Amalalusyo gho Ibayibolo Likwamula / Ka u Satana Aliko Naloli?
Vyo Ibayibolo likwamula
Inga, u Satana aliko naloli. We yo “mulaghili uwa chisu ichapasi ichi” sona wanthumi umubibi yo akamusambukila u Chala. (Yohani 14.30; Aba Efeso 6.11, 12) Ibayibolo likuvumbula inkhalo zya Satana ukwendela mu mazina na vyo amazina agha ghakung’anamula:
U Satana, ukunganamula ‘Uwakususya.’—Jobu 1.6.
U Dyabulosi, ukung’anamula “Umubibi.”—Ubuvumbuli 12.9.
Ichinjoka ichikulu, cho mu Bayibolo chikung’anamula “Umuzimbuli.”—2 Aba Kolinti 11.3.
Uwakughela.—Matayi 4.3.
Umumyasi.—Yohani 8.44.
U Satana te fundo pamo inkhalo izibibi
Bamo bakwennya ukuti u Satana Umubibi fundo pamo nkhalo imbibi zyo umunthu akuba nazyo. Loli Ibayibolo likunena ukuti akabalilo kamo u Chala akanenezannya nu Satana. U Chala wakufikapo, po vitangabombiwa ukuti anenezannyanje ni chigaba chimo ichibibi icha mubili wache. (Ukukumbusya Indaghilo 32.4; Jobu 2.1-6) Umwakuyana bulo, u Satana akamughela u Yesu, yo te mutulanongwa. (Matayi 4.8-10; 1 Yohani 3.5) Cho chifukwa Ibayibolo likunena ukuti u Satana aliko naloli sona te nkhalo bulo izibibi.
Nkhimba tubaghiye ukuswigha nanthi abanthu abinji batakusubila ukuti u Satana aliko? Awe, ichifukwa Ibayibolo likunena ukuti u Satana akubombezya ubumyasi ukuti akwanilisye vyo akulonda. (2 Aba Tesalonika 2.9, 10) Ubumyasi ubukulu bo akubazimbula abanthu bwakuti umwene ataliko.—2 Aba Kolinti 4.4.
Ubumyasi ubwakukwafyannya nu Satana
Ubwanaloli: Ilizyu ilya Chihebeli ilyakuti ‘Lusifa’ mu Mabayibolo ghamo baling’anamuliye ukuti ‘uwakulama.’ (Yesaya 14.12) Ilizyu ili likulangizya ukuti likanenagha izya buchindamu bwa bumwene bwa Babeloni, bo u Chala akati akwiza ukubukozya isoni ichifukwa cha madinkho ghache. (Yesaya 14.4, 13-20) Amazyu aghakuti ‘uwakulama’ bakaghabombezya pakubagemula aba Babeloni pa kabalilo ko ubumwene bwabo bukamongoliwa.
Ubwanaloli: U Satana mulwani wa Chala, te mubombi wa Chala. U Satana akubasusya sona akubayivya abanthu bo bakumubombela u Chala.—1 Pitala 5.8; Ubuvumbuli 12.10.