Nkimba Abakilisitu Bakulondiwa Ukulyennya Buli-buli Ipele?

Pachisu chosi ichapasi abantu bali ni nyinong’ono izyakupamba-pambana pa nkani iyipele. Bamo bakusala ukuti pala bakwangala poka na bamwabo bang’welagheko ipele. Loli bamo bakusala ukuti manyi bang’welaghe ipele. Napo vili bunubu bamo bakung’wela nkani sona bakukolwa. Nkimba Ibayibolo likuti choni pankani iyipele?

1. Nkimba ukung’wela ipele kubibi?

Ibayibibolo litakukanizya ukung’wela ipele. Likunena sona ukuti chabupi ichiza sana cho u Chala atupiye, likunena ukuti ‘uvinyo akuhobosya umoyo wa muntu.’ (Salimo 104.14, 15) Abanavuli bamo abasubaliwa bo bakutambuliwa mu Bayibolo bope bakang’welagha ipele.—1 Timoti 5.23.

2. Nkimba Ibayibolo likubapa bulongozi buli bo basala ukuti bang’welaghepo ipele?

U Yehova abengite ukung’wela nkani nu kukolwa. (Aba Galatiya 5.21) Ibayibolo likunena ukuti: “Utakabanje poka na bantu bo bakung’wela nkani ipele.” (Isya Mbupingamu 23.20) Napo tungasala ukuti tung’welaghe pa twebene loli tutakulondiwa ukung’wela nkani ukuti tutakakolwe nu kuleka ukwinong’ona akiza, ukunena ivyambula mahala sona ukuvulala. Nanti twennya ukuti chakutamya ukuti manyi tukolwanje tungobomba akiza ukulekela zila ukung’wela ipele.

3. Nkimba tungabachindika buli-buli abamwitu pala basala ukuti batakang’welaghe ipele?

Umuntu aliwesi ali nu bwabuke bwakusala ukung’wela pamo awe. Tutakulondiwa ukubalonga abamwitu nanti basala ukung’wela ipele pamo nanti batakung’wela. (Aba Loma 14.10) Tungasala ukuleka ukung’wela nanti twennya ukuti tukubapunuzya abamwitu. (Aba Loma 14.21.) Ibayibolo likunena ukuti ‘Atakabepo umuntu uwakwinong’onela ivyache vyene, loli abinong’onelaghe ivyiza abamwabo.’—Belenga 1 Aba Kolinti 10.23, 24.

MANYA IVYINJI

4. Musale nanti mungang’wela pamo awe

Nkimba inyinong’ono zya Yesu pa nkani ya ukung’wela ipele zikaba zyakuti choni? Ukuti mumwaghe uansala inong’onela ivya chiswigho cho akabomba. Belenga Yohani 2.1-11, nu kwamula amalalusyo agha:

• Umwakuyana ni chiswigho ichi, nkimba u Yesu akalyennyanga buli-buli ipele sona nabo bakang’welagha?

• Pakuti u Yesu atakakanizya ukung’wela ipele, nkimba Umukilisitu akulondiwa ukumwennya buli-buli umuntu yo asala ukuti ang’welaghe?

Napo Umukilisitu aliwesi ali nu bwabuke pa nkani iyipele loli vitakung’anamula ukuti akabalilo kosi ang’welaghe. Belenga Isya Mbupingamu 22.3, nu kwennya ifundo izyakukonkamo izi mo zingabatulila waghe mwasala ukungw’ela:

• Nanti mukwendesya igalimoto pamo inti mubombezye amashini ghamo.

• Nanti muli nulwanda.

• Nanti udokotala abakanizya ukung’wela ipele.

• Nanti mukupotwa ukung’wela panandi.

• Nanti ko mukwikala indaghilo zikukana ukungw’ela ubwalwa.

• Nanti muli nu muntu yumo yo akaleka ung’wela ichifukwa chakuti vikamutamyanga ukung’wela panandi.

Nkimba pa bukwati pangayiwa ipele pamo pa vyakusangalusya vimo? Ukuti mwennye vyo vingabavwa ukusala umwamahala, enelezya IVIDIYO.

IVIDIYO: Nkimba Pabukwati Pakulondiwa Ukuba Ipele? (2:41)

Belenga Aba Loma 13.13; 1 Aba Kolinti 10.31, 32. Pala mwabelenga isimbo lililyosi mwamule ilalusyo ili:

• Nkimba ukwivwila ubulongozi ubu kungabavwa buli-buli ukuti musale ivintu vyo vikumuhobosya u Yehova?

5. Mwibikile impaka

Nanti mwasala ukung’wela ipele, mukulondiwa ukukumbuka ukuti napo u Yehova atakukanizya ipele loli akukanizya ukukolwa. Chifukwa choni? Belenga Hosea 4.11, 18, nu kwamula ilalusyo ili:

• Nkimba choni cho chingabombiwa nanti umuntu akung’wela nkani?

Choni cho chingatwavwa ukuti manyi tung’welaghe nkani? Tukulondiwa ukuba swe bakwiyisya sona tumanyaghe ubwingi bwipele lyo tungang’wela. Belenga Isya Mbupingamu 11.2, nu kwamula ilalusyo ili:

• Choni cho chiza ukwibikila impaka pala tukung’wela?

6. Choni cho chingamwavwa umuntu ukuleka ukung’wela nkani

IVIDIYO: ‘Nkalita ni Nkalo Imbibi (6:32)

• Ukuyana na vyo mwennya mu vidiyo, nkimba u Dmitry akabombagha buli-buli ivintu nanti ang’wela?

• Nkimba akaleka pa kabalilo kanako ukung’wela?

• Nkimba akabomba choni ukuti aleke ukung’wela?

Belenga 1 Aba Kolinti 6.10, 11, nu kwamula amalalusyo agha:

• Choni cho ubwaching’wela bubibi sana?

• Nkimba choni cho chikulangizya ukuti umuntu yo akung’wela nkani ipele angasinta?

Belenga Matayi 5.30, nu kwamula ilalusyo ili:

• Ukudumula inyobe ko u Yesu akanena mu chifwanikizyo ichi, chikung’anamula ukuti umuntu akulondiwa ukwiyima ivintu vimo ukuti amuhobosye u Yehova. Nkimba mungabomba buli-buli nanti vikubatamya ukuleka ukung’wela nkani?a

Belenga 1 Aba Kolinti 15.33, nu kwamula ilalusyo ili:

• Nkimba ubwingi bwipele lyo mukung’wela bungabakwafya buli-buli abamwinyu?

IFUNDO IZYAKUDUMULA

U Yehova atupiye ipele ukuti tuhobokaghe nu bumi, loli akukanizya ukung’wela nkani nu kukolwa.

Ukunyokelamo

• Nkimba Ibayibolo likuti choni pa nkani iya kung’wela ipele?

• Nkimba bubibi buli bo bukubapo nanti mukung’wela nkani ipele?

• Nkimba tungachindika buli-buli vyo abamwitu basala pa nkani iyakung’wela ipele pamo ukuleka?

IFUNDO IZYAKONGELEZYAPO

Nkimba abachinyamata bangasala buli-buli pa nkani iya kung’wela ipele?

Mwinong’onele Ivyapantazi (2:31)

Ennya vyo mungabomba ukuti mumalane ni ntamyo iyakung’wela nkani.

“Umo Tikwenera Kuwonera Phere” (Ichitembe cha Mulindilili icha Chitumbuka, Janiwale 1, 2010)

Ka Umukilisitu akulondiwa ukukomezannya amakapu nu wamwabo pala bakung’wela?

“Mafumbo Ghakufumira ku Ŵaŵazgi” (Ichitembe cha Mulindilili icha Chitumbuka, Febuluwale 15, 2007)

Mu nkhani iyakuti “Nkhaŵa Chiswa Nthema,” ennya mo umuntu akalekela ukung’wela nkani ipele.

“Baibolo Likusintha Umoyo wa Ŵanthu” (Ichitembe cha Mulindilili icha Chitumbuka, Meyi 1, 2012)