Niganizelenga Vya Yesu, Unoyo Ngu Ndimuwi-u Wasembe Unoyo Unanivwela Chisoni

1-2. (a) Chifukwa n’ni Yehova amutumizile Mwanae vailambo yavatila? (b) Kodi ninakambilana n’ni mukhanila? (Aheberi 5:7-9)

CHAKA dotamangela 2000 diviriledo, Yehova Mulungu oomutumiza Mwanae wamtengo wavadimu vailambo yavatila. Koma chifukwa n’ni Yesu azile vailambo yavatila? Imo-i mwa vifukwa vyevyo azele liye vailambo yavatila, kuza vulumucha athu uuchimo nokhwa koma teto za sakaeda vyongo vyevyo Satana aonongile liye. (Yoh. 3:16; 1 Yoh. 3:8) Yehova ooziwa ira vyevyo Yesu aze liye afunjede vailambo yavati, koma teto za kala ngati muthu vyookami-a ira akale Ndimuwa Wasembe wachifundo unoyo unanivwelenga chisoni. Yesu aambeele tumikela monga Ndimuwa Wasembe angabatiziwe mu 29 C.E.a

² Mukhanila, ninokambila vyevyo Yesu agumanilena liye angazile vano vailambo yavati, koma teto mwemo vyamukami-eleathu ira akale Ndimuwa Wasembe wapama vinjinji unoyo unanivwela chisoni. Navwechecha pama vyevyo vyamukami-ile Yesu ira akale “wangwilo,” koma teto ira afwanelele udindo unola, vinonikami-a ira kaviniruchenga pempela wa Yehova, ngakale vevo nin’na iyo chisoni chifukwa yamachimwi-u kapena vyevyo ninalakwi-a iyo. — Welengani Aheberi 5:7-9.

MWANA OOMELUWA WA YEHOVA OOZA VAILAMBO YAVATI

3-4. Kodi vyongo vyachenjile avi va moyo wa Yesu angazile vano vailambo yavati?

³ Anjinji mwa iyo, vyongo vyoochenjavo vamoywi-u. Mwaisazo nootama wewo nakala iyo no-iyana na abali-u koma teto afwi-u. Chenja wewu unokala orucha, koma kavali muthu unoyo vyongo vyachenjile vamoywae kwaranya Yesu. Liye angali udimu, ali ngelo ofuneya vinjinji kwaranya angelo etene. Yehova oomuomeluwana vinjinji Yesu moi Yesuyo oosangalala a-indanga chito undanda “lamanda la Yehova.” (Sal. 16:11; Miya. 8:30) Koma lemba la Afilipi 2:7 linaonga ira ‘mofunechecha,’ oo-iya vyetene vyevyo an’na liye moi oo-iya malwae avadimu noza vailambo yavati za kala na athu.

⁴ Kaganizelani teto vyevyo vyaireile Yesu angabaluwile, koma teto angali mwana. Yesu abaluwele m’banja losauwa, moi sembe ineyo makolwae kakwakwani-ileathu peleka liye angabaluwile inotonyi-eda vyevi. (Lev. 12:8; Luka 2:24) Mwene Herode unoyo ali otakala, angaiziwile vyoi Yesu ubaluwa ooganiza vyoi amuphe. Ira kamuvulumuche Yesu m’mandani mwa Herode, banja liwa lootawela Uiguputo wewo kakalilewoathu wathawi yoyeva. (Mat. 2:13, 15) Moyo wa Yesu angali vailambo yavatila, wali o-iyana vinjinji na mwemo waliliathu angali udimu.

5. Kodi Yesu agumanile na vyoi avi angazile vano vailambo yavati? Nanga vyevyo agumanilena liye vyamukami-ile avi ira akale okozeya kala Ndimuwa Wasembe? (Onani teto ithuzithuzi.)

⁵ Vevo Yesu aulukula liye, oona athu anjinji kavuteyanga. Pivyo-okaiki-a ira Yesu ooiziwa mwemo muthu unavwela liye muthu unoyo unamuomeluwana liye akhwa. Vili eno chifukwa angali vailambwela oona athu anjinji kakhwanga tangani-avo Yosefe unoyo ali babae. Yesu apanganga utumikae, oogumana na athu amakate, avuto lo-ona, okhwa viwalo koma teto makolo anayo a-imiwa kakhwile, moi athu etene anala oowavwela chisoni. (Mat. 9:2, 6; 15:30; 20:34; Maliko 1:40, 41; Luka 7:13) Pivyoona ira Yesu angali udimu oona athu kavuteyanga, koma angazile vano vailambo yavati nokala muthu, oovwechecha pama mwemo athu kanavwelaathu kavuteyanga. (Yes. 53:4) Vyevyo Yesu agumanilena liye angazile vailambo yavati, vyoomukami-a vwechecha pama mwemo athu kanavwelaathu koma teto vinakalelaathu muthu akumudwa koma teto voreya wewo muthu unavwa liye chifukwa ya mavuto anayo unagumanana liye. Monga muthu, naliyene teto Yesu oogumana na mavuto anayo iyo athu ninagumanana iyo monga goma, kaana nkhawa, koma teto kaana chisoni.

YESU UNOWAOMELUWANA VINJINJI ATHU

6. Kodi mawu oerekezela vyongo anayo namaongela Yesaya a-indi-edile liye chito kananifunji-a n’ni vyokuza chikondi koma teto chifundo ya Yesu? (Yesaya 42:3)

⁶ Vathawi yetene ineyo apanga liye utumikae, Yesu oopangela chifundo athu onyozeya koma teto athu anayo kapangeliwa nkhanza. Vyevyo apanga liyevi vyookwakwaneli-eda ulosi. M’malemba Aiheberi, athu anayo mbolimba mwauzimu, thawi dinjinji kanowaerekezela na dimba lo-eleliwa pama kapena mitengo dolapa koma teto dilukulu. (Sal. 92:12; Yes. 61:3; Yer. 31:12) Koma athu osauwa koma teto onyingaleliwa kanowaelekezela na bango lopwanyeya koma teto go-i wa nyale ineyo inatuwa uchi vyevyo athu kanavionaathu ira pivyookami-a. (Welengani Yesaya 42:3; Mat. 12:20) Mowandeliwa na Yehova, namaongela Yesaya oo-indi-eda chito mawu oerekezela vyongo, vevo aonga liye vya chikondi koma teto chifundo ineyo Yesu unaze liye atonyi-ede athu onyozeya, anayo athu amo-iwa kanaonaathu ira mbaathu oofuneya.

7-8. Kodi Yesu akwakwaneli-edile avi ulosi wa Yesaya?

⁷ Mateyu unoyo alembile buku la uthenga wapama, ootonyi-eda ira Yesu ookwakwaneli-eda ulosi wa Yesaya vevo alembile liye ira: “Bango lopwanyeya katinaza kalikotola, moi go-i wa nyale ineyo inatuwa uchi katinaza kaitimi-a.” Vimo-i mwa vyongo vyodabwi-a vyevyo Yesu apangile liye vyookami-a athu onyingaleliwa anayo kaoneya ngati bango lopwanyeya, kapena athu anayo kaviona ira katin’na idedi-edo anayo kavivwa ngati go-i wa nyale ineyo inatuwa uchi ineyo thawi iliyetene inotima. M’mo-i mwa athu anala ngu muthu unayo an’na makate thuthu letene. Vinaoneya ira muthu unola kaan’na idedi-edo yoi unoza achile nosangalalanga na banja lae koma teto afwae. (Luka 5:12, 13) Koma teto vookala muthu m’mo-i unoyo an’na vuto lo-ovwa koma teto ovuteya onga. Kaganizelani mwemo avwela liye aona athu kaonganga koma liye oovwanga vyevyo kanaongaathu. (Maliko 7:32, 33) Koma vookala teto athu amo-iwa anjinji.

⁸ Muthawi ya Yesu, Ayuda anjinji koororomela ira athu anayo kanavuteya chifukwa ya marenda kapena rangala kanakala ira kanalangiwa chifukwa ya machimo anayo aluwa kapena makolwiwa kapangileathu. (Yoh. 9:2) Chifukwa ya vyongo vyolakweya vyevyo karoromelaathuvi, athu anayo kavuteya kooviona ira mbaathu okaana chito. Vokwakwaneli-eda ulosi wa Yesayola, Yesu oochili-a athu anayo kabulela marenda o-iyana-iyana moi oowakami-a iziwa ira Mulungu unowaomeluwana. Kodi vyevi vinanifunji-a ira Yesu unavwa avi aniona nivuteyanga?

9. Kodi lemba la Aheberi 4:15, 16 linatonyi-eda avi ira Ndimuwi-u Wasembe unopangela chifundo athu ookaana ungwilo?

⁹ Welengani Aheberi 4:15, 16. Kaninakaikela ira thawi detene Yesu unoza anitonyi-edenga chifundo. Kodi muthu wachifundo unapanga vyoi avi? Muthu wachifundo ngu muthu unoyo unakuziwa na mavuto koma teto nkhawa dedo muthu m’mo-iwa un’na liye. Mawu Aigiriki anayo kaamasuleleathu ira “chifundo” kanatapulela vwa chisoni koma teto voreya wewo muthu m’mo-iwa unavwa liye. (Onani teto Aheberi 10:34, vevo Paulo a-indi-edile liye chito mawu Aigiriki ofwanafwana na anala.) Khani dofotokoza vyodabwi-a vyevyo Yesu apangile liye dinotonyi-eda mwemo akuziwela liye na mavuto anayo athu amo-iwa kagumananaathu. Liye kaakeda chili-a athu mwamwambo, koma oowaomeluwana moi oofunechecha akami-a. Mwaisazo vevo achili-a liye muthu wamakate, Yesu ookoza muchili-a angali vandendai, koma oomuwandamela nomu-inda muthuyo moi ula wali ulendo owambeela ira muthu wamakateyo a-indiwe vanduli va chaka dinjinji. Koma teto vevo Yesu amuchili-a liye muthu unoyo an’na vuto lo-ovwa oopanga vyongo momuganizela chifukwa oomuchosa vagulu dowa muchili-a umalo aeka. Koma teto vathawi imo-i vevo muzimai m’mo-iwa unoyo vowambeela apanga vyotakala, vanduli viwa lapa no-ambi-a manyalo a Yesu na misodi dae nopukuta misodido na sisi lae, Mfarisi m’mo-iwa oonga vyongo mookana chilungamo. Koma Yesu oomuteteza muzimaiyo moi oomusumulula mwakopolo Mfarisiyo. (Mat. 8:3; Maliko 7:33; Luka 7:44) Vinakeda oneya ira Yesu kaapewa athu anayo kabulela kapena anayo kapangile machimo alukulualukulu. M’malo mwiwa oowawachela mwachifundo moi oowakami-a kaana idedi-edo. Kaninakaikela ira na-iyene teto unonipangela chifundo.

MUMUSAZI-EDENGA NDIMUWI-U WASEMBE

10. Kodi pivyongo vyauzimu viivi vyevyo nina-indi-ede iyo chito malambwano vokami-a athu anayo kaana vuto lo-ovwa koma teto lo-oona? (Onani teto ithuzithuzi.)

¹⁰ Monga o-arela ororomeleya a Yesu, ninoesaesa tonyi-eda chikondi koma teto chifundo wa athu amo-iwa. (1 Pe. 2:21; 3:8) Ngakale ira kaninawande chili-a athu anayo kaana vuto lo-ovwa koma teto lo-oona, ninokoza akami-a mwauzimu. Mwaisazo mabuku okami-a vofunjeda Baibulo, kanofwanyeya muviongelo vyamanda vyokwaranya 100. Moi vofuna akami-a athu anayo kaana vuto lo-oona, mabuku okami-a athu anayo kaana vuto lo-oona, kanofwanyeya muviongelo vyokwaranya 60. Koma teto mawu ofotokozela mavidiyo kanodjambuliwa muviongelo vyokwaranya 100. Vyongo vyevi vinokami-a athu anayo kaana vuto lo-ovwa koma teto lo-oona ira kakale vausamwali na Yehova koma teto Yesu.

11. Kodi gulu la Yehova linasazi-eda avi chifundo ya Yesu vokami-a athu a mitundu detene? (Vyoira 2:5-7, 33) (Onani teto vithuzithuzi.)

¹¹ Gulu la Yehova linoesaesa kami-a athu amitundu detene. Umbuwelani ira Yesu angavenyi-iwe, oopeleka zimu owela wa etene anayo kafwanyeile vaikondwelelo ya Pentekosite, moi uliwetene oovwa uthenga wapama “muiongelo yae.” (Werengani Vyoira 2:5-7, 33.) Vo-arela isazo ya Yesu, gulu la Yehova linokumi-a mabuku okami-a vofunjeda Baibulo muviongelo vyokwaranya 1 000, moi vimo-i mwa viongelo vyevi vinaongiwa na athu oyeva vinjinji. Mwaisazo, viongelo vya tundu wa Iyamerindiani vinaongiwa na athu oyeva vinjinji anayo kanakala umpoto na umwela wa America. Koma mabukwi-u kanofwanyeya muviongelo vya tundu wa Iyamerindiani vyokwaranya 160, nayolinga yoi athu anjinji kakaena mwai ovwa uthengi-u. Mabukwi-u kanofwanyeya teto muviongelo vyokwaranya 20 vya Iromane. Athu masauzande anjinji anayo kanaonga viongelo vyevi kowambeela mutumikela Yehova.

12. Kodi pivyongo viivi vyevyo gulu la Yehova linaniva-aathu malambwano?

¹² Enjedela vowakami-a athu ira kavwe uthenga wapama, gulu la Yehova linokami-a teto athu anayo kanavuteya chifukwa ya ngozi damuilengedwe. Moi vikala athu masauzande anjinji anayo kanavipeleka ira kakami-e abali na arongoliwa anayo kanafuneya likami-edo. Koma teto gulu la Yehova linoniva-a malo apama anayo ninasonkana iyo nofunjedanga vya chikondi ya Mulungu.

NDIMUWI-U WASEMBE UNOKOZA UKAMI-ANI

13. Kodi tindila diivi dedo Yesu unanikami-ela liye?

¹³ Monga m’busi-u wapama, Yesu unoonechecha ira niikaana vyetene vyofuneya ira nikale va usamwali wapama na Yehova. (Yoh. 10:14; Aife. 4:7) Thawi dimo-i mavuto anayo ninagumanana iyo vamoywi-u, kanokoza nipangi-a ira nivivwenga ngati nili go-i wa nyale ineyo inathuwa uchi kapena ngati bango lopwanyeya. Ninokoza kumudwa chifukwa ya marenda alukulu, vyevyo ninalakwi-a iyo kapena akala nisemphanile maganizo na m’bali kapena murongola. Ninokoza vuteyanga ira ni-iye kedanga ganizela vyovoreya wewo ninavwa iyo kapena vyevyo vinikumudwi-ile, noganizelanga vinjinji vya vyongo vyapama vyevyo ninadedi-eda iyo usogolo. Koma muumbuwelenga ira Yesu unoona vyevyo munagumanana nyo moi unovwechecha maganizo am’murimani mwinyu. Chifukwa yoi Yesu ngwachifundo, liye unoza anikami-e. Mwaisazo, unokoza i-ndi-eda chito zimu owela ira auva-eni kopolo mwafooka. (Yoh. 16:7; Tito 3:6) Enjedela veva, Yesu uno-indi-eda chito alombwana anayo chi “mphaso” koma teto Akristu afwi-u ira kanilimbikise koma teto nikami-a. — Aife. 4:8.

14. Kodi ninapange avi akala nikumudwile?

¹⁴ Akala ninavivwa ngati nyale ineyo inatima kapena bango lopwanyeya, niganizelenga modii-a vya Yesu unoyo ngu Ndimuwi-u Wasembe. Muumbuwelenga ira Yehova kaakede mutumiza Yesu vailambwela ira aze apeleke moywae monga dipo ba-i, koma afuna teto mukami-a ira aze avwecheche pama mavuto anayo iyo athu ookaana ungwilo ninagumanana iyo. Nakumudwa chifukwa ya machimo kapena vyevyo ninalakwi-a iyo, Yehova ngokozeya koma teto ofunechecha nikami-a “vathawi yofwanelela.” — Aheb. 4:15, 16.

15. Fotokozani yongo ineyo yamukami-ile m’bali ofotokoziwa mundimela ira aweli-ediwe mupingo.

¹⁵ Yesu unosogolela teto athwae vevo unaesaesa liye saelasaela koma teto kami-a athu anayo ti khosa do-olowa da Yehova. (Mat. 18:12, 13) Kaganizelani vyevyo vyamuileele Stefano.b Angachosiwe mupingo wa chaka 12, ooganiza ira adowe umisonkhano. Liye aongile ira: “Vyali vyorucha. Koma ndoofuna kala teto m’banja la Yehova lelo ti lachikondi. Andimuwa anayo ndagumanilena miyo koondikami-a ira ndikale omasuwa. Thawi dimo-i maganizo oviona ira ndili okaana chito koondizela moi ndakeda funa i-ya. Koma abalayo koondiumbucha ira Yehova na Yesu kanafuna ira kandigwe ulesi. Ndangaweli-ediwe mupingo, abali na arongola limo-i na banja langa koondiwachela na manda men’li. Vangavirile thawi, iyananga oosomedela ira afunjedenga Baibulo moi vathawiila ninatumikela Yehova limo-i monga banja.” Ndimuwi-u Wasembe unoyo ngwachikondi, unosangalala vinjinji aona athu anayo kalapile kakami-iwanga ira kawelele mumpingo.

16. Chifukwa n’ni munayamikela mwai wokaana Ndimuwa Wasembe unoyo unanivwela chisoni?

¹⁶ Yesu angali vailambo yavatila, ookami-a athu anjinji vathawi yofwanelela. Malambwano teto kaninakaikela ira unoza anikami-e thawi iliyetene ineyo ninafuneela iyo kami-iwa. Moi muilambo isha ineyo i-alile vang’ono fiya, unoza akami-e athu ovwela ira katikale teto vaukapolo wa uchimo koma teto ookaana ungwilo. Ninomuyamikela Mulungwi-u Yehova unoyo chifukwa ya chikondae ilukulu koma teto chifundo, oomusakula Mwanae ira akale Ndimuwi-u Wasembe unoyo unanivwela chisoni.