Nkimba Ibayibolo Lingabavwa Pala Mukubina Imbina yo Yitakupola?

Ibayibolo Likwamula

U Chala akubapwelelela ababombi bache bo bakubina. Pakunena izya babombi bache abasubaliwa, Ibayibolo likuti: ‘U Yehova akwiza pakubafukatila pa bedi yo bakubinilapo.’ (Salimo 41.3) Pala mukubina imbina yo yitakupola, ivintu vitatu ivi vingabavwa ukuti mujimbe.

1. Mwiputaghe ukuti mwaghe amaka aghakujimbila kuntamyo Mungapokela “Umutende uwakufuma kwa chala ghugho ghuchilite akivwisizye kosi akamuntu,” gho ghungabavwa ukuti mujimbe mu ntamyo zyinyu zyosi.—Aba Filipi 4.6, 7.

2. Mwennyanje ivintu muzila iyiza. Ibayibolo likunena ukuti: ‘Umoyo uwalusekelo mulembo uwiza loli umuzimu uwakupyoka ghukumala amaka.’ (Isya Mbupingamu 17.22, Good News Translation) Vingabavwa ukuti muchepesyeko inyinong’ono sona vingabavwa ukuti mube nu mubili sona ubumi ubwiza.

3. Musubilaghe ivintu ivya muntazi. Ukusubila vyo u Yehova alayizizye kungabavwa ukuti mube mwe bakuhoboka napo mukubina. (Aba Loma 12.12) Ibayibolo likanenela zila izya kabalilo ko ‘nayumo umuntu yo akwiza ukunene ukuti: ‘Mbinite.’ (Yesaya 33.24) U Chala akwiza pakupozya bosi bo bakubina imbina zyo zitakupola sona zyo abasayansi bapotwa ukumazya. Umwakufwanikizya Ibayibolo likunena ukuti abagosi bakwiza ukuba sona bachinyamata sona abamubili uwiza. ‘Umubili wache ghube wakutyelemuka ukupota po akaba munyamata. Apyanile kumasiku agha bunyamata bwache po akaba wamaka.’—Jobu 33.25.

Mumanye ukuti: Napo Abakaboni ba Yehova bamenye ukuti u Yehova akubavwa loli bope bakupokelagha ubutuli ubwa chipatala pakabalilo ko bakubina imbina yo yitakupola. (Maliko 2.17) Loli tutakubika indaghilo pa nkani iya butuli ubwa chipatala, umuntu aliwesi akusala mwene pa nkani iya butuli ubwa chipatala.