Nkimba Ibayibolo Likuti Choni pa Nkani iya Kusenda Pamo Ukuleka Ukusenda?

Muvigaba vimo abantu bakusubila ukuti umuntu angaba wakuhoboka waghe angasenda pamo ukusendwa. Po te kuti bosi bo bali musendwa bakuhoboka sona tekuti bosi bo bate musendwa batakuhoboka. Loli ubwanaloli bwakuti, Ibayibolo likunena ukuti ukuba pa sendwa pamo ukuleka ukuba pa sendwa, vyosi vyabupi ivyakufuma kwa Yehova.

1. Nkimba bwiza buli bo bukubapo waghe utasenda pamo ukusendwa?

Ibayibolo likunena ukuti: ‘Umwanavuli yuyo asendite abomba akiza, loli yuyo atasendite abomba akiza nkani.’ (Belenga 1 Aba Kolinti 7.32, 33, 38.) Choni cho Ibayibolo likunena ukuti yo atasendite pamo atasendizwe “abomba akiza nkani”? Umukilisitu yo atasendite pamo ukusendwa atakubanga nu budindo ubwa kupwelelela uwamwabo. Sona akubanga nu bwabuke ubukulu nkani ubwakuti angabomba ivintu ivyinji. Umwakufwanikizya, bamo bangaya ku buyo ubunji ukuti baye balumbilile amazyu amiza. Loli ichikulu nkani bakuba na kabalilo akinji akakumanyila pabene nu kughomya ubumanyani bwabo nu Yehova.

2. Nkimba tukupindula buli-buli waghe twasenda pamo ukusendwa umwakuyana ni ndaghilo

Umwakuyana bulo, ukusenda pamo ukusendwa kuli na mapindu aminji sana. Ibayibolo likunena ukuti ‘babili bali akiza ukuchila weka.’ (Undumbilili 4.9) Ivi vyovyo vikubombiwa ku Bakilisitu bo bakukonka ifundo zya mu Bayibolo mu sendwa yabo. Abantu bo basendana umwandondomeko bakulayizannya ukuti akabalilo kosi inti baghananaghe, ukuchindinkana sona ukufighililana. Cho chifukwa bakuba bakufighililiwa nkani ukuchila abantu bo basemannya bulo sona abana babo bakuba bakufighililiwa.

3. Nkimba u Yehova akuyennya buli-buli isendwa?

Po u Yehova akandisyanga isendwa iyabwandilo akanena ukuti: ‘Umwanavuli akwiza pakuleka ubaba wache nu mama wache nu kwiza pakumamatilana poka nu muchi wache.’ (Ubwandilo 2.24) U Yehova akulonda ukuti umulume nu muchi baghananaghe sona bikalaghe poka ubumi bwabo bosi. Akwitikizya ukulekana peka pala weka apanga ubulowe. Pa chifukwa chinichi u Yehova amupiye ubwabuke yo bamunangila ukuti angamuleka uwamwabo uwa mu sendwa.a (Matayi 19.9) U Yehova atakwitikizya ukuti Abakilisitu basendaghe impali.—1 Timoti 3.2.

MANYA IVYINJI

4. Mubombezye akiza ichabupi chinyu ichakuleka ukusenda pamo ukusendwa

U Yesu akennyanga ukuleka ukwingila mu sendwa ukuti chabupi. (Matayi 19.11, 12) Belenga Matayi 4.23, nu kwamula ilalusyo ili:

• Nkimba u Yesu akabombezya buli-buli ichabupi ichakuleka ukusenda pakumubombela u Yehova sona ukwavwa abanji?

Abakilisitu bo batingiye mu sendwa bangahoboka waghe bakubomba ngati mo u Yesu akabombelagha. Enelezya IVIDIYO, nu kwamula ilalusyo.

IVIDIYO: Abakilisitu Abasubaliwa bo Batingiye mu Sendwa (3:11)

• Nkimba Abakilisitu bo batingiye mu sendwa bangabomba ichoni?

Ka muzimenye?

Ibayibolo litakunena imyaka yo umuntu angingilila mu sendwa. Loli likutughomya ukuti umuntu angasenda pamo ukusedwa waghe ‘apululila pa bunyamata bwache.’ Pa kabalilo aka, ichinyonywa ichakughonana chingapangisya ukuti uwachinyamata atakasale umwahala ivintu.—1 Aba Kolinti 7.36, NW.

5. Musalaghe akiza uwakuti mwize musendane nawe

Ukusala uwamwinyu uwakuti mwize musendane nawe chintu chakulondiwa sana pa bumi bwinyu cho mutakwiza ukusala sona. Belenga Matayi 19.4-6, 9, nu kwamula ilalusyo ili:

• Choni cho Umukilisitu atakulondiwa ukusamalila ukwingila mu sendwa

Ibayibolo lingabavwa ukumanya inkalo inyiza zyo uwamwinyu yo mukulonda mwize musendane nawe angaba nazyo. Pa vyosi ivi ichakulondiwa nkani cho mubaghiye pa kwennya kwa muntu yo mukulonda mwize musendane nawe bumanyani bwache nu Yehova.b Belenga 1 Aba Kolinti 7.39; nu 2 Aba Kolinti 6.14, nu kwamula amalalusyo agha:

• Choni cho tukulondiwa ukusendwa pamo ukusenda Umukilisitu uwamwitu?

• Nkimba mukwennya ukuti u Yehova angiyivwa buli-buli waghe twasendana nu muntu yo atamughanite?

6. Mwennyanje isendwa ngati mo u Yehova akuyenezya

Mu kabalilo aka Baizilayeli, abanavuli bamo bakalekagha abachi babo ichifukwa cha bulili. Belenga Malaki 2.13, 14, 16, nu kwamula ilalusyo ili:

• Choni cho u Yehova abengite ukulekana ukusita chifukwa chilichosi icha mu Bayibolo?

IVIDIYO: Isendwa Yitakulondiwa Ukuti Yimalaghe (4:30)

Enelezya IVIDIYO, nu kwamula ilalusyo.

• Pala musendite pamo musendizwe nu muntu yo atamughanite u Yehova, nkimba mungabomba buli-buli ukuti mubanje bakuhoboka?

7. Mubombezyanje ifundo zya mu Bayibolo mu sendwa yinyu

IVIDIYO: Ifundo zya mu Bayibolo Zingabavwa mu Mbumba Yinyu (4:14)

Belenga Aba Hebeli 13.4, nu kwamula amalalusyo agha:

• Nkimba mukwinong’ona ukut indaghilo zya Yehova izyakukwafyannya ni sendwa zyakwivwika? Chifukwa buli?

U Yehova akulonda ukuti Abakilisitu basimbisyanje isendwa yabo sona pala isendwa yikulonda ukumala bakuya pakusokana ku koti. Belenga Titi 3.1, nu kwamula ilalusyo ili:

• Nanti muli mu sendwa, nkimba isendwa yinyu mukasimbisya ku boma?

IFUNDO IZYAKUDUMULA

Ukwingila mu sendwa pamo hagha vyosi vyabupi ivyakufuma kwa Chala. Bosi bo bingiye mu sendwa na bo batingiye mu sendwa bangaba bakuhoboka ichikulu bakubomba umwakukolelana nu bwighane bwa Yehova.

Ukunyokelamo

• Nkimba umuntu angabombezya buli-buli akiza ubwabuke ubwa kuleka ukwingila mu sendwa?

• Choni cho Ibayibolo likuti tubaghiye pakusendana nu mukilisitu uwamwitu?

• Nkimba chifukwa buli icha mu Bayibolo cho isendwa yingamalila?

IFUNDO IZYAKONGELEZYAPO

Nkimba ukusendana mwa ‘Mwene’ kukung’anamula choni?

“Mafumbo Ghakufumira ku Ŵaŵazgi” (Ichitembe cha Mulindilili icha Chitumbuka, Julayi 1, 2004)

Enelezya amavidiyo ghabili gho ghangabavwa ukusala akiza uwakusendana nawe.

Ukwisenganya Ukwingila mu Sendwa 11:53

Manya ichifukwa cho umwanavuli yumo akennya ukuti vyo u Yehova akamupa vyovyo vikaba vyapamwanya nkani ukuchila chilichosi.

Nkennyanga Ngati Angamanyila Ubwanaloli 1:56

Nkimba vintu buli vyo umuntu abaghiye ukwinong’onelapo po atasalite ukumazya isendwa pamo ukulekana kwakabalilo kanandi?

“Chindikani “Icho Chiuta Wagumanya Pamoza” (Ichitembe cha Mulindilili icha Chitumbuka, Disembala 2018)