khani dedi na yolinga yoi amali-e khaniyo mwamurendele kanaira vyongo mosempana na malangizo a m’Baibulo.
Mkiristu kanapwanye malangizo a m’Baibulo akala unadowena upolisi kapena ukoti khani dokuza muthu unoyo uputile mulandu ulukulu monga indela, pangela mwana nkhaza, porecha muthu, ba vyongo vinjinji kapena pha muthu.
a Kumela mu 455 B.C.E. nofiya mu 1 B.C.E. ti chaka 454. Kumela mu 1 B.C.E. nofiya mu 1 C.E. chi chaka imo-i. Teto kumela mu 1 C.E. nofiya mu 29 C.E. ti chaka 28. Eno natangani-a chakadi (454 + 1 + 28) ninafwanya cha 483.