KHANI YOFUNJEDA 49
Ninokoza Kaana Moyo Mpakana Walewale
“Moyo wo-omala kanoza kaufwanye.” — YOH. 17:3.
NYIMBO 147 Mulungu Unilonjeza Moyo Wo-omala
VYEVYO NINAFUNJEDE IYOa
1. Kodi ganizela vya lonjezo la Yehova lokuza moyo wo-omala unanikami-a avi?
YEHOVA unolonjeza ira anayo kanamuvwela kanoza kakale na “moyo wo-omala.” (Arom. 6:23) Naganizelanga lonjezoli, ninowambeela muomeluwana vinjinji. Kaganizelani vyi: Babi-u waudimu unoniwomeluwana vinjinji moi kilivo eneyo inanimwalani-e na liye.
2. Kodi lonjezo la moyo wo-omala linanikami-a avi?
2 Lonjezo la Mulungu la moyo wo-omala, linonikami-a vilela vyoshisha vyevyo ninagumanana iyo vathawiila. Masiki adani-u kaniopopi-e ira kanonipa, kanina-iya tumikela Yehova. Chifukwa n’ni? Chifukwa imo-i choi ninoiziwa ira akala ninakhwe nangali ororomeleya wa Yehova, liye unoza anivenyi-e teto ninoza nikaena idedi-edo yoi kaninaza nikhwa nawili. (Yoh. 5:28, 29; 1 Akor. 15:55-58; Aheb. 2:15) Chifukwa n’ni ninafuneela simikizela ira pivyowandeya za kaana moyo mpakana walewale? Kaganizelani vifukwa vyo-arelavi.
YEHOVA UNOZA AKALEVO MPAKANA WALEWALE
3. Chifukwa n’ni kan’nakaikela ira Yehova unokoza nikami-eda kaana moyo mpakana walewale? (Salimu 102:12, 24, 27)
3 Ninoiziwa ira Yehova unokoza nikami-eda kaana moyo mpakana walewale chifukwa liye ngu Kasupe wamoyo, koma teto unoza akalevo mpakana walewale. (Sal. 36:9) Kaonani mavesi angasene a m’Baibulo, anayo kanasimikizela ira Yehova ookalavo ambeela walewale teto unoza akalevo mpakana walewale. Lemba la Salimu 90:2 linoonga ira Yehova ngu Mulungu “ambeela walewale mpakana walewale.” Lemba la Salimu 102 linoromola teto likundo leli. (Welengani Salimu 102:12, 24, 27.) Teto voonga vya Babi-u waudimu, namaongela Habakuku alembile ira: “Nyo Yehova, nyo mukalavo ambeela walewale. Nyo Mulungwanga, Mulungwanga Wochena, nyo kamunakhwa.” — Hab. 1:12.
4. Kodi ninafuneela kumbanya chifukwa yoi kan’navwechecha likundo loi Yehova ukalavo ambeela walewale? Sambaulani.
4 Kodi munovuteya vwechecha likundo loi Yehova ukalavo ambeela “walewale”? (Yes. 40:28) Athu anjinji teto vinowarucha vwechecha. Voonga vya Mulungu Elihu eere: “Chaka daye tido-owelengeya.” (Yobu 36:26) Koma akala kan’navwechecha imo-iwene kavinatapulela ira yongoyo kai yaimbarimbari. Mofwanafwani-a, masiki ira kaninavwecheche vyetene vyokuza wala, kodi vyevi vinatapulela ira walawo kuliwo? Naari! Mofwanafwana na vyevi, iyo athu kaninawande vwechecha pamapama likundo loi Yehova kan’na maambeelelo koma teto mapeto. Koma vyevi kavinatapulela ira Mulungu kanakaena moyo mpakana walewale. Mulengi kanalepele ira vyongo chifukwa ya vyevyo ninavwechecha iyo kapena vyevyo na-anavivwechecha iyo. (Arom. 11:33-36) Teto liye ookalavo vyongo vyetene muchilengedwela, tangani-avo vyevyo vinapeleka wala n’nga zuwa, vya-anakalevo. Yehova unonisimikizela ira liye “ngonoyo apangile ilambo yavati na kopolo daye.” Liye ookalawo, ‘a-anapange udimu.’ (Yer. 51:15; Vyo. 17:24) Kodi chi chifukwa imo-i iivi eneyo inanikami-e kala osimikiza ira pivyowandeya kaana moyo mpakana walewale?
NOOLENGIWA IRA NIKAENA MOYO MPAKANA WALEWALE
5. Kodi athu owambeela kan’na idedi-edo yoi avi?
5 Yehova oolenga vyamoyo vyetene vailambwela ira vikalenga na moyo wathawi yoyeva, iyavo athu. Liye oowava-a idedi-edo yoi katize kakhwe. Komave, Yehova oomuchenjeza Adamu ira: “Kudje vipaso vya tengo woiziwi-a yapama na yotakala. Chifukwa dambo lelo unaze we udje, unoza ukhwe.” (Gen. 2:17) Adamu na Hava kaavwele Yehova, katakhwa. Eeno pivyovweya onga ira, vira wathawi Yehova oowalola dja chipaso ya “tengo wamoyo.” Vyevi vyatapulela ira liye unowasimikizela ira kanokoza kaana moyo “mpakana walewale.”b— Gen. 3:22.
6-7. (a) Chin’ni teto inatonyi-eda ira athu katalengiwe ira kakhwenga? (b) Kodi nyo munafuna ira muze mupange n’ni usogolo? (Onani vithuzithuzi.)
6 Pivyoiri-a chidwi ira asayansi amo-i koofwanya umboni woi ugogwi-u unokoza sunga vyongo vinjinji kwaranya vyevyo ninaiziwecha iyo vathawi eneyo ninakalecha iyo na moyo. Mu 2010, magazini imo-i yaongile ira ugogwi-u ukaana malo osungela vyongo vyokwakwana ma GB 2.5 miliyoni anayo mbofwanafwana na maola 3 miliyoni (kwaranya chaka 300) a ma porogaramu ava TV oira jambuliwa. Koma teto ugogwi-u unokoza sunga vyongo vinjinji kwaranya veva. Vyevi, vinatonyi-eda ira Yehova oolenga ugogwi-u ira uwandenga sunga vyongo vinjinji kwaranya vyevyo ninasunga iyo va chaka 70 kapena 80 dedo ninakalechana iyo na moyo. — Sal. 90:10.
7 Yehova oonilenga teto na murima wofunechecha ira nikalenga na moyo mpakana walewale. Voonga vya athu, Baibulo linaonga ira Mulungu “oova-a athu murima wofuna kala na moyo mpakana walewale.” (Nam. 3:11) Ila chi chifukwa imo-i eneyo inaniiri-a ira nionenga khwa n’nga mudani. (1 Akor. 15:26) Nabulela vinjinji, kodi ninakedecha garati dedi-edanga ira nikhwe? Naari. Thawi dinjinji, ninodowa wuchipatala dowa onana na dokotala kapena teto ng’wa murombwe ira niile. Teto ninoirecha vyetene vyevyo ninawande iyo, ira kanikhwe. Koma teto munthu onoyo ninamuomeliwana iyo atatiya, kaya ndimuwa kapena mwana, ninovwecha voreya koma teto chisoni wa thawi indendayi. (Yoh. 11:32, 33) Pivyooneya ira, Mulengi-u wachikondi kaanilenge ira niyandenga funjeda kapena kaana murima wofunechecha kaana moyo mpakana walewale, vyaakale ira kai yolinga yaye ira athu kakalengana moyo wo-omala. Koma nikaana teto vifukwa vimo-i vyovweya vyoniiri-a roromela ira ninokoza kaana moyo mpakana walewale. Tiyemoni nitapanye vyevyo Yehova airilevo liye mundulimu koma teto vyevyo unaira liye vathawi ila votonyi-eda ira yolingaye yowambeela kichenjile.
Vokala na idedi-edo yokaana moyo o-omala, ninosangalala naganizela vyongo vyevyo ninaze iyo nikwakwani-e ira usogolo(Onani ndima 7)c
YOLINGA YA YEHOVA KICHENJILE
8. Voonga vya yolinga ya Yehova yokuza iyo athu, kodi lemba la Yesaya 55:11 linanisimikizela n’ni?
8 Masiki ira Adamu na Hava koochimwa teto vyooiri-a ira a-imiwa kakhwenga, Yehova kachenjile maganizwaye okuza yolingaye. (Welengani Yesaya 55:11.) Liye unofunave ava-a athu ororomeleya mwayi woi kaze kakale na moyo mpakana walewale. Ninaonga eeno voganizela vyevyo Yehova ukalile liye aonganga koma teto panga ira akwakwaneli-ede yolinga yaye.
9. Kodi Mulungu unalonjeza n’ni? (Daniyeli 12:2, 13)
9 Yehova unolonjeza ira unoza avenyi-e athu okhwa nowava-a moyo wo-omala. (Vyo. 24:15; Tito 1:1, 2) Muthu ororomeleya Yobu kaakaikela ira Yehova unofunechecha za venyi-a athu anayo katatiile. (Yobu 14:14, 15) Namaongela Daniyeli ooiziwa ira athu kookaana idedi-edo yoza venyi-iwa nokaana mwayi wokaana moyo mpakana walewale. (Sal. 37:29; welengani Daniyeli 12:2, 13.) Ayuda a muthawi ya Yesu kooiziwa teto ira Yehova unokoza peleka “moyo wo-omala” wa atumikaye ororomeleya. (Luka 10:25; 18:18) Moweli-edaweli-eda Yesu oowonga vya lonjezoli teto liye oovenyi-iwa na Babaye. — Mat. 19:29; 22:31, 32; Luka 18:30; Yoh. 11:25.
Kodi vyevyo Eliya airile liye vovenyi-a muthu vinanisimikizela n’ni?(Onani ndima 10)
10. Kodi venyi-iwa wa athu wewo waireile mundulimu unatonyi-eda n’ni? (Onani ithuzithuzi.)
10 Yehova Ngova-a Moyo teto ukaana kopolo yoweli-eda moyo wa anayo katatiile. Liye oova-a kopolo Eliya ira avenyi-e mwana wa mu-iyana wa wu Zarefati. (1 Mam. 17:21-23) Vangavirile thawi, namaongela Elisa mokami-iwa na Mulungu oomuvenyi-a mwana wamu-iyana Wachisunemu. (2 Mam. 4:18-20, 34-37) Venyi-iwa wa athu anala na athu amo-i teto unatonyi-eda ira Yehova ukaana kopolo dowanda weli-eda moyo. Yesu angali vailambo yavatila ootonyi-eda ira Babaye oomuva-a kopolo dedi. (Yoh. 11:23-25, 43, 44) Vano Yesu uli udimu, teto uva-iwa “ulamuliro wetene . . . udimu na vailambo yavati.” Eeno liye unokoza kwakwaneli-eda lonjezo loi “etene kali m’manda a iumbuwelelo” kanoza kavenyi-iwe teto kanoza kakaena idedi-edo yokalave na moyo mpakana walewale. — Mat. 28:18; Yoh. 5:25-29.
11. Kodi dipo linanikami-a avi ira nize nikaena moyo mpakana walewale?
11 Chifukwa n’ni Yehova alolile ira mwanaye womuwomeliwana akhwe khwa wovoreya? Yesu oosambaula chifukwiwa vevo aongile liye ira: “Mulungu oowomeliwana vinjinji ilambo moi oopeleka mwanaye obaliwa eka ira uliwetene womuroromela liye kaonongeye koma akaena moyo wo-omala.” (Yoh. 3:16) Vopeleka Mwanaye n’nga dipo lopimba machimwi-u, Mulungu ooiri-a ira vize vikale vyowandeya ira nize nifwanye moyo wo-omala. (Mat. 20:28) Namarumiwa Paulo oosambaula pama likundo lofuneyali lokuza yolinga ya Mulungu vevo alembile liye ira: “Khwa oofiya zela mwa muthu m’mo-i, venyi-iwa wa okhwa oofiya teto zela mwa muthu m’mo-i. Voi monga mwa Adamu etene kanokhwa, mwemo teto mwa Kiristu etene kanoza kava-iwe moyo.” — 1 Akor. 15:21, 22.
12. Kodi Umwene unaza ukami-a avi ira yolinga ya Yehova yokuza iyo athu ikwakwaneli-ediwe?
12 Yesu oofunji-a o-arelaye ira kapepelenga ira Umwene wa Mulungu uze koma teto yofuna ya Mulungu iireye vailambo yavati. (Mat. 6:9, 10) Mbali imo-i ya yolinga ya Mulungu choi athu kaze kakale vailambwela mpakana walewale. Ira vyevi viwandeye, Yehova umusakula mwanaye ira akale Mwene wa Umwene wa Mesiya. Mulungu ukala asonkani-anga athu okwakwana 144 000 vailambwela, ira ka-inde chito limo-i na Yesu vokwakwaneli-eda yolingaye. — Chiv. 5:9, 10.
13. Kodi Yehova unaira n’ni vathawiila, n’nga iyo ninakami-avo avi?
13 Vano Yehova unosonkani-a a “mwinji mulukulu” koma teto afunji-a ira kakale zika da Umwenaye. (Chiv. 7:9, 10; Yak. 2:8) Masiki ira malambwano athu anjinji muilambwela mbogawaneya chifukwa ya chidani, koma teto kondo, a mwinji mulukulwala kanoyesayesa kala mwamurendele vo-olandela ira kanakumela muvilambo kapena mitundu do-iyana. Mopipilisa aluwa koosai-a wale masupadiwa ira kakale imba da pulawo. (Mik. 4:3) M’malo movazana kondo dedo dinapi-a athu anjinji, aluwa kanokami-a athu fwanya “moyo waimbarimbari” vowafunji-a vyokuza Mulungu waimbarimbari koma teto vyolinga vyaye. (1 Tim. 6:19) Abaliwa kanokoza aruni-anga kapena kanokoza gumanana mavuto a vyachuma chifukwa yokala umbali ya Umwene wa Mulungu, koma Yehova unoonechecha ira aliwa kokaana vyetene vyevyo kanafuneelaathu. (Mat. 6:25, 30-33; Luka 18:29, 30) Makundo anala kanonisimikizela ira Umwene wa Mulungu ngu weniweni koma teto ira unoza upitilize kwakwaneli-eda yolinga ya Yehova.
SOGOLO LAPAMA VINJINJI
14-15. Kodi lonjezo la Yehova loi unoza amali-e khwa linaza likwakwaneli-ediwa avi?
14 Vano Yesu ngu Mwene wa Umwene wa Mulungu udimu teto unoza akwakwaneli-ede malonjezo etene a Yehova. (2 Akor. 1:20) Ambeela mu 1914, Yesu ukala agonji-anga adanaye. (Sal. 110:1, 2) Chinene veva liye na olamulela afwaye kanomari-a gonji-a teto kanoononga athu etene otakala. — Chiv. 6:2.
15 Vathawi ya Ulamulilo wa Chaka 1000 wa Yesu, athu anayo katatiile kanoza kavenyi-iwe teto ovwela kanoza kakami-iwe ira kakale angwiro. Vaduli va shishiwa womari-a, athu anayo Yehova unaze liye aaweluze ira mbolungama, “kanoza kawachele ilambo yavati teto kanoza kakale mwemo wamuyaya.” (Sal. 37:10, 11, 29) Pivyosangalasa ira “khwa monga mudani womari-a, unoza uwonongiwe.”— 1 Akor. 15:26.
16. Kodi chifukwa ilukulu eneyo inafuna niiri-a tumikela Yehova chin’ni?
16 N’nga mwemo nionele iyo, idedi-edwi-u yoza kaana moyo mpakana walewale chokumela m’mawu a Mulungu. Idedi-edwela inokoza nikami-a kalave ororomeleya m’malambo omari-a oruchala. Koma ira nimusangalasenga Yehova, ninafuneela mutumikela ookala chifukwa yoi ninofunechecha za fwanya moyo. Chifukwa ilukulu yokalave ororomeleya wa Yehova na Yesu, chi yoi ninowaomeliwana vinjinji. (2 Akor. 5:14, 15) Chikondila inonilimbi-a ira niasazi-edenga koma teto ira nipangenga tindi wandela amo-i vya idedi-edo yi-u. (Arom. 10:13-15) Naesaesanga kala ova-a koma teto rambela kala ovikonda, ninokala athu anayo Yehova unafuna liye ira kakale afwaye mpakana walewale. — Aheb. 13:16.
17. Kodi uliwetene vaeka un’na udindo woi avi? (Mateyu 7:13, 14)
17 Kodi ninoza nikale mu gulu la athu anayo kanaze kafwanye moyo o-omala? Yehova univa-a mwayi onola. Vili na iyo va thawi ila sakula ira nipitilize enda va sewu wawu moyo (Welengani Mateyu 7:13, 14.) Kodi vyongo vinaza vikale avi va thawi eneyo ninaze iyo nikaena moyo pakana walewale? Ninoza nitapanye yosomeda ya yofuka enela mukhani yo-arela
NYIMBO 141 Moyo Ngodabwi-a
a Kodi munodedi-edela za kaana moyo wo-omala? Yehova unolonjeza ira dambo limo-i, ninoza nikaena moyo wookumbanya ira mwina ninotatiya. Mukhanila ninotapanya vifukwa vimo-i vyevyo vinaniiri-e ira niroromelenga vinjinji ira Yehova unoza akwakwaneli-ede lonjezoli.
b Onani bokosi loi, “‘Tapulela wa Mawu Oyi ‘Mpakana Walewale’ M’Baibulo.”
c MAWU OSAMBAULA ITHUZITHUZI: M’bali ouluula unaganizela vyongo vimo-i vyevyo unafuna liye za ira aza akala na moyo o-omala.