Nkimba Ubwighane Ubwa Chala Bwakuti Choni?

U Chala akulonda ukuti twize twikale umwamutende sona nukuhoboka mu paladayiso pa chisu bwila na bwila!

Lumo mungaswigha ukuti, ‘Ivi vingabombiwa buli-buli?’ Ibayibolo likunena ukuti Ubumwene ubwa Chala bukwiza pakubomba vinivi sona u Chala akulonda ukuti abantu bamanye izya Bumwene bwache nu bwighane bwache.—Ubuvumbuli 21.3, 4; 2 Pitala 3.13.

U Chala akutulondela ivintu ivyiza.

Ukuyana na mumo ubaba akulondela abana bache ivyiza, momo abeleye u Baba witu uwakumwanya. Akulonda tuhobokaye bwila na bwila. (Yesaya 48.17, 18) Alayizizye ukuti “wesi yuyo akubomba ubwighane ubwa Chala akuba nu bumi ubwa bwila na bwila.”—1 Yohani 2.17.

U Chala akulonda ukuti twendaye muzila zyache.

Ibayibolo likunena ukuti Umupeli witu akulonda “ukutulongozya izila zyache” umwakuti “twendaye” mo akulondela. (Yesaya 2.2, 3, nwt) U Chala abunganika abantu “ukuti babanje bantu bache.” Abantu aba bakulumbilila izya bwighane bwache pa chisu chosi ichapasi.—Imbombo 15.14.

U Chala akulonda ukuti tukolelanaye pakumwiputa.

Abantu bo bakumwiputa mubwanaloli bakuba nu lughano ulwenecho. Mumalo mwakupaghulana, abene bakukolelana. (Yohani 13.35) Bo bawenu bo bakumanyisya abantu kulikosi mo bangamubombela u Chala umwakukolelana? Tukubalaba ukuti mumwaghe uansala mu kabuku aka.