UMUTU 36
Mube mwe Basubaliwa mu Vintu Vyosi
Aliwesi akulonda ukuti abamanyani bache babanje basubaliwa. U Yehova wepe akulonda ukuti abamanyani bache babanje basubaliwa. Loli te chipepe ukuba musubaliwa muchisu cho abantu abinji te basubaliwa. Nkimba tungagha lusayo buli pala twaba twe basubaliwa mu vintu vyosi?
1. Choni cho tukulondiwa ukuba swe basubaliwa?
Pala twaba swe basubaliwa ku bamwitu, tukulangizya ukuti tumughanite u Yehova sona tukumuchindika. Inong’onela ifundo iyi: U Yehova amenye vyosi vyo tukwinong’ona sona na vyo tukubomba. (Aba Hebeli 4.13) U Yehova akumanya nanti twasala ukuba basubaliwa sona akuba wakuhoboka. Amazyu ghache ghakunena ukuti: ‘U Yehova amubengite umuntu umulili, loli akuba mumanyani wa bagholosu.’—Isya Mbupingamu 3.32.
2. Nkimba choni cho chingatwavwa ukuti tube swe basubaliwa akabalilo kosi?
U Yehova akulonda ukuti ‘tunenaghe ubwanaloli ku bamwitu.’ (Zekariya 8.16, 17) Nkimba ivi vikung’anamula choni? Vikung’anamula ukuti pala tukunenezannya na bamwitu abamumbumba, bo tukubomba nabo imbombo, abakamu na bayemba sona abasongo ba boma tutabaghiye ukunena ubumyasi. Abantu abasubaliwa batabaghiye ukwiba pamo ukupusika abamwabo. (Belenga Isya Mbupingamu 24.28 nu Aba Efeso 4.28.) Sona basubaliwa pakupeleka umusonko. (Aba Loma 13.5-7) Pala tukubomba bunubu tukulangizya ukuti tukubomba “chicho chigholosu akabalilo kosi.”—Aba Hebeli 13.18.
3. Nkimba pala twaba swe basubaliwa tukupindula buli-buli?
Abamwitu bakutusubalila pala twaba twe basubaliwa. Sona vikwavwa ukuti umuntu aliwesi abanje wakufighililiwa mu chipanga ngati mbumba iya lughano. Tukuba nu mabyebye umwiza. Ukusubalibwa kwitu kungapangisya ukuti ‘abantu babe ni chinyonywa ni chimanyisyo icha Chala Umupoki witu,’ sona nukwiza mu gulu lya Yehova ukuti bamubombelaghe.—Titi 2.10.
MANYA IVYINJI
Ennya mo ukuba musubaliwa kukumukwafizya u Yehova, sona manyila mo mungabela basubaliwa pa chilichosi cho mukubomba pa bumi bwinyu.
4. Tukumuhobosya u Yehova waghe tukubomba ivintu mubwanaloli
Belenga Salimo 44.21 sona Malaki 3.16, nu kwamula amalalusyo agha:
Choni cho mukwinong’ona ukuti te chamahala ukusubila ukuti tungafisa ubwanaloli?
Nkimba mukwinong’ona ukuti u Yehova akwiyivwa buli-buli waghe twasala ukunena ubwanaloli napo chitangaba chipepe ukubomba bununu?
Pala abana bakunena ubwanaloli, bakubahobosya abapapi babo. Pala tukunena ubwanaloli, tukumuhobosya u Yehova
5. Tubombaghe umwabusubaliwa akabalilo kosi
Abantu abinji bakusubila ukuti te kabalilo kosi ko umuntu angaba musubaliwa. Loli za twennye ichifukwa cho tukulondiwa ukuba basubaliwa akabalilo kosi. Enelezya IVIDIYO.
Belenga Aba Hebeli 13.18, nu kunenezannya mo tungabela basubaliwa pala . . .
tuli ni mbumba yitu.
tuli ku mbombo pamo kusukulu.
twakomana ni ngelo.
6. Tukupindula waghe tukuba basubaliwa
Akabalilo kamo tungakomana ni ntamyo ichifukwa chakuba swe basubaliwa. Loli pala akabalilo kendapo, popo mungennya ukuti ukuba musubaliwa akabalilo kosi koko kwakulondiwa nkani. Belenga Salimo 34.12-16, nu kwamula ilalusyo ili:
Ka ukuwa swe basubaliwa kungapangisya buli-buli ukuti tube nu bumi ubwiza?
VYO BAMO BAKUNENA: “Ubumyasi bumo bunandi hee sona patangawa intamyo nanti umuntu akanena ubumyasi padono bulo.”
Choni cho mukusubila ukuti u Yehova abengite ubumyasi bulibosi?
IFUNDO IZYAKUDUMULA
U Yehova akulonda ukuti abamanyani bache babanje basubaliwa mu vyosi vyo bakunena nu kubomba.
Ukunyokelamo
Nkimba zila buli zyo tungalangizizya ukuti swe basubaliwa?
Choni cho te chamahala ukwinong’ona ukuti tungafisa ubwanaloli?
Choni cho mukulonda ukuba basubaliwa akabalilo kosi?
IFUNDO IZYAKONGELEZYAPO
Ka abapapi bangamanyisya buli-buli abana babo ukuti babanje babwanaloli?
Choni cho chiza ukubomba vyo twalayizya?
Ennya ichifukwa cho tukulondiwa ukupeleka indalama ya musonko napo indalama izyo batakuya pakukuzibombezya akiza imbombo.
“Kasi Mukwenera Kupeleka Msonkho?” (Ichitembe cha Mulindilili icha Chitumbuka, Seputembala 1, 2011)
Choni cho chikamwavwa umwanavuli yumo yo atakaba musubaliwa ukuti asinte ubumi bwache nu kwanda ukubomba umwabusubaliwa?