UMUTU 46
Choni cho Tubaghiye Ukwipeleka nu Koziwa?
Mukwipeleka kwa Yehova umwakumulayizya ukwendela mu lwiputo ukuti inti mumwiputaghe yuyo mwene sona ukuti inti mubikaghe ubwighane bwache pabwandilo pa bumi bwinyu. (Salimo 40.8) Pisinda pache popo mukoziwa. Ukubomba bunubu, mukulangizya ku banji ukuti mwipeleka kwa Yehova. Ukwipeleka kwa Yehova nu koziwa kwakulondiwa sana pa vyosi vyo umuntu akulondiwa ukusala pa bumi bwache. Nkimba choni cho chingakupangisya ukuti musale ukwipeleka kwa Yehova?
1. Nkimba choni cho chingapangisya umuntu ukuti ipeleke kwa Yehova?
Tukwipeleka kwa Yehova ichifukwa chakuti tumughanite. (1 Yohani 4.10, 19) Ibayibolo likunena ukuti: ‘Umughane u Yehova u Chala wako nu moyo wako ghosi nu muzimu wako ghosi ni nyinong’ono zyako zyosi na maka ghako ghosi.’ (Maliko 12.30) Tukulangizya ukuti tumughanite u Chala mu vyakunena sona ni vyakubomba vyitu. Ngati mo ulughano lukupangisisya bo bali pa chibwezi ukuti basendane, lope ulughano lwitu kwa Yehova lukupangisya ukuti twipeleke nu koziwa.
2. Nkimba u Yehova akubasaya buli-buli Abakaboni bo boziwa?
Nanti moziwa mukuba mu mbumba iyakuhoboka iya Yehova. Mukwiza ukulwennya ulughano lwache muzila izyakupambana-pambana, sona vikwiza pakubavwa ukuti mube pa bumanyani ubukulu nkani nu Yehova ukuchila mo bubeleye akabalilo aka. (Belenga Malaki 3.16-18.) Ukongelezya pakuba nu Tata winyu uwalughano u Yehova, mukwiza pakuba sona mu mbumba iya buzimu iya pachisu chosi yo muli abakamu na bayemba abalughano. (Belenga Maliko 10.29, 30.) Mubaghiye ukubomba ivintu vimo po muchili mutoziwe, mukulondiwa ukumanyila ivyakukwafyannya nu Yehova, ukumughana, sona nukusubila mwa Yesu umwana wache. Pabumalilo, mukulondiwa ukupeleka ubumi bwinyu kwa Yehova. Pala mwabomba bunubu nu koziwa po mukwiza pakuhoboka nu bumi kwa bwila na bwila. Ibayibolo likunena ukuti: ‘Ulozyo lolo ilelo lukubapoka.’—Belenga 1 Pitala 3.21.
MANYA IVYINJI
Manya ichifukwa cho ukwipeleka kwa Yehova nu koziwa kwakulondiwa nkani.
3. Aliwesi abaghiye ukusala yo akulonda ukumubombela
Abaizilayeli bamo mu kabalilo akakale, bakinong’onagha ukuti bangamwiputa u Yehova poka na bachala ababumyasi. Loli u Yehova akamutuma umulaghuzi u Eliya ukuti abavwe ukusinta inyinong’ono izi. Belenga 1 Banyafyale 18.21, nu kwamula ilalusyo ili:
Nkimba Abaizilayeli bakalondiwanga ukuti babombe ichoni?
Ngati Baizilayeli, nuswe bulo tukulondiwa ukusala yo tukulonda ukuti tumwiputaghe. Belenga Luka 16.13, nu kwamula amalalusyo agha:
Choni cho tutangamwiputa u Yehova sona na bachala abanji pakabalilo koka?
Ka tungalangizya buli-buli ukuti tusalite ukumwiputa u Yehova?
4. Mwinong’onelaghe ulughano lwa Yehova
U Yehova atupiye ivyabupi ivyinji ivyiza. Nkimba uswe tungamupa ichoni? Enelezya IVIDIYO.
Nkimba u Chala akulangizya buli-buli ukuti atughanite? Belenga Salimo 104.14, 15; 1 Yohani 4.9, 10, nu kwamula amalalusyo agha:
Nkimba vyabupi buli vyo u Yehova abapiye vyo vikubahobosya nkani?
Nkimba mukwiyivwa buli-buli ni vyabupi ivi?
Pala twapokela ichabupi cho tuchighanite tukulondelezya izila yiliyosi ukuti tumupalizye yo atupiye. Belenga Ukukumbusya Indaghilo 16.17, nu kwamula ilalusyo ili:
Nanti mwinong’onela vyo u Yehova ababombeye, nkimba vikubavwa ukuti mumupe ichoni?
5. Tukwagha ivisayo ivyinji nanti twipeleka kwa Yehova
Abantu bamo bakwinong’ona ukuti bangaba bakuhoboka nanti bakumanyikwa, bali pa mbombo inyiza sona nanti bali ni ndalama izyinji. Ka ivi vyabwanaloli? Enelezya IVIDIYO, nu kwamula amalalusyo.
Napo umuntu uyu akaghanagha nkani ibola, loli choni cho akaleka pakoma ibola?
Akaleka ibola nu kusala ukuti amubombele u Yehova. Nkimba mukwinong’ona ukuti akasala akiza? Chifukwa buli cho mukunena bunubo?
Bo u Pauli atapindukite nu kuba Mukilisitu akalondagha ukuti abe muntu wakumanyikwa. Akamanyisiwa indaghilo izya Chiyuda nu mumanyisi uwa Chiyuda. Loli akavileka vyosi ivi nu kuba Mukilisitu. Nkimba u Pauli akadandawula na vyo akasala? Belenga Aba Filipi 3.8, nu kwamula amalalusyo agha:
Choni cho u Pauli akanena ukuti vyo akabombagha bo atasalite ukuba Mukilisitu vikaba ngati ‘Viswaswa’ yo yikwaghiwa mu chiponda?
Nkimba akagha mapindu buli?
Nkimba chilipo ichintu cho mungabomba pa bumi bwinyu cho mungafwanikizya nu kumubombela u Yehova?
U Pabuli akati aba Mukilisitu, akagha amapindu aghinji ukuchila vyo akavileka
VYO BAMO BAKUNENA: “Te chamahala ukwipeleka ukuti umubombele u Chala.”
Choni cho mukwennya ukuti ukwipeleka kwa Yehova kwakulondiwa?
IFUNDO IZYAKUDUMULA
Ulughano lukutupangisya ukuti twipeleke kwa Yehova nu koziwa.
Ukunyokelamo
Choni cho tukulondiwa ukumughana u Yehova nu moyo witu ghosi sona ukumwiputa?
Nkimba Abakaboni ba Yehova bo boziwa u Yehova akubasaya buli-buli?
Nkimba numwe mungaghana ukwipeleka kwa Yehova?
IFUNDO IZYAKONGELEZYAPO
Ennya ivifukwa vyo uwakwimba inyimbo sona nuwakuchimbila bakasala ukwipeleka kwa Yehova.
Ennya sona ivifukwa ivyamwabo vyo vingabapangisya ukuti mwipeleke kwa Chala.
Mu lwimbo ulu ennya mo abanavuli na bakolo bo bakipeleka kwa Yehova bakabela bakuhoboka.
Mu nkani iyakuti “Kwa Vilimika Vinandi Nkhajifumbanga Kuti, ‘Cifukwa Wuli Tili na Umoyo.
“Baibolo Likusintha Umoyo wa Ŵanthu” (Ichitembe Cha Mulindilili, icha Chitumbuka, Novembela 1, 2012)