Nkimba Amalusekelo Ghosi Ghakumuhobosya u Yehova?

U Yehova akulonda ukuti tuhobokaghe nu bumi sona akabalilo kamo tungapanga ulusekelo. Loli nkimba malusekelo sona maholide ghosi ghakumuhobosya u Yehova? Nkimba tungalangizya buli-buli ukuti tumughanite u Yehova pa nkani iyi?

1. Choni cho amalusekelo ghamo ghatakumuhobosya u Yehova?

Lumo akabalilo kamo mungaswigha waghe mwamanya ukuti amalusekelo ghamo ghatakukolelana ni fundo zya mu Bayibolo sona abantu bo bakandisya bakaba mu vipanga ivyabumyasi. Amalusekelo ghamo ghakukolelana ni vipanga ivyabumyasi, ivyamizimu sona ghakulimbikisya ifundo iyakuti umuzimu ghutakufwa. Sona ghamo ghakulimbikisya ukuti yo akupangako amalusekelo agho, angaba nu lusako ulwa chintu chimo. (Yesaya 65.11) U Yehova akubasoka abantu bache ukuti: “Mwepeko kukwabo . . . mutakapalamasyanje nachimo ichintu chicho chinyazu.”—2 Aba Kolinti 6.17.a

2. Nkimba u Yehova akwiyivwa buli-buli na malusekelo gho ghakupeleka umuchizi ku bantu?

U Yehova akutusoka ukuti tutakawile mu chipingo icha ‘kusubila abantu.’ (Belenga Yeremiya 17.5) Amaholide ghamo ghakuchindika bo bakulaghila pamo abasilikali. Bamo bakusekelela ivintu vyo vikwimila ichisu pamo isiku lyo bakanda pakwilaghila bene. (1 Yohani 5.21) Amaholide ghamo ghakukolelana ni vyandale pamo ichipani. Nkimba u Yehova akwiyivwa buli-buli waghe tukupeleka umuchizi kwa muntu pamo kukagulu kamo ko kakulimbikisya ifundo zyo zitakukolelana nu bwighane bwache?

3. Nkimba nkalo buli yo yingapangisya ukuti ulusekelo lutakabe lwakwitikiziwa kwa Chala?

Ibayibolo likulesya ‘ubwaching’wela, ivyakusangalusya ivya vyongo, [sona] ichipalano pakung’wela.’ (1 Pitala 4.3) Mumalusekelo ghamo abantu batakwikola mu vyakubomba vyabo sona bakubomba ivintu ivibibi. Loli ukuti tube pabumanyani nu Yehova tutakulondiwa ukubombako inkalo inyazu izi.

MANYA IVYINJI

4. Mughakanaghe amalusekelo gho ghatakumuchindika u Yehova

Belenga Aba Efeso 5.10, nu kwamula amalalusyo agha:

• Nkimba tubaghiye ukwinong’onelapo fundo buli pala tukulonda ukusekelela uholide?

• Nkimba malusekelo buli gho ghakubombiwa nkani ko mukwikala?

• Nkimba mukwinong’ona ukuti amalusekelo agha ghakumuhobosya u Yehova?

Umwakufwanikizya, nkimba mwinong’oneyepo lumo mo u Yehova akwenezya ukukumbukila isiku ilyakupapiwa? Ibayibolo litanenitepo lumo ukuti umubombi wa Chala abaghiye pakusekelela isiku ilyakupapiwa, loli likulingannya izya bantu bamo babili bo batakamubombelagha u Yehova ukuti bobo bakapanga ulusekelo ulwa ukukumbukila isiku ilya kupapiwa. Belenga Ubwandilo 40.20-22 sona Matayi 14.6-10. Nu kwamula amalusyo agha:

• Nkimba pa malusekelo aghakukumbukila ukupapiwa ghosi agha, pakabombiwa choni ichakuyana?

• Ukuyana ni nkani iya mu Bayibolo iyi, nkimba mukwinong’ona ukuti u Yehova akughennya buli-buli amalusekelo agha kukumbukila ukupapiwa?

Mungilalusya ukuti, ‘Nkimba u Yehova akunennya buli-buli waghe nkwaghiwa pa malusekelo aghakukumbukila ukupapiwa pamo gho ghatakukolelana ni fundo zya mu Bayibolo?’ Belenga Ukusoka 32.1-8. Pisinda pache, enelezya IVIDIYO nu kwamula amalalusyo agha:

IVIDIYO: Amaholide Sona Amalusekelo gho Ghakumukalalizya u Chala (5:07)

• Choni cho tukulondiwa ukuti akabalilo kosi tubombaghe ivintu vyo vikumuhobosya u Yehova?

• Nkimba tungabomba buli-buli?

Vyo tungabomba ukuti tumanye waghe amalusekelo ghamo ghatakumuhobosya u Chala

• Nkimba vikukolelana ni fundo zya mu Bayibolo? Ukuti mumanye, fufuza yo akandisya.

• Nkimba ghakupeleka umuchizi ku bantu, ichipani, pamo indembela? Tukupeleka umuchizi ghosi kwa Yehova mwene sona tukusubila ukuti we yo akwiza pakumazya intamyo zyosi zyo tukukomana nazyo.

• Nkimba imyiko sona vyo vikubombiwa vikukolelana ni fundo zya mu Bayibolo? Tukulondiwa ukuwa swe bazelu.

5. Mubavwe abanji ukuchindika vyo mukusubila

IVIDIYO: Mubalongosolele Umwamuchizi vyo mukusubila (2:01)

Belenga Matayi 7.12, nu kwamula amalalusyo agha:

• Ukuyana ni simbo ili, nkimba mubaghiye ukubabuzya abamumbumba yinyu bo batakumubombela u Yehova ukuti batabaghiye pakusekelela amaholide?

• Nkimba mubaghiye ukubomba choni ukuti basimikizye ukuti mubaghanite sona mukubapalizya napo te mupangeko nabo ulusekelo?

6. U Yehova akulonda ukuti tuhobokaghe

U Yehova akulonda ukuti tuhobokaghe poka na bamanyani bitu sona ni mbumba yitu. Belenga Undumbilili 8.15, nu Kwamula ilalusyo ili:

• Nkimba isimbo ili likulangizya buli-buli ukuti u Yehova akulonda ukuti tuhobokaghe?

U Yehova akulonda ukuti abantu bache bahobokaghe. Enelezya IVIDIYO ukuti mwennye mo ivi vikabonekela pa lukomano ulwa pachisu chosi.

IVIDIYO: Ukupokelela Abalendo pa Lukomano Ulwa Vyisu (5:40)

Belenga Aba Galatiya 6.10, nu kwamula amalalusyo agha:

• Nkimba tukulondiwa pakukumbukila amaholide ukuti “tubabombele ivyiza abantu bosi?

• Nkimba choni cho chingabapangisya ukuti mube mwe bakuhoboka, pala mwapeleka ichabupi ichifukwa cha holide pamo pala mukupeleka ichifukwa chakuti mwalonda bulo?

• Akabalilo akinji Abakaboni ba Yehova bakubasenganizyanga abana babo ichakuhobosya chimo pamo ukubapa ichabupi. Pala muli na bana, nkimba vintu buli ivyiza vyo mungalonda ukubapangila abana binyu?

IFUNDO IZYAKUDUMULA

U Yehova akulonda ukuti tuhobokaghe poka ni mbumba sona nabamanyani bitu. Sona akulonda ukuti tuleghukaghe amalusekelo gho ghatakumuhobosya.

Ukunyokelamo

• Nkimba tungilalusya malalusyo ghoni ukuti tumanye waghe ulusekelo lo twasala ukubomba lutakumuhobosya u Yehova?

• Nkimba tungabavwa buli-buli abamanyani bitu pankani iya maholide?

• Nkimba mukumanya buli-buli ukuti u Yehova akulonda ukuti muhobokaghe sona mupangaghe amalusekelo?

IFUNDO IZYAKONGELEZYAPO

Ennya amalusekelo ghamo gho Abakilisitu batakupangako.

“Choni cho Abakaboni ba Yehova Batakupangako Amaholide Ghamo?” (Inkani iya pa intaneti)

Ennya ivifukwa 4 vyo tukusubila ukuti ukukumbukila isiku ilyakupapiwa kutakumuhobosya u Yehova.

“Choni cho Abakaboni ba Yehova Batakukumbukila Isiku lyakupapiwa?” (Inkani iya pa intaneti)

Ennya vyo abana bo bamughanite u Yehova bangabomba ukuti bamuhobosye pa kabalilo aka maholide.

Mwe Bakulondiwa kwa Yehova (11:35)

Abakilisitu amamiliyoni aghinji basalite ukuleka ukupangako u Kilisimasi. Nkimba bakwiyivwa buli-buli ichifukwa cha vyo basalite?

“Ŵali Kusanga Cinthu Ciwemi Cakuluska Khisimasi” (Ichitembe cha Mulindilili icha Chitumbuka, Disembala 1, 2012)