MURU 35
Chin’ni Inanikami-e Ira Nisakulenga Vyongo Mwazelu?
Iyo etene ninofuneela sakula vyoira vamoywi-u. Komave vyevyo ninasakule iyo vinokuza vinjinji moywi-u koma teto usamwali-u na Yehova. Mofwanafwani-a, ninofuneela sakula wewo ninafuna iyo kala, mwemo ninafwanyele iyo ndalama, koma teto akala ninafuna kala vabanja kapena ookala vabanja. Nasakulanga vyongo mwazelu, ninowanda kala mosangalala koma teto ninerenge muomeli-a Yehova.
1. Kodi Baibulo linaukami-eni avi ira musakulenga vyongo mwazelu?
Mwa-anasakule vyoira vakhani imo-iwene, mupepelenga wa Yehova teto musaelenga m’Baibulo ira muiziwe maganizo a Yehova vakhaniyo. (Welengani Miyambo 2:3-6.) Thawi dimo-i, Yehova unopeleka lamulo lovweya pama lokuza khani imo-iwene. Vyera eeno, vinokala pama vinjinji vwela lamulolo.
Ndiye kodi munasakule avi vyoira, vakhani yoi m’Baibulo kamuli lamulo lachindunji lokuza khaniyo? Yehova kanaza a-iya usogolelani “mundila ineyo munafuneela nyo endamo.” (Yesaya 48:17) Kodi munaire avi vyevi? M’Baibulo mukala makundo anayo kanaukami-eni sakula vyoira. Makundo a imbarimbari anayo kanafwanyeya m’Baibulo, kanokoza ukami-ani iziwa maganizo a Mulungu vakhani ineyo munafuna nyo sakula. Nawelenganga Baibulo, thawi dinjinji ninofwanya makundo onikami-a iziwa mwemo Mulungu munaonela liye khani imo-iwene. Eeno nazindikila mwemo Yehova munavwela liye, ninosakula vyevyo vinamuomela.
2. Kodi munafuneela ganizela vyongo vyiivi mwaanasakule vyoira?
Baibulo linaonga ira: “Woenjela unoganizela vya mwemo munaendela liye.” (Miyambo 14:15) Vyevi vinatapulela ira ninafuneela ganiza mofwaasa, naanasakule vyoira. Eeno mwaanasakule vyoira vakhani imo-iwene, muvifukenga ira: ‘Mbamakundo aavi a m’Baibulo anayo kanandikami-e sakula mwazelu vyofuneela ira vakhanila? Kodi vyevyo ndinasakule miyo vinakuza avi moywanga? Nanga athu amo-iwa vinaakuza avi? Yofuneya vinjinji muvifukenga teto ira, kodi vyevyo ndinasakule miyo vinoomeli-a Yehova?’ — Dotoronomo 32:29.
Yehova ukaana ufulu oniwandela vyofuneela ira na vyo-ofuneela ira. Naiziwa pama malamulo na makundwae noesaesa a-indi-eda chito vamoywi-u ninakala ira ninaavifunji-a ira iguguda murima yi-u ikale yapama. Iguguda murima chineyo inanikami-a zindikila ira vyevyo vinafuna iyo ira kapena vyevyo niirile iyo pivyolondola kapena vyolakweya. (Aroma 2:14, 15) Eeno naifunji-anga pama iguguda murima yi-u inoza inikami-e sakula vyoira mwazelu.
FUNJEDANI VYOWENJEDELEYA
Saelani ira muone mwemo makundo a m’Baibulo koma teto iguguda murima vinanikami-edeleathu ira nisakulenga vyongo mwazelu.
3. Mulolenga ira makundo a m’Baibulo kausogolelengani
Kodi makundo a m’Baibulo kananikami-e avi nasakulanga vyoira? Onelani VIDIYO, era eeno tapanyani vyofuka vyo-arelavi.
Kodi Yehova aniva-ile mphaso yamtengo wavadimu iivi?
Chifukwa n’ni Yehova aniva-ile mphaso inela?
Kodi Yehova univa-ile n’ni vofuna nikami-a sakula vyongo mwazelu?
Ira muone isazo ya likundo la m’Baibulo, welengani Aifeso 5:15, 16. Era eeno mutapanye mwemo “muna-indi-edele nyo chito pama thawinyu” . . .
vowelenga Baibulo dambo lililetene.
ira mukale lombwana, kapena iyana wapama, baba, m’ma, kapena mwana wapama.
ira muirengana misonkano dapingo.
4. Mufunji-enga iguguda murima inyu ira musakulenga vyongo mwazelu
Kavinanirucha sakula vyoira vakhani imo-iwene, akala m’Baibulo muli lamulo lovweya pama lokuza khaniyo. Nanga bwanji akala m’Baibulo kamuli lamulo lonikami-a sakula vyoira vakhani imo-iwene? Onelani VIDIYO, era eeno tapanyani vyofuka vyo-arelavi.
Muvidiywela, kodi murongolola airile n’ni ira afunji-e iguguda murima yae koma teto ira asakule vyongo vyevyo vinaomeli-e Yehova?
Nafuna sakula vyoira vakhani imo-iwene, chifukwa n’ni kaninafuneela vepa athu amo-iwa ira kanisakulele vyoira? Welengani Aheberi 5:14, era eeno tapanyani vyofuka vyo-arelavi:
Vinokala vyoorucha vepa athu amo-iwa ira kanisakulele vyoira vakhani imo-iwene, koma kodi iyo vaeki-u ninafuneela iyani-a n’ni?
Chin’ni inaukami-eni ira mufunji-enga iguguda murima inyu koma teto ira musakulenga vyoira mwazelu?
Mofwanafwana na mapu, iguguda murima inonikami-a sakula pama vyofuneela ira vamoywi-u
5. Mulemekezenga iguguda murima ya athu amo-iwa
Athu anayo kali o-iyana kanosakula teto vyongo mo-iyana. Ndiye ninatonyi-ede avi ira ninolemekeza iguguda murima ya athu amo-iwa? Kaganizelani vyoireya vin’livi:
Yoireya yoambeela: Murongola unoyo alemeede vipoda utamela mupingo umo-iwa woi arongola a mupingomo kanoona ira vipoda kai wofwaneelela.
Welengani Aroma 15:1 na 1 Akorinto 10:23, 24, era eeno tapanyani vyofuka vyo-arelavi:
Malinga na mavesala, kodi murongolola unasakule ira n’ni? Nanga nyo munaire avi akala muli na muthu m’mo-iwa woi iguguda murima yae kinamulola panga vyevyo iguguda murima inyu inaulolaniathu?
Yoireya yanambili: M’bali unoiziwa pama ira Baibulo kalinakoondi-a ng’wa walwa mo-opitilila malile, koma liye usakula ira kang’wenga olo vang’ono. Vanduli viwa uitaniwa uphwando moi unoona ira abali amo-iwa kanong’wa walwa.
Welengani Namalaleya 7:16 na Aroma 14:1, 10, era eeno tapanyani vyofuka vyo-arelavi:
Malinga na mavesala, kodi m’balila unasakule ira n’ni? Nanga nyo munaire avi akala muonile muthu m’mo-iwa unoyo iguguda murima yae inamulola panga vyongo vyoi iguguda murima inyu kinaulolani?
Kodi pivyongo vyiivi vyevyo vinakami-e muthu sakula vyongo mwazelu?
1. Muvepenga Yehova ira aukami-eni sakula vyofuneela panga. — Yakobo 1:5.
2. Musaelenga m’Baibulo, mabuku na vyongo vimo-i vyevyo gulu li-u linafalisaathu ira mufwanye makundo anayo kanaukami-eni. Teto munokoza tapanya na Akiristu owaraala mwauzimu.
3. Muganizelenga mwemo vyosakula vinyuvyo vinakuzeleathu iguguda murima inyu koma teto iguguda murima ya athu amo-iwa.
ATHU AMO-IWA KANAONGA IRA: “Uliwetene ukaana ufulu woira vyevyo unafuna liye. Kaya athu amo-iwa kanaonga vyoi avi, miyo kavinandikuza.”
Chifukwa n’ni ninafuneela ganizela mwemo vyoira vi-u vinakuzeleathu Mulungu koma teto athu amo-iwa?
VYEVYO NIFUNJEDILE IYO
Naiziwa maganizo a Yehova vakhani imo-iwene ninosakula vyoira mwazelu era eeno ninoganizela mwemo vyoira vi-uvyo vinakuzeleathu athu amo-iwa.
Vyofuka Vyoweli-eda
Kodi munasakule avi vyoira vyevyo vinamuomeli-e Yehova?
Kodi munafunji-e avi iguguda murima inyu?
Kodi munatonyi-ede avi ira munolemekeza iguguda murima ya athu amo-iwa?
ONANI VIMO-I
Munaire avi ira musakulenga vyongo vyevyo vinaukami-eni limbi-a usamwalinyu na Mulungu?
“Zosankha Zanu Zizilemekeza Mulungu” (Nsanja ya Olonda, April 15, 2011)
Iziwani vinjinji vyokuza mwemo Yehova munaniva-ela liye malangizo.
Onani vyevyo vyakami-ile muthu m’mo-iwa sakula vyoira mwazelu va khani yorucha.
Onani vyevyo ninaire iyo ira niomeli-enga Yehova ngakale vakhani doi kavuli lamulo lachindunji.
“Kodi Mumafunikira Lamulo la M’Baibulo Nthawi Zonse?” (Nsanja ya Olonda, December 1, 2003)