Mo Ichipanga Chingamweghelela u Yehova pa mo Akubombela na bo Babomba Imbibi Inkhulu

1. Nkhimba u Yehova akubalondela ichoni abanthu bosi?

U YEHOVA akabapela abanthu nu bwabuke ubwakusala. Akabalilo kosi mukubombezya ichabupi ichi nanthi mukusala ivinthu. Ichinthu ichakulondiwa sana cho umunthu akulondiwa ukusala chakuti iyipe kwa Yehova nu kuba pigulu ilya babombi bache. U Yehova akulonda ukuti aliwesi abombe bunubu. Chifukwa buli? Ichifukwa chakuti abaghanite abanthu sona akubalondela ivyiza. Akulonda ukuti babanje bamanyani bache sona bikalaghe kwa bwila na bwila.—Kumbu. 30.19, 20; Gala. 6.7, 8.

2. Ka u Yehova akulonda ukuti bo babomba imbibi inkhulu babombe ichoni? (1 Yohani 2.1)

² Loli u Yehova atakukakamizya umunthu aliwesi ukuti amubombelaghe. Akwitikizya umunthu aliwesi ukuti asale weka vyo akulonda ukubomba. Choni cho chikubombiwa nanthi Umukilisitu uwakoziwa apotwa ukukonkha indaghilo zya Chala nu kubomba imbibi inkhulu? Nanthi atakupinduka, abaghiye ukwepusiwa muchipanga. (1 Koli. 5.13) Napo vingaba bunubu, loli u Yehova akuba nu lusubilo ukuti umunthu uyu inthi ize anyokele sona kukwache. Cho chifukwa u Yehova akapeleka isembe ukuti abahobokelaghe abanthu bo babomba imbibi inkhulu. (Belenga 1 Yohani 2.1.) U Chala witu uwalughano akubalambilizya bo babomba imbibi inkhulu ukuti bapinduke.—Zeka. 1.3; Loma 2.4; Yako. 4.8.

3. Ka munkhani iyi inthi tunenezyannye ichoni?

³ U Yehova akulonda ukuti tukolelanaghe ni nyinong’ono zyache pa mo akubenezya abanthu bo babomba imbibi inkhulu. Munkhani iyi, inthi tumanyile mo tungabombela bunubu. Pa kabalilo ko mukubelenga inkhani iyi, ennya (1) mo Abakilisitu ababwandilo aba muchipanga icha ku Kolinti bakabombelagha na banthu bo babomba imbibi inkhulu, (2) ubulongozi bo u Pabuli akabapa pa mo bangabombela nanthi umunthu yo akabomba imbibi inkhulu apinduka sona (3) mo inkhani zya mu Bayibolo zikulangizizya mo u Yehova akubenezya Abakilisitu bo babomba imbibi inkhulu.

MO ABAKILISITU ABABWANDILO BAKABOMBELA NU MUNTHU YO AKABOMBA IMBIBI INKHULU

4. Nkhimba muchipanga icha ku Kolinti mukaba nthamyo buli? (1 Aba Kolinti 5.1, 2)

⁴ Belenga 1 Aba Kolinti 5.1, 2. Pabulendo bwache ubwabutatu ubwa bumishonale, u Pabuli akivwa inkhani iyakukalalizya iyakukwafannya ni chipanga cho chikaba ukuti chanda mwalunulu ku Kolinti. Umukamu yumo muchipanga ichi, akabombagha ubwamalaya nu mama wache uwakumwagha. Inkhalo iyi yikaba yakukozya isoni hee sona yikaba ukuti ‘yitabombiwepo nalumolumo na banthu abakuzi’! Vikulangizya ukuti ichipanga chikennyanga ukuti vyo akabombagha vyiza bulo. Lumo bamo muchipanga ichi, bakennyanga ukuti ukubomba bunubu kokuti bakulangizya ichisa ngati mo u Chala akubombela na banthu abambula ukufikapo. Loli u Yehova atakuhoboka nu munthu yo akubomba ivinthu ivibibi pakasi pa banthu bache. Umunthu uyu akananga imbili ya chipanga ichifukwa cha vinthu ivibibi vyo akabomba. Sona nge akapangisya Abakilisitu abanji bo akangalagha nabo ukuti bande ukubomba vyo umwene akabomba. Ka u Pabuli akapeleka bulongozi buli ku chipanga?

5. Ka u Pabuli akachibuzya ichipanga ukuti chibombaghe ichoni sona akang’anamulagha choni? (1 Aba Kolinti 5.13) (Ennya sona ichithuzi.)

⁵ Belenga 1 Aba Kolinti 5.13. U Yehova akamwavwa u Pabuli ukuti achisimbile ichipanga ukalata nu kulongosola ukuti umunthu yo atakupinduka akulondiwa ukwepusiwa muchipanga. Ka Abakilisitu abasubaliwa bakalondiwanga ukubomba nawe bulibuli ivinthu? U Pabuli akababuzya ukuti “mutakangalilanaye poka.” Ka akang’anamulagha choni? U Pabuli akalongosola ukuti ilamulo ili likongelezyapo ukuti ‘mutakikalaye pasi nu kulya nawe umunthu yunuyu napo panandi.’ (1 Koli. 5.11) Ukulya poka nu munthu yumo ichakulya, chikuba chipepe sana ukuti mwande ukukolelana nkhani. Cho chifukwa u Pabuli akanena ukuti ichipanga chitakulondiwa ukwangala nu munthu uyu. Ivi nge vikafighilila ichipanga ukuti chitakasendeleko inkhalo yache. (1 Koli. 5.5-7) Umwakongelezyapo, nanthi batakangalilagha poka nu munthu yo abomba imbibi inkhulu, nge vikamwavwa ukuti amanye ukuti amunangiye u Yehova nu kumwavwa ukuti apinduke.

6. Ka ichipanga chikabomba choni chikati chapokela ukalata uwa Pabuli sona vikamwavwa bulibuli yo akabombagha imbibi?

⁶ Akati atumizya ukalata wache ku Bakilistu aba ku Kolinti, u Pabuli akanda ukupasya mo ichipanga inthi chibombele. Umwalubilo, u Titi akamubuzya ubuthenga ubwakuhobosya. Ichipanga chikapokela ukalata yo u Pabuli akasimba, ni nyobe zibili. (2 Koli. 7.6, 7) Bakabikapo umoyo pakukonkha ubulongozi bo bakapokela. Umwakongelezyapo, pakati pendapo imyezi ukufuma pa kabalilo ko u Pabuli akabasimbila ukalata, umunthu yo akabombagha ivinthu ivibibi akapinduka! Akasintha inkhalo yache nu kwanda ukukonkha ifundo zya Yehova. (2 Koli. 7.8-11) Ka pa kabalilo aka, u Pabuli akachibuzya ichipanga ukuti chikulondiwa ukubomba choni?

MO ICHIPANGA CHIKABOMBELA NU MUNTHU YO AKAPINDUKA

7. Ka ichilango cho bakamupa umunthu yo akabomba imbibi chikamwavwa bulibuli? (2 Aba Kolinti 2.5-8)

⁷ Belenga 2 Aba Kolinti 2.5-8. U Pabuli akanena ukuti ‘ulufundo lulo afundiwa nalo na banthu abinji muchipanga, lwamukwana.’ Mumazyu aghanji tunganena ukuti ichilango cho bakamupa chikaba ni vyakukonkhapo ivyiza. Choni cho chikabombiwa? Chikamwavwa ukuti apinduke.—Hebe. 12.11.

8. Nkhimba pisinda pache u Pabuli akachibuzya ichipanga ukuti chibombaghe choni?

⁸ Pisinda pache, u Pabuli akachisimbila ichipanga ukuti: “Polelo mubaghiye pakumuhobokela, sona nukumusangalusya” umukamu yo abomba imbibi sona “mumulanjizye namumo mumughaniye.” Ennya ukuti u Pabuli akalondagha ukuti ichipanga chibombe ivinthu ivyinji ukuchila ukumunyosezya bulo umunthu pakasi pa banthu ba Yehova. U Pabuli akalondagha ukuti banenaghe nu kubomba ivinthu ivyakumusimikizya umunthu uwakupinduka ukuti bamuhobokela ukufuma pasi pamoyo sona bamughanite sana. Cho chifukwa bakalondiwanga ukulangizya pabuzelu ukuti bamupokelela ni nyobe zibili umunthu yo anyokela muchipanga.

9. Choni cho bamo babaghiye ukuti bakatamiwanga ukumuhobokela umunthu yo apinduka?

⁹ Ka bamo muchipanga ichi, bangaba ukuti bakalangizyanga ukuti batakulonda ukumupokelela umunthu yo akapinduka? Inkhani iyi yitakutubuzya ivyinji, loli lumo momo vikabela. Vingabombiwa ukuti ivinthu vyo akapuvya vikapangisya inthamyo muchipanga sona vikabakwafya abakamu na bayemba bamo. Bamo babaghiye ukuti bakiyivwanga ukuti te chiza ukumupokelela akiza umunthu uyu ngati mukamu nkhanikhani nanthi bobo bakabikapo umoyo ukuti ivinthu ivibibi vitakabombiwange muchipanga. (Yanisya nu Luka 15.28-30.) Napo vikaba bunubu, choni cho chikaba chakulondiwa sana ukuti ichipanga chilangizyange ulughano ulwabwanaloli kwa mukamu yo akanyokela?

10-11. Choni cho nge chikabombiwa nanthi abasongo bakakana ukumuhobokela umunthu yo akapinduka?

¹⁰ Inong’onela vyo nge vikabombiwa nanthi abasongo bakakanagha ukumunyosezya muchipanga yo akapinduka pamo pisinda apakuti anyokela, chope ichipanga chikane ukumulangizya ulughano. Umunthu uyu nge akaba ni “chitima ichikulu” nkhani. Nge chikaba chipepe ukwiyivwa ukuti atangaba sona muchipanga. Sona nge akaleka ukubikapo umoyo ukuti anyosezyepo ubumanyani bwache nu Chala.

¹¹ Ukuchila vyosi, nanthi abakamu na bayemba bakakanagha ukumuhobokela yo akapinduka, nge bakabika ubumanyani bwabo nu Yehova pangozi. Chifukwa buli? Ichifukwa chakuti nge bakalangizya ukuti batakumweghelela u Yehova pa nkhani iyakuhobokela, loli nge bakalangizya ukuti bakumweghelela u Satana yo ate ni chisa. Sona nge bakaba vibombelo vyo u Satana akubombezya imbombo pakubavulazya abanthu mwabuzimu.—2 Koli. 2.10, 11; Efe. 4.27.

12. Ka ichipanga nge chikamweghelela bulibuli u Yehova?

¹² Ka ichipanga icha ku Kolinti nge chikamweghelela bulibuli u Yehova mumalo mwa Satana? Nge chikamweghelela u Yehova umwakukonkha mo akubombela ivinthu na banthu bo bapinduka. Ennya ifundo zimo zyo bo bakasimba Ibayibolo bakanena izyakukwafanya nu Yehova. U Devedi akanena ukuti ‘mwiza sona wakwisengannya ukuhobokela.’ (Sali. 86.5) U Mika akasimba ukuti: ‘Ka Chala buli yo akuyana numwe, yo akuhobokela ivinthu ivyakupuvya nu kwendapo bulo pa mbibi?’ (Mika 7.18) Sona u Yesaya akanena ukuti: ‘Umunthu umubibi aleke izila zyache sona umubibi asinthe inyinong’ono zyache; anyokele kwa Yehova, po inthi amupelele ichisa, anyokele kwa Chala witu ichifukwa chakuti akwiza pakumuhobokela nu moyo ghosi.’—Yesa. 55.7.

13. Choni cho chikaba chakulondiwa ukumunyosezya umunthu uwakupinduka muchipanga? (Ennya ibokosi ilyakuti “Choni cho Umunthu uwa ku Kolinti Akanyokela?”)

¹³ Ichipanga icha ku Kolinti, chikalondiwanga ukumupokelela ni nyobe zibili umunthu yo akapinduka nu kumusimikizya ukuti chimughanite ukuti chimweghelele u Yehova. Pakukonkha ubulongozi bo u Pabuli akabapa ubwakuti bamupokelelele akiza umunthu yo akapinduka, ichipanga chikalangizya ukuti ‘chikwivwila muvinthu vyosi.’ (2 Koli. 2.9) Napo pakenda imyezi yinandi bulo, loli ichilango cho bakamupa chikamwavwa ukuti apinduke. Polelo abasongo batakalondiwanga ukuchedwa ukumunyosezya muchipanga.

UKUMWEGHELELA U YEHOVA PA NKHANI IYA BUGHOLOSU NI CHISA

14-15. Ka tukumanyilako choni ku vyo vikabombiwa ku Kolinti? (2 Pitala 3.9) (Ennya sona ichithuzi.)

¹⁴ Inkhani yo yikabombiwa ku chipanga icha ku Kolinti, yisimbiwe mu Bayibolo ukuti ‘yitumanyisye.’ (Loma 15.4) Inkhani iyi yikutumanyisya ukuti u Yehova atakwitikizya ukuti abanthu bo babomba imbibi babukilile ukuba pakasi pa banthu bache. Sona ate ni nyinong’ono izyakuti umunthu yo akubomba ivibibi ukusita ukupinduka, akulondiwa ukumulangizya “ichisa” nu kumwitikizya ukuti abukilile ukuba poka na banthu bache abasubaliwa. U Yehova wachisa, loli ifundo zyache izyabugholosu zitakusintha. (Yuda 4) Ubwanaloli bwakuti, atakulangizya ichisa chache akabalilo kosi, ichifukwa chakuti vingapangisya ukuti ichipanga chosi chikomanike.—Mbupi. 13.20; 1 Koli. 15.33.

¹⁵ Napo vili bunubu, loli tukumanya ukuti u Yehova atakulonda ukuti umunthu yumo apyutiwe. Akulonda ukubomba chilichosi cho angakwanisya ukuti amupoke aliwesi. Akubalangizya ichisa abanthu bo bapinduka ukufuma pasi pa moyo, sona bakulonda ukuyannya ubumanyani bwabo nu Yehova. (Eze. 33.11; belenga 2 Pitala 3.9.) Cho chifukwa umunthu uwa ku Kolinti akati apinduka nu kusintha inkhalo yache imbibi, u Yehova akabombezya u Pabuli ukuti achilongosolele ichipanga ukuti umunthu uyu akulondiwa ukuhobokeliwa nu kumupokelela nu moyo ghosi.

16. Ka mukwiyivwa bulibuli na mo inkhani iya ku Kolinti yikendela?

¹⁶ Nanthi tukwinong’onelapo pa mo u Yehova akabombela ni nkhani yo yikabombiwa ku Kolinti, vikutwavwa ukwennya ukuti u Yehova walughano, mugholosu sona wachisa. (Sali. 33.5) Ka ivi vitabapangisya ukuti mongelezye pakumupala nkhani u Chala? Twebosi twe banazi sona tukulondiwa ukuti atuhobokelaghe. Aliwesi uwa uswe ali ni vifukwa ivyakumupalizizya u Yehova ichifukwa cha sembe yo yikupangisya ukuti tuhobokeliwanje imbibi zyitu. Chakusangalusya hee sona chakughomya pakumanya ukuti u Yehova abaghanite abanthu bache sona akubalondela ivyiza!

17. Ka munkhani izyakukonkhapo inthi twize tunenezannye ichoni?

¹⁷ Nkhimba amasiku ghano tungabomba bulibuli na banthu bo babomba imbibi? Ka abasongo ba chipanga bangamweghelela bulibuli u Yehova pa mo akumutulila umunthu ukuti apinduke? Ka ichipanga chikulondiwa ukubomba bulibuli nanthi abasongo basala ukuti umunthu epusiwe muchipanga pamo bamunyosezya muchipanga? Inthi twize tunenezannye amalalusyo agha munkhani izyakukonkhapo.