Kodi Munoumbuwela?

Kodi muwelenga mosamala magazini a chaka ila a Sanja ya Olonda? Kasomedani mafuso o-arelala:

Kodi mawu oyi “chenja maganizo” kanatantauza n’ni? (Aroma 12:2)

Katinatantauza ira nikedenga panga chito dapama doka. M’malomwiwa, ninafuneya saelanga umuthwi-u wamuwari koma teto chenjanga vevo vanafuneya chenja, nayolinga yoi vyoira vi-u vigwilizanenga vinjinji na makundo a Yehova.— w23.01, takuru 8-9.

Kodi ninatonyi-ede avi ganiza pama naonanga vyoireya vya muilambwela?

Etene iyene ninopanga chidwi na mwemo vyoireya vya muilambwela vinakwakwaneli-edaathu maulosi a m’Baibulo. M’malo mokedanga fotokoza maganizwi-u ninafuneya fotokoza mogwilizana na makundo anayo kafalisiwe chineneveva. Naonganga vyongo mogwilizana na vyevyo vili m’mabuku a gulu la Yehova, ninotandiza ira pingo upitilize kala ogwilizana. (1 Akor. 1:10) — w23.02, takuru 16.

Kodi badiziwa wa Yesu una-iyana avi nobadiziwa wa o-arelae?

Yesu kaafuneya vipeleka wa Yehova chifukwa abaliwele mutundu unoyo wali ovipeleka wale wa Mulungu. Liye kaafuneya lapa machimo kapena vepa chikumbumtima yowela chifukwa ali wangwilo, kapena ira o-ochimwa. — w23.03, takuru 5.

Ninatandize avi athu amo-iwa ira kasomedenga vamisonkano?

Nipelekenga ndemanga dachidule ira nipeleke mpata wa athu amo-iwa ira kasomedevo. Nipewenga romola makundo anjinji chifukwa athu amo-iwa kanokoza sauwela vyongo vyoi kaongevo. — w23.04, takuru 23.

Kodi mawu oyi “Sewu wa Chiyelo” kapena ira “Sewu Opatuleya” ofwanyeya va Yesaya 35:8 kanatatauza n’ni?

Sewu opipilisa unola waimelela ndila ineyo Ayuda kavirileathu vokumela wu Babulo welela waniwa. Nanga bwanji malambwano? Wa chaka dinjinji ya-anafiye chaka ya 1919, chito yosakaeda sewu wauzimu yoo-indiwa. Athu koomasulela koma teto sindikiza ma Baibulo. Athu a Mulungu kookala kaendanga va “Sewu Opatuleya” volowa m’paradaizo ira kadowe kawachele madaliso anayo Umwene unazeathu uzi-e.— w23.05, takuru 15-19.

Kodi va Miyambo chaputala 9 ninafwanyavo malangizo okuza a-iyana ambin’li aavi opipilisa?

Chaputala inela inaonga ira “iyana opuusa” unoitana athu ira kadowe wu “Manda” koma “zelu yeniyeni” inoerekezeliwa na iyana unoyo unaitana athu ira “kasogoleliwenga novwechecha” vyongo ira kadowe kafwanye moyo. (Miya. 9:1, 6, 13, 18) — w23.06, takuru 22-24.

Kodi Mulungu atonyi-edile avi ira ngovievi-a koma teto ololela vopanga vyongo na Loti?

Yehova oomuwandela Loti ira avenyewo wu Sodomu ndipo atawele umimwango. Koma Loti angavepile ira atawele wu Zoari, Mulungu oosomedela vyevyo avepile liye. — w23.07, takuru 21.

Kodi mu-iyana unapange n’ni ngati mamunae unaonela vyolava?

Kanafuneya viimba mulandu. Aesaesenga ganizela vinjinji vyokuza usamwalae na Yehova koma teto khani da m’Baibulo da a-iyana anayo katonthoziwe kangapempelile wa Mulungu. Mu-yanoyo unokoza teto mutandiza mamunae pewa vyongo vyevyo vinamupangi-e onela vyolava.— w23.08, takuru 14-17.

Ngati muthu unaruni-a vyevyo ninaroromela iyo, kodi zindikila unanitandize avi ira nisomede mofaasa?

Nionenga ira fusolo kapena runi-awo ngumwai unoyo unanitandize iziwa vyevyo muthuyo unaganiza liye kapena vyevyo vinamukumbanyi-a. Napanga eno ninokoza musomeda mofaasa. — w23.09, takuru 17.

Kodi ninafunjedavo n’ni wa Mariya va khani yofwanya kopolo?

Mariya angavwile ira unoza akale m’mae wa Mesiya, oofwanya kopolo kumela wa athu amo-iwa. Gabirieli na Elizabeti koomulimbikisa vo-indi-eda chito Malemba. Na-iyene ninokoza fwanya kopolo kumela wa Akiristu afwi-u. — w23.10, takuru 15.

Kodi Yehova unasomeda avi mapempelwi-u?

Liye oolonjeza ira unerenga someda mapempelwi-u ndipo unowasomeda mogwilizana na yolinga yae. (Yer. 29:12) Mapempelwi-u kanokoza kala ofwanafwana koma unokoza asomeda mundila yo-iyana. — w23.11, takuru 21-22.

Lemba la Aroma 5:2 linaonga vya “chiyembekezo,” ndiye chifukwa n’ni chiyembekezo inaromoliwa nawili va vesi 4?

Muthu avwa utenga wapama unokaana chiyembekezo yoi unoza akaena moyo m’Paradaizo vailambo yavati. Koma agumananga na mavuto nowavilela koma teto ona ira Yehova unosangalala naliye, chiyembekezo yae inokala yakopolo ndipo vyevyo unaembekezela liye vinomukuza murima vinjinji. — w23.12, takuru 12-13.