Mo u Yehova Akututulila Ukuti Tujimbaghe

1. Choni cho tukulondiwa ukujimba sona wenu yo angatwavwa? (1 Pitala 5.10)

ICHIFUKWA chakuti tukwikala mumasiku aghabumalilo ababombi ba Yehova bakujimba ku nthamyo izyinji. Bamo babina kwakabalilo akatali sana. Bamo bali ni chitima ichifukwa chakuti umukamu wabo afuye. Po bamo abamumbumba yabo pamo aba boma bakubasusya. (Mata. 10.18, 36, 37) Mube bakusimikizya ukuti inthamyo yiliyosi yo mungakomana nayo, u Yehova angabavwa ukuti mujimbe.—Belenga 1 Pitala 5.10.

2. Choni cho tukukwanisya ukujimba?

² Ukujimba kukung’anamula ukubukilila ukumubombela u Yehova umwabusubaliwa nu mwakuhoboka napo tungaba ukuti tukukomana ni nthamyo, bakutuvwima pamo tukugheliwa ukuti tubombe ivinthu ivibibi. Abakilisitu batangakwanisya ukuti babe na maka aghakuti bajimbe pabene, loli u Yehova weyo akubavwa pakubapa ‘amaka aghakuchila gho bali nagho.’ (2 Koli. 4.7) Munkhani iyi, inthi tunenezannye ivinthu 4 vyo u Yehova atupiye ukuti vitwavwe ukuti tujimbaghe. Inthi tumanyile sona mo tungavibombezezya imbombo.

ULWIPUTO

3. Choni cho ulwiputo zila yakuswighisya sana iyakunenezannya nu Yehova?

³ U Yehova apangite izila iyakuti tunenaghe nawe sona akututeghelezya nanthi tukunena napo swe banthu bambula ukufikapo, yo yikutwavwa ukuti tujimbaghe. (Hebe. 4.16) Inong’onela ifundo iyi: Tunganena nu Yehova mulwiputo akabalilo kalikosi sona ivya nkhani yiliyosi yo tungalonda. Akutwivwa napo tunganena muchinenelo chilichosi sona pa malo ghalighosi gho tungaba napo tungaba ukuti tuli mujele. (Yona 2.1, 2; Imbo. 16.25, 26) Nanthi twakomana ni nthamyo iyakuti tukupotwa nu kulongosola mo tukwiyivwila, pope bulo u Yehova akutwivwisya nu kumanya vyo tukulonda ukunena. (Loma 8.26, 27) Naloli, ulwiputo zila iyakuswighisya sana yo tukunenezannya nu Yehova!

4. Choni cho tunganena ukuti nanthi tukumulaba u Yehova ukuti tujimbe vikukolelana nu bwighane bwache?

⁴ U Yehova akutusimikizya ukuti ‘akutwivwa nanthi tukumulaba ichinthu chimo ichakukolelana nu bwighane bwache.’ (1 Yoha. 5.14) Nkhimba tungamulaba ukuti atwavwe ukuti tujimbe? Inga! Ichifukwa chakuti ukubomba bunubu kukukolelana nu bwighane bwache. Choni cho tukunena bunubu? U Yehova akunena ukuti nanthi tukujimba, vikumwavwa ukuti amwamule u Satana. (Mbupi. 27.11) Sona Ibayibolo likunena ukuti, u Yehova wakwisengannya ‘ukulangizya amaka ghache ku banthu bo bakumusubila nu moyo ghosi.’ (2 Syambu. 16.9) Polelo tungaba nu lusubilo losi ukuti ali na maka sona akulonda ukutwavwa ukuti tujimbaghe.—Yesa. 30.18; 41.10; Luka 11.13.

5. Ka ulwiputo lukutwavwa bulibuli ukuti tube nu mutende? (Yesaya 26.3)

⁵ Ibayibolo likunena ukuti nanthi tukwiputa ukufuma pasi pamoyo, ‘Umutende uwakufuma kwa Chala gho ghuchilite akivwisizye kosi aka munthu ghukwiza pakusunga akiza amoyo [ghitu] ni nyinong’ono [zyitu].’ (Filipi 4.7) Tukupalizya sana ichifukwa cha fundo iyi. Abanthu bo batakumubombela u Yehova bakuyezya izila izyakupambanapambana ukuti babe nu mutende uwa mumoyo nanthi bakomana ni nthamyo. Umwakufwanikizya, bamo bakuyezyayezya ukubomba ivinthu ivyakuti batakinong’onaghe ivya nthamyo yo bakomana nayo umwakuti babe nu mutende. Ivi vyakoghofya sana. (Yanisya nu Matayi 12.43-45.) Umutende uwakufuma kwa Yehova, wapamwanya sana ukuchila umutende ghulighosi gho abanthu bangawagha. Nanthi tukumulaba u Yehova ukuti atupe umutende, tukulangizya ukuti tukumusubila sona akutupa ‘umutende uwambula ukumala.’ (Belenga Yesaya 26.3.) Izila yimo yo u Yehova akubombela bunubu, ko kutukumbusya amasimbo gho ghakutusangalusya. Amasimbo agha ghakutukumbusya ukuti atughanite sona akulonda ukutwavwa vyo vikupangisya ukuti tube nu mutende uwa mumoyo.—Sali. 62.1, 2.

6. Nkhimba munyiputo zyinyu mungiputa ichoni? (Ennya sona ichithuzi.)

⁶ Vyo mungabomba. Nanthi mukukomana ni nthamyo yimo mumubuzye u Yehova mo mukwiyivwila, ‘mumutulile u Yehova ukatundu winyu’ nu kumulaba ukuti abape umutende. (Sali. 55.22) Mumulabe sona ukuti abape amahala gho ghangabavwa ukuti mukwanisye ukujimba. (Mbupi. 2.10, 11) Sona nanthi mukwiputa, mutakaluvyanje ukumupalizya u Yehova. (Filipi 4.6) Isiku lililyosi mwinong’onelaghe mo akubatulila pa nthamyo yo mukukomana nayo nu kumupalizya pa butuli bo akubapa. Mutakitikizye ukuti inthamyo yo mukukomana nayo yibapangisye ukupotwa ukwennya amalusayo gho mukupokela.—Sali. 16.5, 6.

AMAZYU GHA CHALA

7. Choni cho ukumanyila Ibayibolo kungatwavwa ukuti tujimbaghe?

⁷ U Yehova atupiye Amazyu ghache ukuti ghatwavwe ukukwanisya ukujimba. Mu Bayibolo muli inkhani zyo zikutusimikizya ukuti u Yehova akutwavwa. Za twennye ichifwanikizyo choka bulo. Pa Matayi 6.8 pakunena ukuti: “Ughuso azimenye kale zizyo mukulonda bo muchili pakulaba.” U Yesu weyo akanena amazyu agha, sona weyo amumenye akiza sana u Yehova ukuchila aliwesi. Chochobene tutakukayikila ukuti u Yehova akulonda ukutwavwa nanthi twakomana ni nthamyo. Mu Bayibolo muli amalayizyo gho ghakutupa amaka ukuti tujimbaghe.—Sali. 94.19.

8. (a) Nkhimba Ibayibolo likutupa bulongozi buli? (b) Ka tungabomba ichoni ukuti tukumbukilaghe ifundo izya mu Bayibolo?

⁸ Mu Bayibolo muli ifundo zyo zikutwavwa ukuti tujimbaghe. Muli ubulongozi ubwamahala bo bukutwavwa ukuti tusalaghe akiza ivinthu. (Mbupi. 2.6, 7) Umwakufwanikizya, likutulimbikisya ukuti tutakapasyange na vyo inthi vibombiwe munthazi, mumalo mwache isiku lililyosi tumusubilaghe u Yehova. (Mata. 6.34) Nanthi tuli nichibelezya ichakubelenga Ibayibolo nu kwinong’onelapo isiku lililyosi, vingatwavwa ukuti tukumbukilaghe ifundo zyo tukulondiwa ukuti zitwavwe ukujimba.

9. Nkhimba inkhani izya mu Bayibolo zingatwavwa bulibuli?

⁹ Mu Bayibolo muli sona inkhani izya banthu bo bakamusubilagha u Yehova sona akabavwanga. (Hebe. 11.32-34; Yako. 5.17) Nanthi tukwinong’onelapo pa nkhani izi, vingatwavwa ukuti tumusubilaghe nkhani u Yehova yo ‘mupoki sona maka ghitu, yo wakwisengannya ukuti atwavwe pa kabalilo aka nthamyo.’ (Sali. 46.1) Sona nanthi tunginong’onela mo ababombi ba Yehova bakalangizizya ukuti bakumusubila nu kubukilila ukumubombela napo bakakomanagha ni nthamyo, vingatwavwa ukuti nuswe bulo tubombaghe bunubu.—Yako. 5.10, 11.

10. Ka mungabomba ichoni ukuti Amazyu gha Chala ghabavwe ukuti mujimbaghe?

¹⁰ Vyo mungabomba. Isiku lililyosi, mubelengaghe Ibayibolo nu kusimba amavesi gho ghangabavwa. Abinji bazyaghannya ukuti ukumanyila isimbo ilyi siku, kwabavwa sana ukwagha ifundo iya mu Bayibolo iyakuti binong’onelepo isiku lyosi. Ivi vyovyo vikamwavwa umuyemba yumo izina lyache u Mariea yo akapwelelelagha ubaba nu mama wache bo bakaba ni mbina iya kansa. Akalongosola ukuti: “Indabindabi yiliyosi nkhabelengagha isimbo ilyi siku mu kabuku akakuti, Ukumanyila Amasimbo Isiku ni Siku nu kwinong’onelapo ifundo zyo namanyilapo. Ivi vikanavwanga sana ukuti ninong’onelaghe ivya Yehova ni vinthu ivyiza vyo akutumanyisya mu Mazyu ghache mumalo mwakwinong’onela bulo ivya nthamyo yane.”—Sali. 61.2.

ABAKILISITU ABAMWITU

11. Ka vikutwavwa bulibuli nanthi tukwinong’onela mo abakamu na bayemba bakujimbila ku nthamyo?

¹¹ U Yehova atupiye abakamu na bayemba pachisu chosi ichapasi ukuti batwavwange nanthi tukujimba ku nthamyo yimo. Tukusangalusiwa sana pakumanya ukuti ‘Abakilisitu abamwitu muchisu chosi ichapasi ichi bakukomana ni nthamyo ngati zyo tukukomana nazyo.’ (1 Pita. 5.9) Ifundo iyi yikulangizya ukuti pali abakamu na bayemba abinji bo bakukomana ni nthamyo ngati zyo nuswe tukukomana nazyo, loli bakubukilila ukumubombela u Yehova umwabusubaliwa. Ivi vikutusimikizya ukuti nuswe bulo tungakwanisya ukujimba!—Imbo. 14.22.

12. Nkhimba Abakilisitu abamwitu bangatwavwa bulibuli, sona nuswe tungabavwa bulibuli? (2 Aba Kolinti 1.3, 4)

¹² Abakilisitu abamwitu bangatwavwa ukuti tujimbe ku nthamyo ukwendela mu vyo bakunena nu kubomba. Umutumiwa u Pabuli akamanya ukuti ifundo iyi yabwanaloli. Akabalilo akinji akabapalizyanga sana abakamu na bayemba bo bakamwavwanga po akaba mujele ilya panyumba umwakubatambula amazina. Bakamusangalusyanga u Pabuli ukumughomya nu kumupa ivinthu vyo akalondiwanga. (Filipi 2.25, 29, 30; Kolo. 4.10, 11) Amasiku ghano abakamu na bayemba bangatughomya nu kutusangalusya ukuti tujimbe ku nthamyo yo twakomana nayo. Sona nuswe bulo tukulondiwa ukubavwa nanthi bope bakomana ni nthamyo.—Belenga 2 Aba Kolinti 1.3, 4.

13. Choni cho chikamwavwa umuyemba u Maya ukuti ajimbe?

¹³ Mu 2020, umwakuchenusya bulo abapolisi ku Russia bakingila munyumba iya muyemba yumo izina lyache u Maya nu kufufuza inyumba yosi. Pisinda pache akalondiwanga ukuti abuke ku khoti ukuti aye ifighilile ichifukwa chakuti akababuzyangako abanji vyo akusubila. U Maya akanena ukuti: “Pa kabalilo ko nkhakomana ni nthamyo iyi, abakamu na bayemba bakandangizya ulughano umwakunimbila ifoni, bakasimbagha amameseji na makalata nu kunsimikizya ukuti banganite sana. Akabalilo kosi nkhiyivwanga ukuti tuli ngati banthu abamumbumba yoka.”

14. Ka tungapindula bulibuli nanthi tukubavwa Abakilisitu abamwitu ukuti bajimbe? (Ennya sona ichithuzi.)

¹⁴ Vyo mungabomba. Nanthi mukujimba ku nthamyo yimo, mubanje papipi sana na bakamu na bayemba binyu Abachikilisitu. Mutakachedwange ukulaba ubutuli ku basongo ba chipanga. Bangaba ngati ‘malo aghakuvwamako ichimpepo sona amalo aghakuvwamako ichivula.’ (Yesa. 32.2) Mukumbukilaghe ukuti Abakilisitu abamwinyu bope bakujimba ku nthamyo izyakupambanapambana. Nanthi mukumubombela umunthu yumo ivinthu umwachisa ukuti mumwavwe, vingabavwa ukuti mube bakuhoboka sona mubukilile ukujimba ku nthamyo yo mukukomana nayo.—Imbo. 20.35.

ULUSUBILO LWITU

15. Nkhimba ulusubilo lukamwavwa bulibuli u Yesu, sona lungatwavwa bulibuli ukuti tujimbaghe? (Aba Hebeli 12.2)

¹⁵ U Yehova atupiye ulusubilo lo lukutwavwa ukuti tujimbaghe. (Loma 15.13) Mukumbukilaghe ukuti ulusubilo lolo lukamwavwa u Yesu ukuti ajimbe ku nthamyo zyosi zyo akakomana nazyo po akaba pachisu ichapasi. (Belenga Aba Hebeli 12.2.) U Yesu akamanyagha ukuti nanthi abukilila ukuba musubaliwa, inthi vipangisye ukuti izina lya Yehova lichindikiwe. U Yesu akalindililagha sona umwachinyonywa akabalilo ko akwiza pakunyokela kwa Baba wache, sona akabalilo ko akwiza ukuba we Mwene nu kulaghila na ba 144,000 mu Bumwene ubwakumwanya. Umwakuyana bulo, ulusubilo lo tuli nalo ulwakuti tukwiza ukwikala muchisu ichipya kwa bwila na bwila, lukutwavwa ukuti tujimbaghe ku nthamyo zyosi zyo tukukomana nazyo muchisu icha Satana ichi.

16. Ka ulusubilo lukamwavwa bulibuli umuyemba yumo ukuti ajimbe, sona tungamanyilako ichoni ku vyo akanena?

¹⁶ Ennya mo ulusubilo ulwakuti tukwiza ukwikala muchisu chipya lukamutulila umuyemba yumo uwa ku Russia izina lyache u Alla. Umulume wache bakamupinya nu kumubika mujele po akalindililagha ukuti alongiwe. Ivi vikati vyabombiwa, u Alla akanena ukuti: “Akabalilo kosi nkhiputagha kwa Yehova ivya lusubilo lwitu nu kwinong’onelapo nkhani mo ivinthu vikwiza ukubela. Nkhamanya ukuti nanthi inthamyo zyamala, kukwiza ukuba ivinthu ivyiza. U Yehova akwiza pakumalana na balwani bache sona akwiza pakutusaya.”

17. Ka tungalangizya bulibuli ukuti tukupalizya ulusubilo lo u Yehova atupiye? (Ennya sona ichithuzi.)

¹⁷ Vyo mungabomba. Mupaghulaghe akabalilo nu kwinong’onelapo ivinthu ivyiza vyo u Yehova alayizizye. Mwisende ngati ukuti muli muchisu ichipya nu kwennya amalusayo gho mukughagha. Inthamyo zyo mukukomana nazyo pakabalilo aka ‘zinandi bulo sona zyakabalilo akanandi’ pakuyanisya na malusayo gho mukwiza pakughagha mu Paladayiso. (2 Koli. 4.17) Sona mubombe chilichosi cho mungakwanisya ukuti mubabuzyanjeko abanji vyo u Chala alayizizye. Inong’onela mo chikubela chipala ku banthu bo batamumenye u Chala ukuti bajimbe ku nthamyo zyo bakukomana nazyo muchisu icha Satana ichi, ukusita ukumanya ivinthu vyo u Chala alayizizye ukuti akwiza pakutubombela. Napo munganenezannya kwakabalilo akanandi bulo, vingabavwa ukuti babe ni chinyonywa ichakulonda ukumanya ivyinji ivya Bumwene bwa Yehova na vyo atulayizizye.

18. Choni cho tungasubila vyo u Yehova atulayizizye?

¹⁸ U Yobu akati ajimba ku nthamyo zyo akakomana nazyo, akamubuzya u Yehova ukuti: ‘Pa kabalilo aka, namanya ukuti mungabomba ivinthu vyosi sona patalipo nachimochimo cho mukulonda ukubomba cho mungapotwa ukukwanisya.’ (Jobu 42.2) U Yobu akamanya ukuti patalipo nachimochimo cho chingapangisya ukuti u Yehova apotwe ukukwanilisya ubwighane bwache. Ifundo iyi yikutughomya ukuti tujimbaghe nanthi twakomana ni nthamyo. Umwakufwanikizya, inong’onela ivya mukolo yo abina kwakabalilo akatali sona akomana na badokotala abinji loli nayumoyumo yo amupozya. Pisinda pache, amwagha udokotala yo amubuzya cho chikupangisya ukuti abinaghe nu kumubuzya izila yo inthi amutulile ukuti apole. Tutakukayikila ukuti umukolo uyu angaba wakuhoboka napo vingaba ukuti atapolite nu kuba nu lusubilo ulwakuti inthi abe akiza. Ivi vingapangisya ukuti abukilile ukujimba, ichifukwa chakuti akusubila ukuti isiku limo imbina yache yikwiza pakumala. Umwakuyana bulo, ulusubilo lo tuli nalo ulwakuti tukwiza ukwikala mu Paladayiso, lukutwavwa ukuti tubukilile ukujimba.

19. Nkhimba tukulondiwa ichoni ukuti tubukilile ukujimba?

¹⁹ Ngati mo twamanyilila, u Yehova akutwavwa ukwendela mulwiputo, Amazyu ghache, Abakilisitu abamwitu sona ulusubilo lwitu ukuti tujimbaghe nanthi twakomana ni nthamyo. Nanthi tukuvibombezya akiza ivinthu ivi, u Yehova inthi abukilile ukutwavwa mphaka pa kabalilo ko akwiza pakumazizya inthamyo zyosi zyo zili muchisu icha Satana ichi.—Filipi 4.13.