Mo Mungamanyila Ukuti u Yehova Akuhoboka Numwe

1. Nkimba akabalilo kamo ababombi abasubaliwa aba Yehova bakwiyivwa buli-buli?

CHAKUHOBOSYA sana ukumanya ukuti u Yehova akuhoboka na bantu bache! Ibayibolo likunena ukuti: ‘U Yehova akuhoboka na bantu bache.’ (Sali. 149.4) Napo vili bunubu, loli akabalilo kamo bamo bangakayikila nu kwilalusya ukuti: ‘Ka u Yehova akuhoboka nune?’ Ibayibolo likutambula abantu bamo bo bakamubombela u Yehova umwabusubaliwa loli akabalilo kamo bakakayikilagha nanti u Yehova akahobokagha nabo.—1 Samu. 1.6-10; Jobu 29.2, 4; Sali. 51.11.

2. Nkimba u Yehova akuhoboka na bawenu?

² Ibayibolo likulangizya ukuti napo twe bantu bambula ukufikapo loli u Yehova angahoboka nuswe. Ka angahoboka buli-buli? Tukulondiwa ukuti tube nu lwitiko mwa Yesu Kilisitu nu koziwa. (Yoha. 3.16) Cho chifukwa tukulangizya pabuzelu ukuti twapinduka ku mbibi zyitu nu kulayizya ukuti inti tubombaghe ubwighane bwa Chala. (Imbo. 2.38; 3.19) U Yehova akuhoboka sana nanti tukubomba bunubu ukuti tube nawe pabumanyani. Nanti tukubukilila ukwikala ukuyana ni chilapo cho tukalapa pa kabalilo ko tukiyipagha, u Yehova akuhoboka nuswe sona akutwennya ukuti swe bamanyani bache.—Sali. 25.14.

3. Nkimba malalusyo buli matatu gho inti tunenezannye?

³ Choni cho akabalilo kamo bamo bakwiyivwa ukuti u Yehova atakuhoboka nabo? Ka u Yehova akulangizya buli-buli ukuti akuhoboka nuswe? Ka Umukilisitu angalangizya buli-buli ukuti akusubila ukuti u Chala akuhoboka nawe?

ICHIFUKWA CHO BAMO BAKWIYIVWA UKUTI U YEHOVA ATAKUHOBOKA NABO

4-5. Napo tungiyivwa ukuti te swe bakulondiwa, nkimba tungasimikizya ichoni?

⁴ Twebingi aba uswe ukufuma bulo po tukaba bana banandi, akabalilo kamo tukwiyivwa ukuti te swe bakulondiwa. (Sali. 88.15) Umukamu yumo izina lyache u Adrián akanena ukuti: “Akabalilo kosi nkwiyivwa ukuti te ne wakulondiwa. Nkukumbukila ukuti po nkaba ne kanyamata, nkiputagha ukuti imbumba yitu yosi yize yibe mu Paladayiso napo une nkiyivwanga ukuti te ne wakulondiwa ukuti nize imbemo.” U Tony yo atakuliye mumbumba iya Bakaboni akanena ukuti: “Abapapi bane batambuzizyepo lumo ukuti banganite pamo bakuhoboka nune. Ivi vikapangisya ukuti niyivwange ukuti pa te nachimo-chimo cho ningabomba ukuti imbahobosye.”

⁵ Nanti akabalilo kamo tukwiyivwa ukuti te swe bakulondiwa, tukumbukilaghe ukuti u Yehova akatughusila kukwache. (Yoha. 6.44) Akennyamo ivyiza mwa uswe vyo uswe tutangavyennya sona aghumenye akiza umoyo witu. (1 Samu. 16.7; 2 Syambu. 6.30) Po tungamusubila nanti akunena ukuti swe bapamwanya sana.—1 Yoha. 3.19, 20.

6. Ka umutumiwa u Pabuli akiyivwanga buli-buli ni vintu ivibibi vyo akabomba kwisinda?

⁶ Bamo aba uswe po tukaba ukuti tuchili pakumanyila ubwanaloli, tukabombagha ivintu vyo pa kabalilo aka tuchili tukwiyipa inongwa. (1 Pita. 4.3) Nabo bamubombela u Yehova umwabusubaliwa ukwa kabalilo akatali, bachili bakwiyipa inongwa. Nkimba momo vibeleye na kwa umwe? Nkimba akabalilo kamo mukwiyivwa ukuti u Yehova atangabahobokela? Nanti vili bunubu mungasangalusiwa pakumanya ukuti ababombi abasubaliwa bamo aba Yehova bope bakiyivwanga umwakuyana bulo. Umwakufwanikizya umutumiwa u Pabuli akiyivwanga ukuti te wakulondiwa nanti akwinong’onelapo pa vyo akabombagha. (Loma 7.24) Napo vikaba bunubu loli u Pabuli akaba ukuti apindukite ku mbibi zyache nu koziwa. Loli akiyennyanga ukuti umwene “munandi nkani pa batumiwa bosi” sona ukuti “mubibi ukuchilapo.”—1 Koli. 15.9; 1 Timo. 1.15.

7. Nkimba tukumbukilaghe ichoni pa vyo tukapuvya kwisinda?

⁷ Ubaba witu uwa kumwanya akulayizya ukuti inti atuhobokele nanti twalapa imbibi zyitu. (Sali. 86.5) Nanti tukubomba ivintu umwakulangizya ukuti tukwipelela ichisa pa vyo twananga, tungaba nu lusubilo ukuti u Yehova atuhobokela.—Kolo. 2.13.

8-9. Ka tungamalana buli-buli ni ntamyo iya kwiyivwa ukuti pate na chimo cho tungabomba ukuti tumuhobosye u Yehova?

⁸ Twebosi tukulonda ukumubombela u Yehova pakubomba chilichosi cho tungakwanisya. Loli bamo bangiyivwa ukuti batangabomba ivyingi ukuti u Yehova ahoboke nabo. Umuyemba yumo izina lyache u Amanda akanena ukuti: “Nkinong’onagha ukuti nanti nkulonda ukumupa u Yehova ivyiza nkani vikung’anamula ukuti akabalilo kosi mbombaghe ivyingi. Ivi vikampangisya ukuti nande ukuyezya ukubomba ivyingi ukuchila vyo ningakwanisya. Pisinda apakuti napotwa ukukwanilisya vyo nkalondagha ukubomba, nkiyivwa ukuti u Yehova akukalala nune ngati mo nune nkabombelagha.”

⁹ Choni cho chingatwavwa ukuti tumalane ni ntamyo iya kuti tukulondiwa ukubomba ivyingi ukuti tumuhobosye u Yehova? Tukumbukilaghe ukuti u Yehova akulonda ukuti tubombaghe vyo tungakwanisya. U Yehova atakulindilila ukuti tubombaghe ivyingi ukuchila vyo tungakwanisya. Akupalizya sana chilichosi cho tungakwanisya pakumubombela nanti chikufuma pasi pamoyo. Mwinong’onele ivifwanikizyo ivya mu Bayibolo ivya bantu bo bakamubombela u Yehova nu moyo wabo ghosi. Inong’onela ichifwanikizyo icha Pabuli. Akabomba umwakubikapo umoyo ukwa myaka iyinji, akendagha amabulendo amatali nu kwandisya ivipanga ivyingi. Loli ivintu vikati vyasinta pa bumi bwache, atakakwanisyagha ukulumbilila ngati mo akabombelagha pabwandilo. Ka ivi vikung’anamula ukuti u Yehova akaleka ukuhoboka nawe? Awe. Mumalo mwache akabukilila ukubomba chilichosi cho angakwanisya sona u Yehova akamusaya. (Imbo. 28.30, 31) Umwakuyana bulo nuswe ivintu vingasinta pa bumi bwitu pa mo tukumubombela u Yehova. Cho chikutupangisya ukuti tumubombelaghe, chocho chakulondiwa nkani kwa Yehova. Pa kabalilo aka za tunenezannye izila zimo zyo zikulangizya ukuti u Yehova akuhoboka nuswe.

KA U YEHOVA AKULANGIZYA BULI-BULI UKUTI AKUHOBOKA NUSWE?

10. Ka ‘tungivwa’ buli-buli ukuti u Yehova akunena ukuti akuhoboka nuswe? (Yohani 16.27)

¹⁰ Ukwendela mu Bayibolo. U Yehova akulangiza ukuti abaghanite abantu bache sona akuhoboka nabo. U Yehova akamubuzya u Yesu ukuti mwana wache umughaniwa pa vyakubombiwa vibili. (Mata. 3.17; 17.5) Ka mungahoboka pakwivwa ukuti u Yehova akubasimikizya ukuti akuhoboka numwe? U Yehova atakunena nuswe ukufuma kumwanya loli ukwendela mu Bayibolo. ‘Tungivwa’ amazyu gha Yehova aghakulangizya ukuti akuhoboka nuswe, nanti tukubelenga amazyu agha lughano gho u Yesu akababuzyanga abamanyili bache. (Belenga Yohani 16.27.) U Yesu akeghelela ubuntu ubwa Baba wache umwakufikapo. Nanti tukubelenga mo u Yesu akalangizizya ukuti akuhoboka na bamanyili bache abasubaliwa bo bakaba bambula ukufikapo, vikutupa ichituzi icha mo u Yehova akunenela amazyu agha kwa uswe.—Yoha. 15.9, 15.

11. Choni cho nanti tukukomana ni ntamyo chitakung’anamula ukuti u Yehova aleka ukuhoboka nuswe? (Yakobo 1.12)

¹¹ Umwakutupa vyo tukulondiwa. U Yehova akulonda sana ukutwavwa umwakutupa vyo tukulondiwa. Akabalilo kamo u Yehova angitikizya ukuti tukomane ni ntamyo zimo ngati mo akabombela nu muntu umugholosu u Yobu. (Jobu 1.8-11) Nanti tukukomana ni ntamyo, chitakung’anamula ukuti u Chala aleka ukuhoboka nuswe. Mumalo mwache tukuba nu lusako ulwakulangizya ukuti tumughanite u Yehova sona tukumusubalila. (Belenga Yakobo 1.12.) Nanti tukukomana ni ntamyo tukwennya mo u Yehova atughaniye sona mo akututulila ukuti tujimbe.

12. Ka tungamanyilako ichoni kwa Dmitrii?

¹² Inong’onela inkani iya mukamu uwa ku Asia izina lyache u Dmitrii. Imbombo yikamumalila sona atakayagha iyamwabo ukwa myezi iyinji. Pisinda pache akasala ukuti abombaghe ivyinji mu bulumbilili, ukulangizya ukuti akumusubila u Yehova. Imyezi iyinji yikendapo loli atakayagha imbombo. Pisinda pache akanda ukubina nkani umwakuti akanda ukupotwa ukunyamuka pabedi. Akanda ukwinong’ona ukuti atangaba umulume pamo ubaba umwiza sona akanda ukupasya ukuti pamo u Yehova atakuhoboka nawe. Pisinda pache isiku limo pachamabwila, akana kache akalindu kakasimba pipepala amazyu gho ghakwaghiwa pa Yesaya 30.15 gho ghakuti: ‘Inti mwaghe amaka nanti mukwikala umwakufwasa ukulangizya ukuti mukunsubila.’ Kakiza ni pepala ili papipi ni bedi ilya baba wache nu kunena ukuti: “Baba nanti mutakwiyivwa akiza mungakumbukilagha isimbo ili.” U Dmitrii akamanya ukuti akulondiwa ukumupalizya u Yehova ichifukwa chakuti imbumba yache yikaba ukuti yichili yili ni chakulya, ivyakuvwala na malo aghakughona. Akanena ukuti, “Cho nkalondiwanga ukubomba pa kabalilo aka ko kubukilila ukuba wakufwasa nu kubukilila ukumusubila u Chala wane.” Nanti mukukomana ni ntamyo iya kuyana bulo, mungaba nu lusubilo ukuti u Yehova akubapwelelela sona angabavwa ukuti mujimbe.

13. Ka u Yehova angabombezya abawenu ukuti alangizye ukuti achili akuhoboka nuswe sona buli-buli?

¹³ Ukwendela mu Bakilisitu abamwitu. U Yehova akubombezya abakamu na bayemba bitu ukuti alangizye ukuti akuhoboka nuswe. Umwakufwanikizya, angapangisya ukuti umukamu pamo umuyemba yumo anene amazyu aghakukazya pa kabalilo akiza. Ivi vyovyo vikamwavwa umuyemba yumo uwa ku Asia pa kabalilo ko akatamiwanga inyinong’ono. Imbombo yikamumalila sona akanda pakubina sana. Pisinda pache umulume wache akapanga ubutulanongwa ubukulu bo bukapangisya ukuti atakabe sona we songo wachipanga. Akanena ukuti, “Ntakivwisyanga ichifukwa cho ivintu ivi vikabombiwanga. Nkinong’onagha ukuti pamo nkabomba ichintu chimo ichibibi cho chikapangisya ukuti u Yehova aleke ukuhoboka nune.” Umuyemba witu uyu akalaba kwa Yehova ukuti amusimikizye nanti achili amughanite. Ka u Yehova akamusimikizya buli-buli? Akanena ukuti, “Abasongo bachipanga bakanena nune nu kunsimikizya ukuti u Yehova anganite.” Pisinda pache akalaba sona ubutuli kwa Yehova. Akanena ukuti, “Isiku linilyo nkapokela ukalata yo abakamu na bayemba bakansimbila. Po nkabelengagha amazyu aghakukazya gho ghakaba mukalata uyu, nkiyivwa ukuti u Yehova akivwa ulwiputo lwane.” Naloli u Yehova akabalilo kosi akulangizya ukuti akuhoboka nuswe ukwendela mumazyu aghachisa gho bamo banganena.—Sali. 10.17.

14. Nkimba zila buli iyamwabo yo u Yehova akulangizizya ukuti ukuhoboka nuswe?

¹⁴ U Yehova akulangizya ukuti akuhoboka nuswe umwakutupa ubulongozi pakubombezya Abakilisitu abamwitu nanti bukulondiwa. Umwakufwanikizya, u Yehova akabombezya umutumiwa u Pabuli ukuti abasimbile Abakilisitu abamwabo amakalata 14. Mumakalata agha, u Pabuli akabapa abakamu na bayemba ubulongozi ubwamaka loli muzila iya lughano. Choni cho u Yehova akamwavwa u Pabuli ukuti apeleke ubulongozi ubu? U Yehova we Baba umwiza yo akubafunda abana bache ‘bo akuhoboka nabo.’ (Mbupi. 3.11, 12) Nanti twapokela ubulongozi ubwakufuma mu Bayibolo tubwennyange ukuti bukaboni ubwakuti u Yehova akuhoboka nuswe, vitakung’anamula ukuti aleka ukuhoboka nuswe. (Hebe. 12.6) Nkimba vintu buli ivyamwabo vyo vikulangizya ukuti u Yehova akuhoboka nuswe?

IVINTU IVYAMWABO VYO VIKULANGIZYA UKUTI U YEHOVA AKUHOBOKA NUSWE

15. Ka bo bawenu bo u Yehova akubapa umuzimu umuzelu sona choni cho ivi vikutupa ulusubilo?

¹⁵ U Yehova akubapa umuzimu umuzelu abantu babo akuhoboka nabo. Tungilalusya ukuti, ‘Ka nkulangizya inkalo zimo zyo umuzimu umuzelu ghukumwavwa umuntu ukuti abe nazyo?’ Ka pa kabalilo aka mwamanya ukuti mukubomba ivintu na banji umwabufisalyoyo ukuchila pa kabalilo ko mukaba ukuti mutamumenye u Yehova? Nanti mukubikapo umoyo pakulangizya inkalo zyo umuzimu wa Chala ghukumwavwa umuntu ukuti abe nazyo, koko kungabavwa ukusimikizya ukuti u Yehova akuhoboka numwe!—Ennya ibokosi ilyakuti “Iseke Izya Muzimu zyo izi . . . ”

16. Ka u Yehova akubombezya abawenu ukuti balumbililaghe amazyu amiza, sona ivi vikupangisya ukuti mwiyivwange buli-buli? (1 Aba Tesalonika 2.4)

¹⁶ U Yehova akubabuzya amazyu amiza bo akuhoboka nabo. (Belenga 1 Aba Tesalonika 2.4.) Ennya mo umuyemba yumo izina lyache u Jocelyn akapindulila ichifukwa chakubabuzyako abanji amazyu amiza. Isiku limo po u Jocelyn akanyamukagha pandabi-ndabi akiyivwanga ukuti akutamiwa inyinong’ono. Akanena ukuti, “Ntakaba na maka sona nkiyivwanga ukuti te ne wakulondiwa. Loli nkaba mupayiniya sona isiku ili likaba lyakwingilila mu bulumbilili. Po nkiputa nu kwingila mu bulumbilili.” Indabi-ndabi yila-yila u Jocelyn akakomana nu Mary yo akaba mukolo uwachisa yo akitikizya ukumanyila Ibayibolo. Imyezi yikati yendapo u Mary akamubuzya u Jocelyn ukuti akaba ukuti akwiputa kwa Chala po u Jocelyn akakong’osyagha pa mulyango. Akati inong’onelapo pa vyo vikabombiwa ivi, u Jocelyn akanena ukuti, “Nkiyivwa ngati u Yehova akumbuzya ukuti ‘nkuhoboka nuwe.’” Ubwanaloli bwakuti te aliwesi yo angitika ubutenga bo tukulumbilila. Loli tungaba bakusimikizya ukuti u Yehova akuhoboka sana nanti akwennya ukuti tukuyezya-yezya ukubomba chilichosi cho tungakwanisya ukuti tulumbilile amazyu amiza ku banji.

17. Ka mwamanyilako ichoni kwa Vicky pankani iya sembe iyakutusatula? (Salimo 5.12)

¹⁷ U Yehova akubalangizya ukulondiwa ukwa sembe iyakutusatula ku bo akuhoboka nabo. (1 Timo. 2.5, 6) Loli ka tungabomba ichoni nanti umoyo witu ghuchili ghukukayikila nanti u Yehova akuhoboka nuswe napo tungaba ukuti toziwe sona tuli nu lwitiko mu sembe iyakutusatula? Tukumbukilaghe ukuti akabalilo kosi tutakasubilaghe inyinong’ono zyitu loli tumusubilaghe u Yehova. Akubennya bo bali nu lwitiko musembe iyakutusatula ukuti bagholosu mumaso ghache sona akubalayizya ukuti akwiza pakubasaya. (Belenga Salimo 5.12; Loma 3.26) Ukwinong’onelapo pa sembe iyakutusatula kukamwavwa sana u Vicky. Isiku limo akati inong’onelapo nkani pa sembe iyakutusatula, akanena ukuti: “U Yehova akandangizya ubufisalyoyo ukwakabalilo akatali. Loli pa kabalilo aka nkaba ngati ukuti nkumubuzya u Yehova ukuti utangamughana umuntu yo ali ngati nene sona isembe iya Mwana wako yitangakupikila imbibi zyane.’” Loli akati inong’onelapo pa sembe iyakutusatula cho chabupi, akanda ukwiyivwa ukuti u Yehova amughanite. Nuswe bulo nanti tunginong’onelapo pa sembe iyakutusatula, tungamanya ukuti u Yehova atughanite.

18. Nkimba tungaba nu lusubilo buli nanti tukubukilila ukumughana Ubaba witu uwa kumwanya?

¹⁸ Napo tungayezya-yezya ukubombezya imbombo vyo twamanyila mu nkani iyi loli akabalilo kamo tungatamiwa inyinong’ono nu kwanda ukukayikila nanti u Yehova akuhoboka nuswe. Nanti ivi vyabombiwa, mukumbukilaghe ukuti u Yehova akuhoboka na “bantu bache babo bamughanite.” (Yako. 1.12) Polelo mubukilile ukupalamila kwa Yehova nu kwennya izila zyosi izya mo akulangizizya ukuti akuhoboka numwe. Akabalilo kosi mutakaluvyanje ukuti u Yehova “ate kubutali naswe”—Imbo. 17.27