Musalaghe Ivyakusangalusya Vyo Vikumuhobosya u Yehova

U Yehova ‘we Chala uwakuhoboka.’ (1 Timoti 1.11, NWT) Akulonda ukuti nuswe tuhobokaghe nu bumi bwitu. Akuhoboka sana nanti tukwibikila akabalilo akakutuzya. Mu mutu ughu inti twennye mo tungabombezezya akiza akabalilo aka sona muzila yo yingamuhobosya u Yehova.

1. Nkimba tukulondiwa ukukumbuka choni nanti tukusala ivyakusangalusya?

Nkimba mwighanite ukubomba choni pa kabalilo ko mukutuzya? Bamo bighanite ukubelenga amabuku, ukwivwisya inyimbo, ukwenelezya amavidiyo pamo ukwangala pa intaneti. Bamo bakuhoboka nkani nanti bakwangalila poka na bamwabo po bakukwela amaghamba, ukusaba pamo ukukoma amagemu. Tungasala chilichosi ukuti chitusangalusyanje loli tukulondiwa ukwenelezya ukuti vyosi vyo tukusala “vikumuhobosya u Chala.” (Aba Efeso 5.10) Chakuhobosya sana ukuti uswe tuyimenye ifundo iyi, ichifukwa chakuti abantu abinji muchisu ichi bakusala ivyakusangalusya vyo u Yehova avibengite ngati amafilimu aghabibi, ivyakughonana pamo ivyamizimu. (Belenga Salimo 11.5) Choni cho chingatwavwa ukuti tusalaghe akiza ivyakusangalusya?

Nanti tukusala akiza abamanyani, bangatwavwa ukuba ni nkalo inyiza sona ukuti tusalaghe ivyakusangalusya ivyiza. Mu Mutu 52 tukamanyila ukuti, ‘yo akwenda na bamahala akwiza pakuba wamahala.’ Umwakuyana bulo, nanti tukubomba nkani ivintu na bantu bo batakukonka indaghilo zya Chala tukwiza ‘pakukomana ni ntamyo.’—Isya Mbupingamu 13.20.

2. Choni cho chakulondiwa sana ukwibikila akabalilo akavyakusangalusya?

Napo tungasala ivyakusangalusya vyo vikumuhobosya u Yehova, loli tukulondiwa ukubombezya akiza akabalilo kitu ko tukumalila pa vyakusangalusya ivi. Pala tungapotwa, tutangaba na kabalilo akakubombela ivintu ivyakulondiwa. Ibayibolo likutubuzya ukuti ‘mubombezyanje akiza akabalilo kinyu.’—Belenga Aba Efeso 5.15, 16, NWT.

MANYA IVYINJI

Ennya vyo mungabomba ukuti musalaghe akiza ivyakusangalusya.

3. Muvikane ivyakusangalusya ivibibi

Choni cho tukulondiwa ukusala ivyakusangalusya mwamahala? Enelezya IVIDIYO, nu kwamula amalalusyo agha:

IVIDIYO: Ka Ningasala Vyakusangalusya Buli? (4:39)

• Nkimba ivyakusangalusya ivya mu kabalilo ka Baloma viyanite buli-buli ni vya masiku ghano?

• Ukuyana ni vidiyo, nkimba u Danny akamanyila choni pa nkani iya vyakusangalusya?

Belenga Aba Loma 12.9, nu kwamula ilalusyo ili:

• Nkimba isimbo ili lingabavwa buli-buli ukuti musale akiza ivyakusangalusya?

Nkimba vintu buli vimo vyo u Yehova avibengite? Belenga Isya Mbupingamu 6.16, 17 nu Aba Galatiya 5.19-21. Pala mwabelenga isimbo lililyosi munenezannye ilalusyo ili:

• Ka vintu buli vimo vyo vyaneniwa mu masimbo agha vyo vikwaghiwa mu vyakusangalusya ivya masiku ghano?

Vyo tungabomba ukuti tusalaghe akiza ivyakusangalusya

Mwilalusye ukuti:

• Nkimba muchakusangalusya ichi muli ivintu vimo vyo u Yehova avibengite?

• Nkimba vikumalila akabalilo akakubombela ivintu ivyakulondiwa?

• Nkimba vikumpangisya ukuba pa bumanyani na bantu bo batamughanite u Yehova?

Tukufighililiwa nanti tukwikala kubutali ni vintu vyo vingatuvulazya. Cho chobene nuswe tukulondiwa ukuba kubutali ni vyakusangalusya vyo vingatuvulazya

4. Mubombezyanje akabalilo kinyu umwamahala

IVIDIYO: Ka Vintu Buli vyo Vikubamalila Akabalilo (2:45)

• Nangabuli umukamu wa mu vidiyo uyu atakenelezyanga ivintu ivibibi, nkimba akaba na ntamyo buli?

Belenga Aba Filipi 1.10, nu kwamula ilalusyo ili:

• Ka ivesi ili lingatwavwa buli-buli ukwinong’onela akabalilo ko tukumalila pa vyakusangalusya

5. Musalaghe ivyakusangalusya ivyiza

Napo ivyakusangalusya vimo vitakumuhobosya u Yehova, loli pali ivyakusangalusya vimo vyo tungabomba. Belenga Undumbilili 8.15 nu Aba Filipi 4.8, nu kwamula ilalusyo ili:

• Nkimba vyakusangalusya buli vyo muvighanite?

IFUNDO IZYAKUDUMULA

U Yehova akulonda ukuti tusalaghe ivyakusangalusya ivyiza.

Ukunyokelamo

• Nkimba vyakusangalusya buli vyo Abakilisitu batakulondiwa ukubombako?

• Choni cho tukulondiwa ukuba maso na kabalilo ko tukumalila pa vyakusangalusya?

• Choni cho tukulondiwa ukusala ivyakusangalusya vyo vikumuhobosya u Yehova?

IFUNDO IZYAKONGELEZYAPO

Manya yo ali nu budindo ubwakutusalila ivyakusangalusya.

“Nkimba Abakaboni ba Yehova Bakulesya, Amavidiyo Inyimbo Pamo Amabuku Ghamo?” (Inkani iya pa intaneti)

Ennya mo mungasalila ivyakusangalusya umwamahala.

“Kasi Vyakusanguluska Vinu ni Vyacandulo?” (Ichitembe cha Mulindilili, icha Chitumbuka Okutobala 15, 2011)

Munkani iyakuti “Nkhaleka Kutinkha Ŵazungu,” ennya ichifukwa cho umwanavuli yumo akasintila ivyakusangalusya.

“Baibolo Likusintha Umoyo wa Ŵanthu” (Ichitembe cha Mulindilili, icha Chitumbuka Febuluwale 1, 2010)

Ennya mo umama yumo akasalila umwamahala pa nkani iya vyakusangalusya ivyamizimu iyibibi.

Muvikane Ivyakusangalusya Ivyamizimu Iyibibi (2:02)