INKANI IYAKUMANYILA 26
Mubukilile Ukuba Maso Ichifukwa Isiku Ilya Yehova Lili Papipi
“Isiku ilya Mwene [Yehova] likwiza umwakuchenusya bulo ukuyana na mumo umwiba akwizila pabusiku.”—1 TESA. 5.2.
ULWIMBO 143 Lutilirani Kuteŵeta, Kuŵa Maso, na Kulindilira
VYO INTI TUMANYILEa
1. Nkimba tungabomba ichoni ukuti twize tupone pisiku ilya Yehova?
NANTI Ibayibolo likunena ivya “isiku ilya Mwene [Yehova]” likunena izya kabalilo ko u Yehova akwiza pakubapyuta abalwani bache nu kubapoka abantu bache. Kwisinda uku u Yehova akapelekapo ichilango ku bantu bamo bo bakaba balwani bache. (Yesa. 13.1, 6; Eze. 13.5; Zefa. 1.8) Mukabalilo kitu aka, “isiku ilya Mwene [Yehova]” likwiza ukwanda pakabalilo ko abalongozi abandale bakwiza pakumongola u Babeloni Umukulu vyo vikwiza ukupangisya ukuti inkondo iya Alamagedoni yibombiwe. Ukuti twize tupone “isiku” ili, tukulondiwa ukuti akabalilo aka twisengannye. U Yesu akanena ukuti tutakulondiwa ukwisengannya bulo ‘intamyo inkulu’ loli tukulondiwa sona “pakuba bakwiyannya.”—Mata. 24.21; Luka 12.40.
2. Ka tungapindula buli-buli ni buku ilya 1 Aba Tesalonika?
2 Mukalata yache yo akabasimbila Aba Tesalonika, umutumiwa u Pabuli akabombezga ivifwanikizyo ivyinji ukuti abavwe Abakilisitu ukuti babukilile ukwisengannya isiku lyo u Yehova akwiza pakupelekela ubulongi. U Pabuli akamanya ukuti isiku ilya Yehova te lize pakabalilo kala-kala. (2 Tesa. 2.1-3) Napo vikaba bunubu, loli akabakazya abakamu na bayemba ukuti babe bakwisengannya ngati ukuti isiku ili inti lyize indabi sona nuswe bulo ubulongozi ubu tungabubombezya imbombo. Za tunenezannye mo akalongosolela ivyakukwafannya na: (1) mo isiku ilya Yehova likwiza ukwizila, (2) bantu bo batakwiza pakupona pisiku lila sona (3) vyo tungabomba ukuti twisengannye ukuti twize tupone.
KA ISIKU ILYA YEHOVA LIKWIZA LIGHI?
Po umutumiwa u Pabuli akasimbagha ibuku ilya 1 Aba Tesalonika, akabombezya ivifwanikizyo vyo nuswe tukupindula navyo (Ennya indime 3)
3. Ka isiku ilya Yehova lizukwiza buli-buli ngati mwiba pabusiku? (Ennya sona ichituzi.)
3 “Ukuyana na mumo umwiba akwizila pabusiku.” (1 Tesa. 5.2) Ifundo iyi yabwandilo pa fundo zitatu zyo zikulongosola mo isiku ilya Yehova likwiza ukubela. Abiba bakwiba mwalubilo sona pakabalilo akabusiku ko abantu batakwinong’onelako. Lyope isiku ilya Yehova lizukwiza umwakuchenusya sana vyo vikwiza pakupangisya abantu abinji ukuswigha. Abakilisitu ababwanaloli bope bakwiza pakuswigha na mo ivintu vikwiza pakusintila umwalubilo. Loli umwakupambana na bantu ababibi, uswe tutakwiza pakupyutiwa.
4. Ka isiku ilya Yehova likuyana buli-buli ni vyakubaba vyo vikwiza pakabalilo akakupapa?
4 “Ukuyana nu bubavu bubo umukolo akwivwa pakupapa.” (1 Tesa. 5.3) Umama yo ali nu lwanda, atangamanya akabalilo akenecho ko akwiza pakupapila. Loli atakukayikila ukuti akabalilo akakupapila kakwiza pakukwana. Akabalilo aka kakwiza pakukwana umwakuchenusya bulo, akwiza pakwivwa ububavu sona butakwiza pakuleka mpaka apape. Umwakuyana bulo, tutakumanya isiku pamo akabalilo ko isiku ilya Yehova likwizila. Loli tukulindilila ukuti mulimosi mo vingabela isiku ili lizukwiza, sona ubulongi ubwa Chala ku bantu ababibi inti bwize umwakuchenusya bulo umwakuti batakwiza pakubugwenta.
5. Nkimba intamyo inkulu yikuyana buli-buli nu buzelu ubwa pandabi-ndabi po izuwa lichili pakufuma?
5 Ngati ubuzelu ubwa pandabi-ndabi po izuwa lichili pakufuma. Muchifwanikizyo ichabutatu u Pabuli akatambula sona ivya biba bo bakwiba pabusiku. Loli pakabalilo aka u Pabuli akuyanisya isiku ilya Yehova ngati ubuzelu ubwa pandabi-ndabi po izuwa lichili pakufuma. (1 Tesa. 5.4) Ivigabenga vyo vikwiza pabusiku vikuluvya ukuti inti kuche. Nanti kwacha vingapangisya ukuti ivigabenga vibonekele pabuzelu. Umwakuyana bulo, intamyo inkulu yikwiza pakubachenusya abantu bo bali ngati biba nu kubalangizya pabuzelu bo bakubukilila ukuba muchisi pakubomba ivintu vyo vitakumuhobosya u Chala. Umwakupambana na bantu aba, uswe tube swe bakwisengannya umwakukana inkalo zyo zitakumuhobosya u Yehova nu kubukilila ukubomba ivintu “vyosi vivyo vyiza ni vigholosu sona ni vyanaloli.” (Efe. 5.8-12) U Pabuli akabombezya ivifwanikizyo vibili ivyakuyana ukuti alongosole ivya bantu bo batakwiza pakupona.
KA BO BAWENU BO BATAKWIZA PAKUPONA PISIKU ILYA YEHOVA?
6. Nkimba abantu abinji baghonite utulo mu zila buli? (1 Aba Tesalonika 5.6, 7)
6 “Babo baghonite utulo.” (Belenga 1 Aba Tesalonika 5.6, 7.) U Pabuli akayanisya abantu bo batakwiza pakupona pisiku ilya Yehova na bantu babo baghonite utulo. Abantu aba batakumanya ukuti ivintu vyo vikubombiwa muchisu vikulangizya ukuti akabalilo kamalite. Umwakuti batakumanya nanti ivintu vimo ivyakulondiwa vikubombiwa sona batakubombapo zimo. Abantu abinji amasiku ghano, bali ngati abantu bo baghonite utulo. (Loma 11.8) Batakusubila ukuti ivintu vyo vikubombiwa, vikulangizya ukuti tukwikala “mumasiku aghabumalilo” sona ukuti intamyo inkulu yili papipi. Nanti kwabombiwa ivintu vimo ivikulu vyo vikukwafya ichisu chosi, abantu bamo bakwanda ukwivwisya amazyu amiza aghakunena ivya Bumwene ubwa Chala. Loli ichachitima chakuti abantu abinji bakunyokela sona pakughona mumalo mwakuti babanje maso. Ichachitima chakuti na bantu bamo bo bakusubila ukuti u Chala akwiza pakulonga ichisu, bakwinong’ona ukuti isiku ili lili kubutali hee. (2 Pita. 3.3, 4) Loli chakulondiwa sana amasiku ghano ukuti isiku lililyosi tubanje maso.
7. Ka abantu bo u Chala akwiza pakubapyuta bakuyana buli-buli na bantu babo bakukolwa?
7 “Abantu babo bakukolwa.” Umutumiwa u Pabuli akayanisya abantu bo bakwiza pakupyutiwa nu Chala na bantu babo bakukolwa. Umuntu yo akolwa akuchedwa ukumanya ivintu vyo vikubombiwa papipi na po ali sona akupotwa ukusala akiza ivintu. Umwakuyana bulo, abantu ababibi batakubombapo zimo nanti u Chala akubasoka. Bakusala izila yo yikubalongozezya ku lunanganiko. Loli Abakilisitu ababwanaloli bakubuzyiwa ukuti akabalilo kosi babanje maso. (1 Tesa. 5.6) Ukaswili yumo uwakumanyila ivya Bayibolo izina lyache u Richard C.H. Lenski akalongosola ukuti “umuntu yo akubukilila ukupanga ivintu umwakwinong’ona akiza sona atakwipanika pakubomba ivintu, chikuba chipepe ukwinong’ona akiza nu kusala akiza ivintu.” Choni cho tubaghiye ukubukilila ukubomba ivintu umwakufwasa nu mwamahala? Ichifukwa chakuti vingatwavwa ukuti tutakingililepo pa vintu ivya ndale pamo ukwingililapo pa vintu ivyamwabo ivibibi vyo vikubombiwa muchisu. Abantu inti babukilile ukusendapo ichigaba pavyakubombiwa ivi po isiku ilya Yehova likupalamila. Nanti abantu bamo bakutukakamizya ukuti twingililepo pa vintu ivi, tutakulondiwa ukupasya na mo tungabombela ivintu. Umuzimu uwa Chala ghungatwavwa ukuti tubukilile ukubomba ivintu umwakufwasa nu mwamahala umwakuti twinong’onaghe akiza nu kusala akiza ivintu.—Luka 12.11, 12.
NKIMBA TUNGABOMBA ICHONI PAKWISENGANNYA ISIKU ILYA YEHOVA?
Po abantu abinji bakubukilila ukususya, uswe tukubukilila ukwisengannya isiku ilya Yehova umwakuvwala ichela ichakuzighila pachifuba icha lwitiko nu lughano ni chisote icha lusubilo (Ennya indime 8, 12)
8. Ka ifundo zyo zili pa 1 Aba Tesalonika 5.8 zingatwavwa buli-buli ukuti tubukilile ukuba maso? (Ennya sona ichituzi.)
8 “Tubaghiye pakuvwala. . . chela ichakuzighila pachifuba . . . chisote icha bupoki.” U Pabuli akatuyanisya na basilikali bo bisengannya nu kuvwala ukuti baye balwe inkondo. (Belenga 1 Aba Tesalonika 5.8.) Abantu bakumanya ukuti nanti kuli inkondo umusilikali akuba wakwisengannya ukulwa akabalilo kosi. Vikuyana bulo nuswe. Tukubukilila ukuba bakwisengannya ukwiza ukwisiku ilya Yehova umwakuvwala ichela ulwitiko nu lughano pakuba chela ichakuzighila pachifuba nu lusubilo lwitu kumutu pakuba chisote icha bupoki. Ifundo izi zikutwavwa sana pa bumi bwitu.
9. Ka ulwitiko lwitu lukutufighilila buli-buli?
9 Ichela ichakuzighila pachifuba chikafighililagha umoyo uwa musilikali. Ulwitiko nu lughano vikufighilila umoyo witu uwakufwanikizya. Vikutwavwa ukuti tubukilile ukumubombela u Chala nu kumukonka u Yesu. Ulwitiko lukutwavwa ukumanya ukuti u Yehova akwiza pakutusaya ichifukwa chakuti twamubombelagha nu moyo witu ghosi. (Hebe. 11.6) Lukutwavwa sona ukuti tubukilile ukuba basubaliwa kwa Mulongozi witu u Yesu napo tungalondiwa ukujimba ku ntamyo izyakupambana-pambana. Tungaghomya ulwitiko lwitu umwakuti lutwavwe ukujimba ku ntamyo zyo tungakomana navyo, umwakumanyilako ku bantu bamo amasiku ghano bo babukilila ukuba basubaliwa napo bakunyoziwa pamo bakukomana ni ntamyo iyakusoba kwa ndalama. Tungacheba ichipingo ichakughana nkani indalama ni vintu ivyakumubili nanti tungabayezya abakamu na bayemba bo bakwikala ubumi ubwakusita ukulonda ivintu ivyinji umwakuti babike ivintu ivya Bumwene pabwandilo pa bumi bwabo.b
10. Ka ukumughana u Chala na bantu kukutwavwa buli-buli ukuti tubukilile ukujimba?
10 Ulughano lope lwakulondiwa sana ukuti tubukilile ukuba maso sona ukuba bamahala. (Mata. 22.37-39) Ukumughana u Chala kukutwavwa ukujimba ku ntanyo zyo tukukomana nazyo po tukubomba imbombo iya kulumbilila. (2 Timo. 1.7, 8) Ichifukwa chakuti tubaghanite abantu bo batakumubombela u Yehova, tukubukilila ukulumbilila muchigaba chitu napo pangalondiwa ukuti tubombezye amafoni na makalata. Tutakunyokela kwisinda loli tukusubila ukuti isiku limo abantu bo tukubalumbilila bangize basinte nu kwanda pakubomba ivintu ivyiza.—Eze. 18.27, 28.
11. Ka ukubaghana abakamu na bayemba kukutwavwa buli-buli? (1 Aba Tesalonika 5.11)
11 Tubaghanite sona abakamu na bayemba bitu. Tukulangizya ukuti tughananite nanti tukukazannya “nukwavwana.” (Belenga 1 Aba Tesalonika 5.11.) Ngati mo abasilikali bakubombela poka nanti bakulwa inkondo, nuswe bulo tukukazannya. Akabalilo kamo umusilikali angamuvulazya uwamwabo umwangozi po bakulwa inkondo, loli atangalonda ukuti amuvulazye uwamwabo. Umwakuyana bulo nuswe tutakulonda ukubavulazya abakamu na bayemba bitu pamo ukunyosezya ububibi pa bubibi. (1 Tesa. 5.13, 15) Tukulangizya sona ulughano lwitu umwakubachindika abakamu bo bakulongozya muchipanga. (1 Tesa. 5.12) Pakabalilo ko u Pabuli akasimbagha ukalata uyu, pakaba ukuti pendapo umwaka ghoka ukufuma po ichipanga icha ku Tesalonika chikandila. Abantu bo bakasaliwa ukuti balongozyanje muchipanga ichi bakaba ukuti bachili batamenye ivyinji sona akabalilo kamo bakwenela ukuti bakapuvyanga pakubomba ivintu vimo. Napo vikaba bunubu loli abakamu na bayemba bakalondiwanga ukubukilila ukubachindika. Po intamyo inkulu yikupalamila, tukulondiwa nkani ukusubila ubulongozi bo abasongo bakutupa ukuchila kwisinda kosi uku. Tutakulondiwa ukusula ubulongozi bo bukufuma kubakamu aba ku hedikota yitu na kubakamu aba ku ofesi. Cho chifukwa pakabalilo aka chakulondiwa sana ukubaghana nu kubachindika abasongo muchipanga chitu. Umwambula ukwennya vyo vyabombiwa, za tubukilile ukubomba ivintu umwahala ukusita ukwennya ivintu vyo abasongo bakupotwa ukubomba akiza. Mumalo mwache tubike amahala ghitu pa mo u Yehova akubatulila ukwendela mwa Yesu Kilisiti abanavuli abasubaliwa aba.
12. Ka ulusubilo lwitu lukufighilila buli-buli inyinong’ono zyitu?
12 Ulusubilo lwitu ulwa vintu ivya muntazi lukutwavwa pakufighilila inyinong’ono zyitu ku vintu ivibibi, ngati mo ichisote chikufighililila umutu uwa musilikali. Nanti tuli nu lusubilo ulwakughoma vingatwavwa ukumanya ukuti ivintu vyo ichisu chikupeleka vyamwalwe. (Filipi 3.8) Ulusubilo lwitu lukutwavwa ukuti twinong’onaghe akiza sona tusalaghe akiza ivintu. Ulusubilo lukamwavwa nkani u Wallace nu Laurinda bo bakubombela ku ofesi yitu yimo ku Africa. Pa masabata ghatatu bulo umama uwa Laurinda akafwa sona ubaba uwa Wallace akafwa. Ichifukwa chakuti imbina iya COVID-19, yikaba ukuti yatamya sana, bakapotwa ukuti babuke kukwabo umwakuti baye babe poka ni mbumba zyabo pa kabalilo akantamyo aka. U Wallace akasimba ukuti: “Ulusubilo ulwakuti abafwe bakwiza pakuzyuka, lukunavwa ukuti ni nong’onelaghepo ivyakukwafannya na bapapi bitu. Ntakwinong’ona mo ivintu vibakabela kubumalilo ubwa bumi bwabo bo bachili pakufwa, loli nkwinong’onela mo inti bize babele mumasiku aghabwandilo muchisu ichipya. Ulusubilo ulu lukunavwa ukuti ichitima chichepeko pamo inyinong’ono izyakuti nduzite abapapi bane.”
13. Nkimba tungabomba ichoni ukuti tube nu muzimu umuzelu?
13 ‘Mutakazimyanje umoto uwa muzimu.’ (1 Tesa. 5.19) U Pabuli akayanisya umuzimu umuzelu nu moto. Nanti tuli nu muzimu uwa Chala, vikutwavwa ukuti tube bakulimbikila ukubomba cho chiza sona ukuba ni chinyonnywa ichakubomba ivintu mubwanaloli na maka pakumubombela u Yehova. (Loma 12.11) Nkimba tungabomba ichoni ukuti tube nu muzimu umuzelu? Tungamulaba u Chala ukuti atupe umuzimu umuzelu, tumanyilaghe Amazyu agha Chala sona tukolelanaghe ni gulu ilya Yehova lyo likulongoziwa nu muzimu umuzelu. Nanti tukubomba bunubu inti vitwavwe ukuti tukulisye ‘iseke izya muzimu.’—Gala. 5.22, 23.
Mwilalusye ukuti, ‘Ka ivintu vyo nkubomba vikulangizya ukuti nkulonda ukubukilila ukupokela umuzimu uwa Chala?’ Ennya indime 14)
14. Nkimba tutakulondiwa ukubomba ichoni nanti tukulonda ukubukilila ukupokela umuzimu uwa Chala? (Ennya sona ichituzi.)
14 Nanti u Chala atupa umuzimu umuzelu, tuchebaghe ukuti ‘tutakazimyanje umoto uwa muzimu.’ U Chala akubapa umuzimu abantu beka bo bali ni nyinong’ono inyiza sona bo bali ni nkalo inyiza. Atangabukilila ukutupa umuzimu wache nanti tukubukilila ukwinong’ona ivintu ivibibi nu kuvibomba. (1 Tesa. 4.7, 8) Ukuti mubukilile ukupokela umuzimu umuzelu, mukulondiwa sona ukuti “mutakaghasulaye amazyu agha bulaghuzi.” (1 Tesa. 5.20) Mu vesi ili “amazyu agha bulaghuzi” ghakung’anamula ubutenga bo u Yehova akutupa ukwendela mumuzimu umuzelu, ukongelezyapo ivyakukwafannya ni siku ilya Yehova sona ivyakukwafannya na kabalilo ko tukwikalamo. Tutakinong’onaghe ukuti isiku ilya Yehova pamo Alamagedoni te vibombiwe pakabalilo ko intchili indi nu bumi. Mumalo mwache tukulangizya ukuti isiku ili inti lyize mwalunulu pamo ukulikumbukila, umwakubukilila ukutangwanika ukubomba ivintu vyo vikulangizya ukuti mwe “bakumunyila u Chala” isiku liliyosi nu kubukilila ukuba ni nkalo inyiza.—2 Pita. 3.11, 12.
“MUVIYELAYE IVINTU VYOSI”
15. Ka tungabomba buli-buli ukuti tutakapusikiwe ni vintu vyo imizimu imibibi yingasasya? (1 Aba Tesalonika 5.21)
15 Muntazi abalwani aba Chala bakwiza pakunena ukuti: “Pali umutende, vyosi vili akiza bulo!” (1 Tesa. 5.3) Imizimu imibibi yikwiza pakupusika abantu abinji muchisu. (Ubuvu. 16.13, 14) Nkimba uswe vikwiza pakuba buli-buli? Uswe tutakwiza pakupusikiwa nanti ‘tukuviyela ivintu vyosi.’ (Belenga 1 Aba Tesalonika 5.21.) Izyu ilya Chigiliki ilyakuti “muviyelaye” bakalibombezya imbombo ukuti balongosole mo abantu bakayezezyanga ugolide nu siliva ukuti bamanye nanti vyabwanaloli. Cho chifukwa nuswe bulo tukulondiwa ukuviyela ivintu vyo tukwivwa pamo ivintu vyo tukubelenga ukuti tusimikizye nanti vyabwanaloli. Ivi vikaba vyakulondiwa sana ku bakamu na bayemba aba ku Tesalonika sona vyakulondiwa sana kukwitu amasiku ghano po intamyo inkulu yikupalamila. Mumalo umwakusubila bulo chilichosi cho abantu bakunena, tukulondiwa ukubombezya amaka ghitu agha kinong’onele ukuti tuyanisye vyo tukubelenga na vyo tukwivwa nanti vikukolelana na vyo Ibayibolo ni gulu ilya Yehova likunena. Nanti tukubomba bunubu, vingatwavwa ukuti tutakapusikiwe na mabumyasi gho imizimu imibibi yingasasya.—Mbupi. 14.15; 1 Timo. 4.1.
16. Nkimba lusubilo buli lo tuli nalo, sona tukusimikizya ukubomba ichoni?
16 Tukumanya ukuti abantu aba Yehova bakwiza pakupona pa ntamyo inkulu. Aliwesi paweka atakumanya ukuti indabi kukwiza pakuba buli-buli! (Yako. 4.14) Napo tungabukilila ukuba nu bumi mupaka po intamyo inkulu yikwiza pakubombiwa pamo tungafwa po yichili pakubombiwa, loli tungize tupokele ubumi ubwa bwila na bwila nanti tukubukulila ukuba basubaliwa. Abapakaziwa bakwiza pakuba poka nu Yesu Kilisitu kumwanya. Abang’ozi izinji bakwiza pakwikala mupaladiyiso pachisu ichapasi. Swebosi za tubukilile ukuba nu lusubilo ulwakughoma nu kubukilila ukuba bakwisenganya isiku ilya Yehova!
ULWIMBO 150 Penjani Chiuta Kuti Mupone
a Mu 1 Aba Tesalonika chaputala 5, tukwaghamo ivifwanikizyo vyo vikutumanyisya ivyakukwafannya ni siku ilya Yehova. Nkimba “isiku” ili chochoni sona inti lyize lighi? Ka bo bawenu bo bakwiza pakupona? Ka bo bawenu bo batakwiza pakupona? Ka tungisengannya buli-buli? Inti tunenezannye amazyu gho umutumiwa u Pabuli akanena nu kwamula amalalusyo agha.
b Ennya pachigaba ichakuti Nkhani Zakupambanapambana inkani iyakuti “Ŵakajipeleka na Mtima wose.”