Choni cho Chikubombiwa mu Maofesi Agha Bakaboni ba Yehova?

Bo bali mu mbumba iya Beteli bakubomba imbombo mu madipatimenti aghakupambanapambana ukuti imbombo iya bulumbilili yendaghe akiza mu chisu pamo mu vyisu ivyinji. Bamo bakusanuzya amabuku, bakupulinta amagazini, bakufwapikila amabuku, bamo bakubomba ko bakusengulako amabuku, bamo bakujambula inkani izyakwivwisya bulo na mavidiyo, ni mbombo izinji.

Ikomiti yo yikwenelezya imbombo. Akagulu Akakwenelezya, pa ofesi yiliyosi kakusala abasongo batatu pamo ukupululila apa bo bakuba mu komiti. Ikomiti iyi yikubuzya Akagulu Akakwenelezya mo imbombo yikwendela mu chigaba cho yikwenelezya, sona ni ntamyo zyosi zyo zingabapo. Ivi vikwavwa ukuti Akagulu Akakwenelezya kamanye imitu yo yingize yibe mu mabuku aghakuntazi, sona na vyo tungize tumanyile pa nkomano izya chipanga ni nkomano inkulu. Bo bakwimila Akagulu Akakwenelezya bakubatuma ukuti bize bendele amaofesi sona nukubavwa aba mu Komiti Iyakwenelezya mo bangabombela imbombo zyabo. (Isya Mbupingamu 11.14) Pakuba sona ulukomano ulwapalubazu. Yo akwimila Akaguku Akakwenelezya akunena inkani yo yikubaghomya bo bakwikala mu chigaba icha ofesi.

Yikwavwa ivipanga. Abakamu pa ofesi bobo bakwitikizya ukuti pabe ichipanga ichipya. Bobo bakwenelezya sona imbombo izya bapayiniya, abamishonale, na bakwendela ivipanga mu chigaba icha ofesi. Bobo bakupanga ulubatiko ulwa nkomano izya masiku matatu ni nkomano izya isiku lyoka. Bakwenelezya imbombo iyakuzenga Inyumba izya Bumwene sona bakwenelezya ukuti amabuku ghatumiziwa ku vipanga. Imbombo yosi yo yikubombiwa pa ofesi yikwavwa ukuti imbombo iyabulumbilili yendaghe akiza.—1 Aba Kolinti 14.33, 40.

• Ka Ikomiti Iyakwenelezya yikwavwa buli-buli Akagulu Akakwenelezya?

• Nkimba mbombo wuli yo bakwenelezya pa ofesi?