UMUTU 41
Nkimba Ibayibolo Likuti Choni pa Nkani Iyakughonana
Abantu abinji batakusatuka ukunena inkani izyakughonana. Loli Ibayibolo pala likunena izyakughonana likunena umwambula ukufisa sona umwamuchizi. Vyo likunena vikutwavwa. Vili bunubu chifukwa chakuti Ibayibolo mazyu aghakufuma kwa Chala yo mupeli witu yo akumanya vyo tukulondiwa. Akutubuzya vyo tukulondiwa ukubomba ukuti tumuhobosyanje sona vyo vingatwavwa ukuti tuhobokaghe nu bumi kwa bwila na bwila.
1. Nkimba u Yehova akuyennya buli-buli inkani iyakughonana?
Ukughonana chabupi ichakufuma kwa Yehova. U Yehova akulonda ukuti umwanavuli nu mukolo bo basendanite bahobokaghe ni chabupi ichi. Ichabupi ichakughonana ichi te chakuti bapapaghe bulo abana, loli zila yoka iyakulangizannya ulughano sona ukuti bahobokaghe nu bumi. Cho chifukwa Ibayibolo likunena ukuti: ‘Uhobokaghe nu muchi wako uwa pa bunyamata bwako.’ (Isya Mbupingamu 5.18, 19) U Yehova akulonda ukuti bo basendanite babanje basubaliwa kwa wamwabo uwa musendwa, umwakuti batakapange ubulowe.—Belenga Aba Hebeli 13.4.
2. Nkimba ubwamalaya chochoni
Ibayibolo likunena ukuti “abamalaya . . . batakwiza pakupyana Ubumwene Ubwa Chala.” (1 Aba Kolinti 6.9, 10) Abantu bo bakasimba Ibayibolo bakabombezya izyu ilya Chigiliki ilyakuti por·neiʹa ukuti balongosole ivyakukwafyannya nu bwamalaya. Izyu ili likung’amula (1) ukughonanaa ukwa bantu bo batasendanite, (2) ukughonana ukwa banavuli bene bene pamo abakolo benebene, (3) ukughonana ni vinyamana. Tukumuhobosya u Yehova nanti “tukuleghuka ubwamalaya.”—1 Aba Tesalonika 4.3.
MANYA IVYINJI
Enya vyo mungabomba ukuti mukane ubwamalaya sona ubwiza bo bukubapo nanti mwaba mwe bazelu.
3. Mukane ubwamalaya
U Jozefu akaba muntu umusubaliwa yo akakana ukughonana nu muchi uwamwenecho. Belenga Ubwandilo 39.1-12, nu kwamula amalalusyo agha:
Choni cho chikamwavwa u Jozefu ukuti asamale? Ennya vesi 9.
Nkimba mukwinong’ona ukuti u Jozefu akasala akiza ivintu? Chifukwa buli?
Nkimba abachinyamata bangamweghelela buli-buli u Jozefu pakubusamala ubwamalaya amasiku ghano? Enelezya IVIDIYO.
U Yehova akulonda ukuti swebosi tuleghuke ubwamalaya. Belenga 1 Aba Kolinti 6.18, nu kwamula amalusyo agha:
Nkimba vintu buli vyo vingamupangisya umuntu ukuti abombe ubwamalaya?
Nkimba mungabuleghuka buli-buli ubwamalaya?
4. Mungazipota ingelo
Nkimba choni cho chingapangisya ukuti chibe chakutamya ukupota ubwamalaya? Enelezya IVIDIYO, nu kwamula ilalusyo.
Nkimba umukamu uwa mu vidiyo akabomba choni bo azyaghannya ukuti inyinong’ono sona ivyakubomba vyache vingapangisya ukuti aleke ukuba musubaliwa kwa muchi wache?
Akabalilo kamo Abakilisitu abasubaliwa bope vikubatamya ukuti baleke ukwinong’ona ivintu ivibibi. Nkimba choni cho chingabavwa ukuti muleghuke ukwinong’ona ivintu vyo vingabapangisya ukuti mupange ubwamalaya? Belenga Aba Filipi 4.8, nu kwamula amalalusyo agha:
Nkimba vintu buli vyo tukulondiwa ukwinong’onelapo?
Nkimba ukubelenga Ibayibolo sona ukwibikila ivyakubomba mwigulu lya Yehova vingabavwa buli-buli ukuti mutakanange?
5. Ifundo zya Yehova zikutwavwa
U Yehova akumanya vyo tukulondiwa. Akutumanyisya vyo tungabomba ukuti tube swe bazelu sona na mapindu gho tukughagha waghe twabomba bunubu. Belenga Isya Mbupingamu 7.7-27. Pamo Enelezya IVIDIYO, nu kwamula amalalusyo.
Ka umunyamata uyu akagheliwa buli-buli?—Ennya Isya Mbupingamu 7.8, 9.
Ukuyana ni simbo ilya Isya Mbupingamu 7.23, 26, tungakomana ni ntamyo waghe tungapanga ubwamalaya. Nanti twaba swe bazelu, nkimba ntamyo buli zyo tungaleghuka?
Nkimba ukuba ni nkalo inyiza kungatwavwa buli-buli ukuti tuhobokaghe nu bumi bwila na bwila?
Abantu bamo bakwinong’ona ukuti vyo Ibayibolo likunena pa nkani iyakughonana ukwa pakasi pa bakolo pamo abanavuli bene-bene te lughano. Loli u Yehova we Chala uwalughano sona akulonda ukuti aliwesi ize ahoboke nu bumi ubwa bwila na bwila. Ukuti ivi vize vibombiwe tukulondiwa ukubomba vyo akulonda. Belenga 1 Aba Kolinti 6.9-11, nu kwamula ilalusyo ili:
Ka u Chala abengite bulo ukughonana ukwa banavuli pamo abakolo bene-bene?
Ukuti tumuhobosye u Yehova tukulondiwa ukusinta. Nkimba ukubomba bunubu kwakwavwa? Belenga 1 Aba Kolinti 6.9-11, nu kwamula ilalusyo ili:
Nkimba mukwennya ukuti ifundo izya Yehova izya kukwafyannya nu bwamalaya zyakwivwika? Chifukwa buli?
U Yehova abavwa abantu abinji ukuti bande pakwivwila indaghilo zyache. Numwe bulo angabavwa
VYO BAMO BAKUNENA: “Chiza bulo ukughonana na aliwesi ichikulu mughananite.”
Ka umwe mukwinong’ona buli-buli?
IFUNDO IZYAKUDUMULA
Ukughonana chabupi ichakufuma kwa Yehova sona umwanavuli nu muchi wache bo basendanite bobo babaghiye ukuhoboka ni chabupi ichi.
Ukunyokelamo
Nkimba ubwamalaya bukongelezya ichoni?
Nkimba choni cho chingatwavwa ukuti tubuleghuke ubwamalaya?
Nkimba tukupindula buli-buli nanti tukukonka ifundo zya Yehova?
IFUNDO IZYAKONGELEZYAPO
Manya ichifukwa cho u Yehova akulonda ukuti abantu bo bakulonda ukwikala poka basendanaghe.
“Nkimba Ibayibolo Likuti Choni pa Nkani iya Kwikala Poka po Mutasendanite?” (Inkani iya pa intaneti)
Nkimba ifundo iya mu Bayibolo iyakuti ukughonana ukwa banavuli pamo abakolo bene-bene kubibi yikung’anamula ukuti tubabengaghe abantu bo bakubomba ivintu ivi?
“Ka Ukughonana Ukwa Banavuli Pamo Abakolo Bene-bene Kubibi?” (Inkani iya pa intaneti)
Manya mo ifundo izya Yehova pa nkani iya kughonana kukututulila.
“Nkimba Ukughonana mu Mulomo Kukubanga Kughonana Ukwa Momumo?” (Inkani iya pa intaneti)
Mu nkani iyakuti “Ŵakanichindikanga Chomene,” ennya vyo vikamwavwa umuntu yumo ukuleka inkalo iyakughonana na banavuli abamwabo ukuti amuhobosye u Yehova.
“Baibolo Likusintha Umoyo wa Ŵanthu” (Ichitembe cha Mulindilili icha Chitumbuka, Epulelo 1, 2011)
a Ivi vikongelezyapo ivintu ivyakupambana-pambana ngati ukughonana mumulomo, kumatanga sona ukwangazya inkule ukuti umuntu abe ni chinyonywa icha kughonana.