UMUTU 49
Nkimba Choni cho Chingavwa Imbumba Ukuba Yakuhoboka?—Ichigaba 1
Imbumba izipya zikusubilagha ukuti inti zihobokaghe kwa bwila na bwila pisinda pa bukwati bwabo. Ivi vingabombiwa naloli. Abakilisitu bo bikala musendwa kwa kabalilo akatali sona bakukonka ubulongozi bwa mu Bayibolo bazimenye ukuti ivi vingabombiwa.
1. Nkimba bulongozi buli bo Ibayibolo likubapa abalume?
U Yehova imikite umulume ukuti abe mutu wa mbumba. (Belenga Aba Efeso 5.23.) U Yehova akulonda ukuti umulume asalaghe ivintu vyo vingatula imbumba yache. Ibayibolo likubabuzya abalume ukuti: ‘Mubaghanaghe abachi binyu.’ (Aba Efeso 5.25) Nkimba ivi vikung’anamula choni? Umulume uwa lughano akubomba ivintu umwachisa, pala bali panyumba na pala bali na bantu. Akumufighilila ku vintu vyo vingamuvulazya umwakumubili sona munyinong’ono. (1 Timoti 5.8) Loli ichakulondiwa nkani umulume akumwavwa umuchi wache ukuti abe pabumanyani ubwamaka nu Yehova. (Matayi 4.4) Umwakufwanikizya abaghiye ukwiputa nu kubelenga Ibayibolo poka nu muchi wache. Pala umulume akumupwelelela umuchi wache umwalughano ubumanyani bwache nu Yehova bukubukilila ukuba bwamaka.—Belenga 1 Pitala 3.7.
2. Nkimba Ibayibolo likubapa bulongozi buli abachi?
Amazyu gha Chala ghakunena ukuti ‘umuchi aliwesi amuchindikaghe umulume.’ (Aba Efeso 5.33) Nkimba angabomba buli-buli ivi? Anginong’onela inkalo izyiza zyo umulume ali nazyo sona na vyo akubomba ukuti amupwelelele umwene poka na bana bache. Angalangizya sona ukuti akumuchindika waghe akumwavwa pa vyo asala ukuti vyende akiza sona pala akunena nawe umwachisa na po angaba ukuti umulume wache atakumwiputa u Yehova.
3. Nkimba imbumba zingaghomya buli-buli isendwa zyabo?
Pa nkani iya nyegha Ibayibolo likunena ukuti: “Po babili banaba bakwiza pakuba mubili ghoka.” (Matayi 19.5) Ivi vikung’anamula ukuti bosi babili batakulondiwa ukubomba chilichosi cho chingapangisya ukuti isendwa yabo yimale. Bakubomba ivi umwakuba na kabalilo aka kwangalila poka sona nu kunenezannya umwakusatuka mo bakwiyivwila. Bakumusubila nkani u Yehova ukuchila aliwesi. Akabalilo kosi bakuba maso ukuti batakabe pa bumanyani nu muntu yo bate nawe pa sendwa.
MANYA IVYINJI
Ennya ifundo zya mu Bayibolo zyo zingaghomya isendwa yinyu.
4. Umulume amughanaghe umuchi wache nu kumupwelelela
Ibayibolo likunena ukuti “abalume babaghanaye abachi babo ukuyana na mumo baghaghaniye amabili ghabo.” (Aba Efeso 5.28, 29) Ka ivi vikung’anamula choni? Enelezya IVIDIYO, nu kwamula ilalusyo.
Nkimba umulume angalangizya buli-buli ukuti amughanite umuchi wache sona akumupwelelela?
Belenga Aba Kolosi 3.12, nu kwamula ilalusyo ili:
Nkimba umulume angalangizya buli-buli inkalo izi mu nyegha yache?
5. Mwebachi mubaghane sona mubachindikaghe abalume binyu
Ibayibolo likulimbikisya abachi ukuti babachindikaghe abalume babo na po bangaba ukuti batakumubombela u Yehova. Belenga 1 Pitala 3.1, 2, nu kwamula amalalusyo agha:
Nanti umulume winyu atakumusubila u Yehova, tukusubila ukuti mukulonda hee ukuti wepe amwiputaghe u Yehova. Nkimba mukwinong’ona ukuti choni cho chingamwavwa? Nkimba mukwinong’ona ukuti mukulondiwa ukumulumbilila amazyu amiza akabalilo kosi pamo ukumulangizya inkalo inyiza nu kumuchindika? Choni cho mukunena bunubu?
Umulume nu muchi bangasalila poka ivintu ivyiza. Loli akabalilo kamo umuchi atangitikizya vyo umulume wache basala. Anganena inyinong’ono zyache umwamuchizi sona umwakwiyisya, loli akulondiwa ukukumbuka ukuti u Yehova amupiye umulume ubudindo ubwakusala vyo vikulondiwa mu mbumba yache. Umuchi akulondiwa sona ukubikapo umoyo ukumwavwa umulume ukuti akwanisye vyo asala. Nanti akubomba bunubu vikwavwa ukuti imbumba yache yibe yakuhoboka. Belenga 1 Pitala 3.3-5, nu kwamula ilalusyo ili:
Nkimba u Yehova akwiyivwa buli-buli nanti umuchi akumuchindika umulume wache?
6. Mungamalana ni ntamyo mu mbumba yinyu
Nayimo isendwa yo yakufikapo. Loli bo bali mu isendwa bangabombela poka ivintu ukuti bamalane ni ntamyo. Enelezya IVIDIYO, nu kwamula amalalusyo.
Ukuyana na vyo mwennya mu vidiyo, nkimba choni cho chikulangizya ukuti imbumba iyi yitakakolelanagha?
Nkimba bakabomba choni ukuti baghomye isendwa yabo?
Belenga 1 Aba Kolinti 10.24 sona Aba Kolosi 3.13. Nu kwamula ilalusyo ili:
Nkimba ukwivwila ubulongozi ubwa mu Bayibolo kungaghomya buli-buli imbumba?
Ibayibolo likunena ukuti tuchindikanaghe. Ukuchindikana kukongelezyapo ukumubombela umuntu umwachisa sona umwamuchizi. Belenga Aba Loma 12.10, nu kwamula ilalusyo ili:
Nkimba umulume pamo umuchi akulondiwa ukulindilila tasi ukuti uwamwabo weyo ande pakumuchindika? Choni cho mukunena bunubu?
VYO BAMO BAKUNENA: “Une nu wamwitu uwa mu isendwa tutakukolelana ngati mo vikabela pabwandilo.”
Nkimba mungabavwa buli-buli ukumanya ukuti Ibayibolo lingabavwa?
IFUNDO IZYAKUDUMULA
Umulume nu muchi bangaba bakuhoboka nanti baghananite sona bakwivwila ubulongozi ubwa mu Bayibolo.
Ukunyokelamo
Nkimba umulume angavwa buli-buli ukuti imbumba yibe yakuhoboka?
Nkimba umuchi angavwa buli-buli ukuti imbumba yibe yakuhoboka?
Pala muli pa sendwa, nkimba fundo buli iya mu Bayibolo yo yingabavwa ukuti mughomye isendwa yinyu?
IFUNDO IZYAKONGELEZYAPO
Manyila ifundo zyo zingabavwa ukuti muhobokaghe mu mbumba yinyu.
Enelezya ulwimbo lo lukulingannya amalusayo gho mungagha ichifukwa chakukonka ubulongozi ubwa mu Bayibolo mu sendwa yinyu.
Nkimba ifundo iyakuti abachi bivwilaghe abalume babo yikung’anamula choni?
Nkimba imbumba yimo yikabomba bulibuli ukuti yimalane ni ntamyo inkulu zyo zibapo?
U Chala Akatwavwa Ukuti Imbumba Yitu Yande Sona Ukwenda Akiza (5:14)