“Weyo Unoza Ukale Na Miyo M’Paradaizo”

1. Anga-an’le vang’ono khwa, kodi Yesu amuwanden’le n’ni wachifamba onoyo ali vambali vaye? (Luka 23:39-43)

YESU na achifamba anayo kapachikiwile limo-i na liye, koovwa ululu oopi-a vevo moywiwa wamalaathu vang’onovang’ono. (Luka 23:32, 33) Achifamba etene anala koomunyoza Yesu, eeno pi vyovaela iziweya ira katali ofunjedaye. (Mat. 27:44; Malik. 15:32) Koma m’mo-i wa aluwa oochenja maganizo. Liye eere: “Yesu, mwandiumbuwele mwaza muvolowa mu umweninyu.” Yesu asomedile ira: “Ndithu ndinoouwandela peeno, weyo unoza ukale na miyo m’Paradaizo.” (Welengani Luka 23:39-43.) Kavali umboni wotonyi-eda ira Wachifambola oosomedela uthenga woi ‘Umwene wa udimu uwandamela.’ Koma teto Yesu kaamuwanden’le muthula ira unoza avolowe mu Umwene wa udimu. (Mat. 4:17) Yesu awonga vya paradaizo wa vailambwela usogolo. Chifukwa n’ni ninawonga eeno?

2. Kodi chin’ni eneyo inatonyi-eda ira wachifamba onoyo alapilola ali Muyuda?

² Podi ira wachifamba onoyo alapiloyo ali Muyuda. Liye oomuwandela wachifamba fwaye ira: “Kodi we kunaova Mulungu eti, voona ira nawen’ne teto unana wachela chilango yofwanafwana na ya muthu onola?” (Luka 23:40) Ayuda kalambela Mulungu m’mo-i, koma athu a mitundu dimo-i kalambela Milungu dinjinji. (Ekis. 20:2, 3; 1 Akor. 8:5, 6) Vyaakale ira wachifambola kaali Muyuda, yofuka eneyo afuke liye yakala yoi, ‘Kodi we kunaova milungu eti?’ Wenjedela vevo, Yesu kaarumiwe wa athu a mitundu ndimo-i, koma wa “khosa dotatiya da nyumba ya Izaraeli.” (Mat. 15:24) Koma Mulungu ali angawandelile Aizarayeli ira unoza avenyi-e athu anayo katatiile. Wachifamba onoyo alapilola podi ira ooiziwa vyevyi teto mawaye kanotonyi-eda ira ooyembekezela ira Mulungu unoza avenyi-e Yesu ira alamulele mu Umwene wa Mulungu. Vinovaela iziweya ira muthula, naliyene oororomela ira Mulungu unoza amuvenyi-e.

3. Kodi podi ira wachifamba onoyo alapilola aganizela vya n’ni Yesu angaongile vya Paradaizo? Sambaulani. (Genesesi 2:15)

³ N’nga Muyuda, wachifamba onoyo alapilola podi ira ooiziwa vyokuza Adamu na Hava koma teto Paradaizo mwemo mwali athu. Eeno liye podi ira oororomela ira Paradaizo onoyo Yesu amuromolile liye unoza akale munda woriya vailambo yavati vevano. — Welengani Genesesi 2:15.

4. Kodi mawu anayo Yesu amuwanden’le liye wachifamba kanafuneela niiri-a ganizela n’ni?

⁴ Mawu anayo Yesu amuwanden’le liye wachifambola kanokoza niiri-a ganizela mwemo moyo unazeathu ukalele m’Paradaizo. Teto ninokoza funjedavo yongo vyokuza Paradaizo va ulamulilo wa Mwene Solomo onoyo wali wamurendele. Teto ninoyembekezela Yesu onoyo uli wokwaranya Solomo, ira unoza a-inde chito na olamulela afwaye sakaeda ilambwela ira ikale malo apama vinjinji. (Mat. 12:42) Pivyovweya ira a “khosa dimo-i” kanokoza kala ofunechecha iziwa vyevyo kanafuneelaathu panga ira kaze kakale na moyo mpakana walewale m’Paradaizo. — Yoh. 10:16.

KODI MOYO UNAZA UKALA WOI AVI M’PARADAIZO?

5. Kodi munaembekezela ira moyo unaza ukala woi avi m’Paradaizo?

⁵ Kodi m’maganizo mwinyu munazecha vyoi avi mwaganizelanga mwemo moyo unazeathu ukalele m’Paradaizo? Podi ira munoganizelecha vya malo oriya ofwanafwana na munda wa Edeni. (Gen. 2:7-9) Mwina munoumbuwelecha ulosi wa Mika wokuza athu a Mulungu woonga ira, “uliwetene unoza akale vati va tengwaye wa mpesa na tengwaye wa nankuyu.” (Mik. 4:3, 4) Mwina munoumbuwelecha teto vyevyo Baibulo linawongaathu vyoi unoza ukale vyodja vinjinji. (Sal. 72:16; Yes. 65:21, 22) Eeno munokoza viyerekezelanga mwangali m’munda woriya, vatebulo vangali vyodja vinjinji vyooma. Munokoza yerekezela teto muvumanga mpweya wapama wa vyomela na maluwa, teto munovwa teya wa abalinyu na afwinyu tangani-avo teto ovenyi-iwa anayo kanasangalala aledela limo-i. Vyetene vyevyi kai vyokeda ro-a. Mookaikela vyongo vyevyi vinoza viireye vailambwela. Komave m’Paradaizo ninoza ni-indenga teto chito yosangalasa.

6. Kodi ninaza ni-inda chito yoi avi m’Paradaizo? (Onani ithuzithuzi.)

⁶ Yehova anilengile ira nisangalalenga na-indanga chito. (Nam. 2:24) Ninoza nitanganisiwe vo-inda chito simbwasimbwa vathawi ya Ulamulilo wa Chaka 1000 wa Kiristu. Athu anayo kanaze kavulumuwe zuzumi-iwa ulukulu koma teto anayo kanaze kavenyi-iwe kanoza kafuneele vyowara, vyodja koma teto malo okala. Ira vyongo vyevyi vifwanyeye vanoza vakale chito injinji yosangalasa. Mofwanafwana na Adamu na Hava anayo kafuneela lima mundiwa, ninoza nikaena mwayi wosakaeda ilambwela ira ikale Paradaizo. Kaganizelani teto mwemo vinazeathu vikalele vyosangalasa funji-a athu mamiliyoni anayo kanaze kavenyi-iwe, anayo kanaze kakale kaiziwanga vyoyeva vyokuza Yehova na vyolinga vyaye. Vinoza vikale teto vyosangalasa kami-a athu ororomeleya anayo kakan’lewo Yesu a-anaze vailambwela ira kaiziwe vinjinji.

7. Kodi ninakale osimikiza vyan’ni, n’nga chifukwa n’ni?

⁷ Ninokoza kala osimikiza ira moyo wa m’Paradaizo unaza ukala wamurendele, kaninaza nisauwelanga iliyetene koma teto vyongo vinoza viireyenga mwadongosolo. Chifukwa n’ni ninawonga eeno? Chifukwa Yehova univa-a wale ithuzithuzi ya mwemo moyo unazeathu ukalele mu Ulamulilo wa mwanaye. Ninoonecha vyevyi naganizela khani ya ulamulilo wa Solomo.

ULAMULILO WA MWENE SOLOMO UNOTONYI-EDA MWEMO VINAZEATHU VIKALELE M’PARADAIZO

8. Kodi mawu ofwanyeya va Salimu 37:10, 11, 29, anayo Mwene Davide alembile liye kakwakwaneli-ediwe avi? (Onani khani yoi “Vyofuka Vyokumela wa Owelenga” eneyo ili m’magazinila.)

⁸ Mwene Davide oowandeliwa lemba mwemo moyo unazeathu ukalele usogolo, mwene wazelu na ororomeleya aza aambeela lamulela. (Welengani Salimu 37:10, 11, 29.) Thawi dinjinji ninowelengela amo-i Salimu 37:11 nawonganga vya Paradaizo onoyo unaza. Nikaana vifukwa vyapama vyoirela vyevyi chifukwa Yesu ooromola teto mawu avalembali va ulalikaye wavamwangoni, votonyi-eda ira vyevyi vinoza vikwakwaneli-ediwe teto usogolo. (Mat. 5:5) Koma mawu a Davide anala kootonyi-eda teto mwemo moyo unazeathu ukalele vathawi ya umwene wa Solomo. Vathawi eneyo Solomo alamulela liye wu Izarayeli, athu a Mulungu koosangalala na murendele teto katasauwela iliyetene mu ilambo “yoenda ukaka na nuwi.” Mulungu eere: “Mwapitiliza arela malangizwanga . . . , ndinoza nduuva-eni murendele muilambweyo, moi munoza mugone vati vo-okala ouwopi-ani.” (Lev. 20:24; 26:3, 6) Malonjezo anala kookwakwaneli-ediwa mu ulamulilo wa Solomo. (1 Lim. 22:9; 29:26-28) Teto Yehova oolonjeza ira athu otakala olambela milungu dimo-i “katinaza kakalawo.” (Sal. 37:10) Eeno mawu ofwanyeya va Salimu 37:10, 11, 29, kookwakwaneli-ediwavo mundulimu teto kanoza kakwakwaneli-ediwe usogolo.

9. Kodi mfumukazi wawu Seba awongile vyoi avi vyokuza ulamulilo wa Mwene Solomo?

⁹ Mfumukazi wawu Seba oovwa ira athu awu Izarayeli koosangalala na murendele koma teto moyo wapama mu ulamulilo wa Mwene Solomo. Mfumukaziyo ooenda ulendo undendayi kuma waniwa dowa wu Yerusalemu ira aviwonele ekave. (1 Mam. 10:1) Angaendele umwene wa Solomo, mfumukazila eere: “Ndiwona ira ndakede wandeliwa vyoyeva vyoka. . . . Odala nyo athu, odala atumikinywala anayo kanatumikela vamaso vinyu thawi detene, novwanga zelu dinyu.” (1 Mam. 10:6-8) Koma mwemo vyongo vyaliliathu mu Umwene wa Solomo, vyakeda tonyi-eda vyevyo Yehova unaze liye airele athu mu ulamulilo wa Mwanaye Yesu.

10. Kodi Yesu unakwaranya Solomo mundila diivi?

¹⁰ Yesu unokwaranya Solomo mu vyongo vyetene. Solomo kaali wangwilo teto oolakwi-a vyongo, vyevyo vyairi-ile ira athu a Mulungu kagumanena mavuto. Koma Yesu Ngolamulela wangwilo onoyo kanalakwi-a vyongo. (Luka 1:32; Aheb. 4:14, 15) Yesu kaagonjile va vyoshisha vyorucha vinjinji vyevyo Satana amuzi-ede liye. Kiristu ootonyi-eda ira kanachimwe kapena panga iliyetene eneyo inaporeche nzika daye dororomeleya. Ngu mwayi watengo wavadimu kaana Mwene n’nga onola.

11. Kodi ngu mbaani anayo kanaze kakami-ede Yesu lamulela?

¹¹ Yesu unoza a-inde chito limo-i na olamulela afwaye okwakwana 144 000 kami-eda athu, koma teto kwakwaneli-eda vyolinga vya Yehova vailambwela. (Chiv. 14:1-3) Olamulela afwaye anala, kanaza kakala achifundo chifukwa naaluwene teto koogumanana mavuto vevo kaliathu vailambwela. Kodi aliwa kanaza kakala na udindo woi avi?

KODI OZOZIWA KANAZA KAKALA NA UDINDO WOI AVI?

12. Kodi Yehova unaza ava-a a 144 000 chito yoi avi?

¹² Yesu na olamulela afwaye kanoza kakale na chito ilukulu kwaranya eneyo Solomo an’na liye. Mwene wa Chiizarayelila afuneya samalela athu mamilioni anayo kali muilambo imo-i yokha. Koma olamulela a Umwene wa Mulungu kanoza kakami-ede athu mabilioni vailambo yetene yavati. Veva Yehova oopeleka mwayi wavadela vinjinji wa a 144 000.

13. Kodi udindo wa olamulela afwaye a Yesu unaza utangani-avo vyongo viivi?

¹³ Mofwanafwana na Yesu, a 144 000 kanoza katumikele n’nga mamwene na asembe. (Chiv. 5:10) Vo-arela Ilamulo ya Mose, asembe kookaana udindo oonechecha ira athu kookaana thanzi lapama koma teto kali va usamwali wapama na Yehova. Vofwanya Ilamulo yali “ithuzithuzi ya vyongo vyapama vyevyo vinaza,” pivyovweya wonga ira olamulela afwaye a Yesu kanoza kakami-ede athu kaana thanzi lapama koma teto kala va usamwali wapama na Yehova. (Aheb. 10:1) Ninafuneela embekezela ira nize niwone mwemo mamwene na asembala munazeathu mukami-edele zika da Umwene dedo dinaze dikale va ilambo yavati. Mulimwetene mwemo Yehova munasakaedele liye vyongo, nili osimikiza ira Paradaizo unazoyo, athu anayo kanaze kakale vailambwela kanoza kava-iwe malangizo anayo kanazeathu kafuneele. — Chiv. 21:3, 4.

KODI A “KHOSA DIMO-I” KANAFUNEELA PANGA N’NI IRA KAZE KAKALE M’PARADAIZO?

14. Kodi vali gwilizana woi avi vaari va a “khosa dimo-i” na abalaye a kiristu?

¹⁴ Yesu ooromola athu anayo kanaze kalamulele limo-i na liye ira “gulu la khosa ling’onong’ono.” (Luka 12:32) Oowonga teto vya gulu limo-i lelo aliromon’le liye ira “khosa dimo-i.” Magulu ambin’li etene anala kanapanga gulu limo-i la khosa dogwilizana. (Yoh. 10:16) Vano magulu ambin’lala kano-inda chito limo-i teto vi vinoza vipitilizeve fiyeda vevo ilambwela inazeathu ikale Paradaizo. Vathawi eneyo a “gulu la khosa ling’onong’ono” kanaza kakala kangali udimu, koma a “khosa dimo-i” kanoza kakale na idedi-edo yozasangalala na moyo vailambwela mpakana walewale. Koma viikala vyevyo a “khosa dimo-i” kanafuneelaathu ira vathawi ila ira kaze kakale m’Paradaizo.

15. (a) Kodi a “khosa dimo-i” kana-inda chito avi na abalaye a Kiristu? (b) Kodi ninalandele avi isazo ya m’bali onoyo udowile dowa gula vyongo? (Onani ithuzithuzi.)

¹⁵ Wachifamba onoyo alapilole ookhwa a-anakayena mwayi okwakwanela wotonyi-eda ira oomuyamikela Kiristu. Mo-iyana na vyevyi, vathawi ila iyo a “khosa dimo-i” nikaana mwayi ulukulu wotonyi-eda ira nili umbali ya Yesu. Mofwanafwani-a, ninotonyi-eda ira ninomuwomeluwana va vyevyo ninairelecha iyo abalaye ozoziwa. Yesu awongile ira unoza aweluze athu volandela mwemo munairelaathu na abalayala. (Mat. 25:31-40) Ninokoza kami-eda abalaye a Kiristu na-indanga nawo mwatindi chito yolaleela nofunji-a athu. (Mat. 28:18-20) Chi chifukwiwa ninafunechecha indi-eda chito pama vyongo vyokami-eda vofunjeda Baibulo monga buku loi Sangalalani Na Moyo Mpakana Walewale!. Akala kamunaambeele funjeda Baibulo na muthu, bwanji ookaana yolinga yoi muvepe athu anjinji ira mufunjedenga nawo Baibulo?

16. Kodi ninafuneela panga n’ni ira nize nikale zika da Umwene wa Mulungu?

¹⁶ Kaninafuneela embekezela mpakana nize nivolowe m’Paradaizo ira nize niambeele kala tundu wa athu anayo Yehova unafuna liye ira kaze kakalemo. Vathawi ila ninafuneela yesayesa ira nikalenga oona murima mu vyoonga koma teto mu vyoira koma teto kaana makalelo apama. Ninafuneela teto kala ororomeleya wa Yehova, lombwana kapena iyani-u koma teto Akiristu afwi-u. Nayesayesanga arela makundo a Yehova vathawi ila vevo nili iyo mu ilambo yotakalela, vinoza vikale teto vyo-orucha vi-arela naza nivolowa m’Paradaizo. Ninokoza ambeela vano ulukuli-a luso koma teto makalelo anayo kanaze kafuneele vathawi eneyo. Onani khani yoi “Kodi Muli Okozeya ‘Zawachela Ilambo Yavati’?” eneyo ili m’magazinila.

17. Kodi ninafuneela kalelanga viimba mulandu chifukwa ya machimo anayo nairile iyo mundulimu? Sambaulani.

¹⁷ Kaninafuneela viimbanga mulandu chifukwa ya machimo alukulualukulu anayo nairile iyo mundulimu. Pivyoona ira kaninafuneela wonanga sembe ya dipo n’nga chifukwa ‘yoirelanga machimo mwadala.’ (Aheb. 10:26-31) Koma ninokoza kala osimikiza ira akala nilapile mokumela vati va murima teto niwachela likami-edo lokumela wa Yehova koma teto nichenja ikalelo yi-u, liye unoza anikurumuwele na murima wetene. (Yes. 55:7; Vyo. 3:19) Umbuwelani mawu anayo Yesu awanden’le liye Afarisi ira: “Miyo kandizile za itana athu olungama, koma ochimwa.” (Mat. 9:13) Eeno sembe ya dipo chi yakopolo vinjinji moi inokoza phimba machimwi-u etene.

MUNOKOZA ZA KALA M’PARADAIZO MPAKANA WALEWALE

18. Kodi munafune za kambirana vyoi avi na muthu onoyo apachikiwe na Yesu?

¹⁸ Kodi munoviyerekezelanga mwangali m’Paradaizo muwaledanga na wachifamba onoyo awongile na Yesule? Pi vyookaiki-a ira enete nyen’ne munoza musambaule mwemo munayamikelela nyo sembe ya Yesu. Nyo podi za mufuka ira ausambauleleni vinjinji vyokuza vyevyo vyaireile m’maola omari-a a moyo wa Yesu vailambwela, koma teto mwemo mwavwele liye Yesu angasomedile yovepa yaye. Podi ira liye unoza aufukeni ira mumusambaulele mwemo vyongo vyaliliathu m’malambo omari-a. Unaza ukala mwayi ulukulu funjeda mawu a Mulungu na athu n’nga onola. — Aife. 4:22-24.

19. Chifukwa n’ni moyo m’Paradaizo kunaza ukala wogomi-a? (Onani ithuzithuzi yavatakuru lowambeela.)

¹⁹ Moyo m’Paradaizo kunaza ukala wogomi-a. Thawi detene ninoza nigumanenga na athu apama koma teto inda chito yosangalasa. Kwaranya vyetene, dambo lililetene ninoza nimuiziwenga pama Babi-u waudimu koma teto sangalala na vyongo vyevyo univa-ile liye. Kaninaza nimari-a funjeda vya liye teto vanoza vakale vinjinji vyoi nifunjede vyokuza chilengedwaye. Vevo ninaze iyo nikale na moyo wa thawi yolapha, pavevo teto ninaze iyo nimuwomeluwengana vinjinji Mulungu. Ninoyamikela vinjinji Yehova na Yesu vonilonjeza ira ninoza nikale na moyo mpakana walewale m’Paradaizo.