Musubilaghe Ukuti u Yehova Abaghanite Sana

1. Choni cho mukiyipa kwa Yehova? (Ennya sona ichithuzi.)

KA MUNGAKUMBUKILA akabalilo ko mukiyipa kwa Yehova? Mukabomba bunubu ichifukwa chakuti mukamumanya akiza nu kwanda ukumughana. Mukamulayizya ukuti inthi mubikaghe ubwighane bwache pabwandilo pa bumi bwinyu sona inthi mubukilile ukumughana nu moyo winyu ghosi, nu muzimu winyu ghosi, ni nyinong’ono zyinyu zyosi na maka ghinyu ghosi. (Mali. 12.30) Ukufuma bulo pakabalilo kala, ulughano lwinyu lwakula sana. Ka mungamula bulibuli nanthi yumo angabalalusya ukuti, “Nkhimba mumughanite naloli u Yehova?” Tutakukayikila ukuti mutangachedwa ukwamula ukuti, “Inga, mughanite sana u Yehova ukuchila aliwesi pamo ichinthu chilichosi!”

2-3. Ka u Yehova akulonda ukuti tumanye ichoni, sona inthi tunenezannye ichoni munkhani iyi? (Yeremiya 31.3)

² Ka mungamula bulibuli nanthi umunthu yumo angabalalusya ukuti, “Nkhimba mukusimikizya ukuti u Yehova abaghanite?” Ka mungachedwa ukwamula ichifukwa chakuti mungaba ukuti mukwinong’ona ukuti u Yehova atabaghanite? Umuyemba yumo yo akakomanagha ni nthamyo po akakulagha akati: “Nkhamanyagha ukuti imughanite u Yehova. Nthakakayikilagha. Loli akabalilo akinji nkhakayikilagha nanthi u Yehova anganite.” Polelo choni cho chingabavwa ukusimikizya ukuti u Yehova abaghanite?

³ U Yehova akulonda ukuti mube bakusimikizya ukuti abaghanite. (Belenga Yeremiya 31.3.) Chochobene akulonda ukuti mupalamilaghe kukwache. Sona mukati mwiyipa nu koziwa, akanda ukubaghana sana. Ifundo iyi yikung’anamula ukuti abaghanite sona atakwiza pakubalekapo. Ichifukwa chakuti u Yehova abaghanite nkhani ababombi bache abasubaliwa, akubennya ukuti bali ngati ‘chuma chache ichapamwanya sana.’ Polelo numwe bulo mwe bapamwanya kwa Yehova. (Mala. 3.17) U Yehova akulonda ukuti mwiyennyange ngati mo umutumiwa u Pabuli akiyenezyanga. Akaba wakusimikizya ukuti u Yehova amughanite, chochobene akasimba ukuti: ‘Nasimikizya ukuti napo yingaba imfwa, pamo ubumi, pamo abanthumi, pamo amaboma, pamo ivinthu vivyo vilipo ilelo pamo vyo vikwiza munthazi pamo abalaghili pamo ubutali ubwamumwanya pamo ubutali ubwa pasi pamo ichipeliwa chilichosi, vitangatusabulannya uswe ku lughano ulwa Chala.’ (Loma 8.38, 39) Munkhani iyi, inthi tunenezannye ichifukwa cho tukulondiwa ukusimikizya ukuti u Yehova atughanite sona vyo vingatwavwa ukuti tubombe bunubu.

ICHIFUKWA CHO TUKULONDIWA UKUSIMIKIZYA UKUTI U YEHOVA ATUGHANITE

4. Ka bumyasi buli bo u Satana akulonda ukuti tusubilaghe sona tungabomba bulibuli ukuti tubukane?

⁴ Nanthi tungitikizya ukuti u Yehova atughanite, vingatwavwa ukuti tulimbane “nu buchevu ubwa” Satana. (Efe. 6.11) U Satana akubomba chilichosi cho angakwanisya ukuti atupangisye ukuti tuleke ukumubombela u Yehova. Akunena ubumyasi ubwakuti u Yehova atatughanite. Ibayibolo likumuyanisya u Satana ni nkhalamu. (1 Pita. 5.8, 9) Inkhalamu zighanite ukukola ivinyamana vyo vite na maka sona vyo vitangifighilila. Umwakuyana bulo, u Satana akutukola nanthi tute na maka, tulitite pamo nanthi tukupasya ni vinthu vyo vikabombiwa kwisinda, pamo vyo vikubombiwa pakabalilo aka pamo vyo inthi vibombiwe munthazi. (Mbupi. 24.10) U Satana akusubila ukuti angatupangisya ukuti tuwe amaka, umwakuti tuleke ukumubombela u Yehova. Loli “mumukane” u Satana nu buchevu bwache umwakubikapo umoyo pakubomba chilichosi cho mungakwanisya ukuti musimikizye ukuti u Yehova abaghanite sana.—Yako. 4.7.

5. Choni cho chakulondiwa sana ukwiyennya ukuti u Yehova abaghanite sona mwe bapamwanya?

⁵ Nanthi tungitikizya ukuti u Yehova atughanite, vingatwavwa ukuti tupalamile kukwache. Choni cho tukunena bunubu? U Yehova atupelite muzila iyakuti tulangizannyanje ulughano. Nanthi yumo alangizya ukuti atughanite, vikutupangisya ukuti nuswe bulo tumulangizye ukuti tumughanite. Polelo, nanthi tukwiyivwa ukuti u Yehova atughanite sona akutwennya ukuti twe bakulondiwa, vingatwavwa ukuti nuswe bulo tumughanaghe sana. (1 Yoha. 4.19) Sona nanthi tukumughana sana, popo wepe akutughana nkhani. Ibayibolo likutubuzya ukuti: “Palamila kwa Chala po wepe akwiza pakupalamila kukwinyu.” (Yako. 4.8) Ka tungabomba bulibuli ukuti tusimikizye ukuti u Yehova atughanite?

CHONI CHO CHINGABAVWA UKUTI MUSUBILAGHE UKUTI U YEHOVA ABAGHANITE?

6. Nkhimba mukulondiwa ukubomba ichoni nanthi mutakusimikizya ukuti u Yehova abaghanite?

⁶ Mubukilile ukumulaba u Yehova ukuti abavwe ukwivwisya ichifukwa cho abaghaniye. (Luka 18.1; Loma 12.12) Isiku lililyosi, mumulabaghe u Yehova ukuti abavwe ukwanda ukwiyennya ngati mo akubenezya. Ubwanaloli bwakuti, akabalilo kamo chingaba chipala sana ukusubila ukuti u Yehova abaghanite. Loli mukumbukilaghe ukuti u Yehova mukulu nkhani ukuchila umoyo winyu. (1 Yoha. 3.19, 20) Akwennya inkhalo inyiza zyo muli nazyo napo umwe mungaba ukuti mutakumanya ukuti muli nazyo. (1 Samu. 16.7; 2 Syambu. 6.30) Polelo mutakachedwe ukumubuzya mo mukwiyivwila nu kumulaba ukuti abavwe ukusubila ukuti abaghanite. (Sali. 62.8) Pisinda apakuti mwamulaba, chakulondiwa sana ukubomba ivinthu ivyakukonkhapo ivi.

7-8. Ka uwa masalimo akutwavwa bulibuli ukumanya ukuti u Yehova atughanite?

⁷ Musubilaghe vyo u Yehova akunena. U Yehova akabavwa abanthu bo bakasimba Ibayibolo ukuti bamulongosole mo abeleye. Ennya vyo uwamasalimo u Devedi akanena ivya Yehova. Akasimba ukuti, ‘U Yehova ali papipi na bo umoyo wabo wafwanthika.’ (Sali. 34.18) Akabalilo kamo nanthi mwakomana ni nthamyo yimo munganda ukwiyivwa ukuti nayumoyumo yo angabivwisya pamo ukubavwa. Loli u Yehova atulayizizye ukuti mutubalilo ngati utu, popo akuba nkhani papipi nuswe ukuchila kwisinda kosi. Musalimo limo u Devedi akasimba ukuti: ‘Mwasengula amasozi ghane mwibotolo ilya chikwela.’ (Sali. 56.8) U Yehova akwennya nanthi mukutamiwa. Akubapasikizya sona akumanya inthamyo zyo mukukomana nazyo. Akusengula amasozi ghinyu sona akughennya ukuti ghakulondiwa sana ngati mo amizi ghakubela ghakulondiwa kwa munthu yo akwenda mulungalangala. Pa Salimo 139.3, u Devedi akamubuzya u Yehova ukuti: ‘Umwe [Yehova] muzimenye akiza izila zyane zyosi.’ U Yehova akwennya vyosi vyo mukubomba, loli akubikapo nkhani amahala pa vinthu vyo mukubomba akiza. (Hebe. 6.10) Chifukwa buli? Ichifukwa chakuti akupalizya sana chilichosi cho mukuyezyayezya ukubomba ukuti mumuhobosye.a

⁸ U Yehova akutughomya ukwendela mu Mazyu ghache, akuba ngati akunena ukuti: “Nkhulonda ukuti umanye ukuti nkhughanite sana, sona nkhukupasikizya.” Loli ngati mo twamanyilila kubwandilo, u Satana akunena ubumyasi ubwakuti u Yehova atabaghanite. Polelo nanthi akabalilo kamo mwanda ukukayikila waghe u Yehova abaghanite, mwize mwilalusye ukuti, ‘Ka nanda ukusubila uwenu, “umwenecho uwa bumyasi bosi” pamo ‘u Chala uwabwanaloli’?’—Yoha. 8.44; Sali. 31.5.

9. Nkhimba u Yehova abalayizizye ichoni abanthu bo bamughanite? (Ukusoka 20.5, 6)

⁹ Inong’onela mo u Yehova akubenezya abanthu bo bamughanite. Ennya vyo u Yehova akamubuzya u Mozesi na Abaizilayeli. (Belenga Ukusoka 20.5, 6.) U Yehova akulayizya ukuti inthi abukilile ukubalangizya ulughano abanthu bo bamughanite. Amazyu agha ghakutusimikizya ukuti, u Chala witu umusubaliwa atangapotwa ukubalangizya ulughano ababombi bache bo bamughanite. (Nehe. 1.5) Nanthi mwanda ukukayikila waghe u Yehova abaghanite, mwilalusye ukuti, ‘Nkhimba une mughanite u Yehova?’ Pisinda pache mwinong’onele ifundo iyi: Nanthi mumughanite sona mukuyezyayezya ukubomba chilichosi cho mungakwanisya ukuti mumuhobosye, mungaba nu lusubilo losi ukuti wepe bulo abaghanite sana. (Dani. 9.4; 1 Koli. 8.3) Mumazyu aghanji tunganena ukuti, nanthi umwe mutakukayikila ukuti mumughanite u Yehova, choni cho mukukayikila waghe u Yehova abaghanite? Mube bakusimikizya ukuti abaghanite, sona atalibalekapo lumo.

10-11. Ka u Yehova akulonda ukuti tuyennyange bulibuli isembe iyakutusatula? (Aba Galatiya 2.20)

¹⁰ Mwinong’onelaghe isembe iyakutusatula. Isembe iyakutusatula, chabupi ichapamwanya sana cho u Yehova abapiye abanthu. (Yoha. 3.16) Loli ka u Yehova akamutuma umwana wache ukuti ize abafwile numwe bulo? Inga! Inong’onela mo ivinthu vikabela kwa mutumiwa u Pabuli. Kumbukila ukuti u Pabuli akabomba imbibi zimo inkhulu po akaba ukuti achili ukuba Mukilisitu sona akalondiwanga ukubukilila ukulimbana nu kusita ukufikapo. (Loma 7.24, 25; 1 Timo. 1.12-14) Napo vikaba bunubu, loli akennyanga ukuti isembe iyakutusatula chabupi cho u Yehova amupiye. (Belenga Aba Galatiya 2.20.) Kumbukila ukuti u Yehova akamwavwa u Pabuli ukuti asimbe ifundo iyi mu Bayibolo. Sona chilichosi cho chili mu Bayibolo chikasimbiwa ukuti chitumanyisye. (Loma 15.4) Amazyu gho u Pabuli akanena ghakulangizya ukuti u Yehova akulonda ukuti mwennyange isembe ukuti chabupi chapamwanya sana cho u Yehova abapiye. Ivi vingabavwa ukusimikizya ukuti u Yehova abaghanite sana.

¹¹ Tukumupalizya sana u Yehova ichifukwa chakuti akamutuma u Yesu pachisu ichapasi ukuti ize atufwile. Loli ichifukwa ichamwabo cho u Yesu akizila pachisu ichapasi, chikaba chakuti ize abamanyisye abanji ivya bwanaloli ubwakukwafannya nu Chala. (Yoha. 18.37) U Yesu akamanyisya sona mo u Yehova atughaniye.

U YESU ANGABAVWA UKUMANYA UKUTI U YEHOVA ABAGHANITE

12. Choni cho tungasubila vyo u Yesu akanena ivyakukwafannya nu Yehova?

¹² Pa kabalilo ko akaba pachisu ichapasi, u Yesu akahobokagha sana pakubamanyisya abanthu mo u Yehova abeleye. (Luka 10.22) Tungasubila vyosi vyo u Yesu akanena ivyakukwafannya nu Yehova, ichifukwa chakuti u Yesu akikala nu Yehova kumwanya ukwakabalilo akatali bo achili ukwiza pachisu ichapasi. (Kolo. 1.15) U Yesu amenye akiza mo u Yehova abaghaniye ababombi bache abasubaliwa. Ka u Yesu angabavwa bulibuli ukusimikizya ukuti u Yehova abaghanite?

13. Ka u Yesu akulonda ukuti tumwennyenje bulibuli u Yehova?

¹³ U Yesu akulonda ukuti tumwennyange u Yehova ngati mo umwene akumwenezya. Mu Mazyu Amiza, u Yesu akamunena u Yehova ukuti ali ngati we “Baba” amabulendo aghakupululila 160. Sona po akanenagha na bo bakamukonkhagha, u Yesu akabombezyanga amazyu aghakuti “Utata winyu” pamo ‘u Baba winyu uwakumwanya.’ (Mata. 5.16; 6.26) Bo u Yesu achili atizite pachisu ichapasi, ababombi abasubaliwa ba Chala bakamwitizyanga u Yehova ukuti, ‘Uwamakaghosi,’ Uwapamwanya Nkhani’ sona ‘Umupeli Umukulu,’ na mazina aghanji. Loli akabalilo akinji u Yesu akamwitizyanga u Yehova ukuti, ‘Ubaba.’ Pakubombezya amazyu agha, u Yesu akalangizya ukuti u Yehova akulonda ukuti ababombi bache biyivwange ukuti bali papipi nawe ngati mo umwana akwiyivwila ukuti ubaba wache amughanite. Naloli, u Yesu akulonda ukuti twennyanje ukuti u Yehova we Baba witu uwalughano yo akutwennya ukuti swe bana bache abaghaniwa. Za twennye ivyakubombiwa vibili po u Yesu akabombezya izina ilyakuti “u Baba” pakunena ivya Yehova.

14. Nkhimba u Yesu akalangizya bulibuli ukuti aliwesi wakulondiwa sana kwa Baba witu uwakumwanya? (Matayi 10.29-31) (Ennya sona ichithuzi.)

¹⁴ Ichabwandilo, ennya amazyu gho u Yesu akanena pa Matayi 10.29-31. (Belenga.) Utwatiti, tuyuni tunandi sana to tutangamughana pamo ukumwiputa u Yehova. Loli u Baba witu akumanya waghe akatiti kamo kawa pasi. U Yehova akukennya akayuni akanandi aka ukuti kakulondiwa sana, tutakukayikila ukuti akumwennya umubombi wache aliwesi ukuti wakulondiwa, sona amughanite ichifukwa chakuti akumwiputa! Pakusimikizya ifundo iyi, u Yesu akanena sona ukuti “zyope ni sisi izya kumitu yinyu zibelengiwe.” Polelo nanthi u Yehova akumanya utunthu utunandi utwakukwafannya nuswe, tungaba bakusimikizya ukuti akumupasikizya aliwesi paweka. Naloli, u Yesu akulonda ukuti aliwesi iyennyange ukuti wakulondiwa kwa Yehova.

15. Ka amazyu gho u Yesu akanena pa Yohani 6.44 ghakubabuzya ichoni ivya Baba winyu uwa kumwanya?

¹⁵ Ichabubili, ennya mo u Yesu akabombezezya izina ilyakuti “Utata.” (Belenga Yohani 6.44.) Utata winyu uwakumwanya akamuguzila aliwesi mubwanaloli. Choni cho akabaguza umwe? Ichifukwa chakuti akennya inkhalo inyiza zyo muli nazyo. (Imbo. 13.48) Amazyu gho u Yesu akanena pa Yohani 6.44, akakola amazyu gha Yehova gho ghali pa Yeremiya 31.3. Pisimbo ili, u Yehova akababuzya abanthu bache ukuti: ‘Nakupalamizya kukwane nu lughano ulusubaliwa.’ (Yere. 31.3; yanisya nu Hoseya 11.4) Inong’onela vyo ifundo iyi yikung’anamula. Ubaba witu uwakumwanya akubukilila ukwennya inkhalo inyiza zyo muli nazyo, zyo umwe mutangamanya ukuti muli nazyo.

16. (a) Ka u Yesu akamanyisya ichoni, sona choni cho tungamusubila? (b) Nkhimba mungasimikizya bulibuli ukuti u Yehova we Baba winyu yo mukulondiwa? (Ennya sona ibokosi ilyakuti “U Baba yo Twebosi Tukulondiwa.”)

¹⁶ Pakumulongosola u Yehova ukuti we Baba witu, u Yesu akaba ngati akutubuzya ukuti: “U Yehova te we Baba wane neka, loli numwe bulo we Baba winyu. Nkhubasimikizya ukuti abaghanite sona akumupwelelela aliwesi paweka.” Nanthi akabalilo kamo mwanda ukukayikila nanthi u Yehova abaghanite, mwilalusye ukuti, ‘Nkhimba nkhumusubila u Yesu yo amumenye akiza u Yehova ukuchila aliwesi sona akabalilo kosi akanenagha ubwanaloli?’—1 Pita. 2.22.

MUSIMIKIZYANJE UKUTI U YEHOVA ABAGHANITE

17. Choni cho tukulondiwa ukubukilila ukusimikizya ukuti u Yehova atughanite?

¹⁷ Tukulondiwa ukubukilila ukusubila ukuti akabalilo kosi u Yehova atughanite. Tukumbukilaghe ukuti u Satana akubomba chilichosi cho angakwanisya ukuti tuleke pakumubombela u Yehova. Inthi abukilile ukutuwisya amaka ukuti tusubilaghe ukuti u Yehova atatughanite. Tutakulondiwa ukusubila ubumyasi bwa Satana!—Jobu 27.5.

18. Ka mungabomba ichoni ukuti mubukilile ukusimikizya ukuti u Yehova abaghanite?

¹⁸ Ukuti musimikizye ukuti u Yehova abaghanite, mubukilile ukumulaba ukuti abavwe ukuti mwiyennyange ngati mo akubenezya. Mwinong’onelaghe amavesi agha mu Bayibolo gho ghakulongosola mo u Yehova akubatulila bo bamughanite. Mukumbukilaghe ukuti, akabalilo kosi u Yehova akubaghana sana abanthu bo bamughanite. Mutakaluvyange ukuti u Yehova akabapa Umwana wache ukuba sembe iyakubasatula umwe pamweka. Sona musubilaghe vyo u Yesu akanena ukuti u Yehova we Baba winyu uwa kumwanya. Nanthi yumo angabalalusya ukuti, “Ka ukusimikizya ukuti u Yehova akughanite?” mungamula umwakusimikizya ukuti, “Inga, anganite sana! Sona isiku lililyosi nune bulo nkhubomba chilichosi cho ningakwanisya ukulangizya ukuti mughanite!”