Mubanje pa Malo Amiza Nanthi Mukumanyila

Ka mukulonda ukuti mupindulaghe nkhani nanthi mukumanyila pa mwebene? Ifundo izyakukonkhapo izi zingabavwa nanthi mukulonda ukuti mupindulaghe po mukumanyila pa mwebene:

• Musale amalo amiza. Nanthi vingabombiwa, muyezye ukwagha amalo gho pa te ichinthu cho chingabatangwanisya po mukubelenga. Mungasala ukuti mwikale pa mupando pa malo gho mukwennya ukuti mungamanyila akiza.

• Musale amalo gho mungabapo mweka. U Yesu akasalagha ukuti iputaghe ‘pandabindabi nkhani’ ku ‘malo gho kutakabangako abanthu.’ (Mali. 1.35) Nanthi mutangaghagha amalo aghakuti mungabako mweka, mungababuzya abamumbumba yinyu pamo abamwinyu bo mukwikala nabo, akabalilo ko mukulonda ukumanyila nu kubalaba ukuti batakabatangwanisye.

• Mubikaghepo umoyo. Muleghuke chilichosi cho chingabatangwanisya po mukumanyila. Nanthi mukubombezya ifoni pamo itabuleti pakumanyila, mungavibika pa sayilenti pamo pa eyapuleni modi ukuti yitakabavulungannye. Sona nanthi mukwinong’ona ukuti pali ichinthu chimo cho mukulondiwa ukuti mubomba, mungachisimba ukuti muchibombe akabalilo akanji. Nanthi mwanda ukwiyivwa ukuti mwalita po mukumanyila, mungatuzyako tasi panandi pamo mungigholola.