MURU 19
Kodi a Mboni da Yehova Mba Akiristu Aimbarimbari?
Iyo a Mboni da Yehova, ninororomela ira nili Akiristu aimbarimbari. Chifukwa n’ni ninaonga eeno? Ninaonga eeno chifukwa ya wewo ninalanda iyo vyevyo ninaroromela iyo, zina lelo ninaiziweyana iyo, koma teto chikondi ineyo ninatonyi-edana iyo.
1. Kodi vyevyo a Mboni da Yehova kanaroromelaathu vinakumela waani?
Yesu eere: “Mawu [a Mulungu] chiimbarimbari.” (Yohani 17:17) Mofwanafwana na Yesu, vyevyo a Mboni da Yehova kanaroromelaathu vinakumela m’mawu a Mulungu. Mofwanafwani-a, kaganizelani vyevyo a Mboni da Yehova anayo vowambeela kaiziweya ira ofunjeda Baibulo kairileaathu. Mu chaka ya 1870, gulu la ofunjeda Baibuloli loowambeela funjeda Baibulo mosamala vinjinji ira kavwecheche vyevyo linafunji-aathu. Aluwa koowambeela roromela vyevyo Baibulo linafunji-aathu ngakale ira vyaroromelaathuvyo vyali vyo-iyana na vyevyo machalichi amo-iwa kafunji-aathu. Vira wathawi koowambeela wandela athu amo-iwa makundo a imbarimbari anayo kafwanyaathu m’Baibulo.a
2. Chifukwa n’ni ninaiziweyana zina loi Mboni da Yehova?
Yehova unoromola athu anayo kanamulambela ira ti Mboni daye chifukwa kanoonga vyoona vyokuza liye. (Aheberi 11:4–12:1) Mofwanafwani-a, wan’le vinjinji Mulungu oowawandela atumikaye ira: “Nyo muli mboni danga.” (Werengani Yesaya 43:10.) Yesu naliyene unoiriwa “Mboni yororomeleya.” (Chivumbuluso 1:5) Eeno mu 1931, noowambeela iziweya na zina loi Mboni da Yehova. Iziweya na zina leli ngumwai ulukulu.
3. Kodi a Mboni da Yehova kanamusazi-eda avi Yesu chifukwa yotonyi-eda chikondi?
Yesu oowaomeliwana vinjinji ofunjedaye moi aaona ngati abalayeabalaye. (Welengani Maliko 3:35.) Eeno a Mboni da Yehova, naaluwene ti banja limo-i logwilizana la vailambo yetene. Chichifukwa iwa iyo ninaonga ira nili abali na arongola. (Filimoni 1, 2) Teto ninovwela lamulo loi: “Omeliwanani gulu letene la abali.” (1 Petulo 2:17) A Mboni da Yehova kanotonyi-eda ira kanoomeliwana abaluwa mundila dinjinji. Mofwanafwani-a, Akiristu afwiwa vailambo yetene yavati kagumanana mavuto kanowakami-a.
FUNJEDANI VYOWENJEDELEYA
Saelani ira muiziwe vinjinji vyokuza limbili la Mboni da Yehova teto muone umboni umo-iwa otonyi-eda ira iyo nili Akiristu aimbarimbari.
Vyevyo Akiristu aimbarimbari kanaroromelaathu vinakumela m’Baibulo teto kanowandela amo-iwa vyevyo kanaroromelaathu
4. Vyevyo ninaroromela iyo vinakumela m’Baibulo
Yehova oowonga wan’le ira atumikaye kanoza kavwechechenga imbarimbari ya m’Baibulo vang’onovang’ono. Welengani Daniyeli 12:4, era eeno tapanyani yofuka yo-arelela:
Malinga na lembali, kodi atumiki a Mulungu kanaza kaiziwe n’ni kadowanave saela makundo a m’Baibulo?
Onani vyevyo ofunjeda Baibulo, tanganiavo Charles Russell, kairaathu vofunjeda mawu a Mulungu. Onelani VIDIYO, era eeno tapanyani yofuka yo-arelela.
Muvidiywela, kodi Charles Russell, na ofunjeda Baibulo afwaye ka-arela ndila iivi vofunjeda Baibulo?
Nanga munoiziwa?
Thawi dimo-i ninochenjanga vyongo vimo-i vyevyo naroromela iyo. Chifukwa n’ni n’naira eeno? Zuwa lakumanga linawala vang’onovang’ono. Mofwanafwana na vyevi Mulungu unonikami-eda vwechecha mawaye vang’onovang’ono. (Welengani Miyambo 4:18.) Baibulo kalinachenja. Koma nalivwechechanga pama ninochenja vyevyo naroromela iyo.
5. Ninoira vyongo mogwilizana na zina li-u
Chifukwa n’ni naambeele iziweya na zina loi Mboni da Yehova? Onelani VIDIYO, era eeno tapanyani yofuka yo-arelela.
Chifukwa n’ni zina loi Mboni da Yehova lili lofwaneelela?
Chifukwa n’ni Yehova unasakula athu ira kakale Mboni daye? A Mboni da Yehova kookala kakami-anga athu iziwa ira Yehova ngu Mulungu wa imbarimbari. Vili eeno chifukwa athu kanofunji-a vyongo vyonama vyokuza liye. Tiyemoni nione vin’li mwa vyonama vyevi.
Vipembezo vimo-i vinafunji-a ira Mulungu unafuna ira ni-indi-edenga chito vyosema volambela. Kodi vyevi pivyoona? Welengani Levitiko 26:1, era eeno tapanyani vyofuka vyo-arelavi:
Kodi vyoona viwa piivi? Kodi Yehova unavwa avi athu kalambelanga vyosema?
Asogoleli avipembezo amo-iwa kanafunji-a ira Yesu ngu Mulungu. Kodi vyevi pivyoona? Welengani Yohani 20:17, era eeno tapanyani vyofuka vyo-arelavi:
Kodi vyoona viwa piivi? Kodi Yesu naliyene ngu Mulungu?
Kodi munavwa avi mwaganizela ira Yehova unoruma Mboni daye ira dilaleele imbarimbari yokuza liye na mwanaye?
6. Ninoomeliwana m’mo-i na fwaye
Baibulo linawonga ira Akiristu kanafuneela kala ogwilizana monga vyano vyatutu la muthu. Welengani 1 Akorinto 12:25, 26, era eeno tapanyani vyofuka vyo-arelavi:
Kodi Akiristu aimbarimbari kanaira n’ni kaona ira Akiristu afwiwa kanozuzuma?
Kodi nyo muwonile n’ni vyotonyi-eda ira a Mboni da Yehova kanotonyi-edana chikondi?
A Mboni da Yehova kazuzumanga muilambo imo-iwa a Mboni afwiwa a vailambo yetene kanoesaesa akami-eda mombaraanya. Ira muone isazo ya vyevi, onelani VIDIYO. Era eeno tapanyani yofuka yo-arelela.
Kodi vyevyo a Mboni da Yehova kanairaathu vokami-edana vinatonyi-eda avi ira kanoomeliwana mʼmo-i na fwae?
Akiristu aimbarimbari kanokami-eda athu anayo kanagumanana mavuto
ATHU AMO-IWA KANAONGA IRA: “Chifukwa n’ni munairiwa Mboni da Yehova, ookala Mboni da Yesu?”
Kodi Yehova aambeele alini romola athu anayo kanamulambela ira Mboni daye?
VYEVYO NIFUNJEDILE IYO
A Mboni da Yehova mba Akiristu aimbarimbari. Iyo nili m’banja limo-i la vailambo yetene yavati teto vyevyo ninafunji-a iyo vinakumela m’Baibulo, koma teto ninowandela amo-iwa imbarimbari yoonga vya Yehova.
Vyofuka Vyoweli-eda
Chifukwa n’ni naambeele iziweya na zina loi Mboni da Yehova?
Kodi ninaira avi vyongo na Akiristu afwi-u?
Kodi nyo munaganiza ira a Mboni da Yehova mba Akiristu aimbarimbari?
ONANI VIMO-I
Iziwani vinjinji vyokuza limbili li-u.
Mboni za Yehova Zinasonyeza Chikhulupiriro, Gawo 1: Kutuluka mu Mdima (1:00:53)
Onani visazo vyotonyi-eda vyevyo a Mboni da Yehova kairileathu vomali-a vyofunji-a vyonama.
Fwanyani vyosomeda vya vyofuka vyevyo mun’na nyo vyokuza Mboni da Yehova.
Stephen oowomeliwa ira vyauwalanga. Welengani khani ira mufwanye vyevyo aonile liye a Mboni da Yehova kairanga vyevyo vyamukami-ile ira achenje.
“Moyo Wanga Unkangoipiraipirabe” (Nsanja ya Olonda, July 1, 2015)
a Magazini-u ya Sanja ya Olonda ineyo ili yoiziweya pama, ikala isambaulanga makundo aimbarimbari ya m’Baibulo ambeela mu 1879.