Ka Abasongo Bakwavwa Buli-buli Ichipanga?

Uswe tute na badimi bo tukubalipila. Mumalo mwache tukukonka vyo Abakilisitu ababwandilo bakabombagha. Abasongo abakwenelezya bakasaliwanga ukuti ‘babanje badimi aba chipanga icha Chala.’ (Imbombo 20.28) Abasongo ba chipanga bakwavwa ing’ozi zya Chala mubulolo sona bali pabukamu ubukulu nkani nu Yehova. ‘Bakusungilila umwakusita ukufyengiwa, ukuyana na mumo u Chala akulondela ukuti babombelaye. Batakubomba imbombo yabo nu moyo uwakunyonywa indalama, loli bakubomba nu moyo uwakunyonywa ukubomba.’ (1 Pitala 5.1-3) Nkimba mbombo buli yo bakubomba?

Bakutwenelezya nu kutupasikizya. Abasongo bakulongozya nukufighilila ichipanga ukuti chibukilile ukupalamila kwa Yehova. Abasongo ba chipanga batakuba pamwanya pa bamwabo ichifukwa bamenye ukuti we Chala yo abapiye imbombo iyakulondiwa nkani iyi. Bakutwavwa ukuti twikalaghe akiza nukuba bakuhoboka. (2 Aba Kolinti 1.24) Ngati we mudimi yo akupasikizya ing’ozi yiliyosi, abasongo bope bakuyezyayezya ukumanya umuntu aliwesi mu chipanga.—Isya Mbupingamu 27.23.

Bakutumanyisya mo tungabombela ubwighane bwa Chala. Abasongo ba chipanga bakutangilila pa nkomano ukuti baghomye ulusubilo lwitu usabata aliwesi. (Imbombo 15.32) Bakwiyipa pakutangilila imbombo iya bulumbilili, tukubombela poka sona bakutumanyisya mo tungabombela imbombo izyakupambanapambana.

Bakughomya aliwesi pamwene. Ukuti bavwe aliwesi pamwene na Mazyu agha Chala, bakwiza ku nyumba zyitu pamo tungakomana nabo ku Nyumba iya Bumwene.—Yakobo 5.14, 15.

Pakongelezyapo pa mbombo zyo bali nazyo mu chipanga, bakubomba sona imbombo izinji nu kwavwa imbumba zyabo. Vinivi vikulondiwa akabalilo. Pakuti bakwiyula nkani pa mbombo tubaghiye ukubachindika.—1 Aba Tesalonika 5.12, 13.

• Nkimba abasongo bali ni mbombo buli mu chipanga?

• Nkimba abasongo bakubomba ichoni ukuti balangizye ukuti bamughanite aliwesi pamwene?