Vyosangalasa Vyevyo Nifwanyile Iyo Koma Teto Vyevyo Nifunjedile Iyo Votumikela Yehova

Makolwanga kakumele wu Estonia vathawi ya khondo yanambili Yavailambo Yetene, nodowa wu Germany wewo ndabaluwele miyo. Ndangabaluwe, koowambeela kozeela vyotamela wu Canada. Nyumbi-u yowambeela yali vakwikwi na wu Ottawa wu Canada, yali ing’onong’ono teto kawetelamo anaku. Nali osauwa vinjinji komave nookwakwani-a dja mabonje va yodja ya mamawa.

Dambo limo-i a Mboni da Yehova koowawelengela am’manga lemba la Chivumbuluso 21:3, 4. Vyevyo kaawelengeleathu vyoowakuza vinjinji mpakana koomori-a misodi dachisangalalo. Mbewu da imbarimbari doowambeela ulukula m’murimani mwiwa moi aliwa na ababanga koodowa vasogolo mombaraanya teto koobadiziwa.

Makolwanga kataiziwa pamapama Chingelezi, komave koopanga tindi votumikela Yehova. Loweluka lililetene, ababanga koonilanda miyo limo-i na murongolanga n’ng’onong‘ono Sylvia vodowa wolaleela, ngakhale vanduli voi koo-inda chito ma-iyu wetene ufakitale yopanga ndalama daisulo wu Sudbury, wu Ontario. Mulungu uliwetene noofunjeda Sanja ya Olonda monga banja. Ababanga na am’manga koondikami-a vinjinji ira ndimuomeliwengana Mulungu. Vyevi vyoopangi-a ira ndivipeleke wa Yehova mu 1956, ndangan’na chaka 10. Ona ira aliwa koomuomeliwana vinjinji Yehova woondikami-a vinjinji vamoywanga wetene.

Ndangamari-ile sukulu, ndoowambeela sokoneziwa na vyongo vimo-i votumikela Yehova. Ndaganiza ira akala ndinakale mpainiya, kandinaza ndikwakwani-a fwanya ndalama doi ndize ndigwelele ndege nodowa muvilambo vyo-iyana-iyana monga mwemo ndafunela miyo. Ndoofwanya chito ya u DJ unyumba imo-iwa youlusela mawu, teto ndooiwomeliwana vinjinji chitwela. Koma nda-inda chitwela mazulo, vyevyo vyapangi-a ira thawi dinjinji kandifwanyeyenga vamisonkano teto ndoogwilizana na athu oyi katamuomeliwana Mulungu. Vogomi-eda viwa, chikumbumtima yanga yofunji-iwa Baibulo yoondikami-a ira ndichenje.

Ndootamela wu Oshawa wu Ontario. Wewo ndoogumana na Ray Norman, murongolae Lesli koma teto apainiya amo-iwa. Etene anala koondiwachela pama. Ona mwemo kasangalalelaathu woondipangi-a ira ndiganizele vyolinga vyanga. Aliwa koondilimbikisa ira ndiambeele upainiya moi ndoouwambeela mu Septembala 1966. Ndali osangalala teto ndaona ira vyongo vinondiendela pama. Komave, vyongo vyevyo vyachenje moywanga vyali vinga-alile vang’ono ireya.

YEHOVA AUVEPANI IRA MUPANGE VYONGO VIMO-IVIWAVYENE, MUSHISHENGA VIPANGA

Nda-anamari-e sukulu ndoolemba fomu yofukedela utumiki wava Beteli wu Toronto, wu Canada. Koma vanduli viwa ndipanganga upainiya, ndooitaniwa ira ndatumikele wa chaka 4. Koma ndoomuwomeliwana vinjinji Lesli moi ndoowova ira akala ndinasomede dowa wu Beteli, kandinaza ndimuona nawili. Vanduli vopepelela khanila mokumela vati vamurima wathawi indendai, ndoosomedela dowa tumikela wu Beteli moi ndoosazikana na Lesli ndangali okumudwa.

Vowambeela nda-inda chito mu dipatimenti yochapa vyowara, teto vanduli viwa ndoova-iwa chito yausekilitale. Vathawiyo, Lesli ali mpainiya wavadela wu Gatineau, wu Quebec. Thawi detene ndoofuna iziwa ira unapanga n’ni koma teto akala ndasakun’le vyofwanelela. Vanduli viwa, vooireya yongo imo-iwa yosangalasa yoi kandaidedi-edela. Ray, murongolae wa Lesli, ooitaniwa wu Beteli moi nakala subi limo-ive. Vyevi vyoopangi-a ira ndiambeele nawili aleda na Lesli moi nootelana va 27 Febuluwale 1971, dambo lelo ndamari-a miyo utumikanga wa chaka 4.

Miyo na Lesli nootumiziwa dowa tumikela mupingo wa Chifulenchi wu Quebec. Vangavirile chaka doyeva, ndoodabwa ndingawandeliwe ira ndikale woing’anela dela. Va ndali ndangan’na chaka 28 doka. Ndaviona ira ndili mwana koma teto o-oiziwa vinjinji. Koma mawu a va Yeremiya 1:7, 8 koondilimbikisa. Lesli ali angapangile ngozi ya galimoto maulendo angasene. Ndiye kodi nakwakwani-a avi utumiki woing’anela dela? Koma Lesli andiwanden’le ira, “Akala Yehova univepile ira nipange vimo-iviwavyene, kodi kaninashishe vipanga?” Eno noosomedela teto noosangalala panga utumikila wachaka 17.

Ndootanganisiwa vinjinji va utumikanga woing’anela dela, moi kandakaana thawi yokwakwanela yowaleda na Lesli. Vanduli viwa ndoofunjeda yongo imo-iwene. Lolemba limo-i mamawa, ndakede vwa gogoda vaisewo. Ndangakumile kandafwanyilevo uliwetene. Ndakede fwanyavo basiketi, mwangali nguwo yotandela vatebulo, ipaso, keke, buledi, botolo la vinyu, matambula koma teto pepala yolembiwa ira, “Atukuleleni a-iyaninyu umalo amo-iwa mwasangalale.” Vadambo leli unde woocha pama, moi zuwa lali lowala. Koma ndoomufotokozela Lesli ira ndookaana khani doi ndikozeele, moi kandinakwakwani-e dowa. Liye oondivwechecha koma kavyamusangalasile. Ndangakede garati vapando ira ndiambeele kozeela, chikumbuntimanga yoowambeela ndivuti-a. Ndooganizela lemba la Aifeso 5:25, 28. Vyali ngati Yehova unondilimbikisa ira ndiganizele mwemo iyananga mwavwela liye. Ndangapepelile, ndoomuwandela Lesli ira, “Tiyemo nidowe.” Vyevi vyoomusangalasa. Noodowa umalo amo-iwa oriya, mpepetele mwa mu-inje wewo nagaratile iyo vanguwele, teto leli lali limo-i mwa malambo anayo nasangalalile iyo vinjinji vamoywi-u. Koma ndookwakwani-a teto kozeela khani danga dile.

Noosangalala na utumiki-u woing’anela dela, moi nooendela madela anjinji, kumela wu British Columbia dowa fiya wu Newfoundland. Va yolinga yanga ineyo ndan’na miyo kumela ndangali mwana, yofuna dowa m’madela o-iyana-iyana, yoowambeela kwakwaneli-ediwa. Ndali ndangaganizelevo vyovolowa Sukulu ya Giliyadi, koma kandafuna kala m’mishonale. Ndaona ira amishonale mbaathu avadela, moi ndaganizela vyoi miyo kandinakwakwani-e utumiki unola. Koma teto ndoowova vyoi mwina ndinokoza tumiziwa uilambo imo-iwa wu Africa, wewo uli marenda na kondo. Ndoosangalala tumikela wewo ndatumikela miyo.

NDOODABWA NDANGAWANDELIWE IRA NDIDOWE NDATUMIKELE WU ESTONIA NA VILAMBO VYA MPEPETELE MWA NYANJA YA BALTIC

Mu 1992, vevo chitwi-u ya-uleliwaathu mu vilambo vyevyo vyali mu ulamulilo wa Soviet Union, noovepiwa akala ninaomeliwe dowa tumikela monga amishonale wu Estonia. Noodabwa vinjinji, koma noopepelela khanila. Va teto noovifuka ira, ‘Akala Yehova univepile ira nipange vimo-iviwavyene, kodi kaninashishe vipanga?’ Noosomedela, moi nooviwandela ira, ‘Voi kaninadowa wu Africa.’

Va-anavire thawi noowambeela funjeda Chiesitoniya. Vanduli viwa, vangavirile medi dingasi dene nangali muilambweyo, noovepiwa ira nipange utumiki woing’anela dela. Nafuneela niendelenga mipingo 46 koma teto magulu muvilambo viraru vya mpepetele mwa nyanja ya Baltic koma teto wu Kaliningrad, wu Russia. Vyevi vyatapulela ira nafuneela teto funjeda Chilativiya, Chilituweniya na Chirasha. Vyali vyorucha, komave afwi-u koowona tindi li-u moi koonikami-a funjeda viwongelovi. Mu 1999, ofesi ya thambi ya wu Estonia yoo-uleliwa, moi ndookaana mwai wotumikela mukomitiwa limo-i na Toomas Edur, Lembit Reile, koma teto Tommi Kauko.

Nooiziwana na a Mboni anjinji anayo katami-ediwe wu Siberia mundulimu. Ngakale ira koozuzumi-iwa vinjinji mundende koma teto mwalani-iwa na mabanjiwa, aliwa katilunduwile kapena sunga yam’murimani. Koopitilizave kala osangalala koma teto laleela mwatindi. Vyevi vyoonikami-a ona ira na-iyene ninokoza wanda vilela nokalangave osangalala ngakale vevo nigumanile iyo na mavuto.

Vevo chaka daviraathu, noowambeela kala otanganisiwa moi kanakaana thawi injinji yovuma. Teto vanduli viwa Lesli oowambeela goma vinjinji. Kanazindikilile mombaraanya ira liye ali angaambeele marenda anayo kanapangi-a ira muthu agomenga vinjinji. Va sopano noosimikizela vyowelela wu Canada. Nangaitaniwe ira navolowena sukulu ya abali a mukomiti ya thambi wu Patterson, New York, U.S.A., ndookaikela akala ninakwakwani-e dowa. Komave nangaipepelele vinjinji khanila, noodowa. Yehova oodalisa vyevyo nasakulile iyo. Nangali usukulu inela, pavevo Lesli awachelile liye likami-edo lelo afuneela liye, moi noowambeela teto panga vyongo ngati wale.

NOODABWA IRA KOONITUMIZA WU AFRICA

Nangawelele wu Estonia mu 2008, mazulo a dambo limo-i noowachela foni kumela ulikulu li-u la vailambo yetene, yonivepa akala ninawande dowa tumikela wu Congo. Ndoodabwa vinjinji, simbwasimbwa chifukwa yoi ndafuneela someda dambo lo-arela. Vowambeela kandimuwanden’le Lesli vya khanila, chifukwa ndoowona ira kanagona ma-iyu anayo. M’malo mwiwa miyo kandagonile. Ndoopepela wa Yehova, nomufotokozela nkhawa dedo ndan’na miyo va khani yodowa wu Africa.

Dambo lo-arela ndangamufotokozele Lesli, noowandelana ira, “Yehova unonivepa ira nidowe wu Africa, ndiye ninaiziwe avi akala kaninakwakwani-a koma teto kaninasangalala akala kaninadowe?” Eno vanduli votumikela wu Estonia wa chaka 16, noogwela ndege dowa wu Kinshasa, wu Congo. Wewo ofesi ya thambi yookaana malo oriya koma teto a phee. Imo-i mwa vyongo vyevyo Lesli aambeele liye ela vachisi la subi li-u, yali kaadi lelo asungile liye vevo nakumile iyo wu Canada. Vakaadilo vali mawu oyi, “Muphuwenga mosangalala vamalo anayo muzaliwe nyo.” Nangaambeele waleda na abali, pangi-a maphuzilo a Baibulo koma teto ona vyosangalasa vyoza chifukwa ya utumiki wa umishonale, noowambeela teto sangalala votumikela Yehova. Vira wa thawi, nookaana mwai woendela maofesi a thambi muvilambo 13 vya wu Africa. Vyevi vyoopangi-a ira nikaena mwai oona athu o-iyana-iyana koma teto osangalasa. Nkhawa dedo ndan’na miyo vowambeela doomala moi ndoomutokoza Yehova chifuwa yonitumiza wu Africa.

Wu Congo, noova-iwa vyodja vyo-iyana-iyana monga vilombo ving’onong’ono, vyevyo naganiza iyo ira kaninadje. Koma ningaonile ira abali-u kanoviwomeliwana, na-iyene nooshisha moi nooviomeliwana.

Nookwakwani-a dowi-a yodja yauzimu koma teto likami-edo limo-iliwa umamawani wa ilambweyo wewo magulu avigawenga kaukelaathu madela koma teto porecha a-iyana na a-ima. Abali anjinji kali osauwa, koma noolimbikisiwa vinjinji ona ira aliwa koororomela vinjinji ira athu okhwa kanoza kavenye, koomuwomeliwana Yehova koma teto kali ororomeleya ugulu lae. Vyevi vyoopangi-a ira nivifufuze koma teto limbi-a iroromelo yi-u. Nyumba koma teto mbewu da abali anjinji dali dingawonongeile. Vyevi vyoonikami-a vwechecha likundo loi vyongo vyevyo ninakaena iyo vinokoza mala mombaraanya koma teto ira yofuneya vinjinji kuusamwali-u na Yehova. Ngakale ira abalayo koogumana na mavuto alukulu anala, katasimbwa kumbanya. Teto voi abalala koowona vyongo mofwanelela vyoonilimbikisa ira nilimbane na mavutwi-u, ngakale okuza thanzi li-u, molimba murima.

NOODOWA WU ASIA

Vanduli viwa, vooireya yongo imo-iwa yoi kanaiembekezela. Noovepiwa ira nitamele wu ofesi yathambi ya wu Hong Kong. Nali na-anaganizelevo vyoi ninoza nikale wu Asia. Koma ningaganizele mwemo Yehova mwanikami-edele liye mwachikondi m’mautumiki o-iyana-iyana noosomedela. Mu 2013, noo-iyana na afwi-u koma teto dela loriya la wu Africa nimori-anga misodi, moi kanaiziwa ira wewo ninadowa iyo ninaya nagumane na vyoi avi.

Noofiya wu Hong Kong, ineyo ili tawoni yoriya koma teto yokaana athu anjinji, moi wewu wali chenja ulukulu. Vyali vyorucha funjeda Ichainizi. Komave abali kooniwachela pama teto vyodja vya wewo vyoonisangalasa. Chitwi-u yoodowa vasogolo mombaraanya koma kaana nyumba wali wogwela ntengo. Eno Bungwe Lolamulela looganiza vyoguli-a nyumba dinjinji da Beteli muilambweyo. Ndiye va-anavire thawi indendai, mu 2015, nootamela wu South Korea, wewo ninatumikela iyo mpakana vano. Uno teto noofwanya iwongelo imo-iwa yorucha. Komave ngakale ira vikala vyongo vinjinji vyoi nifunjede, ninolimbikisiwa vinjinji chifukwa afwi-u kanoniwandela ira ninoesaesa ifunjeda iwongelwela.

VYEVYO NIKAN’LE IYO NIFUNJEDANGA

Kai thawi detene vevo fwanya afwi-u unakalaathu wokweya, koma niona ira naambeela iyo aledela athu amo-iwa, ninokoza iziwana na athu mombaraanya. Niona ira ngakhale ira abali-u kano-iyana va vyongo vimo-i, kanofwanafwana va vyongo vinjinji. Koma teto Yehova anilengile mundila yavadela yoi niwandenga ula murimi-u nowandanga kaana afwi-u anjinji. — 2 Akor. 6:11.

Niwona ira ninafuneela aonanga athu ngati mwemo Yehova unaawonela liye koma teto fufuzanga ira niwone mwemo Yehova unanitonyi-edela liye chikondi koma teto mwemo unanisogolelela liye vamoywi-u. Thawi iliyetene ineyo nawona iyo ira nifooka kapena ambeela kaikela akala abali-u kanasangalala na iyo, noowelenga makalata na makaadi anayo afwi-u kanilembelaathu. Nikala niwonanga mwemo Yehova ukan’le liye asomedanga mapepelwi-u, nilimbikisa koma teto niva-a kopolo.

Va chaka detene dedi, miyo na Lesli nifunjeda funeya wokaana thawi yoirela vyongo limo-i monga banja, ngakhale vevo nitanganisiwe iyo vinjinji. Niwona teto funeya woteya nalakwi-a mawongelo a mawu amo-iwene, simbwasimbwa vevo ninafunjeda iyo iwongelo imo-iwa. Mazulo uliwetene ninoshisha ganizela yongo imo-iwene yosangalasa ineyo Yehova uniirele liye era eno iyo muyamikela.

Onga vyoona, ndali nda-anaganizelevo ira ndinoza ndikale m’mishonale kapena teto kala muvilambo vyo-iyana-iyana. Komave ndisangalala funjeda likundo loi ninokoza panga iliyetene mokami-iwa na Yehova. Thawi detene ndinoumbuwela mawu a namaongela Yeremiya, oyi: “Mundidabwi-a nyo Yehova.” (Yer. 20:7) Onga vyoona, liye univa-a vyongo vinjinji vyosangalasa koma teto madaliso anjinji, tangani-avo kwakwaneli-eda yolinga yanga yofuna gwela ndege. Nikala nidowanga vandege m’madela anjinji oyi ndangali mwana kandinaganizelevo ira ndinoza ndidowewo. Teto niendela maofesi a thambi muvigawo 5 vya ilambo yavatila. Va mautumiki etene anayo nipangile iyo, ndinomutokoza vinjinji Lesli chifukwa yokaana murima wofunechecha ndikami-a.

Ninopitiliza viumbucha ira ninopanga vyetene vyevi chifukwa yoi ninomuwomeliwana Yehova. Vano ninakala ngati ninakeda lawa madaliso anayo ninaze iyo nifwanye usogolo naza niwachela moyo o-omala, vevo Yehova ‘unaze liye atapule ndanda lae nokutirisa vyokumbwa vya yamoyo iliyetene.’ — Sal. 145:​16.