Nkimba Mungabomba Choni Ukuti Mupindulaghe na vyo Mukumanyila mu Bayibolo?

Ka mwinong’oneyepo ukuti mubombe imbombo yimo yo yikaba yakutamya nkani? Ukuti imbombo iyi yileke ukuba yipala, lumo mukayigaba ukuti mubombaghe panandi-panandi. Umwakuyana bulo, ivi vyovyo mungabomba Pala mukulonda ukubelenga Ibayibolo. Mungilalusya ukuti, ‘Ka inti nandile pii?’ Mumutu ughu inti twennye ivintu vyo tungabomba ukuti tuhobokaghe pakumanyila nu kubelenga Ibayibolo.

1. Choni cho tubaghiye ukubelenga Ibayibolo akabalilo kosi?

Umuntu yo akubelenga Ibayibolo akabalilo kosi, pamo ukuti ‘indaghilo zya Yehova,’ akwiza ukuba wakuhoboka sona ivintu vikwiza pakumwendela akiza. (Belenga Salimo 1.1-3.) Mungabomba akiza pala munganda ukubelenga na maminisi ghanandi isiku lililyosi. Pala mwanda ukughivwisya akiza Amazyu gha Chala inti muhobokaghe nanti mukubelenga Ibayibolo.

2. Choni cho chingatwavwa ukuti tupindulaghe na vyo tukubelenga mu Bayibolo?

Ukuti tupindulaghe na vyo tukubelenga mu Bayibolo, tubaghiye ukwinong’onelapo pa vyo tukubelenga. Tubaghiye ukubelenga sona ‘ukubombezya vyo tukubelenga.’ (Yoswa 1.8.) Pala mukubelenga Ibayibolo mwilalusye ukuti: ‘Nkimba vyo nabelenga, vikumbuzya choni ivya Yehova u Chala? Ka vyo nabelenga, ningavibombezya buli-buli pa bumi bwane? Ka ningabombezya buli-buli amavesi agha pakwavwa abamwitu?’

3. Ka mungabomba buli-buli ukuti mwaghe akabalilo akakubelengela Ibayibolo?

Ka vikubatamya ukuti mwaghe akabalilo akakubelengela Ibayibolo? Abantu abinji vikubatamya. Muyezesyanje ukuti ‘akabalilo kinyu kosi kabanje kakubombela imbombo.’ (Aba Efeso 5.16) Mungabomba bunubu nanti mukwibikila akabalilo akakubelengela Ibayibolo isiku lililyosi. Abantu bamo bakusala ukubelenga Ibayibolo pandabi-ndabi. Bamo bakubelenga pamusanya, pa kabalilo akakutuzya. Loli bamo bakubelenga Ibayibolo pachamabwila po batabukite pakughona. Nkimba kabalilo buli ko kangaba kiza kwa umwe?

MANYA IVYINJI

4. Manyila mo mungahobokela pakubelenga Ibayibolo

Abantu abinji bakwennya ukuti ukubelenga Ibayibolo kwakutamya. Loli mungaba ni chinyonywa ichakuti mubombe bunubu ngati mo mungandila ukuhoboka ni chakulya cho mutaliyepo lumo. Belenga 1 Pitala 2.2, nu kwamula ilalusyo ili:

• Ka mukwinong’ona ukuti pala mukubelenga Ibayibolo isiku lililyosi, vingabavwa ukuti muhobokaghe pakubelenga Ibayibolo sona nu kubukilila ukulibelenga?

Enelezya IVIDIYO ukuti mwennye mo abantu bakandila ukuhoboka pakubelenga Ibayibolo. Nu kwamula amalalusyo.

IVIDIYO: Abachinyamata Bamanyila Ukughana Amazyu gha Chala (5:33)

• Ukuyana na vyo mwennya mu vidiyo, ka ntamyo buli zyo abachinyamata bakalimbanagha nazyo?

• Nkimba choni cho chikabavwa ukuti babukulile ukubelenga Ibayibolo akabalilo kosi?

• Ka bakabomba buli-buli ukuti babukilile ukuhoboka pakubelenga Ibayibolo?

Ifundo zyo zingabavwa ukuti mwandeko pakubelenga:

• Mwaghe Ibayibolo Ilyakwivwika akiza. Muyezye Ibayibolo ilya Mang’anamuliro gha Charu Chiphya pala likwaghiwa mu chinenelo chinyu.

• Mwande nu kubelenga amavesi gho ghakubahobosya. Ennya pachati ichakuti “Mwandeko Ukubelenga Ibayibolo.”

• Musimbe po mwalekelezya ukubelenga. Mubombezye Ichati Ichakubelengela Ibayibolo cho chili mwibuku ili.

• Mubombezye JW Library^® app. Mungabelenga nu kwivwisya Ibayibolo kulikosi ko muli pakubombezya ifoni pamo ivintu ivyamwabo.

• Mubombezye vyakusazgirapo mu Bayibolo ilya Mang’anamuliro gha Charu Chiphya. Muli imapu, amachati sona amang’anamulo agha mazyu agha mu Bayibolo gho ghangabavwa ukuti muhobokaghe pakubelenga.

5. Mwisengannye pakumanyila Ibayibolo

Belenga Salimo 119.34, nu kwamula ilalusyo ili:

• Choni cho mubaghiye ukwiputa tasi po mutandite ukubelenga Ibayibolo pamo ukwisengannya pakumanyila Ibayibolo?

Nkimba mungabomba buli-buli ukuti mupindulaghe na vyo mukumanyila? Po mukwisengannya ukumanyila, yezya ukubombezya izila izi:

1. Belenga indime izyabwandilo mu mutu.

2. Mubelenge inkani yosi, amasimbo sona nukwennya ukukolelana ko kulipo.

3. Mugwale amaansala gho ghakwamula amalalusyo; inti vibavwe po mukunenezannya na yo mukumanyila nawe.

Ka muzimenye?

Abakaboni ba Yehova babombezyapo Amabayibolo aghakupambana-pambana. Loli balighanite nkani Ibayibolo ilya Malemba Ghakupatulika mu Mang’anamuliro gha Charu Chiphya Ichifukwa lyakwivwika akiza, ling’anamuliwe akiza sona muli izina lya Chala.—Ennya Inkani iya pa Intaneti iyakuti “Ka Abakaboni ba Yehova Bali ni Bayibolo Lyabo?”

IFUNDO IZYAKUDUMULA

Ukuti mupindulaghe na vyo mukumanyila mu Bayibolo mwibikile akabalilo akakubelengela, mwiputaghe kwa Chala ukuti abavwe ukwivwisya vyo mukubelenga, mwisengannyanje po muchili ukwanda pakumanyila Ibayibolo.

Ukunyokelamo

• Choni cho chingabavwa ukuti mupindulaghe pala mukubelenga Ibayibolo?

• Ka kabalilo buli ko mungaghana ukubelenga sona ukumanyila Ibayibolo?

• Chifukwa buli ukwisengannya po muchili pakubelenga Ibayibolo kwakulondiwa?

IFUNDO IZYAKONGELEZYAPO

Ennya ifundo zimo zyo zingabavwa ukuti mupindulaghe nanti mukubelenga Ibayibolo.

“Kasi Mungachita Wuli Kuti Mupulikiskenge Baibolo?”(Ichitembe cha Mulindilili icha Chitumbuka Na. 1 2017)

Manyila izila zitatu izyakubelengela Ibayibolo.

“Nkimba Ibayibolo Linganavwa Buli-Buli?—Ichigaba 1: Ulimanye Akiza Ibayibolo Lyako” (Inkani iya pa intaneti)

Manya mo mungabombela ukuti muhobokaghe pala mukubelenga Ibayibolo.

“Nkimba Ibayibolo Linganavwa Buli-Buli?—Ichigaba 2: Vyo Ningabomba Ukuti Ihobokaghe Pala Nkubelenga Ibayibolo” (Inkani iya pa intaneti)

Laba ubutuli ku bantu bo babelenga Ibayibolo ukwa kabalilo akatali.

Mungapindula Nanti Mukumanyila Ibayibolo pa Mwebene 2:06