Mwemo Yehova Munanikami-edela Liye Ira Nivilelenga Mosangalala

1-2. (a) Kodi ninatapanya vyofuka viivi? (b) Chin’ni inatonyi-eda ira Yehova ngofunechecha nikami-eda?

YEHOVA unokoza nikami-eda ira niwandenga limbana na mavuto anayo ninagumanana iyo vamoywi-u koma teto ira nisangalalenga vomutumikela. Ndiye kodi unanikami-eda mundila diivi? N’nga n’naire avi ira nipindulenga vinjinji na likami-edo lelo unaniva-a liyeli? Vyofuka vyevi vinosomediwa mukhanila. Komave, na-anatapanye vyosomeda viwa, tiyemoni niganizele yofuka ila: Kodi Yehova ngofunechecha nikami-eda?

² Mawu anayo namarumiwa Paulo a-indi-edele liye chito mukalataye yodowa wa Aheberi kanokoza nikami-a fwanya yosomeda. Liye alembile ira: “Yehova ngu malimba ndikami-eda; Kandinaza ndiova. Muthu unandiirele n’ni?” (Aheb. 13:6) Buku limo-i lofotokoza Baibulo lawongile ira mawu oyi “namakami-eda,” anayo ka-indi-ediwe chito valembali, kanaonga vya muthu onoyo unatamanga ira adowe akami-e m’mo-uwene onoyo unafuneela likami-edo. Fwanafwani-ani ira munanaona Yehova atamangelanga dowa vulumucha m’mo-uwene onoyo uli vamavuto. Pi vyo-okaiki-a ira munosomedela ira mafotokozelo anala kanatonyi-eda ira Yehova ngofunechecha kala namakami-edi-u. Mokami-iwa na Yehova, ninowanda vilela vyoshisha vilivyetene mosangalala.

3. Kodi pi vyongo viraru viivi vyevyo Yehova una-indi-edela liye chito vonikami-eda vilela mosangalala vyoshisha vyevyo ninagumanana iyo?

³ Kodi Yehova unanikami-a vilela vyoshisha vi-u mosangalala mundila n’nga diivi? Ira nifwanye yosomeda, tiyemoni niwelenge vyevyo vili m’buku la Yesaya. Chifukwa n’ni? Chifukwa vyoro-eda vinjinji vyevyo Yesaya awandeliweliye lemba vinokuza atumiki a Mulungu malambwano. Wenjedela vevo, thawi dinjinji Yesaya oomusambaula Yehova m’mawu o-orucha vwechecha. Mu Yesaya chaputala 30 muukala visazo n’nga vyevyo. Mu chaputalela, Yesaya oosambaula mo-indi-eda chito mawu anayo kananikami-a ona m’maganizo mwi-u, mwemo Yehova munakami-edela liye athwaye (1) vovuruwana mwacheru koma teto someda mapepelwi-u, (2) voniva-a malangizo, koma teto (3)  voniva-a madaliso vathawi ila koma teto usogolo. Tiyemoni nitapanye mwasatanesatane vyongo viraruvi vyevyo Yehova una-indi-edela liye chito vonikami-a.

YEHOVA UNONIVURUWANA

4. (a) Kodi Yehova aasambaulile avi Ayuda amuthawi ya Yesaya, n’nga aalolile ira kagumanena vyoi avi?  (b) Kodi Yehova ava-ile athu ororomeleya idedi-edo yoi avi ? (Yesaya 30:18, 19)

⁴ M’mawu owambeela mu chaputala 30, Yehova unowasambaula Ayuda n’nga “a-ima aalombwana o-ovwa,” anayo kanawenjedela “chimo va chimo.” Liye oowenjedela ira: “Anala mbaathu opanduwa, . . . anayo katinafuna vwa malamulo a Yehova.” (Yes. 30:1, 9) Voi aluwa kookoonda vwela, Yesaya oovaela onga ira Yehova unoza aalole ira kagumanena mavuto. (Yes. 30:5, 17; Yer. 25:8-11) Vi pivyevyo vyaireile. Aluwa koolandiwa dowa uukapolo Ubabulo. Komave, vookala Ayuda amo-i ororomeleya, teto Yesaya oowawandela utenga wa idedi-edo. Oowawandela ira dambo limo-i Yehova unoza aawomele murima. (Welengani Yesaya 30:18, 19.) Teto vi pivyevyo vyaireile. Yehova oowamasula uukapolo. Komave, liye kaamasulile thawi eneyo. Mawu oyi “Yehova unoza adedi-ede ira auwomeleni murima” kanatonyi-eda ira voofuneela vira thawi ira Ayuda ororomeleya kamasuliwe. Moi aizarayeli, kookala chaka 70 uukapolo Ubabulo kaanamasuliwe ira kawelele waniwa wu Yerusalemu. (Yes. 10:21; Yer. 29:10) Aluwa kangawelile, chisoni eneyo kan’naathu chifukwa ya ukapolo yoomala teto koowambeela kala mosangalala.

5. Kodi lemba la Yesaya 30:19 linanisimikizela n’ni?

⁵ Malambwano ninokoza limbi-iwa vinjinji na mawu ala oyi: “Mookaikela liye unoza auwomele murima aza avwa ula wawo.” (Yes. 30:19) Yesaya oonisimikizela ira Yehova unoza avuruwane mwacheru vevo ninavepa iyo likami-edo, teto unoza asomede mombaraanya mapepelwi-u. Liye oowenjedela ira: “Aza avwa ula waowo liye unoza ausomede.” Mawu olimbi-a anala kanoniumbucha ira Babi-u ngofunechecha kami-eda uliwetene onoyo unavepa likami-edo wa liye. Iziwa vyevi unonikami-a ira nivilelenga mosangalala.

6. Kodi mawu a Yesaya kanatonyi-eda avi ira Yehova unovuruwana pepelo la ntumikaye uliwetene vayeka?

⁶ Kodi chin’ni teto eneyo lembali linanisimikizelaathu va khani ya pepelo? Yehova unovuruwana mapepelwi-u uliwetene vayeka. Chifukwa n’ni ninaonga eeno? Umbali yowambeela ya Yesaya chaputala 30, Yehova oo-indi-eda chito mawu oyi “we” voonga vya athwaye n’nga gulu. Koma mu vesi 19 mawu oyi “we” kanatonyi-eda ira utengoyo wadowa wa muthu uliwetene vayeka. Yesaya alembile ira: “We kunaza uula teto”; “liye unoza auwomele murima;” “liye unoza ausomede.” N’nga Babi-u wachikondi, Yehova kanawandela mwanaye onoyo ufookile ira, “Unafuneela kala wolimba n’nga balawo kapena murongolawo.” M’malo muwa, liye unoganizela uliwetene vayeka teto unovuruwana pepelo la uliwetene vayeka mwachidwi.—Sal. 116:1; Yes. 57:15.

7. Kodi Yesaya na Yesu katonyi-edile avi funeya wopepela moweli-edaweli-eda?

⁷ Napepela wa Mulungu va khani eneyo inanikumbanyi-a, yongo yowambeela eneyo unaniirele liye kuniva-a kopolo ira nivilele. Teto akala vyoshishavyo kavinamala mombaraanya n’nga mwemo nadedi-edela iyo, ninafuneela dowanave muvepa ira aniva-e kopolo doi nivilele. Liye unonilimbi-a ira niirenga vyevi. Vi vinogwilizana na mawu a Yesaya oyi: “Kamu-iye muumbucha [Yehova].” (Yes. 62:7) Kodi vyevi vinatapulela n’ni? Ninafuneela pepela wa Yehova moweli-edaweli-eda wewo uli n’nga ninaamuumbucha. Mawu a Yesayala kanoniumbucha fanizo la Yesu lokuza pepela lelo linafwanyeya va Luka 11:8-10, 13. Valembali Yesu oonilimbi-a ira nivepenga “mokaamela” koma teto “nivepengave” muzimu wochena. Ninokoza muvepa teto Yehova ira anisogolele ira nisakule pama vyongo.

YEHOVA UNONISOGOLELA

8. Muthawi ya Ayuda, kodi lemba la Yesaya 30:20, 21 lakwakwaneli-ediwe avi?

⁸ Welengani Yesaya 30:20, 21. Vevo asilikali a Babulo karungunuwileathu mzinda wa Yerusalemu wa chaka na hafu, mavuto anayo athu kagumananaathu kakede fiya volemeeleya n’nga yodja na ma-inje. Koma mogwilizana na vesi 20 na 21, Yehova oowalanyeda Ayudayo ira akala kanalape koma teto chenja yvoira viwa, liye unoza aavulumuche. Vomuromola Yehova n’nga “Namalangiza Mulukulu,” Yesaya oolanyeda athwayo ira Yehova unoza aafunji-e mwemo kanamulambeleleathu mosomedeleya. Mawu anala kookwakwaneli-ediwa vevo Ayuda kamasuliweathu uukapolo. Yehova ootonyi-eda ira ali Namalangiziwa Mulukulu, teto malangizo anayo aava-a liye, kookami-a ira kakwakwani-e weli-eda lambela waimbarimbari. Iyo teto malambwano nikaana mwayi oyi Yehova ngu Namalangizi-u Mulukulu.

9. Kodi chi ndila imo-i iivi malambwano eneyo ninawachelela iyo malangizo a Yehova?

⁹ Vodowanave onga mwa fanizo, Yesaya unonisambaula n’nga ofunjeda anayo kanafunji-iwa na Yehova mundila mbinli. Yowambeela, Yesaya uni: “Maswawo kanoza kaambeele ona Namalangizawo Mulukulu.” Mu fanizoli, Namalangiza uimela usogolo wa ofunjedaye. Malambwano nikaana mwayi ulukulu ira ninowachela malangizwaye. Kodi Yehova unanifunji-a avi? Liye unonifunji-a zela mugulu laye. Ninoyamikela vinjinji chifukwa ya malangizo ovweya pama anayo unaniva-a liye zela mugulu layeli! Malangizo anayo ninava-iwa iyo vamisonkano dapingo na dagawo koma teto m’mabukwi-u, porogarama ya JW Broadcasting, na ndila dimo-i kanonikami-eda vilela mosangalala nagumanana mavuto.

10. Kodi ninavwa avi “mawu unduli wi-u”?

¹⁰ Yesaya ooromola ndila yanambili eneyo Yehova unanifunji-edela liye, voonga ira: “Mabarwawo kanoza kavwe mawu unduli wawo.” Va namaongelola amusambaula Yehova n’nga namalangiza wacheru onoyo unayenda unduli wa ofunjedaye, nowatonyi-eda ndila vasogolo viwa koma teto ava-a malangizo. Malambwano ninovwa mawu a Mulungu kumela unduli wi-u. Moi avi? Mawu a Mulungu kalembiwe m’Baibulo walewale, iyo na-anabaluwe. Eeno, nawelenganga Baibulo, vinakala n’nga ninanavwa Mawu a Mulungu unduli wi-u.—Yes. 51:4.

11. Ira nivilelenga mosangalala, kodi ninafuneela ira n’ni, n’nga chifukwa n’ni?

¹¹ Kodi ninaire avi ira nipindulenga na malangizo anayo Yehova unaniva-a liye zela mugulu laye na m’Mawaye? Onani ira Yesaya ooromola vyongo viili. Yowambeela liye eere, “ndila chiila.” Yanambili eere, “endani mwemu.” (Yes. 30:21) Kayi vyokwakwanela keda iziwa “ndila.” Ninafuneela teto “endamo.” Zela m’Mawu a Yehova, n’nga mwemo gulu laye linaasambaulelaathu, ninoiziwa vyevyo Mulungu unafuna liye ira niirenga. Ninofunjeda teto mwemo nina-indi-edele iyo chito vyevyo nifunjedile iyo. Ira nivilelenga mosangalala votumikela Yehova, ninafuneela ira vyongo viili vyetene vyevyi. Nairanga vyevyi pa vevo ninakala iyo osimikiza ira Yehova unoza anidalise.

YEHOVA UNONIDALISA

12. Mogwilizana na Yesaya 30:23-26, kodi Yehova adalisile avi athwaye?

¹² Welengani Yesaya 30:23-26. Kodi yoro-edela yakwakwaneli-ediwe avi wa Ayuda anayo kawelele Uizarayeli vanduli vomasuliwa uukapolo Ubabulo? Yehova oowadalisa na vyongo vinjinji vyoakami-eda ira kakaena moyo koma teto kadowenave mutumikela. Liye oowava-a yodja yoinjiva. Koma Yofuneya vinjinji, choi oowava-a yodja yoinjiva yauzimu vevo lambela waimbarimbari waweli-ediwaathu vang’onovang’ono. Madaliso auzimu anayo athu a Mulungu kasangalalilenaathu vathawi eneyo kookwaranya iliyetene eneyo Mulungu aliliye angaava-ilevo mundulimu. Mogwilizana na vesi  26, Yehova oowakami-eda vwechecha vinjinji mawaye. (Yes. 60:2) Madaliso anayo aava-ile liye atumikaye koowakami-eda ira kamutumikelenga mosangalala teto koofwanya kopolo “chifukwa yokaana imwerumweru m’murimani.”—Yes. 65:14.

13. Kodi yoro-eda yokuza weli-ediwa wolambela wa imbarimbari ukwakwaneli-ediwe avi malambwano?

¹³ Kodi yoro-eda yoonga vyoweli-ediwa wolambela wa imbarimbari unonikuza teto malambwano? Ee! Moi avi? Ambeela mu 1919 C.E., athu mamiliyoni anjinji koomasuliwa uukapolo wa Babulo Mulukulu, onoyo uli vipembezo vyetene vyonama. Aluwa koosogoleliwa uilambo yapama vinjinji kwaranya Ilambo Yolanyediwa ya Izarayeli. Ilambwela ngu paradaizo wauzimu. (Yes. 51:3; 66:8) Kodi paradaizo wauzimula chi’ni?

14. Kodi paradaizo wauzimu chin’ni, n’nga n’ngu mbaani anayo kali mwemo malambwano? (Onani Matapulelo a Mawu amo-i.)

¹⁴ Ambeela mu 1919 C.E., ozoziwa kookala kasangalalanga kala m’paradaizo wauzimu.b Vevo thawi inamalaathu, “akosa dimo-i,” anayo kan’na idedi-edo yoza kala vailambwela, koovolowa teto muilambo yauzimwila teto kanosangalala na madaliso a Yehova oinjiva.— Yoh. 10:16; Yes. 25:6; 65:13.

15. Kodi paradaizo wauzimu uli uuvi?

¹⁵ Kodi paradaizo wauzimu uli uuvi malambwano? Atumiki a Yehova kanofwanyeya uliwetene vailambwela. Eeno, paradaizo wauzimu onoyo kanakalechamoathu uli teto vailambo yetene. Malambwano, kaya ninakala uuvi vailambwela, ninowanda kala m’paradaizo wauzimu akala ninayesayesa ira vyongo vyokami-a lambela waimbarimbari.

16. Kodi ninaire avi ira nidowenave ona riya wa paradaizo wauzimu?

¹⁶ Ira nikaleve m’paradaizo wauzimula, mwa vimo-i, ninafuneela dowanave yamikela ira nili mupingo wa vailambo yetene Wachikiristu. Kodi ninaire avi vyevyi? Ninoirana vyevyi, voing’ana vyapama mwa abali na arongoli-u, ookala vyevyo kanalakwi-aathu. (Yoh. 17:20, 21) Chifukwa n’ni vyevyi vili vyofuneya? Kaganizelani lifwanafwani-edoli. Naendanga malo amo-iwa oriya, ninodedi-eda ona mitengo do-iyana-iyana. Mofwanafwana na vyevyi, malambwano teto paradaizo wauzimu unooneya pama chifukwa yoi muukala athu o-iyana-iyana anayo kanafwanafwani-ediwa na mitengo. (Yes. 44:4; 61:3) Ninafuneela ganizelanga vinjinji riya wa “nkhalango” yetene enela, ookala vyofooka vya “mitengo” dedo dili vakwikwi na iyo. Kanilole ira vyofooka vi-u kapena vya amo-i viiri-e ira kanionenga riya wa gulu lavailambo yetene la pingo Wachikiristu lelo lili logwilizana.

17. Kodi uliwetene wa iyo unaire n’ni ira alimbi-enga mgwilizano mupingo?

¹⁷ Kodi iyovano vaeki-u ninaire avi ira nilimbi-enga mgwilizano mupingo? Nikalenga athu ozi-a murendele. (Mat. 5:9; Arom. 12:18) Thawi iliyetene eneyo nizilena iyo murendele mupingo, ninowenjedela riya wa paradaizo wauzimu. Ninoumbuwela ira Yehova ngonoyo ukokele wa liye uliwetene onoyo uli m’paradaizo wauzimu. (Yoh. 6:44) Kaganizelani mwemo Yehova munasangalalela liye anionanga ira ninoyesayesa limbi-a murendele na mgwilizano vaari va atumikaye anayo unaaona liye ira mba atengo wavadimu!—Yes. 26:3; Hag. 2:7.

18. Kodi ninafuneela ganizelanga vinjinji vya n’ni, n’nga chifukwa n’ni?

¹⁸ Kodi n’naire avi ira nipindulenga mokwakwanela na madaliso anayo ninawachela iyo n’nga atumiki a Mulungu? Niganizelenga vinjinji vyevyo ninafunjeda iyo m’Mawu a Mulungu koma teto m’mabukwi-u okami-eda vofunjeda Baibulo. Ira vyevyi unonikami-eda ira nikaena makalelo anayo kanairi-e ira ‘niwomeluwengana abali’ koma teto ‘nikaena chikondi ya imbarimbari vaari vi-u.’ (Arom. 12:10) Naganizelanga vinjinji madaliso anayo niwachenle iyo vathawi ila, ninolimbi-a usamwali-u na Yehova. Teto ganizela vinjinji madaliso anayo Yehova unisungeleliye usogolowu unoiri-a ira niroromelenga vinjinji ira ninoza nimutumukele mpakana walewale. Vyetene vyevyi vinokoza nikami-eda ira nimutumikelenga mosangalala vathawi ila.

NIKALE OSIMIKIZA IRA NIVILELENGA

19. (a) Mogwilizana na Yesaya 30:18, kodi ninakale osimikiza vya n’ni? (b) Chin’ni inanikami-ede ira nivilelenga mosangalala?

¹⁹ Yehova “unoza amaruwe” m’malo mwa iyo vevo unazeliye aonongenga ilambo yotakalela. (Yes. 30:18) Nili osimikiza ira Yehova onoyo uli “Mulungu onoyo unaweluza mwachilungamo” kanaza alola ira ilambo yolamuleliwa na Satanela ikalevove kwaranya thawi eneyo ai-elele liye. (Yes. 25:9) Ninodedi-edela mwachidwi thawi eneyo dambo lovulumucha la Yehova linazeathu lifiye. Koma vano, nili osimikiza ira ninodowanave ona ira chi ngari yatengo wavadimu pepela, funjeda Mawu a Mulungu nowa-arela, koma teto ganizela madaliswi-u. Nairanga vyevyi, Yehova unoza anikami-ede ira nivilelenga mosangalala vevo ninamulambela iyo.