Bukilila Ukukuzya Ubumanyani Bwinyu nu Yehova

Ukwanda bulo po mukandila ukumanyila ibuku ili, mwamanyila ivyinji ivyakukwafyannya nu Yehova. Ivintu vyo mwamanyila vyabapangisya ukuti mumughane nkani u Yehova cho chifukwa mwipelekite kukwache nu koziwa. Loli nanti muchili, tukusubila ukuti vyovyo mukwinong’ona ukuti inti mubombe lunulu. Nanti moziwa mutakulondiwa ukuleka ukuba pa bumanyani nu Yehova. Nkimba mungabomba buli-buli ukuti mubukilile ukuba pa bumanyani nu Yehova kwa bwila na bwila?

1. Choni cho mukulondiwa ukubukilila ukughomya ubumanyani bwinyu nu Yehova?

Tukulondiwa ukubikapo umoyo ukuti tubukilile ukughomya ubumanyani bwitu nu Yehova. Chifukwa buli? “Umwakuti tutakepukayeko” kwa Yehova. (Aba Hebeli 2.1) Nkimba choni cho chingatwavwa ukuti tubukilile ukumubombela u Yehova umwabusubaliwa? Twibikilaghe ivyakubomba pa mbombo iya bulumbilili sona tulondelezyanje izila izinji izya mo tungamubombela u u Yehova umwakukwana. (Belenga Aba Filipi 3.16.) Ukumubombela u Yehova chintu chakulondiwa sana pa bumi bwitu!—Salimo 84.10.

2. Nkimba mukulondiwa ukubukilila ukubomba sona choni?

Nangabuli mwamalizya ukumanyila ibuku ili, loli ubumi bwinyu ubwa Chikilisitu inti bubukilile. Ibayibolo likunena ukuti tubaghiye ‘tuvwale ubuntu ubupya.’ (Aba Efeso 4.23, 24) Po mukubukilila ukumanyila Amazyu gha Chala sona nu kwaghiwapo pa nkomano, inti mumanye ivintu ivipya ivyinji ivyakukwafyannya nu Yehova sona ni nkalo zyache. Mubikaghepo umoyo ukuti mube ni nkalo ngati zyo alinazyo, sona mubukilile ukusinta ukuti mumuhobosyanje u Yehova.

3. Nkimba u Yehova akwiza pakubavwa buli-buli ukuti mubukilile ukukula mwabuzimu?

Ibayibolo likunena ukuti: ‘U Chala . . . akwiza ukumalizya pakubamanyisya. Akwiza ukubaghomya, akwiza ukubapa amaka sona akwiza ukubaghomya ukuti mutakayingane.’ (1 Pitala 5.10) Aliwesi akugheliwa ukuti abombe ivintu ivibibi. Loli u Yehova akutupa chilichosi umwakuti tujimbe ku ntamyo. (Salimo 139.23, 24) Akutulayizya ukutupa umoyo na maka aghakumubombela umwabusubaliwa.—Belenga Aba Filipi 2.13.

MANYA IVYINJI

4. Mubukilile ukunenezannya nu kwivwisya kwa Yehova

Ulwiputo nu kumanyila vyabavwa ukuti mube pa bumanyani nu Yehova. Nkimba ivintu ivi vingabavwa buli-buli ukuti mube pa bumanyani nkani nu Chala?

Belenga Salimo 62.8, nu kwamula ilalusyo ili:

• Ukuti mughomye ubumanyani bwinyu nu Yehova, nkimba mungasinta choni pa nkani iya lwiputo?

Belenga Salimo 1.2 na mazyu aghamuntende, nu kwamula ilalusyo ili:

• Ukuti mughomye ubumanyani bwinyu nu Yehova, nkimba mungabomba buli-buli ukuti mupindulaghe waghe mukubelenga Ibayibolo?

Nkimba mungabomba buli-buli ukuti mupindulaghe waghe mukumanyila Ibayibolo pa mwebene? Ukuti mwennye ifundo zimo zyo zingabavwa, enelezya IVIDIYO, nu kwamula amalalusyo.

IVIDIYO: Mupindulaghe na vyo Mukumanyila pa Mwebene (5:22)

• Nkimba masakizyo buli gho mwamanyila mu vidiyo gho mukulonda ukughabombezya?

• Nkimba nkani buli zyo mungighana ukuti mumanyile?

5. Mwibikile ivyakubomba

Ukwibikila ivya kubomba po tukumubombela u Yehova kukwiza pakutwavwa ukuti tukule mwabuzimu. Enelezya IVIDIYO, nu kwamula ilalusyo.

IVIDIYO: Ubumi Ubwiza Nkani (3:31)

• Ukuyana na vyo mwennya mu vidiyo, nkimba u Cameron akabomba choni ukuti apindule ni vyakubomba vyo akibikila?

Nangabuli te aliwesi yo angabuka pakulumbilila kuchisu ichinji, loli swebosi tungibikila ivyakubomba vyo tungavikwanisya. Belenga Isya Mbupingamu 21.5, nu kwennya ivyakubomba vyo tungibikila  . . .

• ku chipanga.

• mu bulumbilili.

Nkimba ifundo ya mwisimbo ili yingabavwa buli-buli ukukwanisya vyo mwasala?

Ivyakubomba vimo vyo mungibikila

• Inyiputo zyinu zibe zyiza.

• Mubelenge Ibayibolo lyosi.

• Mumumanye aliwesi mu chipanga chinyu.

• Mwande pakumanyila Ibayibolo pa mwebene.

• Mwande ubupayiniya uwa kabalilo akanandi pamo uwakabalilo kosi.

• Nanti we mukamu limbikila nkani ukuti ube we mwavwilizyi wa chipanga.

IFUNDO IZYAKUDUMULA

Bukilila ukughomya ubumanyani bwinyu nu Yehova sona nu kwibikila ivyakubomba, popo mukwiza pakuhoboka nu bumi kwa bwila na bwila!

Ukunyokelamo

• Nkimba choni cho muli nu lusubilo ukuti u Yehova akwiza pakubavwa nanti mukumubombela umwabusubaliwa?

• Nkimba mungaghomya buli-buli ubumanyani bwinyu nu Yehova?

• Nkimba ukwibikila ivyakubomba kungabavwa buli-buli ukuti mube papipi nkani nu Yehova?

IFUNDO IZYAKONGELEZYAPO

Nkimba ichakulondiwa nkani kwa Yehova cho choni, ukusubaliwa lyoka pamo akabalilo kosi?

Mube mwe Basubaliwa Ngati we Abulahamu (9:20)

Akabalilo kamo ababombi ba Yehova abasubaliwa bangaleka ukuhoboka. Ennya mo mungabombela ukuti muhobokaghe.

Mungaba mwe Bakuhoboka Nanti Mukubelenga Ibayibolo (5:25)

Nkimba mungabomba buli-buli ukuti mwibikile ivyakubomba ivya buzimu nu kuvikwanisya?

“Fiskani Vilato Vinu Vyauzimu Kuti Muchindike Mlengi Winu” (Ichitembe cha Mulindilili icha Chitumbuka, Julayi 15, 2004)

Choni cho tukulondiwa ukuba swe Bakilisitu bakughoma mwabuzimu sona tungabomba buli-buli ukuti tube bakughoma mwabuzimu?

“Tiŵe Ŵakukhwima Cifukwa ‘Zuŵa Likuru la Yehova Liri Pafupi’” (Ichitembe cha Mulindilili icha Chitumbuka, Meyi 15, 2009)