Ka Tungabomba Buli-buli Ukuti Tusalaghe Akiza Ivintu?

Twebosi tukuba ni vintu ivyakuti tusale. Ivyakusala ivi vingaba ni vyakufumapo ivyiza pamo ivibibi sona vingakwafya ubumanyani bwitu nu Yehova. Umwakufwanikizya, tungasala ukwakuti twikalaghe, mo tungaghila indalama sona mo tungasalila pa nkani iyakusenda pamo ukusendwa. Pala tungasala akiza ivintu, tungaba nu bumi ubwiza sona tungamuhobosya u Yehova.

1. Ka mungabombezya buli-buli Ibayibolo ukuti libavwe ukusala akiza ivintu?

Po muchili mutasalite ivyakubomba, mwiputaghe kwa Yehova nu kubelenga Ibayibolo ukuti mwennye mo u Yehova akuyenezya inkani iyo. (Belenga Isya Mbupingamu 2.3-6.) Pali inkani zimo zyo u Yehova akabikila zila indaghilo. Polelo vyo mungabomba ko kwivwila indaghilo izi.

Nkimba mungabomba buli-buli pala pate ululaghilo lo lukubabuzya ivyakubomba? U Yehova akwiza pakubatangilila ‘mu zila yo mubaghiye ukwendamo.’ (Yesaya 48.17) Ka vingabombiwa buli-buli? Lumo mungagha ifundo mu Bayibolo zyo zingabatangilila. Ifundo zya mu Bayibolo bwanaloli bo bukuvumbula inyinong’ono zya Chala sona na mo akwiyivwila. Akabalilo akinji tukumanya mo u Yehova akwiyivwila pa nkani yimo waghe tukubelenga Ibayibolo. Pala twamanya inyinong’ono zya Yehova popo tungasala ivintu vyo vingamuhobosya.

2. Nkimba vintu buli vyo munginong’onelapo po muchili mutasalite ivyakubomba?

Ibayibolo likunena ukuti: ‘Umuntu uwamahala akwinong’onelapo pa mo akwendela.’ (Isya Mbupingamu 14.15) Ifundo iyi yikung’anamula ukuti po tuchili tutasalite ichakubomba tubaghiye ukwinong’onelapo tasi pa vyo tukulonda ukusala. Po tukwinong’onelapo vyo tukulonda ukusala tungilalusya ukuti: ‘Nkimba fundo buli iya mu Baibolo yo yinganavwa? Ka vyo nkulonda ukusala inti vimpe umutende wa mumoyo? Ka inti vibakwafye buli-buli abamwitu? Ichakulondiwa nkani chakuti ka vyo nkulonda ukusala inti vimuhobosye u Yehova?’—Ukukumbusya Indaghilo 32.29.

U Yehova weyo ali nu bwabuke ubwakutubuzya cho chibibi na cho chiza. Pala twamanya akiza ifundo ni ndaghilo zya Chala nu kuzikonka popo tukumumanyisya akiza umabyebye witu. Umabyebye, buntu bwitu ubwamukasi bo bukutwavwa ukumanya ichiza ni chibibi. (Aba Loma 2.14, 15) Pala twamumanyisya akiza umabyebye witu akwiza pakutwavwa ukuti tusalaghe akiza ivintu.

MANYA IVYINJI

3. Ifundo zya mu Bayibolo zibatangililaghe

IVIDIYO: Mwitikizye Ukuti Ifundo zya mu Bayibolo Zibatangililaghe (5:54)

• Nkimba chabupi buli ichapamwanya cho u Yehova atupiye?

• Choni cho u Yehova atupiye ubwabuke ubwakusala?

• Nkimba u Yehova atupiye ichoni ichakuti chitwavwenje ukusala akiza ivintu?

Ennya ichifwanikizyo icha fundo yimo yo yikwayiwa mu Bayibolo, Belenga Aba Efeso 5.15, 16. Nu kunenezannya mo mungabombezezya akiza akabalilo kinyu . . .

• pakubelenga Ibayibolo akabalilo kosi.

• pakuba umulume, umuchi pamo umwana umwiza.

• pakwayiwa pa nkomano izya pachipanga.

4. Mumumanyisye umabyebye winyu ukuti musalaghe akiza ivintu

IVIDIYO: “Mubukilile Ukuba nu Mabyebye Umwiza” (5:13)

• Ukuyana na vyo mwennya mu vidiyo, nkimba umuyemba abomba choni ukuti amumanyisye umabyebye wache sona ukuti asale vyo vikumuhobosya u Yehova?

Choni cho te chakulondiwa ukuti tulabaghe abamwitu ukuti bobo batusalilaghe ivyakubomba? Belenga Aba Hebeli 5.14, nu kwamula amalalusyo agha:

• Napo chingaba chipepe ukulaba abamwitu ukuti batusalilaghe ivintu, Loli ka vintu buli vyo tukulondiwa ukusala swebene?

• Nkimba vintu buli vyo vingatwavwa ukuti tumumanyisye akiza umabyebye witu sona tusalaghe akiza ivintu?

5. Muchindikaghe umabyebye uwa bamwinyu

Abantu bakusala ivintu umwakupambana. Ka tungalangizya buli-buli ukuti tukuchindika umabyebye wa bamwitu? Inong’onela ivyakubombiwa vibili ivi:

Ichakubombiwa ichabwandilo: Umuyemba yo aghanite ukupoda asamila ku chipanga cho nanti abayemba bennya umuyemba apodite batakuhoboka.

Belenga Aba Loma 15.1 sona 1 Aba Kolinti 10.23, 24, nu kwamula amalalusyo agha:

• Ukuyana na mavesi agha, nkimba umuyemba angasala ukubomba choni? Nkimba mungabomba ichoni nanti muli nu muntu yo umabyebye wache atakumwitikizya ukubomba vyo umabyebye winyu akubitikizya ukubomba?

Ichakubombiwa ichabubili: Umukamu amenye ukuti Ibayibolo litakukanizya ukung’wela panandi ipele loli umwene asalite ukulekela zila ukung’wela. Umukamu uyu bamwitizya ku vyakusangalusya ko agha abakamu bakung’wela ipele.

Belenga Undumbilili 7.16 sona Aba Loma 14.1, 10, nu kwamwula amalalusyo agha:

• Ukuyana na vyo mwabelenga mu mavesi agha, nkimba umukamu angasala ukubomba choni? Nkimba mungabomba choni pala uwamwinyu akubomba ivintu vyo umabyebye winyu akubabuzya ukuti vibibi?

Nkimba fundo buli zyo zingabavwa ukuti musalaghe akiza ivintu?

1. Mwipute kwa Yehova ukuti abavwe ukusala vyo mungabomba.—Yakobo 1.5.

2. Mufufuze mu Bayibolo na mu mabuku ghitu ukuti mwaghe ifundo zyo mungazibombezya imbombo. Mungalalusya sona ku Bakilisitu abakughoma mwabuzimu.

3. Mwinong’onelepo mo ivyakusala vyinyu vingakwafizya umabyebye winyu sona uwabamwinyu.

IFUNDO IZYAKUDUMULA

Tukusala akiza ivintu waghe twamanya inyinong’ono zya Yehova pa nkani yimo sona pala tukwinong’onelapo waghe vingabavwa abamwitu pamo ukubavulazya.

Ukunyokelamo

• Nkimba mungabomba buli-buli ukuti musale ivintu vyo vikumuhobosya u Yehova?

• Ka mungamumanyisya buli-buli umabyebye winyu?

• Ka mungalangizya buli-buli ukuti mukuchindika umabyebye wa bantu abanji?

IFUNDO IZYAKONGELEZYAPO

Ka mungabomba buli-buli ukuti musale ivintu vyo vingaghomya ubumanyani bwinyu nu Chala?

“Vyakusankha Vinu Vicindike Ciuta” (Ichitembe cha Mulindilili icha Chitumbuka, Epulelo 15, 2011)

Manya mo u Yehova akupelekela ubulongozi.

U Yehova Akubafighilila Abantu Bache (9:50)

Ennya vyo vikamwavwa umwanavuli yumo ukuti asale akiza ivintu vyo vikaba vyakutamya.

U Yehova Akutulayizya Ivintu Ivyiza (5:46)

Manya mo mungamuhobosezya u Yehova pakusala akiza ivintu pa nkani yo atapelekite indaghilo.

“Kasi Nyengo Zose Mukukhumbikwira Dango Lakudunjika la mu Baibolo?” (Ichitembe cha Mulindilili icha Chitumbuka, Disembala 1, 2003)