UMUTU 09
Palamila kwa Yehova mu Lwiputo
Ka mwinong’onitepo lumo ukuti mukulondiwa ubulongozi pa bumi? Ka muli na malalusyo gho mukulondiwa amaansala ghache? Ka mukulondiwa ukusangalusiwa? Nkimba mungalonda ukuti mube papipi nu Yehova? Ulwiputo lungabavwa ukuti mwaghe amaansala agha malalusyo agha. Ka zila wuli iyiza iyakwiputila? Ka u Chala akwivwa inyiputo izya muntu aliwesi? Nkimba mungabomba buli-buli ukuti u Chala ivwe nyiputo zyinyu? Za twennye.
1. Ka tungiputa kwa wenu, sona ka mungalaba ichoni?
U Yesu akamanyisya ukuti tubaghiye ukwiputa kwa Tata witu uwakumwanya. Umwene u Yesu akiputagha kwa Yehova. Akanena ukuti: “Bo mukwiputa mutinji: ‘Tata witu uwakumwanya . . . ’” (Matayi 6.9) Pala tukwiputa kwa Yehova tukughomya ubumanyani bwitu.
Tungalaba chilichosi cho tukulonda, loli ukuti u Chala amule inyiputo zyitu tubaghiye ukumulaba vyo vikukolelana nu bwighane bwache. Pakuti “akutwivwa nanti tukumulaba ichintu chimo ukuyana nu bwighane bwache.” (1 Yohani 5.14) U Yesu akatupa ichifwanikizyo ichiza icha mo tungiputila. (Belenga Matayi 6.9-13.) Umwakongelezyapo, pala tukulaba ivintu ivyakukwafyannya nu bumi bwitu, tubaghiye ukumupalizya u Chala pa vyo atupiye na pa vyo akutubombela sona nukumulaba u Chala ukuti abavwe abamwitu.
2. Ka tungiputa buli-buli?
Ibayibolo likutughomya ukuti ‘tupungulile amoyo ghitu kwa Chala’ (Salimo 62.8) Inyiputo zyitu zibaghiye ukufumila pasi pa moyo. Tungiputa umwakufumya amazyu pamo umwachimyamya loli muzila iya umuchizi. Tungiputa pa kabalilo kosi ko twighana sona amalo ghalighosi.
3. Ka u Chala akwamula buli-buli inyiputo zyitu?
Akwamula mu zila izyakupambana-pambana. U Yehova atupiye Amazyu ghache Ibayibolo, mo tukwagha amaansala aghamalalusyo gho tukwilalusya. Ukubelenga Amazyu gha Chala ghangavwa ukuti ‘umupunganu abe wamahala.’ (Salimo 19.7; Belenga Salimo 19.7.) U Yehova angatupa umutende uwa mu moyo pala twakomana ni ntamyo. Sona angapangisya ukuti ababombi abamwitu batwavwe pa kabalilo ko tukulondiwa ubutuli.
MANYA IVYINJI
Manya mo mungiputila ulwiputo ulwakufumila pasi pa moyo lo lungamuhobosya u Chala sona na mo lungabavwizya.
4. U Chala akulonda ukuti tumwiputaghe umwakukolelana nu bwighane bwache
Choni cho chingapangisya ukuti inyiputo zyitu zibe zyakwivwika kwa Chala pamo hagha? Enelezya IVIDIYO.
U Yehova akulonda ukuti twiputaghe kukwache. Belenga Salimo 65.2, nu kwamula amalalusyo ili:
Nkimba mukwinong’ona ukuti ‘uwakwivwa inyiputo’ akulonda ukuti mwiputaghe kwa yuyo? Chifukwa buli?
Ukuti u Chala ivwe inyiputo zyitu tubaghiye ukubomba ivintu vyo vikukolelana nu bwighane bwache. Belenga Mika 3.4 nu 1 Pitala 3.12 nu kwamula ilalusyo ili:
Nkimba tungamanya buli-buli ukuti u Yehova akwivwa inyiputo zyitu?
Pa kabalilo aka nkondo, imbali zyosi zikwiputa ukuti ziwine. Ka u Chala angivwa inyiputo zyabo?
5. Inyiputo zyitu zifumilaghe pasi pa moyo
Abantu bamo bamanyisiwe ukuti biputaghe ulwiputo ulwakusungila bulo. Ka momo u Chala akulonda ukuti twiputilaghe? Belenga Matayi 6.7, nu kwamula ilalusyo ili:
Ka mungabomba choni ukuti mutakiputaghe ‘ulwiputo ulwakusungila bulo?’
Isiku lililyosi mwinong’onelaghepo pa vyo u Yehova ababombela nu kumupalizya. Nanti mungabombagha bunubu isiku lililyosi pa sabata, vingabavwa ukuti mutakiputaghe ulwiputo ulwakunyokezya-nyokezya.
Utata uwalughano akulonda umwana wache anenezannyanje nawe ukufumila pasi pa moyo. Umwakuyana bulo, u Yehova wepe akulonda ukuti tumwiputaghe ukufumila pasi pa moyo
6. Ulwiputo chabupi ichakufuma kwa Chala
Nkimba u lwiputo lungabavwa buli-buli mukabalilo ka ntamyo? Enelezya IVIDIYO.
Ibayibolo likutubuzya ukuti ulwiputo lungatwavwa ukuti tube nu mutende uwa mu moyo. Belenga Aba Filipi 4.6, 7, nu kwamula amalalusyo agha:
Te kabalilo kosi ko pala tukwiputa intamyo zingamala, loli ka lukutwavwa buli-buli?
Ka vintu buli vyo mungighana ukwiputa?
Ka muzimenye?
Ilizyu ilyakuti “ameni” likung’anamula ukuti “vibe bunubo” pamo “momumo.” Mu Bayibolo ilizyu ilyakuti “ameni” likutambuliwa kubumalilo wa lwiputo.—1 Syambukulu 16.36.
7. Mubanje na kabalilo akakwiputila
Akabalilo kamo tungatangwanika nu kupotwa ukwagha akabalilo akakwiputila. Choni cho u Yesu akennyanga ukuti ulwiputo lwakulondiwa? Belenga Matayi 14.23 nu Maliko 1.35, nu kwamula amalalusyo agha:
Nkimba u Yesu akabombagha buli-buli ukuti aghe akabalilo akakwiputa?
Ka umwe kabalilo buli ko kakuba kiza ukuti mwipute?
VYO BAMO BAKUNENA: “Ukwiputa kwitaghisya bulo kabalilo ichifukwa nayumo yo akwivwa.”
Nkimba umwe mukuti choni?
IFUNDO IZYAKUDUMULA
Ulwiputo ulwakufumila pasi pa moyo lukutwavwa ukuti tupalamile kwa Chala, lukutupa umutende uwa mumoyo, sona lukutupa amaka ukuti tubukilile ukumuhobosya u Yehova.
Ukunyokelamo
Ka tubaghiye ukwiputa kwa wenu?
Ka tubaghiye ukwiputa buli-buli?
ka mapindu buli gho tungaghagha pala tukwiputa?
IFUNDO IZYAKONGELEZYAPO
Agha amaansala agha malalusyo gho abantu abinji bakulalusya pa nkani iya lwiputo.
Manya ichifukwa cho mubaghiye ukwiputa sona na mo mungabombela ukuti inyiputo zyinyu zivwikaghe.
Manya vyo Ibayibolo likumanyisya pa nkani ya yo tubaghiye ukwimuputa.
“Ka Tubaghiye Ukwiputa ku Bazelu Umoyo?” (Inkani iya pa intaneti)
Mu vidiyo iyalwimbo iyi, ennya pala pali akabalilo akenecho na malo ghakwiputila.