Choni Cho Ivyakuvwala Sona Ukwiswefya Vyakulondiwa Nkani?

Aliwesi akusala ivyakuvwala sona na mo akulonda pakubonekela. Nanti tukubombezya ubulongozi ubwa mu Bayibolo bungatwavwa ukuti tusalaghe ivyakuvwala vyo vingatuhobosya uswe sona u Yehova. Zatwennye ifundo zimo.

1. Nkimba fundo buli zyo zingatwavwa ukuti tusalaghe akiza ivyakuvwala sona na kabonekele kitu?

Akabalilo kosi ‘tuvwalaghe umwakwichindika nu mwamahala sona akiza,’ sona akabalilo kosi tubonekaghe akiza umwakuti abanji bennye ukuti ‘tukumwiputa u Chala.’ (1 Timoti 2.9, 10) Za twennye ifundo 4 izi: (1) “Tuvwalaghe akiza.” Ngati mo mukwenezyanga ku chipanga Abakaboni ba Yehova bakuvwalagha umwakupambana-pambana, loli ivyakuvwala na kayanizye kabo akasisi akabalilo kosi vikumuchindika u Yehova. (2) Tuvwalaghe ‘umwamahala.’ Ivi vikung’anamula ukuti tutabaghiye ukuvwala ivyakuvwala vyo vingapangisya ukuti abanji babe ni nyinong’ono izyakughonana sona vyo vingalangizya ukuti tukwiyinong’onela swebene. (3) Tungalangizya ukuti ‘tukuvwala akiza’ waghe tutakukonkelezya amasitayelo pamo amafashoni ghosi gho ghafuma. (4) Ivyakuvwala vyitu vilangizyanje ukuti ‘tukumuchindika u Chala’ sona umwakuti abanji bamanye ukuti tukumwiputa u Chala uwa bwanaloli.—1 Aba Kolinti 10.31.

2. Nkimba akabonekele kitu kangabakwafya buli-buli abakamu na bayemba bitu?

Bwanaloli ukuti aliwesi akusala mwene ivyakuti avwale, loli akabalilo kosi tubaghiye pakwinong’onela mo vingabakwafizya abanji. Tubaghiye ukwenelezya ukuti tutakapunuzyanje abanji, mubuyo bwache ‘Twebosi tubaghiye pakuhobosya abakamu bitu nu kubabombela ivyiza, umwakuti ulwitiko lwabo lukulaghe.’—Belenga Aba Loma 15.1, 2.

3. Nkimba akavwalile kitu kangabapangisya buli-buli abanji ukumanyila ivya Yehova?

Akabalilo kosi tukuyezya-yezya ukuvwala akiza nkani-nkani pala tuli pa nkomano sona mu bulumbilili. Tutakulonda ukuvulungannya abantu pakwivwisya amazyu amiza ichifukwa cha mo tukubonekela. Mumalo mwache tukulonda ukuti abanji ‘babanje ni chinyonywa ni chimayisyo icha Chala umupoki witu’ mumalo mwa mo tukubonekela.—Titi 2.10.

MANYA IVYINJI

4. Nanti tukuboneka akiza tukulangizya ukuti tukumuchindika u Yehova

Nkimba choni cho chakulondiwa nkani ukuti twinong’onelaghe pa mo tukubonekela? Belenga Salimo 47.2, nu kwamula amalalusyo agha:

• Pakuti tukumwiputa u Yehova, choni cho tubaghiye pakwinong’onela nkani mo tukuvwalila?

• Nkimba mukwennya ukuti chakwivwika ukwinong’onelapo mo tukuvwalila ku nkomano sona mubulumbilili? Chifukwa buli?

5. Vyo tungabomba ukuti tusalaghe akiza ivyakuvwala sona na kabonekele kitu

Enelezya IVIDIYO.

IVIDIYO: “Mubombaghe Vyosi Ukuti Mumuchindike u Chala” (10:18)

Napo mukuvwala ivyakuvwala ivyakudula pamo hagha, loli vibaghiye ukuba vyakuswepa sona muvwalaghe umwakukolelana na kumalo gho muli. Belenga 1 Aba Kolinti 10.24; 1 Timoti 2.9, 10. Pisinda pache mwennye ichifukwa cho tutabaghiye pakuvwala amalaya gho . . .

• ghanyalite pamo aghambula ukulongosoka

• ghakufyenya nkani, aghakulangala pamo gho ghangapangisya ukwanda ukwinong’ona ivyakughonana.

Napo Abakilisitu bate pasi pa ndaghilo izya Mozesi, loli bangamanyilako ivyinji ku ndaghilo izi pa mo u Yehova akwenezya inkani iya vyakuvwala. Belenga Ukukumbusya Indaghilo 22.5, nu kwamula ilalusyo ili:

• Choni cho tutabaghiye pa kuvwala ivyakuvwala vyo vikupangisya abakolo ukuboneka ngati banavuli pamo abanavuli ukuboneka ngati bakolo?

Belenga 1 Aba Kolinti 10.32, 33 nu 1 Yohani 2.15, 16, nu kwamula amalalusyo agha:

• Choni cho tubaghiye pakwinong’onela waghe ivyakuvwala vyitu vikupunuzya abantu mukaya kitu pamo ku chipanga?

• Nkimba vyakuvwala buli vyo abantu bighanite pa kuvwala ku malo ko mukwikala?

• Nkimba mukwenya ukuti ivyakuvwala vyo mwatambula Umukilisitu angavwala? Chifukwa buli?

IFUNDO IZYAKUDUMULA

Pala tukusala akiza ivyakuti tuvwale sona na mo inti tubonekele tungalangizya ukuti tukumuchindika u Yehova sona na banji.

Ukunyokelamo

• Choni cho akavwalile kitu na mo tukubonekela vyakulondiwa kwa Yehova?

• Nkimba choni cho chingatwavwa ukuti tusalaghe akiza ivyakuvwala?

• Nkimba akavwalile kitu kangapangisya buli-buli abanji ukumanyila ivya Yehova?

IFUNDO IZYAKONGELEZYAPO

Ennya vyo abanji banginong’ona pala bennya mo mwavwalila.

“Nkimba Nkuboneka Buli-buli?” (Inkani iya pa intaneti)

Manya ichifukwa cho mukulondiwa ukwinong’onela tasi po muchili mutijambuye mu mubili.

“Nkimba Ibayibolo Likuti Choni pa Nkani iya Kwijambula mu Mubili?” (Inkani iya pa intaneti)

Ennya ubulongozi ubwamwabo bo bungabavwa ukuti musalaghe akiza ivintu.

“Kasi Kavwaliro Kinu Kakuchindika Chiuta?” (Ichitembe cha Mulindilili, icha Chitumbuka icha Seputembala 2016)

Nkimba umukolo yumo yo akalondagha ukumupala u Yehova akamanyila buli-buli ukwanda ukuchindika vyo abanji basala pa nkani iya vyakuvwala?

“Nkhakhuŵaranga Chomene na Umo Ŵanthu Ŵakavwaliranga Kweniso Kujitozgera” (Wukani!, Disembala  22, 2003)