UMUTU 07
Nkimba u Yehova We Wenu?
Ka pala mukwinong’ona izya Chala, choni cho chikwiza munyinong’ono zyinyu? Ka mukwennya ukuti wapamwanya nkani ukuti mutangaba nawe pa bumanyani, pamo mukwennya ukuti ali kubutali nkani ngati ntondwa? Pamo mukumwennya ukuti wamaka nkani ngati mo vibeleye na kamesya pamo ngati kujilima kwa mvula? Nkimba u Yehova we wenu nkani-nkani? Ibayibolo likuvumbula inkalo zyo u Yehova ali nazyo sona likutubuzya ukuti akutupasikizya.
1. Choni cho u Chala tutangamwennya?
“U Chala we muzimu.” (Yohani 4.24) U Yehova ate nu mubili ngati wa muntu. Umwene muzimu sona akwikala kumwanya ko tutangennyako.
2. Ka nkalo buli izyamwabo zyo u Yehova alinazyo?
Napo u Yehova tutangamwennya, loli pala twamumanya tukwanda ukumughana chifukwa ali ni nkalo inyiza. Ibayibolo likunena ukuti: ‘U Yehova aghanite ubugholosu, sona atalibalekapo abantu bache bo basubaliwa.’ (Salimo 37.28) Sona umwene “wachisa sona walupasikizyo,” ku bantu bo bali mu mayimba. (Yakobo 5.11) ‘U Yehova ali papipi na bantu bo bafwantika umoyo; akubapoka bo bafyenyiwa.’ (Salimo 34.18) Ka muzimenye ukuti vyo twasala ukubomba vingamuhobosya pamo ukumukalalizya u Yehova? Umuntu yo asala ukubomba ivintu ivibibi akumupunuzya sona nukumukalalizya. (Salimo 78.40, 41) Loli umuntu yo akubomba ivyiza akumuhobosya.—Belenga Isya Mbupingamu 27.11.
3. Nkimba u Yehova alangizya buli-buli ukuti atughanite?
Inkalo inkulu nkani yo u Yehova alinayo lughano. Cho chifukwa Ibayibolo likunena ukuti “u Chala we lughano.” (1 Yohani 4.8) Tungamanya ulughano lwa Yehova ukwendela mu Bayibolo sona mu vintu vyo akapela. (Belenga Imbombo 14.17.) Ulughano lwache lukubonekela pa mo akatupelela uswe, swe bantu. Akatupela ukuti twennyange imitundu iya vintu ivyakupambana-pambana, ukwivwa inyimbo izyiza nu kwivwa ukunona ukwa vyakulya. Akalondagha ukuti tuhobokaghe nu bumi.
MANYA IVYINJI
Manya vyo u Yehova akubomba ukuti akwanilisye ubwighane bwache. Ennya sona mo u Yehova akulangizizya inkalo zyache izyakuswighisya.
4. Umuzimu umuzelu maka gho u Chala akubombezya imbombo
Ngati mo umuntu akubombezezya inyobe ukuti abombe imbombo, u Yehova wepe akubombezya umuzimu umuzelu. Ibayibolo likunena ukuti umuzimu te muntu hagha, loli maka gho u Chala akubombezya ukuti akwanilisye chilichosi cho akulonda ukubomba. Belenga Luka 11.13 sona Imbombo 2.17, nu kwamula amalalusyo agha:
U Chala akwiza “pakupungulila” umuzimu wache umuzelu ku bo bakumulaba. Ka mukwinong’ona ukuti umuzimu umuzelu muntu pamo maka gho u Chala akubombezya imbombo? Choni cho mukunena bunubu?
U Yehova akubombezya umuzimu wache umuzelu ukuti abombe ivyakuswighisya. Belenga Salimo 33.6 nu 2 Pitala 1.20, 21, nu kwamula ilalusyo ili:
Nkimba zila buli izyamwabo zyo u Yehova akubombezya umuzimu wache umuzelu?
5. U Yehova ali ni nkalo izyiza izyakuhobosya
U Mozesi akaba mubombi umusubaliwa uwa Chala, loli akalondagha ukumumanya akiza Umupeli. Polelo u Mozesi akamubuzya ukuti: ‘Mumanyisye izila zyinu, ukuti imbamanye umwe.’ (Ukusoka 33.13) U Yehova akamubuzya u Mozesi mo Umwene abeleye. Belenga Ukusoka 34.4-6, nu kwamula amalalusyo agha:
Ka nkalo buli zyo u Yehova ali nazyo zyo akamubuzya u Mozesi?
Nkimba nkalo buli zyo u Yehova ali nazyo zyo umwe zikubahobosya?
6. U Yehova akubapasikizya abantu
Akabalilo kamo, abantu ba Chala, Abahebeli, bakaba bazya ku Ijiputi. Ka u Yehova akayivwanga buli-buli po abantu bache bakatamiwanga? Ivwisya Idilama ilya MAZYU nu kukonka vyo vikuneniwa, pamo belenga Ukusoka 3.1-10. Nu kwamula amalalusyo.
Ka inkani iyi yikubavwa buli-buli ukumanya mo u Yehova akuyivwila pala abantu bakutamiwa?—Ennya vesi 7 nu 8.
Ka mukwinong’ona ukuti u Yehova angabavwa abantu? Chifukwa buli?
7. Ichipeliwa chikuvumbula inkalo zya Yehova
U Yehova akuvumbula inkalo zyache mu vintu vyo akapela. Enelezya IVIDIYO. ukufuma apo belenga Aba Loma 1.20, nu kwamula ilalusyo ili.
Ka nkalo buli izya Yehova zyo mukuzyennya ukwendela mu vintu vyo apelite?
VYO BAMO BAKUNENA: “U Chala te muntu, loli maka bulo gho ghali paliposi.”
Umwe mukwinong’ona buli-buli?
Choni cho mukwinong’ona bunubo?
IFUNDO IZYAKUDUMULA
U Yehova muzimu tutangamwennya na maso. Ali ni nkalo izyinji, loli inkalo iyikulu nkani yo ali nayo lughano.
Ukunyokelamo
Ka choni cho tutangamwennya u Yehova?
Nkimba umuzimu umuzelu cho choni?
Ka nkalo buli izyamwabo zyo u Yehova ali nazyo?
IFUNDO IZYAKONGELEZYAPO
Manya inkalo 4 izikulu zyo u Yehova ali nazyo.
“Kasi Tingamulongosora Wuli Chiuta?” (Ichitembe cha Mulindilili icha Chitumbuka Na. 1 2019)
Ennya amabukaboni gho ghakulangizya ukuti u Yehova ate mu chintu chilichosi.
Ennya ichifukwa cho Ibayibolo likuyanisya umuzimu umuzelu ni nyobe ya Chala.
Umuntu yo afuye amaso vikamutamyanga ukuti asubile ukuti u Chala amughanite. Ennya cho chikapangisya ukuti asinte inyinong’ono izi.