INKHANI IYAKUMANYILA 10
ULWIMBO 31 Yendaninge na Chiuta!
Mweghelele Akinong’onele ka Yehova nu Yesu
“Pakuti u Kilisitu akayimba mumubili wache, namwe bulo mubaghiye mwiyannyanje mwebene ni nyinong’ono.”—1 PITA. 4.1.
IFUNDO INKHULU
Tumanyile mo umutumiwa u Pitala akeghelela akinong’onele ka Yesu sona mo nuswe tungabombela.
1-2. Ka ukumughana u Yehova kukongelezyapo ichoni sona u Yesu akabomba bulibuli?
“UMUGHANAYE Umwene u Chala wako nu moyo wako ghosi, nu muzimu wako ghosi na maka ghako ghosi ni nyinong’ono zyako zyosi.” (Luka 10.27) U Yesu akalangizya ukuti ululaghilo ulu lolo lwakulondiwa sana mu Ndaghilo izya Mozesi. Ukumughana u Yehova nu moyo witu ghosi kukukwafya mo tukwiyivwila, vyo tukulonda ukubomba sona mo tukubombela ivinthu. Kukongelezyapo ukwiyipa nu moyo witu na maka ghitu ghosi. Loli ukumughana u Yehova kukongelezyapo sona inyinong’ono zyitu, vyo vikung’anamula mo tukwinong’onela pa vinthu vimo. Napo vili bunubu, loli tutangeghelela inyinong’ono zya Yehova ndendende. Loli tungivwisya inyinong’ono izya Chala nanthi tungamanyila “inyinong’ono zya Kilisitu” ichifukwa chakuti u Yesu akalangizyanga sona mo Ubaba wache akwinong’onela.—1 Koli. 2.16
2 U Yesu akamughanagha u Yehova ni nyinong’ono zyache zyosi. Akamanyagha vyo u Chala akalondagha ukuti abombe sona akabikapo umoyo ukubomba bunubu napo akamanyagha ukuti inthi akomane ni nthamyo ichifukwa chakubomba cho chiza. Ichifukwa chakuti u Yesu akabikapo umoyo pakubomba imbombo iya Baba wache, atakitikizya chilichosi ukuti chimuvulungannye.
3. Nkhimba umutumiwa u Pitala akamanyilako choni kwa Yesu sona akabalimbikisya Abakilisitu ukuti babombe ichoni? (1 Pitala 4.1)
3 U Pitala na batumiwa abamwabo bakaba nu lusako ulwakwikala nu Yesu sona ukumanya mo akinong’onelagha. Pa kabalilo ko u Pitala akasimbagha ukalata wache uwabwandilo, akabalimbikisya Abakilisitu ukuti babe na kinong’onele akakuyana na ko u Kilisitu akaba nako.a (Belenga.1 Pitala 4.1) U Pitala akabombezya amazyu gho abasilikali bakubombezya aghakuti: ‘Mwisengannye.’ Polelo nanthi Abakilisitu bakuyezya akinong’onele ka Yesu, bakwiza pakuba ni vilwilo vyosi ivyakulwila inkhondo iyakulimbana ni mbibi ni chisu cho u Satana akulaghila ichi.—2 Koli. 10.3-5; Efe. 6.12.
4. Ka munkhani iyi inthi tumanyile ichoni?
4 Inthi twennye mo u Yesu akabombelagha sona mo tungabombela ukuti tumweghelele. Inthi tumanyile (1) mo tungeghelela akinong’onele ka Yehova ko kangatwavwa ukuti twinong’onaghe umwakuyana, (2) mo tungabela bakwiyisya sona (3) mo tungabela bakwinong’ona akiza umwakumusubila u Yehova ukwendela mu lwiputo.
MWEGHELELE AKINONG’ONELE KA YEHOVA
5. Ka u Pitala akapotwa bulibuli ukulangizya inyinong’ono zya Yehova pa chakubombiwa chimo?
5 Za twennye ichakubombiwa chimo cho chikulangizya ukuti u Pitala akapotwa ukweghelela inyinong’ono zya Yehova pa nkhani yimo. U Yesu akababuzya abatumiwa bache ukuti akulondawa ukubuka ku Yelusalemu, ko inthi aye apelekiwe munyobe zya balongozi bachipanga, inthi aye ajimbe ku nthamyo izyakupambanapambana sona pabumalilo inthi aye aghoghiwe. (Mata. 16.21) Chibaghiye ukuti chikamutamya u Pitala ukwitikizya ukuti u Yehova inthi itikizye ukuti u Yesu yo Abaizilayeli bakamusubilagha sona bakamulindililagha ukuti we Mesiya aghoghiwe. (Mata. 16.16) Chochobene u Pitala akamusendela u Yesu palubazu nu kumubuzya ukuti: “Awe Mwene! Ichi chitakakuwilaye!” (Mata. 16.22) Ichifukwa chakuti u Pitala atakeghelela inyinong’ono zya Yehova pa nkhani iyi, akapotwa ukukolelana ni nyinong’ono zya Yesu.
6. Ka u Yesu akalangizya bulibuli ukuti inyinong’ono zyache zikayana bulo ni zya Yehova?
6 Akinong’onele ka Yesu kakakolelanagha sana na kinong’onele ka Baba wache uwakumwanya. U Yesu akamubuzya u Pitala ukuti: ‘Epapo, we Satana! Uwe uyanite bulo ni chizinkha muzila yane. Inyinong’ono zyako zitakufuma kwa Chala, loli ku nyinong’ono bulo izya banthu.’ (Mata. 16.23) U Pitala abaghiye ukuti akamwinong’onelagha ivyiza u Yesu, loli u Yesu akakana ubulongozi bwache. Apa tukumanyilapo ichinthu chimo. Ubwighane bwa Yehova bukaba bwakuti u Yesu atakipelele ichisa. Pa chakubombiwa ichi, u Pitala akamanyila ifundo iyakulondiwa sana iyakuti akulondiwa ukusenda inyinong’ono zya Chala ukuba zyache.
7. Nkhimba u Pitala akalangizya bulibuli ukuti akeghelela inyinong’ono zya Yehova? (Ennya icha pachifwambo.)
7 Akabalilo kakati kendapo, u Pitala akalangizya ukuti akulonda ukweghelela akinong’onele ka Yehova. Akabalilo kakakwana akakuti abanthu bo batakaba Bayuda sona batakasilimuliwa, babe banthu ba Chala. U Yehova akamutuma u Pitala ukuti aye alumbilile kwa Kolineliya, yo akaba mwigulu ilya banthu ababwandilo ukuba Bakilisitu bo batakaba Bayuda. Ichifukwa chakuti Abayuda batakabombelagha poka ivinthu na banthu bo batakaba Bayuba, chochobene tutakukayikila ukuti u Pitala akalondiwanga ubutuli ukuti abe wakwisengannya ukubomba imbombo iyi. U Pitala akati amanya ubwighane bwa Chala pa nkhani iyi, akasintha inyinong’ono zyache. Ivi vikapangisya ukuti pa kabalilo ko u Yehova akamutuma ‘atakazyelazyela.’ (Imbo. 10.28, 29) Akamulumbilila u Kolineliya sona imbumba yache yosi yikoziwa.—Imbo. 10.21-23, 34, 35, 44-48.
U Pitala ingila munyumba iya Kolineliya (Ennya indime 7)
8. Ka tungalangizya bulibuli ukuti tuli ni nyinong’ono izyakuyana nizya Yehova? (1 Pitala 3.8)
8 Pakati pendapo imyaka iyinji, u Pitala akabalimbikisya Abakilisitu ukuti ‘bapasikizannyanje.’ (Belenga 1 Pitala 3.8.) Pakuba banthu ba Yehova, tungaba ni nyinong’ono izyakuyana nanthi tukuyezya inyinong’ono izya Yehova zyo tukumanyila mu Bayibolo. Umwakufwanikizya, u Yesu akababuzya abamanyili bache ukuti babikaghe ivinthu ivya Bumwene pa bwandilo pa bumi bwabo. (Mata 6.33) Vingabombiwa ukuti yumo muchipanga chinyu angasala ukuti ande ubupayiniya ubwa kabalilo kosi. Mumalo mwakusakizya ukuti ipelele ichisa, tungapanga akiza ukumubuzya ivinthu ivyiza ivyakukwafannya na vyo asala nu kumwavwa.
MUBE BAKWIYISYA
9-10. Nkhimba u Yesu akalangizya bulibuli ukuti akaba wakwiyisya nkhani?
9 Ubusiku ubwakuti indabi inthi afwe, u Yesu akamumanyisya u Pitala poka na bamanyili abanji ukulondiwa ukwa kuba wakwiyisya. Bo kuchili kutilite, u Yesu akamutuma u Pitala nu Yohani ukuti baye basengannye amalo aghakulyelamo ichakulya ichabumalilo cho inthi balye po achili atafuye. Bakalondiwanga ukwenelezya ukuti babikapo ibeseni ilya mizi ni vyakupuputila ukuti yumo ize abasukuzye abalendo mu vinama po bachili batandite ukulya ichakulya. Loli, ka wenu yo akwiza ukwiyisya ukuti abombe imbombo iyapasi iyi?
10 U Yesu akalangizya ukuti munthu wakwiyisya sana. Abatumiwa babaghiye ukuti bakaswigha sana bati bamwennya u Yesu akubomba imbombo yo yikabombiwanga na bazya. U Yesu akavula ichakuvwala chache icha kuzi, akasenda ichakupuputila nu kupinya mumusana, akasenda amizi nu kubika mu beseni nu kwanda ukubasukuzya mu vinama. (Yoha. 13.4, 5) Vibaghiye ukuti vikamusendela akabalilo akatali ukuti amalizye ukusukuzya ivinama ivya batumiwa bache bosi 12, ukongelezyapo nu Yudasi yo akaba papipi ukuti amupeleke. Loli umwakwiyisya, u Yesu akamalizya imbombo iyi. Pisinda pache u Yesu akanena ukuti: ‘Nkhimba mwachivwisya chicho nababombela? Umwe mukunitizya une ukuti Mumanyisi sona Mwene,’ chizapo pakubomba bunubu pakuti momo mbeleye. Po nanthi une Umwene nu Mumanyisi winyu nabasukuzya ivinama vyinyu, numwe bulo mubaghiye pakusukuzannya ivinama vyinyu.’—Yoha. 13.12-14.
Ukwiyisya ukwenecho kukongelezyapo . . . mo tukwinong’onela na mo tukubenezya abanji
11. Ka u Pitala akalangizya bulibuli ukuti akamanyila ukuba wakwiyisya? (1 Pitala 5.5) (Ennya sona ichithuzi.)
11 U Pitala akamanyila kwa Yesu mo angabela wakwiyisya. U Yesu akati anyokela kumwanya, u Pitala akapanga ichiswigho umwakumupozya umunthu yo akapapiwa uwakulemala. (Imbo. 1.8, 9; 3.2, 6-8) Umunthu yula akati apola, ichilundilo icha banthu chikamuzyungulila u Pitala. (Imbo. 3.11) Nkhimba u Pitala akanda ukwikwezya nu kwituvya ichifukwa chakuti akakulila ku malo gho abanthu bakennyanga ubudindo nu kutchuka ukuti vyapamwanya? Awee, umwakwiyisya u Pitala akapeleka ubuchindamu kwa Yehova nu Yesu bo bakaba bakwenelela, umwakunena ukuti: ‘Ukwendela mwizina lya [Yesu] sona ulwitiko lo tuli nalo mwizina lyache, umunthu uyu yo mukumwennya sona mumumenye, apola.’ (Imbo. 3.12-16) Amazyu gho umutumiwa u Pitala akabombezya mwakalata yo akabasimbila Abakilisitu gho ghakunena ivyakulondiwa ukwakuba bakwiyisya, ghakutukumbusya ichakubombiwa cho u Yesu akabomba, po akapinya ichakupuputila mumusana wache nu kusukuzya ivinama ivya batumiwa bache.—Belenga 1 Pitala 5.5.
U Pitala akati apanga ichiswigho, umwakwiyisya akapeleka ubuchindamu kwa Yehova nu Yesu. Nuswe bulo tungalangizya ukuti swe bakwiyisya umwakubomba ivinthu ivyinji ukusita ukulindilila ukuti abanji batwennye pamo ukuti batupe ichinthu chimo (Ennya indime 11-12)
12. Ngati we Pitala, ka tungabomba ichoni ukuti tubukilile ukuba bakwiyisya?
12 Tungamweghelela u Pitala nanthi tukuyezyayezya ukuba bakwiyisya. Mukumbukilaghe ukuti ukwiyisya ukwenecho kukongelezyapo ivinthu ivyinji ukuchila ukunena bulo amazyu aghiza. Amazyu gho u Pitala akabombezya aghakuti “ukwiyisya” ghakukwafya sona mo tukwinong’onela na mo tukubenezya abanji. Tutakubabombela abanji ivinthu ivyiza ichifukwa chakuti tukulonda ukuti batupale, loli ichifukwa chakuti tumughanite u Yehova sona tubaghanite abanthu. Nanthi tukuhoboka pakumubombela u Yehova sona abakamu na bayemba bitu muzila yiliyosi, napo vyo tukubomba abanthu bangennya pamo hagha, tukulangizya ukuti swe bakwiyisya.—Mata. 6.1-4.
MUBE ‘BAKWINONG’ONA AKIZA’
13. Ka ukuba ‘wakwinong’ona akiza’ kukung’anamula choni?
13 Ka ukuba ‘bakwinong’ona akiza’ kukung’anamula choni? (1 Pita. 4.7) Umukilisitu yo wakwinong’ona akiza, akubomba chilichosi cho angakwanisya ukuti asale ivinthu umwakukolelana ni nyinong’ono zya Yehova. Akumanya ukuti patalipo nachimochimo cho chakulondiwa nkhani pa bumi bwache, ukuchila ubumanyani bwache nu Yehova. Akuleka ukwiyinong’onela weka sona akuzyaghannya ukuti atakumanya ivinthu vyosi. Akabalilo kosi akulangizya ukuti akumusubila u Chala umwakwiputa kwa Yehova.b
14. Nkhimba u Pitala akapotwa bulibuli ukumusubila u Yehova pachakubombiwa chimo?
14 Pa busiku ubwakuti indabi inthi afwe, u Yesu akabachevya abatumiwa bache ukuti: ‘Ubusiku ubu mwebosi mukwiza pakuntholoka.’ U Pitala akamula umwakusimikizya ukuti: ‘Nthakwiza pakubalekapo nalumo, napapo abanthu bosi bangachibomba!’ Pa busiku bula, u Yesu akabapa abatumiwa bache ubulongozi ubwakuti: “Mubanje maso nu kwiputa.” (Mata. 26.31, 33, 41) Nanthi u Pitala akakonkhagha ubulongozi ubu, nge akalangizya ukuti akaba mujimvu, ukulangizya ukuti akaba pabumanyani ubwiza nu Yesu. Mumalo mwache u Pitala akiyipa inongwa ichifukwa chakuti akamukozya isoni Umwene wache.—Mata. 26.69-75.
15. Ka u Yesu akalangizya bulibuli ukuti akinong’onagha akiza pabusiku bwache ubwabumalilo pachisu ichapasi?
15 Nkhimba u Pitala akapotwa bulibuli ukumusubila u Yehova pachakubombiwa chimo? Napo u Yesu akaba wakufikapo loli akabalilo kosi akiputagha. Ivi vikamwavwanga ukuti abe mujimvu nu kubomba vyo u Yehova akalondagha ukuti abombe. (Mata. 26.39, 42, 44; Yoha. 18.4, 5) Tutakukayikila ukuti u Pitala atakaluvyapo lumo ukuti u Yesu akiputagha umwakupyanizyapyanizya pabusiku ubwakuti indabi yache inthi afwe.
16. Nkhimba u Pitala akalangizya bulibuli ukuti akamanyila ukuba munthu uwakwinong’ona akiza? (1 Pitala 4.7)
16 Akabalilo kakati kendapo, u Pitala akanda ukumusubila nkhani u Yehova ukwendela mulwiputo. U Yesu akati azyuka akamusimikizya u Pitala na batumiwa abamwabo ukuti bakwiza pakupokela umuzimu ubuzelu ukuti ghubavwe. U Yesu akababuzya ukuti bikale mu Yelusalemu nu kulindilila ukuti ivi vibombiwe. (Luka 24.49; Imbo. 1.4, 5) Nkhimba u Pitala akabombagha choni po akalindililagha? U Pitala na Bakilisitu abamwabo ‘bakabunganagha pipipipi pakwiputa.’ (Imbo. 1.13, 14) Akabalilo kakati kendapo, u Pitala akabalimbikisya Abakilisitu abamwabo ukuti babanje bakwilema nu kumusubila u Yehova ukwendela mu lwiputo. (Belenga 1 Pitala 4.7.) U Pitala akamanyila ukumusubila u Yehova sona akaba ngati yo mphanda iya chipanga.—Gala. 2.9.
17. Ka tukulondiwa ukubukilila ukubomba choni ukusita ukusendela mo ivinthu vibeleye pabumi bwitu? (Ennya sona ichithuzi.)
17 Ukuti tube bakwinong’ona akiza, akabalilo kosi tukulondiwa ukumulaba u Yehova mu lwiputo. Tuzimenye ukuti tubaghiye ukubukilila ukwiputa kwa Yehova ukusita ukusendela mo ivinthu vibeleye pabumi bwitu. Chochobene, nanthi tukulonda ukusala ichinthu chimo ichakulondiwa sana pabumi bwitu, tumulabaghe u Yehova ukuti atupe ubutuli ichifukwa tukusubila ukuti weyo achimenye cho chiza nkhani kwa uswe.
U Pitala akamanyila ukuti amusubilaghe u Yehova ukwendela mu lwiputo. Nuswe bulo tungaba bakwinong‘ona akiza nanthi tukumulaba u Yehova mu lwiputo nkhaninkhani nanthi tukulonda ukusala ichinthu chimo ichakulondiwa sana (Ennya indime 17)c
18. Ka tungeghelela bulibuli akinong’onele ka Yehova?
18 Tukupalizya sana ichifukwa chakuti u Yehova atupelite muzila iyakuti tungasendelako inkhalo zyache. (Ubwa. 1.26) Napo vili bunubu, loli tutangamweghelela u Yehova ndendende. (Yesa. 55.9) Loli ngati we Pitala, nuswe bulo tungeghelela akinong’onele ka Yehova. Nge twabomba bunubu umwakubukilila ukweghelela akinong’onele ka Chala, ukuba bakwiyisya sona ukuba bakwinong’ona akiza.
ULWIMBO 30 Dada Wane, Chiuta Wane na Mubwezi Wane
a Amazyu aghakuti ‘inyinong’ono zyo akaba nazyo’ gho ghakwaghiwa pa 1 Pitala 4.1, ghangang’anamula sona “mo ukwenezya ivinthu, mo ukubombela ivinthu” sona “mo ukwinong’onela.”
c AMAZYU AGHAKULONGOSOLA ICHTHUZI ICHA: Umuyemba akwiputa mumoyo po akulindilila ukuti bamupange intavyu ukuti ingile imbombo.